Четворица жители на Вевчани, вработени во Подрачното шумско стопанство „Јабланица“ – Струга, се соочуваат со кривични пријави поради сомневање дека со злоупотреба на службената положба и несовесно работење овозможиле незаконски да биде присвоено и пренесено огревно дрво, со што го оштетиле ЈП „Национални шуми“ за 570.569 денари.

Од ОВР Струга информираат дека кривични пријави се поднесени против В.Р. (56), З.П. (61), А.А. (61) и Т.Д. (49), сите од Вевчани. Тие се осомничени за кривичните дела „злоупотреба на службена положба и овластување“, а првопријавениот се товари и за „несовесно работење во службата“.

Според полицијата, В.Р., како раководител на Подрачното шумско стопанство „Јабланица“ – Струга, без овластување од директорот на ЈП „Национални шуми“ склучил договор за позајмица со правно лице од струшкото село Велешта. Воедно, не ја извршил својата службена должност и не обезбедил надзор со кој би го спречил и санкционирал незаконското постапување на останатите вработени.

Истрагата покажала дека З.П. и А.А., вработени во истото шумско стопанство, не доставувале примероци од испратниците до сметководството и не евидентирале сеча на вкупно 127,32 кубни метри буково огревно дрво, со што биле прикриени количините на исечената дрвна маса.

Четвртоосомничениот Т.Д., исто така вработен во претпријатието, според пријавата, во една испратница внесувал два различни договори и двајца купувачи, спротивно на своите службени обврски.

Со ваквите незаконски постапки, како што наведува полицијата, на правното лице од селото Велешта му било овозможено бесправно да го пренесе до својот склад незаконски исеченото огревно дрво и на тој начин да стекне противправна имотна корист, додека ЈП „Национални шуми“ претрпело штета од 570.569 денари.

The post ОВОЗМОЖИЛЕ ДИВА СЕЧА НА 127 КУБИЦИ БУКА Кривични пријави за четворица вевчанци, вработени во „Национални шуми“ appeared first on plusinfo.mk.

СВР Струмица – ОВР Радовиш поднесе кривична пријава против едно физичко и едно правно лице од Радовиш, поради сомнежи за злоупотреби при трговија со огревно дрво, фалсификување документи и незаконска заработка од речиси 1,5 милиони денари.

Пријавата е поднесена против С.К. (43) од село Дедино, општина Конче, како и против правен субјект од Радовиш, а случајот е доставен до Основното јавно обвинителство во Радовиш.

Според истрагата, С.К. како одговорно лице во фирмата, искористувајќи ја својата службена позиција, изготвувал испратници за транспорт на огревно дрво со неточни и фиктивни податоци.

Во документите биле наведувани непостоечки примачи, без адреси на испорака, а дел од испратниците биле и коригирани во делот на количини и вид на дрвна маса.

На тој начин, според полицијата, во промет биле пуштени 173,31 кубни метри дрва, со што е стекната противправна корист од 864.262 денари.

Контролите откриле и дополнителни неправилности кај 27 испратници.

Во документите било наведено дека се испорачани 46 кубни метри огревно дрво, но проверките на терен и разговорите со купувачи покажале дека реално биле испорачани 149 кубни метри.

Разликата од 103 кубни метри, според истрагата, е претворена во дополнителна противправна корист од 566.500 денари.

Покрај манипулациите со количини, С.К. е осомничен и дека во дел од испратниците го фалсификувал потписот на овластено лице во рубриката „одговорно лице“, по што тие документи биле користени како валидни во правниот промет.

Со сите утврдени неправилности, според полицијата, осомничените се стекнале со противправна имотна корист во вкупен износ од 1.430.762 денари.

Истрагата продолжува, а по целосно документирање на случајот ќе следуваат соодветни кривични постапки.

The post 103 КУБИЦИ ДРВА ИСЧЕЗНАЛЕ ОД ХАРТИЈА ДО ТЕРЕН Со фиктивни испратници заработиле над 1,4 милиони денари appeared first on plusinfo.mk.

Вчера доцна вечерта полицијата во Кавадарци го привела 38-годишниот В.Ј. од селото Дреново, откако претходно не застанал на знак за запирање и продолжил да вози, игнорирајќи и црвено светло на семафор.

Тој управувал „лада“ со кавадаречки регистарски ознаки, во која како сопатници биле 25-годишниот М.И. од селото Возарци и уште едно лице. Во возилото превезувал и огревно дрво.

