Капка во морето се олеснувањата што ги најави владата за поставување фотонапонски централи на куќи, згради и погони, со измените на Законот за градба, велат експерти што ги консултираше Плусинфо. Според нив, владата не изменила ништо во однос на фактичката состојба со поставувањето фотоволтаици, а забележуваат и на дозволената моќност, која, како што велат, е мала за да биде исплатлива инвестицијата, како за граѓаните така и за компаниите.

Министерот за транспорт и врски Благој Бочварски како клучна измена ја издвои таа според која на граѓаните нема да им биде потребно решение од општината за поставување на фотонапонските централи. Граѓаните ќе треба да достават само известување до општината, со основен проект и имотен лист за објектот на кој треба да бидат поставени.

– На овој начин домаќинствата и заедници на станари ќе можат да постават фотонапонски електроцентрали со јачина до 6 киловати, а правни лица до 40 киловати – рече Бочварски.

Професорот Константин Димитров вели дека фактички нема никакво олеснување во постапката.

– Ако треба секој што сака да постави фотонапонски централа на покривот да достави основен проект, кој е составен од три други проекти коишто треба да се контролираат, тоа значи дека ништо не е олеснето. Има и низа други бариери кои непотребно се ставени, а кои ги дестимулираат инвеститорите – вели Димитров.

Тој смета дека и одлуката да се дозволи вакви централи да бидат со јачина од 6 односно 40 киловати е неприфатлива.

– Не треба да се ограничува моќноста. Треба да се дозволи граѓаните и стопанските субјекти да поставуваат централи со моќност што би им ја дозволила електродистрибуција. Само така граѓаните и фирмите ќе имаат корист од поставувањето фотонапонски централи. На пример, ако електродистрибуција ти дозволила да можеш да трошиш 120 киловати, коректно е да можеш да вложиш во централа со толкава јачина. Само така вложувањето ќе биде исплатливо. Со 6 киловати не е исплатливо. Дополнително, треба да се подготвува само еден електропроект. Владата мора да се откаже и од ДДВ на опремата за производство на електрична енергија од сонце, но и да ги субвенционира овие вложувања. Се најавија субвенции, но нив никаде ги нема. Не знам што се чека – вели Димитров.

Тој објаснува дека државата има само корист од вложувањето во што поголем број вакви централи и од дополнителната струја во системот што нема да мора да ја купува.

– Но, ваквите вложувања ќе го намалат профитот на компаниите кои увезуваат струја. Веројатно и ЕВН е против тоа, како и сите други електродистрибутивна компании. Сепак, државата треба да го гледа својот интерес и во овој случај – додава Димитров.

Овој експерт доставил писмо до министерствата за економија и за финансии, со предлози за поедноставување на постапката за инсталирање фотонапонски централи, па чека некаков одговор.

Маријан Ненов од невладината „Но пасаран“ вели дека владата сега увидела дека секој на приватен имот може да си постави што сака без одобрение од општината.

– Решенијата за градба за граѓаните кои на покривите на сопствен објект поставуваа фотонапонски централи за сопствени потреби беа непотребни и претходно. Замислете секој што има бавча да бара дозвола од општината што ќе посади. Покривите се современи градини, на кои сопствениците можат да постават што сакаат. Во случајов, дури и не прават никакво загадување на воздухот, но имаат производство на струја што го користат.  Друг е случајот кога произведената струја сакате да ја продавате. Во тој случај, според мое мислење, потребно е да се бара лиценца за производство – вели Ненов.

Неговата главна забелешка на измените на Законот за градба е тоа што со нив не се дозволува граѓаните кои живеат во станови да постават фотонапонски централи на покривите на зградите и да ја користат струјата за сопствени потреби, туку само за заедничките простории.

– Се прашувам, зошто и на овој начин се фаворизира монополот на една компанија? Инаку, зошто не би им се дозволило на заедниците на станари да произведуваат струја за становите? Во овој случај, со законот требаше да се дозволи формирање  енергетски заедници во зградите, на кои би им се дозволило да постават помоќни фотонапонски централи, до 50 киловати, за да можат да ги задоволат потребите од струја на сите станари, а ако имаат поголемо производство, да го продаваат. Во овој случај би можело да се пропише парите од продажбата заедницата на станари да ги уплаќа во резервниот фонд кој се користи за разни реконструкции односно поголеми зафати во зградата – вели Ненов.

Вака како што е предложено, додава тој, се отвора можност во иднина енергетски компании да закупуваат покриви на згради и да произведуваат струја за станарите за продажба.

– Така, парите ќе завршат на контата на некои фирми. Мислам дека во блиска иднина тоа ќе се случи – вели Ненов.

Заинтересирани граѓани за вложување во вакви објекти велат дека владата доцни со сето она што значи олеснување на постапката.

