Полицијата во текот на мај изрекла вкупно 16.885 казни за различни сообраќајни прекршоци низ државата, а најголем дел од нив се однесуваат на возачи кои возеле побрзо од дозволеното.

Според податоците на Министерството за внатрешни работи, дури 4.473 возачи биле санкционирани поради непочитување на ограничувањето на брзината, што го прави овој прекршок најчест меѓу учесниците во сообраќајот.

На второто место се непрописно паркираните возила, за што биле издадени 3.851 казна, додека 920 возачи биле фатени како користат мобилен телефон зад воланот.

Во текот на месецот полицијата санкционирала и стотици возачи за потешки прекршоци. Евидентирани се 241 случај на управување возило без возачка дозвола, 70 возачи биле затекнати како возат под дејство на алкохол, а 33 лица управувале возило и покрај претходно изречена забрана.

Посебно загрижува податокот дека во текот на мај биле одземени 238 возила согласно одредбите од Кривичниот законик.

Контролите покажале и дека голем број возачи на мотоцикли не користат заштитна опрема. Санкционирани биле 1.281 мотоциклист поради неносење кацига.

Казни добиле и 1.584 лица кои не користеле сигурносен појас, како и 295 пешаци поради прекршоци во сообраќајот.

Од сообраќај биле исклучени 240 нерегистрирани возила, додека 83 возила биле отстранети поради техничка неисправност. Дополнително, 55 возачи биле санкционирани поради неправилно затемнети стакла на возилата.

Од МВР најавуваат дека засилените сообраќајни контроли ќе продолжат и во наредниот период со цел зголемување на безбедноста на патиштата и намалување на бројот на сообраќајни несреќи.

The post ПОЛИЦИЈАТА НЕМАШЕ МИЛОСТ ВО МАЈ Изречени речиси 17.000 казни, одземени 238 возила appeared first on plusinfo.mk.

Вкупно 1.303 сообраќајни прекршоци се евидентирани за време на продолжениот викенд, а 57 лица биле лишени од слобода поради безобѕирно управување со возило, соопшти Министерство за внатрешни работи.

Најголем дел од прекршоците – 488 – се однесуваат на возачи кои ја пречекориле дозволената брзина. Полициските контроли биле спроведени на патиштата низ целата држава во периодот од 10 до 13 април.

Од приведените лица, шест биле фатени како управуваат возило под дејство на алкохол, 23 возеле без возачка дозвола, додека четири управувале возило и покрај претходно изречена забрана. Во истиот период биле одземени и 22 возила согласно член 300-б од Кривичниот законик.

Според статистиката на полицијата, евидентирани се и 164 прекршоци за неправилно паркирање, како и 26 санкции за возење под дејство на алкохол. Санкционирани биле и 19 мотоциклисти поради неносење заштитен шлем, како и 119 учесници во сообраќајот кои не користеле сигурносен појас.

Дополнително, од сообраќај биле отстранети 20 нерегистрирани возила и уште пет поради техничка неисправност. Казни биле изречени и за 10 возачи поради затемнети стакла спротивно на прописите.

Од полицијата најавуваат дека засилените контроли ќе продолжат и во наредниот период и апелираат до граѓаните да ги почитуваат сообраќајните правила со цел поголема безбедност на патиштата.

The post 1.303 ПРЕКРШОЦИ ЗА ЧЕТИРИ ДЕНА Приведени 57 возачи за безобѕирно возење appeared first on plusinfo.mk.

Во првите десет дена од март, полицијата низ државата регистрирала дури 6.264 сообраќајни прекршоци, а 151 возач бил лишен од слобода поради безобѕирно управување со возило, соопшти Министерство за внатрешни работи .

Најголемиот дел од казните се однесуваат на пречекорување на дозволената брзина – дури 1.800 возачи возеле побрзо од пропишаното.

Според податоците на полицијата, меѓу приведените возачи 32 биле фатени како управуваат возило под дејство на алкохол, додека 50 лица возеле без возачка дозвола. Полицијата лишила од слобода и 12 возачи кои управувале возило иако имале изречена забрана за возење.

Во овој период биле одземени и 53 возила, согласно член 300-б од Кривичниот законик.

