Словачкиот парламент усвои амандман на законот за сообраќај со кој се утврдува максималната дозволена брзина на тротоарите во урбаните средини на 6 км/ч., објави Политико.

Ограничувањето се однесува на пешаци, велосипедисти, лизгачи и возачи на скутери и електрични тротинети – сите оние на кои им е дозволено да се движат по тротоари – и има за цел да се избегнат чести судири.

– Главната цел е да се зголеми безбедноста на тротоарите со оглед на зголемениот број судири со возачи на тротинет – рече авторот на амандманот, Љубомир Важни од левичарската популистичка партија Смер на премиерот Роберт Фиц, која е дел од владејачката коалиција.

Според него, амандманот ќе биде корисен за докажување на прекршоци, „особено во случаи кога е потребно објективно да се утврди дали се движеле побрзо од она што се смета за соодветна брзина во области наменети првенствено за пешаци“.

Иако законот ќе стапи на сила на 1 јануари 2026 година, предлагачите јавно не објаснија како планираат да го спроведат.

Просечната брзина на одење обично е помеѓу 4 и 5 км/ч. Сепак, Британската фондација за срце известува дека темпо од 4 милји на час се смета за умерено за некој во одлична физичка состојба.

Опозицијата ја критикуваше промената, па дури и Министерството за внатрешни работи на Словачка рече дека би било посоодветно да се забранат електричните тротинети од тротоарите отколку да се воведе општо ограничување на брзината.

Мартин Пекар од опозициската либерална партија Прогресивна Словачка рече дека пешаците се соочуваат со опасност од автомобили, а не од велосипедисти или скутери, и дека амандманот го казнува одржливиот транспорт.

– Ако сакаме помалку судири, ни требаат повеќе безбедни велосипедски патеки, а не апсурдни ограничувања што се физички невозможни за следење. Со споменатата брзина, велосипедистот тешко може да ја одржи рамнотежата -рече Пекар.

Амандманот предизвика бран на забава на социјалните медиуми, при што некои се прашуваа дали трчањето за да се фати автобус може да резултира со казна.