По преземени мерки, полицијата ги пронашла возачот и возилото во селото Возарци. При контролата било утврдено дека автомобилот бил нерегистриран, возачот немал стекнато право за управување од „Б“ категорија и поминал на црвено светло. Огревното дрво било без соодветна документација, па со потврда било одземено и предадено на шумската полиција.

Со сопатникот бил извршен службен разговор, а по насоки на јавен обвинител, возачот бил приведен во полициска станица. Возилото е привремено одземено и ќе следуваат соодветни пријави.

The post БЕГАЛ ОД ПОЛИЦИЈА НИЗ КАВАДАРЦИ Возел нерегистрирано возило, поминал на црвено, превезувал крадени дрва appeared first on plusinfo.mk.

Тивка, но систематска сеча пустошела во виничко. Дури 1.108 стебла биле бесправно исечени, штетата достигнала 310.240 денари. Полицијата поднесе кривични пријави против 8 лица од Виница и од Виничко.

Надворешната канцеларија за криминалистички работи Виница пријавила 8 осомничени. Дел од нив работеле во ЈП „Национални шуми“ – Подрачно шумско стопанство „Плачковица“ во Виница. Други биле приватни лица и превозници.

Прво и второпријавениот, Г.И. (49) од село Калиманци и А.А. (31) од Виница, од јуни 2024 до февруари 2025 година исекле 1.108 стебла. Вкупната дрвна маса изнесувала 44,32 кубни метри. Сечеле на катастарски парцели во сопственост на 4 физички лица и делумно во државна сопственост. Причиниле штета од 310.240 денари.

Третопријавениот Ј.П. (59), управител на правно лице од Виница, несовесно ги обележал границите на една парцела. Навлегол во соседни парцели со површина од 4.080 метри квадратни.

Четвртопријавениот С.Ѓ. (64) од село Лески, вработен во ЈП „Национални шуми“ – ПШС „Плачковица“, како референт за превоз издал 8 приемници за дотур и 26 испратници за превоз. Дополнително, без овластување извршил ознака за сеча со несоодветен чекан.

Петтопријавениот Љ.В. (63), исто така вработен во претпријатието, извршил теренски увид. Потоа бил изготвен записник и одобрение за сеча на огревно дрво.

Шестопријавениот Б.П. (64), одговорно лице во ПШС „Плачковица“, го потпишал одобрението без контрола на преземените активности.

Седмо и осмопријавените, З.С. (66) од село Јакимово и Т.М. (71) од село Крушево, врз основа на издадените испратници, превезувале огревно дрво со 2 товарни возила. Немале лиценца и извод од лиценца за јавен превоз во внатрешниот патен сообраќај.

Сите се товарат за повеќе кривични дела. Дел од нив за „продолжено кривично дело“ во врска со „кражба“. Други за „злоупотреба на службената положба и овластување“, „фалсификување исправа“ и „несовесно работење во службата“. Превозниците се гонат за „вршење на јавен превоз без поседување лиценца“.

Акцијата открила синџир од бесправна сеча до транспорт. Институциите сега ќе треба да утврдат индивидуална одговорност.

1. ШУМСКА АФЕРА ВО ВИНИЦА Сеча, фалсификати и див превоз на огревно дрво

The post 1.108 СТЕБЛА ИСЕЧЕНИ, ШТЕТАТА Е 5.000 ЕВРА Осуммина осомничени за синџир на дива дрвосеча во Виничко appeared first on plusinfo.mk.

Двајца вработени во Подрачното шумско стопанство „Кожуф“ во Гевгелија се осомничени за сериозни пропусти и злоупотреби во работењето. Против нив е поднесена кривична пријава поради сомнение за „несовесно работење во службата“ и „фалсификување службена исправа“.

Станува збор за Л.М. (32) и Н.А. (45), двајцата од Гевгелија, против кои постапката ја покрена ОВР Гевгелија. Според наводите, на 16 октомври 2025 година, Л.М., кој работел како референт за користење на шуми и дотур во Јавното претпријатие „Национални шуми“, подружница Шумско стопанство „Кожуф“, издал дозвола за сеча на огревно дрво иако претходно воопшто не било поднесено барање за обезбедување дрвни сортименти.