Полицијата регистрирала и 1.477 прекршоци за неправилно паркирање, како и 110 санкции за возење под дејство на алкохол.

Контролите покажале и бројни други прекршувања на сообраќајните правила. 754 учесници во сообраќајот биле казнети затоа што не користеле сигурносен појас, а 43 моторциклисти биле санкционирани затоа што возеле без заштитен шлем.

Казни добиле и 238 пешаци, како и еден возач на електричен тротинет.

Покрај тоа, 67 нерегистрирани возила биле исклучени од сообраќај, додека 79 возила биле отстранети поради техничка неисправност. Санкционирани биле и 25 возачи поради неправилно затемнување на стаклата на возилата.

Од полицијата најавуваат дека сообраќајните контроли ќе продолжат и во наредниот период, со апел до возачите и сите учесници во сообраќајот да ги почитуваат правилата за да се намали бројот на несреќи на патиштата.

The post 151 ВОЗАЧ ЗАД РЕШЕТКИ, ОДЗЕМЕНИ 53 ВОЗИЛА За 10 дена напишани 6.264 казни, над 1.800 за брзо возење appeared first on plusinfo.mk.

Од 1 до 18 февруари полицијата одзела вкупно 96 автомобили од возачи што возеле без возачка дозвола или имале забрани за возење, како и од возачи што безобѕирно управувале со возилата, односно возеле пребрзо или биле пијани зад воланот. Просечно тоа се по 5 одземени автомобили дневно.

Мерката одземање на возилото се применува од 1 февруари, согласно последните измени на Кривичниот законик.

Дали и кога возилото ќе се врати на сопственикот? 

На социјалните мрежи се отворија прашања дали одземањето на возилата е трајно или привремено и која е постапката за да им бидат вратени на сопствениците. Граѓаните се прашуваат колку долго ќе трае постапката за враќање на возилата и дали во Обвинителството ќе им се даде приоритет на овие предмети, со оглед дека судовите за да донесат одлука, прво треба да добијат обвиненија за сторителите на кривичните дела во сообраќајот.

Од Министерството за внатрешни работи велат дека полициските службеници го одземаат возилото по насоки на јавен обвинител, а натамошната постапка е во надлежност на Јавното обвинителството и на судовите.

– Возилата се одземаат согласно членовите 297, 297-а и 300-б од Кривичниот законик. Во периодот од 01 до 18.02.2026 на територија на целата држава по насоки на јавен обвинител се одземени вкупно 96 возила. На сопственикот на возилото му се издава потврда за привремено одземени предмети – велат од МВР за Плусинфо.

Полицијата врши привремено одземање и во други случаи

Трајното одземање се врши согласно член 300-б од Кривичниот законик и тоа е во надлежност на Јавното обвинителство и на судовите, додаваат оттаму.

Од полицијата велат дека вршат и привремено одземање на возилата, согласно член 344 од Законот за безбедноста на сообраќајот на патиштата и тие основи се поинакви отколку кога се одземаат согласно Кривичниот законик.

– Привремено одземање се врши кога не е продолжен рокот на важност на сообраќајната дозвола и кога е утврдена техничка неисправност на возилото. Полициски службеник може привремено да го одземе возилото до утврдување на техничка исправност, но не подолго од 3 работни дена. Доколку се утврди техничка неисправност што предизвикува голема бучава или кога сообраќајната дозвола е со изминат рок од 6 или повеќе месеци, возилото се одзема во времетраење од 90 дена – велат од МВР.

Ако одземеното возило биде оштетено, надлежните ќе ја покријат штетата

Во моментов, додаваат од МВР, одземените возила се чуваат на паркинзите на полициските станици, а понатаму ќе се чуваат на места и на локации коишто ќе бидат одредени од Обвинителството.

На прашањето дали полицијата ја гарантира заштитата на одземените возила, како на пример од кражби, временски непогоди и други случаи во кои може да настане нивно оштетување, од полицијата одговорија дека доколку се утврди дека оштетувањето настанало при транспортот или при чувањето на автомобилите во депото, надлежните ја покриваат штетата.

