Од 3 до 6 јуни, Скопје повторно ќе стане центар на светската музика, со  јубилејното, 25-то издание на ОФФест 2026 и настапи на извонредни артисти, со особено силно присуство на африканската музичка сцена.

Разновидноста на звуци, од традиционални до современи експериментални изрази, го прави ОФФест уникатно доживување за сите љубители на музиката. Фестивалските вечери ќе се одвиваат на две препознатливи локации – првите три вечери во Македонската опера и балет, а завршницата во Младинскиот културен центар.

Како дел од придружната програма, публиката ќе има можност да го проследи и култниот бразилски документарен филм „Elis & Tom“, кој додава уште една уметничка димензија на фестивалот.

Директорот на Скопскиот џез фестивал и организатор на Оффест, Оливер Белопета најави 8 концерти со репрезентативни имиња и покрај тоа што, како што кажа на прес-конференција, Скопје уште нема летна сцена, скопските горештини веќе најавуваат жешки денови, а не е подобра приказната ниту со спонзорите.

Град Скопје продолжува по стапките на Данела Арсовска да не го финансира фестивалот, а од ресорното министерство како покровител доделени се 35 илјади евра, па иако, како што рече Белопета, би сакале фестивалот, особено затоа што е јубилеен, да трае 10 дена, тој ќе си трае колку што трае и инаку, 4 дена.

– Сметавме дека со оглед на сето ова, е потребно само да се следи главниот концепт на програмата, да се донесат најрепрезентативните имиња од т.н. Трет свет или музика на светот и моја задача беше да одберам група која веќе со успех гостувала на фестивалот и да ја поканам и за ова јубилејно издание – рече Белопета.

Изборот паднал на јужноафриканските ѕвезди BCUC, седумчлен бенд кој на Оффест 2024 година, со нивниот звук – мешавина од тапани, гласови, свирежи, басови, донесе френетично вриење од енергија на сцената на МОБ и експлозивна и незаборавна вечер.

Нив ќе можеме да ги гледаме уште првата фестивалска вечер, на 3 јуни, веднаш по триото Guitari Baro.

На 4 јуни, во Националната опера и балет со почеток во 20 часот, свој настап ќе имаат норвешките виртуози Нилс Окланд и Сигбјорн Апеланд.

Маестралниот виолинист Нилс Окланд, препознатлив по специфичниот традиционален инструмент „хардангер фидл“ (Hardanger fiddle), важи за уметник кој со подеднаква леснотија и природност фасцинира без оглед на музичкиот контекст – без разлика дали настапува како солист, во дует или со својот матичен бенд. А за оваа вечер, веројатно поврзано и со следните настапувачи, Добрила и Дориан, кој ќе го промовираат својот трет албум, Белопета најави и изненадување.

На 5 јуни на сцената ќе се качат Raül Refree & Maria Mazzotta, по кои ќе следи моќниот женски колектив Les Amazones d’Afrique.

Последната музичка вечер, на 6 јуни, ќе ги донесе енергичните настапи на Matchume Zango и Zawose Queens. Истата вечер во киното Фросина во МКЦ ќе биде прикажан култниот бразилски документарен филм „ELIS & TOM“.

Визуелниот идентитет и дизајнот на годинешното јубилејно издание се дело на истакнатиот дизајнер Зоран Кардула. Билетите се веќе пуштени во продажба и можат да се набават онлајн преку официјалната веб-страница на фестивалот.

The post НОВО ИЗДАНИЕ НА ОФФЕСТ Јубилејниот скопски фестивал на светска музика со возбудлива програма и извонредни музичари appeared first on plusinfo.mk.

Годинешното издание на Скопскиот џез фестивал кој се одржува од 16 до 19 октомври, продолжува со истиот програмски концепт како и досега, односно, свртен кон современиот џез и актуелноста на оние кои се дел од програмата. Како што вели директорот на фестивалот Оливер Белопета, „сите кои доаѓаат на СЏФ имаат оваа година или лани, некои нови остварувања кои оставиле силен белег на сцената, па така нивниот избор никогаш не е случаен“.

Во овој концепт спаѓа и ексклузивноста, па и годинава има доста ексклузивни настани затоа што, вели Белопета, „основна цел на фестивалот е да ја задржи репутацијата која ја има во Европа и светот, помалку или повеќе култен статус кој не носи пари, но носи огромно лично задоволство“.

Накусо, Белопета најави дека успешната приказна од изминатите години, продолжува со истите елементи кои кажуваат зошто е таа успешна.

За првпат годинава скопскиот џез фестивал остана без поддршката на Американската амбасада во Скопје, со оглед на тоа што претседателот Трамп забранил какво било давање пари за културата во Македонија, иако, како што вели Белопета, поголемиот дел од програмата ја промовира токму американската култура, односно, повеќето од музичарите кои се дел од фестивалот се токму американски џезери.