Неговиот колега, Н.А., вработен како референт за превоз, во службената документација впишал дека такво барање било доставено, без притоа да провери дали тоа навистина се случило. Дополнително, Л.М. не извршил прием на испорачаната дрвна маса, ниту го спровел задолжителниот надзор, иако бил должен да ја контролира количината и квалитетот на исеченото дрво.

Кај второпријавениот, пак, се утврдени и неправилности при транспортот. Тој издал испратница за превоз на огревно дрво наведувајќи дека станува збор за бука, иако во возилото биле натоварени дабови дрва. При жигосувањето, користел шумски жиг што не одговарал на оној наведен во испратницата, а дел од дрвните сортименти воопшто не биле жигосани.

Како дополнителен проблем, во дозволата за сеча и во испратницата бил внесен и невистинит податок за лицето кое наводно го поднело барањето за сеча.

Надлежните институции продолжуваат со постапката за целосно расчистување на случајот.

The post СО ФАЛЦ ДОКУМЕНТИ ДОЗВОЛИЛЕ СЕЧА НА КОЖУФ Кривична пријава за двајца вработени во шумско стопанство appeared first on plusinfo.mk.

И покрај топлото време граѓаните кои се топлат со дрва и пелети веќе се подготвуваат за зимата.

Складовите и трговците со огревно дрво велат дека интересот е добар. Цената се движи од 3.900 денари до 4.500 денари за кубен метар за буката и од 4.000 до 4.500 за кубик даб. Во цената е вклучено и доставување. Постојат и огласи за продажба на огревно дрво на кои дрвото се нуди по цена од 3.000 до 5.400 денари за кубик.

Продажбата која се реализира преку ЈП Национални шуми во складовите е по ценовникот од ноември 2024 година кој уште е во сила. Според него, цената на буката за кубен метар изнесува 3.744 денари, за јасенот 3.504 денари, за тополата 3.384, за елката 2.460, за борот 2.460 денари, за моликата 2.460 денари, кубик огревно дрво од костен чини 3.840, а од багрем 3.864 денари.

Последните години, пелетите стануваат сè попопуларни, додека речиси и да нема домаќинства кои се греат на јаглен. Цената на пелетите е стабилна и сè повеќе добива предност како поекономичен и попрактичен избор.

Вреќа од 15 килограми пелети од прва каса на пазарот се движи од 210 до 380 денари, зависно од тоа дали се произведува во земјава или е од увоз. Цената на пелетите од втора класа се движи од 230 до 235 денари.

Во земјава најчесто се увезуваат босански, црногорски и српски пелети, а ги има и од домашно производство.

Од компанијата „Еко Лајф“ од Ранковци велат дека годинава има голем интерес за пелети. Цената на вреќа од 15 килограми на овој производител е 249 денари, а ги има од бор и од бука.

Трговците со пелети велат дека годинава има голем интерес за овој огревен енергенс.

– Имаме голем интерес за пелети и за брикети годинава. Цената за прва и за втора класа речиси е иста и се движи од 230 до 255 денари за пакување од 15 килограми. Брикетите се со цена од 17.000 до 19.000 денари тон. Снабдувањето е без проблеми во овој период – велат од Пелет центарот во Скопје.

Граѓаните од Скопје кои ги анкетиравме велат дека полека го напуштаат дрвото за огрев иако, како што велат, покрај топлењето имаат и други придобивки од таквиот начин на греење. Нивните пресметки се дека е најевтино да се греат на струја со инвертери.

– Не сме приклучени на скопското парно. Досега ги испробавме сите енергенси од дрво и нафта до пелети. Последниве години цената на дрвата и на пелетите растеше, па годинава решивме да не ризикуваме и се определивме за греење со инвертер. Ќе видиме дали ќе ни се исплати – вели Аце од Ѓорче Петров.

Негова сограѓанка, пак, вели дека уште се грее на дрво.

– Мислам дека е поисплатливо бидејќи покрај греењето на шпоретот и готвам. Годиниве се потопли, па и помалку дрва се трошат. Останува од претходната година, па само се докупува 1 до 2 кубика. Ама младите веќе не сакаат вакво греење бидејќи треба да чистат и да го палат, што им претставува тешкотија – вели таа.

Според статистиките, најголем број од домаќинствата во земјава немаат парно греење и се оставени да бираат дали ќе се греат на дрво, пелети, струја или друг вид на греење. Изборот го прават според сопствените пресметки и можностите.

