Историско археолошко откритие го потресе научниот свет на дното на Охридското Езеро, во близина на Лин во Албанија, е пронајдена населба стара од 6.000 до 8.000 години, што ја прави најстарото човечко населено место покрај езеро во цела Европа, објави Ројтерс.

Истражувачи од Универзитетот во Берн (Швајцарија), во соработка со албански колеги, веќе шест години го проучуваат локалитетот и велат дека пронајдоците го менуваат досегашното знаење за раната цивилизација на Стариот Континент.

– Оваа населба е најстарата од ваков тип која сме ја откриле во Европа. Благодарение на сочуваните органски материјали под вода, имаме уникатен увид во животот на луѓето од тој период, што јаделе, како граделе, како се движеле и што одгледувале – изјави професорот Алберт Хафнер, кој го предводи проектот.

Дрвените столбови од куќите, заедно со бакарни предмети, коски, керамика и други артефакти, се вадат од длабочина до три метри, при што се користат радиокарбонска анализа и дендрохронологија за точно датирање.

Според првичните анализи, населбата се простирала на околу шест хектари и била дом на неколку стотици луѓе, кои живееле во склад со природата, ловеле, рибареле и одгледувале култури. За целосно истражување на локацијата, научниците предвидуваат дека ќе бидат потребни децении.

– Тоа што тие луѓе го постигнале во тоа време е навистина неверојатно. Архитектурата, организацијата, прехраната, сè укажува на напредна заедница – вели албанскиот археолог Адриан Анастаси.

Охридското Езеро, кое е едно од најстарите и најдлабоки езера во Европа, повторно се најде во фокусот на светската археолошка заедница овој пат, со откритие што би можело да ја прераспише историјата на човековото населување на континентот.

The post 📽️ ПОДВОДНА СЕНЗАЦИЈА ВО ОХРИДСКОТО ЕЗЕРО Археолози ја пронајдоа најстарата населба на континентот од 6000 до 8000 години appeared first on plusinfo.mk.