Охридско-струшки регион Archives - plusinfo.mk

ТРАКТОР ДАДЕН ОД ДРЖАВАТА ГО НЕМА НИТУ ВО ГАРАЖА, НИТУ НА НИВА Иротова-Лазарева објави шокантни сознанија од инспекциите кај земјоделците во Орхидско-струшкиот регион

плусинфо — Thu, 12 Nov 2026 11:05:21 +0000

Директорката на Агенцијата за финансиска поддршка на земјоделството (АФПЗРР) Даниела Иротова – Лазарева објави шокантни сознанија за повеќе злоупотреби на државните субвенции во Охридско-струшкиот регион.

Таа, како што информира во објава на Фејсбук присуствувала на контролите во овој регион.

Според неа , резултатите од извршените контроли отвораат сериозни прашања за начинот на користење на финансиската поддршка и веродостојноста на пријавените податоци.

-Трактор набавен преку програмата за рурален развој во 2023 година – при денешната екс пост контрола во с. Бичево, Струшко, не е пронајден кај земјоделското стопанство, ниту на пријавените земјоделски површини. Според изјавите на присутните, бил даден на користење на друго лице а во стопанскиот двор нема никакви траги од истиот, а постојат и писмени дојави дека е продаден. Корисникот има договорна обврска најмалку пет години да ја користи инвестицијата за потребите на своето стопанство и да не ја дава на трети лица и да ја отуѓува – вели таа.

Најавува дека земјоделецот ќе мора да ги врати парите.

Во друго два случаи, инспекторите откриле манипулација и при пријавување на пчелни семејства.

-Пријавени 50 пчелни семејства – при контролата на лице место не беше затекнато ниту едно пчелно семејство, а според расположливите податоци корисникот нема ниту регистарски број на одгледувалиште (РБО). Во друг случај, пријавени 600 пчелни семејства – на терен затекнавме само 190 пчелни семејства со пчели и 10 празни сандаци, додека останатите 400 не беа пронајдени – вели Иротова-Лазарева во објавата.

Таа додава дека финансиската поддршка не е само право да се добијат средства од државата.

-Таа подразбира и одговорност, исполнување на условите и почитување на преземените обврски. Контролите продолжуваат – пред исплата, по исплата и во текот на периодот на исполнување на договорните обврски. Нема селективност и нема привилегирани. Нашата обврска е да ги заштитиме чесните земјоделци и да обезбедиме јавните средства да се користат за вистинско земјоделско производство. Пријавеното на хартија мора да постои – заклучува Иротова-Лазарева.

The post ТРАКТОР ДАДЕН ОД ДРЖАВАТА ГО НЕМА НИТУ ВО ГАРАЖА, НИТУ НА НИВА Иротова-Лазарева објави шокантни сознанија од инспекциите кај земјоделците во Орхидско-струшкиот регион appeared first on plusinfo.mk.

📷 БОГАТИ АРХЕОЛОШКИ НАОДИ ОТКРИЕНИ ВО НЕКРОПОЛАТА РЕСНИЦА ВО СТРУШКО Штит, шлем, копја, меч, предмети од злато, бронза, килибар…

плусинфо — Mon, 05 Oct 2026 07:09:35 +0000

Богато војничко погребување со штит, шлем, копја, меч и предмети од злато, бронза и килибар е најновото исклучително откритие на археолозите на архајската некропола Расница кај струшкото село Корошишта, со што дополнително се потврдува значењето на локалитетот за проучување на Охридско-струшкиот регион во VI век пред нашата ера.

Националниот археолошки музеј денеска ќе ги презентира најновите резултати од археолошките истражувања на локалитетот, каде годинава е откриено богато војничко погребување со комплетна воена опрема.

Од Националниот археолошки музеј истакнуваат дека новите наоди недвосмислено го потврдуваат карактерот на Расница како архајска некропола и отвораат можности за подлабоко проучување на погребните обичаи, воената организација и општествената структура на тогашните заедници.

Локалитетот го привлече вниманието на стручната и пошироката јавност во 2024 година, кога беа откриени монументална гробна целина и исклучително богат археолошки материјал, меѓу кој бронзен шлем со златни апликации, бронзен штит, златен надградник, златни прстени и фолии, килибарни и стаклени мониста, сребрени игли и кантарос, како и повеќе бронзени садови.

Најновите откритија, според музејот, носат нова димензија во толкувањето на некрополата, бидејќи богатото војничко погребување овозможува попрецизно согледување на статусот, идентитетот и улогата на лицата што биле погребувани на овој простор.

Археолошките истражувања ги предводи д-р Перо Арџанлиев, кустос советник во Националниот археолошки музеј, а на денешната презентација на локалитетот ќе присуствуваат и директорката на Националниот археолошки музеј Магдалена Манаскова и директорката на Управата за заштита на културното наследство Весела Честоева.

Под архајски период се подразбира периодот од приближно VIII до почетокот на V век пред нашата ера, кога се развиваат градовите-држави, трговијата и културните врски низ поширокиот регион на Медитеранот. Во археолошки контекст, архајскиот период се однесува и на заедниците што живееле во непосреден контакт со хеленскиот свет, како и на нивните материјални и културни влијанија.

Фото: НУ Завод за заштита на спомениците на културата и Музеј – Охрид
НУ Завод за заштита на спомениците на културата и Музеј – Охрид

The post 📷 БОГАТИ АРХЕОЛОШКИ НАОДИ ОТКРИЕНИ ВО НЕКРОПОЛАТА РЕСНИЦА ВО СТРУШКО Штит, шлем, копја, меч, предмети од злато, бронза, килибар… appeared first on plusinfo.mk.