Вообичаено, грејната сезона во земјава трае од втората половина на октомври до крајот на  март, но поради климатските промени последните години во земјава има потопли зими и потрошувачката за огрев е пониска.

The post КУПЕТЕ СИ ДРВА ПО ЛАНСКИ ЦЕНИ Никогаш не е рано да се мисли на зимата appeared first on plusinfo.mk.

Полицијата вчера во Демир Хисар уапси шумар од Крушево, кој ги продал дрвата што претходно ги запленил од дрвокрадци. Ќе добие кривична пријава за Злоупотреба на службената положба и овластувањето.

„На 15.7.2025 во 13.35 часот пред угостителски објект во Демир Хисар, полициски службеници од ОВР Демир Хисар го лишиле од слобода Т.О.(46) од Крушево. Имено, тој се сомничи дека како вработен во шумско претпријатие во Крушево извршил кривично дело по член 353 од Кривичниот законик – Злоупотреба на службена положба и овластување. Како службено лице одзел нелегално исечени огревни дрва со приколки и ги продал на трето лице“, соопшти полцијата.

По целосното документирање на настанот, против шумарот ќе биде поднесена соодветна кривична пријава.

The post ПОЛЦИЈАТА УАПСИ ШУМАР ВО КРУШЕВО Запленил нелегално сечени дрва, па ги продал appeared first on plusinfo.mk.

Цената на огревното дрво со превоз за втора класа се движи од 3.200 до 3.500 денари за кубен метар и од 4.000 до 4.500 денари за прва класа бука. Цените на дабовото дрво се повисоки за 100 денари. Дел од фирмите кои нудат огревно дрво велат дека не можат да кажат по која цена го продаваат, бидејќи дневно се менуваат цените со оглед дека има мал интерес.

Цената на пелетите, зависно од квалитетот и дали е увозна или од домашно производство. се движи од 199 денари за вреќа од 15 килограми до 405 денари.

Фирмите кои нудат огревно дрво велат дека интересот е многу мал или незначителен, а тоа го поврзуваат со фактот дека граѓаните кои се греат на дрво веќе се иселиле од државата или дека се преориентирале на инвертери или друг огрев.

– Во моментов продажбата на огревно дрво е нула и не можам да кажам која е причината за ваквата состојба? Дали се тоа инвертерите кои ги плаќа државата или граѓаните веќе не мислат дека дрвото е најздраво за греење. Но, мислам дека тука големо влијание има и иселувањето – вели раководителот на „Бено комерц“, фирма која снабдува со огревно дрво.

Според него, ако вака продолжи пласманот на огревното дрво веќе следната година нема да има кој да продава огрев, бидејќи трошоците им растат, а цената на работната рака драстично се зголемува.

– Немаме интерес ако нема продажба. Ние набавуваме дрво преку тендери од Национални шуми по утврдена цена. Секоја година, работниците кои ги ангажираме за сечење и подготовка на дрвото за продажба, си ја покачуваат цената. Но, и така скапи ги нема, бидејќи речиси сите заминаа во странство. Резултатот од сето тоа на крајот ќе биде да се откажеме од продажба на огревно дрво – вели тој.

И фирмите, пак, кои пласираат огревно дрво преку синдикати и пензиски друштва велат дека е намален интересот иако цената на дрвото е пониска од лани кога кубен метар се продаваше и по цена од 5.600 или 6.000 денари.

– Нашето дрво е веќе договорено со синдикални организации кои организираат набавка на дрво за членството. Инаку интересот за огревно дрво во овој период е слаб. Цената е пониска од ланската, ам нма кој да купува. Со превоз кај нас за прва класа дрво цената се движи од 4.200 до 4.500 денари, а за втора класа од 3.200 до 3.500 денари. Цената е за 100 денари повисока кај дабовото дрво. – велат од фирмата Огревно дрво од Крушево.

Национални шуми и годинава го продаваат огревното дрво по ценовникот од пред две години.

Најскапото и најквалитетното дрво – она од даб, се продава по цена од 3.564 денари по кубен метар. Буката има цена од 3.444 денари, јаворот е со цена од 3.204 денари за кубен метар.

За разлика од слабиот интерес за огревно дрво, кај прелетите интересот се зголемува. Годинава цените на пелетите се намалени и почнуваат од 199 денари, па се до 405 денари за вреќа од 15 килограми. Цената зависи и од тоа каде ќе ги купите пелетите.