– Премногу пари се вложуваат за да се стигне до крајот, а тоа е поставувањето на фотоволтаиците. Сето она што го бара владата во врска со проектите, лиценцираните изведувачи, контролите на целокупната постапка, сето тоа е скапо, бидејќи 6 киловати на ваква централа на покривот, според моите пресметки, нема да задоволат ниту дел од струјата што ја трошам годишно. Сметам дека треба да се дозволи да се вградуваат поголеми централи – вели скопјанец што ги разгледува можностите за инвестирање.

И бизнис заедницата бараа поголеми олеснувања за поставување фотонапонски централи, но нејзините претставници во моментов не се сигурни што точно олеснила владата, бидејќи не го виделе текстот.

The post САМО 6 КИЛОВАТИ НА ПОКРИВОТ НЕ СЕ НИШТО! Експерти велат дека владините олеснувања за поставување фотоволтаици се занемарливи appeared first on plusinfo.mk.

Царинската управа, пак, најави реконструкција на граничните премини Деве Баир, Ќафасан и Делчево, нивно проширување со дополнителни ленти за проток на стоки, како и продолжување на реформите во делот на давачките и процедурите.

– Никој не можеше да претпостави колку ќе трае корона кризата и како да се димензионираат мерките. Не знаеме ниту како ќе се одвиваат понатаму состојбите. Има претпоставки дека до пролет или до лето се ќе заврши, но компаниите секојдневно се соочуваат со предизвици – дали можат да ги задржат вработените и како да функционираат, со колкав капацитет. Поголемите можеби ја преживеаа кризата, но дел од помалите не. Затоа, се бараат средства и механизми по секоја основа за опстанок. Она што во моментов е битно, е како да ја олесниме нивната работа и да ја зголемиме конкурентноста – рече в.д. извршната директорка, Билјана Пеева Ѓуриќ.

Според директорот на Царинската управа, Ѓоко Танасоски, многу скоро се очекува проширување на т.н. зелени коридори.

– На последниот Комитет на ЦЕФТА беше заклучено дека зелените коридори треба да продолжат да функционираат и да се прошират на граничните премини со ЕУ. Се интензивираат состаноците меѓу ЦЕФТА секретаријатот и царинските администрации. Очекуваме многу брзо проширување на зелените коридори, но за нас е клучно да ги реконструираме Деве Баир, Ќафасан и Делчево, да ги прошириме со дополнителни ленти за проток на стоки – истакна Танасоски.

Комората апелира дека за раздвижување на надворешно-трговската размена е неопходно намалување на царините за медицинските материјали, како и за прехранбените производи што се дефицитарни на домашниот пазар и што не можат да се обезбедат од домашните производители. Во услови на криза како оваа што ја наметна ковид-19, тешко е да се одржува и синџирот на снабдување, не само на основните продукти, туку и на енергијата. Затоа, врвен приоритет е одржувањето непрекината врска на транспортните коридори, но не само со регионот, туку и со државите-членки на ЕУ со кои ние и другите земји од Западен Балкан годишно реализираме повеќе од 70 отсто од размената.

Пеева Ѓуриќ на прес-конференцијата ја истакна и потребата од даночни олеснувања, како и од измена на Законот за царинска тарифа со цел нејзино подобро усогласување со потребите на бизнис-секторот, во насока на создавање предуслови за подолгорочно одржлива конкурентност и за привлекување нови, странски директни инвестиции.

– Да им се помогне на извозно-ориентираните компании да ги одржат капацитетите и вработените во одреден временски период, особено да се обезбеди помош за компаниите кои не се дел од големи странски групации и кои мора со многу ограничени ресурси да се борат сами на странските пазари. ликвидносна поддршка, грантови или бескаматни заеми би можеле да бидат некои од мерките за дел од компаниите кои времено може да останат или се останати без обновени договори за работа, како и вклучување на овие компании во јавните набавки и/или во новоотворените проекти од страна на државата, во рамки на реализацијата на планираните капитални инвестиции – рече Ѓуриќ.

Неопходно е, дополни Пеева Ѓуриќ, и да се воведе механизам за поттикнување нето-извозот и на додадената вредност.

– Во изминатиот период вложивме максимални напори за олеснување на работењето на компаниите. Според анектата на членките на Комората, 75 отсто од фирмитер се задоволни од досега спроведените реформи на Царината и поедноставените царински постапки – напомена директорот.

Во однос на трговскста размена, истакна дека во првите 11 месеци годинава вкупниот увоз е помал за седум отсто од истиот период лани, а намалувањето на извзоот е за 11 проценти.

– Споредено со лошата економска состојба во светот, ова се солидни резултати за кои се вложени исклучителни напори и од страна на Царината и од страна на државата воопшто – укажа Танасоски.

Тој вети дека сите препораки од стопанството за царинското работење ќе бидат разгледани, а реформите ќе продолжат.

– Во оваа криза поддршката на извозните компании е најголем приоритет. Коридорот 10 стана поатрактивен, а наскоро тоа се очекува и за Коридорот 8 – рече Танасоски.

The post Даночни олеснувања и укинување на непотребните трошоци за компаниите, бара Стопанската комора appeared first on plusinfo.mk.