– При одземање се изготвува фото-документација за состојбата на возилото. Сопственикот се повикува со писмена покана, а возилото му се враќа со издавање потврда за вратени предмети. Преземањето се врши со шлеп-служба – додаваат од МВР.

Оттаму не одговорија на прашањето дали сопственикот на одземено возило откако ќе добие право да си го земе назад, ќе треба да плати лежарина за онолку денови колку што возилото било одземено и колку пари изнесува лежарината.

Обвинителството гони за кривичното дело

Од Јавното обвинителство објаснуваат дека врз основа на одредбите од член 300-б од Кривичниот законик, предвидено е одземање на моторно возило како предмет со кој е извршено кривичното дело, а условите за одземање се наведени во членот 100-а од Кривичниот законик.

– Членот 300-б предвидува задолжително одземање на моторно возило или можност за одземање на возилото во зависност од условите под кои е сторено делото. Привременото одземање на предметите со кои е извршено кривично дело додека трае постапката може да се изврши врз основа на наредба на јавен обвинител, но и од страна на правосудната полиција. По спроведената постапка, Судот во одлуката која ќе ја донесе одлучува и по однос на одземените предмети – велат од Обвинителството.

За враќање на возилото ќе одлучуваат судовите

Од Кривичниот суд Скопје најавија дека во наредните денови ќе дадат статистика за тоа дали веќе почнале да ги процесираат кривичните дела во кои како мерка им се одземени автомобили на граѓаните, односно, дали веќе кај нив пристигнале некои обвиненија од Јавното обвинителство.

– Со оглед на фактот дека предметите поврзани со новиот безбедносен систем за сообраќајни прекршоци во судот почнаа да се процесуираат неодамна и се во фаза на процесирање, во текот на следната недела ќе излеземе со официјална статистика – одговорија од Кривичниот суд на прашањата на Плусинфо.

Што предвидува Кривичниот законик? 

Основите за одземање на возилото се членот 297 од Кривичниот законик, кој се однесува на кривичното дело Загрозување на безбедноста во сообраќајот, членот 297-а за делото Безобѕирно управување со моторно возило, како и новиот член 300-б. Членот 300, пак, е за кривичното дело Тешки дела против безбедноста на луѓето и имотот во сообраќајот.

Членот 300-б предвидува дека под условите определени со членот 100-а, од сторителот ќе се одземе возилото со кое се сторени делата: Загрозување на безбедноста во сообраќајот, Безобѕирно управување со моторно возило и Тешки дела против безбедноста на луѓето и имотот во сообраќајот. Доколку возилото е во сопственост на трето лице, ќе се одземе само доколку тоа лице знаело или било должно да знае дека сторителот немал право да управува со моторно возило.

„Под условите определени со членот 100-а, од сторителот може да се одземе возилото доколку возел со брзина која ја надминува дозволената брзина за најмалку 70 километри на час во населено место или за најмалку 90 километри на час надвор од населено место“, се вели во измените на Кривичниот законик.

Членот 100-а, пак, ги одредува услови за одземање на предмети и во став 2 тој гласи: Од сторителот на кривичното дело ќе се одземат предметите што биле наменети или се употребени за извршување на кривичното дело без оглед дали се негова сопственост или сопственост на трето лице, ако тоа го бараат интересите на општата безбедност, здравјето на луѓето или причините на моралот. Став 3 предвидува дека предметите што се употребени или биле наменети за извршување на кривичното дело може да се одземат ако постои опасност повторно да бидат употребени за извршување на кривично дело.

За безобѕирно возење следува и затвор

Безобѕирното возење (член 297-а) е утврдено како кривично дело во измените на КЗ во 2024 година и гласи: Учесник во јавниот сообраќај кој не се придржува на прописите за безбедност во сообраќајот и со тоа ќе го загрози јавниот сообраќај безобѕирно управувајќи со моторно возило со концентрација на алкохол над 1,5 г/кг во крвта, со употреба на дроги, психотропни супстанции или прекурсори, возејќи во спротивна насока на јавен пат на кој коловозните ленти се физички одвоени една од друга или на автопат, претекнувајќи колона возила на непрегледно место или возејќи со брзина која ја надминува дозволената брзина за најмалку 50 км/ч во населено место или за најмалку 70 км/ч надвор од населено место, ќе се казни со затвор од 3 месеци до 3 години и со парична казна.