– Имаме голем интерес за пелети годинава. Обезбедени се доволно количини по поволни цени и се надеваме дека до почеток на сезоната овој интерес ќе се задржи – велат од Пелет центарот во Ѓорче Петров.

Експертите велат дека просечно македонско домаќинство годишно користи од 3 до 10 кубни метри огревно дрво за загревање, или најчесто околу 6 кубни метри. Тоа значи дека зимава домаќинствата ќе потрошат од 19.200 до 21.000 денари ако се греат на буково дрво од втора класа и од 24.000 до 27.000 денари со дрво од прва класа.

Пресметките за потрошувачката на пелети покажуваат за 100 квадратни метри површина во една грејна сезона се трошат околу 3 тони пелети или околу 43.890 денари ако се користат најевтините пелети.

Се смета дека повеќе од 120.000 домаќинства во земјава се греат на дрво, а остатокот на друг вид греење. Речиси 9% се греат на пелети или брикети.

Последните години, поради субвенциите, голем дел од граѓаните од дрво или нафта се префрлија на пелети или на инвертери. Околу 60.000 домаќинства и само во Скопје се греат на парно, а остатокот се греат на електрична енергија.

Во Македонија, според последниот попис, има 598.632 домаќинства и 839.174 станови. Колку од нив се иселени, засега никој не знае.

The post НИКОЈ ВЕЌЕ НЕ САКА ДА КУПУВА ДРВА ЗА ОГРЕВ И ЗА ЏАБЕ Цените паднаа, ама нема ни кој да цепи ни кој да гори – сите се иселија! appeared first on plusinfo.mk.

На 29.02.2024 на патот од село Орманли кон село Костурино, струмичко, полициски службеници од Полициската станица за безбедност на патниот сообраќај Струмица затекнале трактор со приколка на која имало натоварено нежигосани огревни дрва, кој го управувал И.Д. од село Собри, а пред него во пaтничко возило на Шумска полиција биле затекнати пријавените Ѓ.И., Ј.И., Д.Д. и сопственикот на тракторот Т.Џ.. Притоа, од лицата била побарана соодветна документација за дрвата кои ги превезуваат, нa што од Ѓ.И., И.Д. и Ј.И. им било одговорено дека немаат документација и дека ги пронашле во запуштена куќа на планината.

До доаѓањето на увидната екипа на местото, пријавените Ѓ.И., И.Д. и Ј.И. изготвиле потврда за привремено одземени предмети без број и датум, а во описот напишале дека дрвата биле одземени од непознат сторител. Тие изготвиле и записник без број и датум. По преземени мерки и активности било утврдено дека пред да бидат затекнати од полициските службеници, пријавените Ѓ.И., И.Д., Ј.И. и Д.Д. со возилото на Шумска полиција, а пријавениот Т.Џ. со трактор отишле во двор на жител на село Орманли, каде затекнале бесправно исечени огревни дрва, кои ги одзеле и натовариле на тракторот, без притоа на лицето да му издадат соодветна документација. Во разговорот со жителот на село Орманли, тој појаснил дека во последната година на ист начин од дворното место во три наврати му биле одземани огревни дрва од вработени во Шумска полиција и за тие случаи, исто така, не му издавале документ за одземање, со изговор дека не му даваат документи бидејќи нема да му напишат казна.

Истиот ден, тракторот бил однесен во шумски склад во Струмица, дрвата биле растоварени, а во моментот кога лицата биле информирале дека тракторот ќе биде одземен, пријавените Ѓ.И., Д.Д., Ј.И., Д.И. и М.К. агресивно се однесувале кон полициските службеници и ги попречувале во извршување на дејствијата.

За сите преземени дејствија бил запознаен јавен обвинител од Основното јавно обвинителство Струмица, а по документирање на настаните против лицата е поднесена кривичната пријава.

The post УАПСЕНИ ТРОЈЦА „ВАЛКАНИ“ ШУМСКИ ПОЛИЦАЈЦИ Одземале диво сечени дрва и си ги присвојувале appeared first on plusinfo.mk.

Граѓаните кои досега не се снабдиле со огрев велат дека веќе ги фаќа паника дека ќе мора да платат и повеќе од 6.000 денари за кубен метар, бидејќи ако се повтори ланската година цената во септември и во наредните месеци ќе оди нагоре.

