Финската инфлуенсерка Оливија Орас почина на 3 септември на 27-годишна возраст, откако изгубила свест при давањето анестезија пред планирана липосукција во приватна клиника во Хелсинки.

Според нејзините родители, уметницата Јохана Орас и трговецот со уметнички дела Рејо Орас, нивната ќерка била во клиниката за естетската процедура кога ненадејно ја загубила свеста. Таа била пренесена во Универзитетската болница во Хелсинки, каде што починала неколку дена подоцна. Семејството потоа поднело пријава до полицијата, барајќи да се истражат околностите на нејзината смрт.

Хелсиншката полиција отвори истрага за случајот под сомнение за тешко убиство од небрежност. Од полицијата засега велат дека истрагата е во рана фаза и дека не можат да соопштат повеќе детали, ниту јавно е соопштено кој е осомничен. Полицијата, исто така, извршила претрес во клиника на улицата Александринкату во Хелсинки.

Случајот доби дополнителна тежина откако финскиот регулатор за здравствените услуги нареди итно запирање на работата на две локации на „Plastic Surgery Center“. Одлуката уследила по инспекција на 9 септември, при која било утврдено дека безбедноста на пациентите била „сериозно загрозена“. Регулаторот засега не ги објавил конкретните пропусти поради кои е донесена одлуката.

Финскиот јавен сервис Yle објави дека Орас била пациентка во оваа клиника, а истрагата се фокусира на околностите во кои дошло до губењето на свеста. Важно е што самата липосукција, според досегашните информации, воопшто не била започната – Орас се онесвестила при подготовката и давањето анестезија. Причината за смртта официјално сè уште не е објавена.

Оливија Орас стана позната во Финска уште како тинејџерка. На 14 години отвори профил на Инстаграм и брзо собра илјадници следбеници. Нејзината приказна беше претставена и во документарецот „The Perfect Selfie“ од 2016 година, кој повеќе од една година го следел нејзиниот живот и односот кон социјалните мрежи и стекнувањето популарност.

По документарецот, Оливија се повлекла од социјалните мрежи и во 2017 година се преселила во Амстердам. Подоцна доживеала тежок период откако во зградата во која живеела била сведок на самоубиството на пријател. По враќањето во Финска се соочила со зависност од апчиња за спиење и алкохол, а во 2022 година доброволно побарала помош во установа за лекување зависности.

Во последните години од животот повторно ја насочила енергијата кон работа и општествено корисни проекти. Ја основала непрофитната организација „Oras Respiratus Ry“, која поддржува истражувања за белодробни заболувања, откако на нејзиниот татко му била дијагностицирана белодробна фиброза. Работела и во компании од областа на вештачката интелигенција и велнес-технологијата.

Истрагата за нејзината смрт продолжува, а финските власти засега не ја соопштуваат точната причина за смртта ниту дали евентуални пропусти во клиниката директно придонеле за трагичниот исход.

The post 📽️ ЛИПОСУКЦИЈАТА НЕ НИ ПОЧНАЛА, А ТАА ПОЧИНАЛА Надлежните ја суспендирале работата на клиниката во која почина финската инфлуенсерка appeared first on plusinfo.mk.