Оне Македонија беше единствениот учесник во тендерската постапка, со што ѝ се овозможува да изгради и управува со една од најнапредните и најбезбедни самостојни 5G мрежи во регионот. Согласно претходно соопштение на компанијата, Оне Македонија има склучено прелиминарен договор со Ериксон (Ericsson) за стратешка соработка во планирањето, дизајнот и имплементацијата на новата мрежа.

„Поставувањето на 5G мрежата и почетокот на комерцијалните услуги се планирани за крајот на март 2027 година, со долгорочна развојна мапа која предвидува целосна покриеност на урбаните средини и транспортните коридори до 2030 година, како и национален пристап до брз интернет до 2032 година“, велат од Оне Македонија.

Проектот има за цел да обезбеди брза, сигурна и безбедна мобилна поврзаност која ќе одговори на потребите на граѓаните, институциите и бизнисите, при целосна усогласеност со европските стандарди и вредности, се вели во соопштението.

„Новата мрежа ќе биде дизајнирана како стабилна, безбедна и идно ориентирана дигитална инфраструктура што ќе поддржи иновации и долгорочен економски раст“.

Оне Македонија вели дека, како дел од 4iG Групацијата, една од водечките технолошки и телекомуникациски компании во регионот на Централна и Источна Европа, ќе придонесе кон зајакнување на дигиталниот екосистем на Северна Македонија и забрзување на технолошкиот развој на земјата.

„4iG Групацијата веќе работи под брендот Оне низ Западен Балкан, нудејќи фиксни и мобилни услуги во Албанија и обезбедувајќи мобилни услуги во Црна Гора“.

Која е 4iG Групацијата?

4iG Nyrt., со седиште во Будимпешта и во мнозинска сопственост на унгарски акционери, е една од водечките телекомуникациски и инфо-комуникациски корпорации во Унгарија и регионот на Западен Балкан. Како компанија котирана на Будимпештанската берза, 4iG е препознатлива по својот иновативен и современ пристап. Како водечки унгарски телекомуникациски оператор и ИТ систем интегратор, 4iG игра клучна улога во дигиталната трансформација на регионот.

Како сопственик на ОНЕ Црна Гора и ОНЕ Албанија, 4iG Групацијата обезбедува услуги за речиси 2,2 милиони резиденцијални и 400 000 бизнис корисници низ Западен Балкан и е пазарен лидер во телекомуникациските и инфо-комуникациските услуги во регионот.

„4iG Групацијата е посветена на изградба на мрежи со користење технологии од доверливи и безбедни извори, во рамките на иницијативата „Clean Network“, се вели во соопштението на Оне Македонија.

„Со повеќе од 8.000 високо квалификувани професионалци, 4iG обезбедува врвни телекомуникациски и инфо-комуникациски услуги, прилагодени на постојано променливите потреби на пазарите на кои работи. Динамичната стратегија за експанзија на Групацијата ја зацврсти нејзината позиција како значаен играч во телекомуникацискиот сектор во Унгарија и Западен Балкан“.

The post ОТВОРЕН ПАТОТ ЗА ПРВАТА НАЦИОНАЛНА 5Г МРЕЖА Оне Македонија е победник на тендерот appeared first on plusinfo.mk.

Агенцијата за електронски комуникации (АЕК) денеска донесе одлука дека „Оне Македонија телекомуникации“ на унгарски „Фор-ај-џи“ (4iG) е најповолен понудувач на тендерот за избор на трет мобилен оператор во државава.

Од АЕК за МИА изјавија дека со денешната одлука почнува да тече рокот од 10 дена за уплата на еднократниот надомест за трите фреквенции, што се доделуваа со тендерот, во вкупен износ од 8.020.003 евра. Најнискиот почетен износ на пазарната вредност на радиофреквенциите како еднократен надомест за одобрението А1 е 4,2 милиони евра, за одобрението Б1 е 1,5 милион евра, а за одобрението C1 – 2,32 милиона евра.

По уплатата, ќе може да се издаде одобрението, а компанијата може да почне со работа теоретски веднаш, односно да побара пристап преку мрежите на постојните оператори до изградба на своја инфраструктура.