Веќе втора година по ред е загубена и поддршката и комуникацијата и со Градот Скопје, што е впрочем случај и со се друго од областа на културата во градот, меѓудругите и поддршката за МКЦ поради што годинава ќе ги нема оние полноќни концерти таму како што беше во изминатите години.
Сепак, и ова 44-то издание на СЏФ кое ја има главната поддршка од Министерството за култура, а освен домашните спонзори, и поддршката од австриската, од полската амбасада и од делегацијата на ЕУ, има богата и ексклузивна програма и актуелни имиња од светската џез сцена. Целата програма ќе се одвива во Националната опера и балет, а ќе стартува со триото на полскиот пијанист Анджеј Јагоѓински, кое, како што најави Белопета, ќе ги свири Бах и Шопен.

Истата вечер, по Јагоѓински ќе свири и нашиот Национален џез оркестар со двајцата гости: австрискиот диригент и аранжер Зиги Фајгл и американскиот тромбонист Луис Бониља.

Втората вечер, на 17 октомври, се американскиот гитарист Марк Рибо, култен гитарист кој свирел на албуми на Том Вејтс и Роберт Плант и еден од најпрогресивните артисти на реномираната импровизаторска сцена на Чикаго, Кахил Ел Забар, кој слави 50 години на сцената и е на промотивна турнеја со својот ансамбл.

На 18 октомври ќе имаме скандинавска вечер, па први настапуваат „After the wildfire quartet“ – Арве Хенриксен и Јан Банг со гитаристот Ејвинд Арсет и перкусионистот Ингар Зак, а потоа Горан Кајфеш со квартетот Tropiques кој на публиката ќе ѝ понуди „хипно-џез“ уживање. Квартетот покрај Кајфеш, го сочинуваат и исклучителните шведски музичари Александар Зетсон, Јохан Берлинг и Јохан Холмегард.

СЏФ завршува на 19 октомври, со настап на најкреативниот и најдобар жив американски џез музичар, трубачот и композитор Вадада Лео Смит и пијанистката Силви Курвоазје, по кои ќе свири и квартетот на тенор саксофонистот Џејмс Брендон Луис.

Програмата на 44. Скопски џез фестивал предвидува и две ексклузивни европски филмски премиери во киното Фросина. Прикажани ќе бидат документарците „We want the funk!“ и „SUN RA: Do the impossible“.

Наградата за најдобар џез музичар, што ја доделува СЏФ, оваа година му припадна на пијанистот, композитор и аранжер Гордан Спасовски, кој со своето трио ќе настапи на посебен настан во „Аудиокултура“, на 18 октомври.

The post СКОПСКИОТ ЏЕЗ ФЕСТИВАЛ СТАРТУВА СО ШОПЕН И БАХ ВО ЏЕЗ АРАНЖМАН Годинава без американска поддршка, но со многу американски џезери appeared first on plusinfo.mk.

„Вообичаено – пишува тој – џез фестивалот го посетуваа драги колеги од Европа и светот кои постојано говореа дека истите концерти во Скопје биле подобри отколку на нивните фестивали. Зошто? Најпрецизниот одговор постојано доаѓаше од самите музичари. Бевме посебно инспирирани од амбиентот, велеа, од акустиката на салата и од блискиот контакт со публиката. Акустиката, со оние висечки ‘печурки’, мошне интересна приказна од средината на седумдесетите години, е дело на австриски експерти. А ‘интимниот’ контакт помеѓу музичарите и публиката го обезбедува амфитеатралниот карактер на гледалиштето“.

Не случајно античките Грци граделе амфитеатри, подоцна ги правеле и Римјаните, но во целосна кружна форма и за друга намена, ојаснува Белопета и додава:

„Скопје нема концертна сала (Универзална предолго се распаѓаше). МОБ и Филхармонија тоа не се. Тие, иако служат за се и сешто, имаат прецизна функционална намена. Скопје нема ниту вистинска летна сцена. Да, најдобро би било да добиеме нова Универзална сала, која проектно ќе води сметка за стариот амфитеатрален облик (и одвнатре и однадвор), со приближно истиот капацитет и на истата локација“.

Сепак, Белопета, поучен од, како што вели, многугодишното искуство со сега воскреснатиот „Случај Универзална“, се сомнева дека тоа ќе се случи. Како и изградбата на некаков фантазиран, далеку поскап „Мултимедијален центар“.

(Фото: Фејсбук профил на Оливер Белопета)

The post Белопета: Врвни музичари сведочеа дека се инспирирани од акустиката на Универзална сала и од контактот со публиката appeared first on plusinfo.mk.