– Проверувам во повеќе складишта, а цената се движи околу 5.000 денари, некаде и повеќе. Ќе мора да реагирам брзо за да не се зголеми цената. Сега има дрва доволно, но за некој ден може и да ги снема, дали намерно или вистина нема да ги има знаат само трговците. Лани купив огрев уште пролетта, но годинава такви ми беа приликите и морав да го одложам купувањето до сега – вели граѓанин.

Складиштата во овој период од годината се полни со огревно дрво и испораките ги прават истиот ден или наредните според тоа како ќе се договорите со купувачот. Сепак, никој не гарантира дека цената која е актуелна сега ќе остане и во текот на следните месеци.

– Интерес има, а и дрва има. Цените секаде низ Скопје се речиси идентични 4.500 денари со превоз. Засега има доволни количини што се олесни со зголемената продажба на пелети кои ги има годинава. Дали ќе има зголемување на цената не можеме да кажеме бидејќи сè зависи од владата – вели сопственик на складиште.

Во друго складиште, пак, велат дека цената од вид до вид дрво се разликува за 100 денари, а испорачуваат исечено дрво.

– Може да купите чисто дрво само од еден вид, а може и да ги мешате. Цената е 5.200 денари за кубен метар даб и 5.100 денари за буково дрво заедно со сечењето, ако купите од 5 кубни метри нагоре, а под тоа цената е 5.400 денари бидејќи превозот за помали количини се доплаќа и чини 200 денари. Дрво имаме на лагер и може уште истиот ден да му го испорачаме на купувачот – велат од друг скопски склад.

Сопствениците на складови се жалат дека тешко доаѓаат до работници и нивната цена секоја година расте, како и цената на горивото, поради што и цената на огревното дрво расте.

Во складиштата на ЈП Национални шуми годинава важат ланските цени. Таму кубен метар даб и багрем се продава по цена од  3.564 денари, буката по 3.444 денари, а јавор, јасен и брест по 3.243 денари.

И годинава Национални шуми имаат испорака на рати за одредена категорија граѓани во земјава, а веќе од почетокот на годината ги потпишаа договорите за сеча со одделни трговци со огрев за сеча во шумите во земјава. Дел од огревното дрво го обезбедуваат и граѓаните сами преку добивање дозволи за сеча во сопствена или во државна шума.

Според планот, годинава ЈП Национални шуми треба да произведе вкупно 556.808 кубни метри огревно дрво и отпад собрани по сечата. Дали ќе го постигне планот не се знае. Секоја година претпријатието реализира помалку од планираното, што се одразува и на пазарот во вид на недостиг.

Лани во ноември владата реагираше кога цената на огревното дрво наеднаш скокна за 2.000 денари и достигнаа 5.300 денари за кубен метар. Таа ја ограничи цената до 4.500 денари за метар просторен, односно до 6.429 денари за метар кубен. Највисоката цена на пелетите за огрев беше утврдена до 27 денари за еден килограм. Во цената беше вклучен ДДВ и транспортот. Мерката траеше до 31 декември 2022 година.

Дел од граѓаните и годинава ќе се греат на пелети чија цена се движи од 275 денари до 432 денари за вреќа од 15 килограми зависно од продажниот објект од кој ќе ги купат.

Брикетите, пак, годинава достигнаа и цена од 435 денари за пакување од 10 килограми.

Вообичаено за греење од 6 месеци во земјава се трошат од 3 до 10 кубни метри дрво или најчесто до 7 кубни метри. Тоа значи дека за огрев на дрво граѓаните ќе треба да издвојат од 13.500 денари до 45.000 денари за 10 кубни метри по најниската цена од 4.500 денари и од 16.200 денари до 52.000 денари за 10 кубни метри ако ги купат дрвата по цена од 5.200 односно 5.400 денари.

Ако дрвото се замени со брикети тогаш 1 тон брикети заменува 4 кубни метри дрво.

Годишна потрошувачка за пелети за загревање на куќа се движи до 2 тони пелети.

Со дрво се греат 49 отсто од домаќинствата во земјава.

The post ЌЕ ТРЕБА ЛИ ПОВТОРНО ДА СЕ ЗАМРЗНАТ? Цената на огревното дрво се движи кон 100 евра за кубик appeared first on plusinfo.mk.