Првиот критериум што ќе треба да го исполни новиот оператор е до крајот на март 2027 година еден град да покрие со 5Г, до крајот на 2028 година главните коридори во согласност со договорот за основање транспортна заедница на основната и за сеопфатната патна мрежа во државата да бидат покриени со непрекинат 5Г-сигнал, а до крајот на 2030 година сите градови во државата. До крајот на 2032 година секој граѓанин да има можност за пристап до интернет преку 5Г со минимална брзина на пристап до интернет од најмалку 100 Mbps.

Носителот на одобрението мора да почне со користење на доделените радиофреквенции најдоцна во рок од една година од датумот на почнувањето на важноста на одобрението. Во областите во кои има слаба или воопшто нема покриеност, доколку носителот на одобрението планира да гради, ќе мора да ги консултира и другите оператори за заедничко инвестирање. Исто така, операторот ќе мора да обезбеди пристап до пасивна инфраструктура врз основа на разумно барање од други оператори.

– Според условите на тендерот, почетокот на сервисот е до крајот на 2026 година, така што по носењето на официјалната одлука од страна на АЕК, ќе почнеме со официјален процес на воспоставување нова мобилна мрежа во Македонија. Најдоца до крајот на 2026 година мора да почнеме операција во најмалку еден град во Македонија, може да биде и порано, но тоа е краен рок што го користиме како ориентација за нашите плански активности – изјави  Бране Ѓуровиќ, извршен директор на „Оне Македонија“, на 22 август минатата година по отворањето на понудите на тендерот, а на кој беа единствен понудувач.

Рокот на важност на одобренијата за користење радиофреквенции А1 и С1 ќе биде 12 години, односно до 2037 година, а на одобрението В1 – 8 години до 2033 година поради усогласување со претходно издадените одобренија на другите два оператора.

Од АЕК велат дека влезот на третиот мобилен оператор во државата ќе ја зголеми конкуренцијата на пазарот, што беше константна забелешка во извештаите на Европската комисија за напредокот на Македонија.

Процесот за воведување трет мрежен оператор за мобилни мрежи и услуги почна минатата година откога Групацијата 4иГ, преку својата подружница „Оне Македонија телекомуникации“, на 17 декември 2024 година официјално достави писмо за намери до АЕК, каде што изрази интерес за обезбедување достапни радиофреквенции како дел од планот за влез на телекомуникацискиот пазар како нов оператор во државата. Вицепремиерот и министер за транспорт Александар Николовски во изјава за медиумите тогаш оцени дека официјализирањето на интересот за влез на пазарот од Групацијата 4иГ ќе значи крај на дуополот на двата мобилни оператора во земјата и намалување на цените за мобилни услуги.

На македонскиот пазар моментно работат „Македонски телеком“ АД Скопје и „А1 Македонија“ ДООЕЛ Скопје, како и виртуелните оператори „Лајкамобајл“ ДООЕЛ Скопје, „Мтел“ ДООЕЛ Скопје, „Роби“ ДООЕЛ Штип и „Греен телекомуникации“ ДОО Прилеп.

The post „ОНЕ МАКЕДОНИЈА“ СТАНУВА ТРЕТ МОБИЛЕН ОПЕРАТОР За една година треба да покрие еден град со 5Г сигнал appeared first on plusinfo.mk.

Оне Македонија, подружница на групацијата 4iG, потпиша првичен договор со Ериксон Телекомуникации Македонија, каде се наведува стратешка соработка за планирање, дизајнирање, снабдување со опрема и распоредување на една од првите самостојни (SA) 5G мобилни мрежи во Западен Балкан.

Овој договор сигнализира цврст чекор напред во намерите на Оне Македонија да стане водечки телекомуникациски оператор во Северна Македонија и ја нагласува долгорочната посветеност на 4iG за инвестирање во напредна дигитална инфраструктура којашто е целосно усогласена со европските стандарди. Партнерството со Ериксон, кој е еден од најдоверливите европски добавувачи на телекомуникациски услуги, ја одразува заедничката визија за градење безбедна, иновативна и напредна мрежа што ја поддржува и националната конкурентност и пошироката дигитална агенда на ЕУ.

5G SA мрежата е замислена како целосен проект, дизајниран од темел со најнапредна технолошка архитектура, вклучувајќи ја мрежата за радио пристап (RAN) и основните мрежни компоненти кои се целосно во согласност со домашните и безбедносните барања на ЕУ. Ова ќе ѝ овозможи на Оне Македонија да им обезбеди искуство за напредно мрежно поврзување на корисниците низ целата земја, од индивидуални потрошувачи до претпријатија и јавни институции.

– Ова партнерство со Ериксон не е само за изградба на мобилна мрежа. Станува збор за градење доверба, транспарентност и дигитална иднина на Северна Македонија. Со овој договор, ние сме еден чекор поблиску до испорака на 5G мрежа од светска класа, создадена во согласност со европските безбедносни стандарди и со потребите на македонските граѓани и институции. Горди сме што соработуваме со глобално почитуван европски партнер додека го правиме овој следен смел чекор – изјави Брано Ѓуровиќ, извршен директор на Оне Македонија.

Писмото за намера потврдува дека новата 5G мрежа ќе има за цел да лансира услуги во најмалку еден град до крајот на 2026 година, да се прошири по транспортните коридори до 2028 година, да ги достигне сите урбани области до 2030 година и да обезбеди секој граѓанин да има пристап до интернет со брзина од најмалку 100 Mbps до 2032 година.

– Со комбинирање на нашата глобална експертиза во 5G самостојна технологија со амбицијата на Оне Македонија да изгради инфраструктура подготвена за иднината, поставуваме темели за безбеден, иновативен и одржлив дигитален екосистем во земјата. Заедно, се стремиме да испорачаме сигурна поврзаност со високи перформанси, зајакнувајќи ја конкурентноста на Северна Македонија и усогласувајќи се со дигиталната агенда на Европа – изјави Антонио Пасарела, раководител на одделот за Централна Европа и Северен Балкан во Ериксон.

Планираната соработка со Ериксон доаѓа во стратешки важно време, бидејќи Оне Македонија ја чека конечната одлука за националниот тендер за спектар, што се очекува на почетокот на ноември.

Како дел од групацијата 4iG, јавно котирана компанија на берзата во Будимпешта со операции низ Унгарија, Албанија и Црна Гора, Оне Македонија ќе ја користи стабилноста, искуството и европската ориентација на една од најбрзо растечките телекомуникациски групации во регионот. 4iG е широко призната по својата лидерска улога во развојот на безбедна инфраструктура и нејзината посветеност на дигиталната трансформација на Западен Балкан.

The post ВО 2026 ГОДИНА ВО НАЈМАЛКУ 1 ГРАД ЌЕ ИМА НОВА 5G МРЕЖА Оне Македонија и Ериксон ќе креираат самостојна 5G мрежа appeared first on plusinfo.mk.

Агенцијата за електронски комуникации (АЕК) објави дека ќе распише јавен тендер со јавно наддавање за доделување радиофреквенции, откако пристигнаа писма за искажување интерес од тpи компании: ONE Македонија, Битстрим Мобиле и е& ППФ Телеком Груп.

ONE Македонија предложи измени во условите, вклучувајќи можност за плаќање на рати, попусти за нови оператори, ревидирање на обврските за 5G покриеност и одложување на почетокот на комерцијално работење. АЕК прифати дел од нив, меѓу кои е ревидирање на условот за 5G покриеност – сега се бара сите населени места да имаат 5G сигнал до 2032 година – и дозволи старт со мрежа во најмалку еден град до крајот на 2026 година. Сепак, предлозите за намалување или одложување на плаќањата беа одбиени поради законски ограничувања.

Битстрим Мобиле изрази интерес за фреквенции што не беа опфатени со првичната НамерАЕКа, па АЕК најави дека ќе објави нова процедура за тие опсези. Од друга страна, е& ППФ Телеком Груп оцени дека минималните надоместоци се преголеми, но АЕК објасни дека цените се одредени врз основа на анализа и нема можност за нивно намалување.

А1 Македонија побара став дали АЕК ќе интервенира ако новиот оператор се спои со постоечки. Агенцијата појасни дека во сличен претходен случај постапила со цел да се ослободат фреквенции и да се заштити конкуренцијата, и дека така ќе постапи и во иднина.

Со оглед на тоа што бројот на заинтересирани субјекти е поголем од достапните дозволи, АЕК ќе објави јавен тендер со јавно наддавање, со што се отвора можност за појава на трет мобилен оператор во Македонија.

The post АЕК ЌЕ РАСПИШЕ ЈАВЕН ТЕНДЕР ЗА ТРЕТ МОБИЛЕН ОПЕРАТОР Повеќе компании се заинтересирани appeared first on plusinfo.mk.