Став 2 предвидува дека со истата казна ќе се казни и учесник во јавниот сообраќај кој управува моторно возило без положен возачки испит, без важечка возачка дозвола или доколку му е изречена санкција забрана на управување со моторно возило која е сè уште важечка или санкција престанок на важење на возачката дозвола.

The post ПОЛИЦИЈАТА ОДЗЕМА ПРОСЕЧНО ПО 5 АВТОМОБИЛИ ДНЕВНО За враќање на возилата треба да се чека одлука на судот appeared first on plusinfo.mk.

Седум возачи биле приведени вчера низ државата откако полицијата ги фатила зад волан без возачка дозвола, а меѓу нив имало и двајца малолетници.

Акцијата се спровела на целата територија на Македонија, при што двајца возачи биле приведени во Скопје, а по еден во Гевгелија, Богданци, Гостивар, Тетово и Битола.

Особено загрижува фактот што еден од приведените во Гостивар е малолетник, како и еден од возачите во Скопје, кој управувал мотоцикл без положен возачки испит.

Сите лица се приведени во полициска станица, а по насоки на јавен обвинител возилата им се одземени. По целосно документирање на случаите, против нив ќе бидат поднесени соодветни кривични пријави.

Од полицијата апелираат до граѓаните да не седнуваат зад волан без положен испит, ниту доколку имаат изречена забрана за управување или се под дејство на алкохол, со цел да се зголеми безбедноста во сообраќајот.

The post СЕДУМ ВОЗАЧИ ФАТЕНИ БЕЗ ДОЗВОЛА Mеѓу нив и малолетници зад волан, останаа без автомобили и со кривични appeared first on plusinfo.mk.

СВР Битола вчера одзеде четири патнички автомобили, откако при сообраќајна контрола, полициски службеници констатирале дека возилата се управувани од лица кои немаат возачка дозвола, или возачката дозвола им е под активна судска забрана поради сторен прекршок.

Лицата приведени, а против нив ќе бидат поднесени соодветни пријави, соопшти СВР Битола во дневниот билтен, во кој се опишани поединечно конкретните случаи:

На 09.02.2026 во 09:45 часот на ул.„Ѓорѓи Наумов” во Битола, полициски службеници од СВР Битола го лишиле од слобода Р.А.(37) од Битола. При контрола во сообраќајот, полициските службеници сопреле патничко возило „даеву” со битолски регистарски ознаки, управувано од Р.А., при што било констатирано дека го управувал без да поседува важечка возачка дозвола. Во координација со јавен обвинител, возилото било одземено, а по документирање на настанот против него ќе биде поднесена соодветна пријава.

На 09.02.2026 во 10:45 часот на патот Прилеп – Битола, полициски службеници од СВР Битола го лишиле од слобода П.М.(39) од с.Кривогаштани, прилепско. При контрола во сообраќајот, полициските службеници сопреле патничко возило „фолксваген голф” со прилепски регистарски ознаки, управувано од П.М., при што било констатирано дека го управувал без да поседува важечка возачка дозвола. Во координација со јавен обвинител, возилото било одземено, а по документирање на настанот против него ќе биде поднесена соодветна пријава.

На 09.02.2026 во 13:10 часот на ул.„Прилепска” во Битола, полициски службеници од СВР Битола го лишиле од слобода П.А.(31) од с. Драгожани, битолско. При контрола во сообраќајот, полициските службеници сопреле патничко возило „мерцедес” со битолски регистарски ознаки, управувано од П.А., при што било констатирано дека го управувал за време на мерка – забрана за управување со моторно возило од Б категорија. Во координација со јавен обвинител, возилото било одземено, а по документирање на настанот против него ќе биде поднесена соодветна пријава.

На 09.02.2026 во 16:15 часот во Ресен, полициски службеници од ОВР Ресен го лишиле од слобода Џ.К.(38) од Ресен. При контрола во сообраќајот, полициските службеници сопреле патничко возило „фолсваген” со ресенски регистарски ознаки, управувано од Џ.К., при што било констатирано дека го управувал за време додека имал активна забрана за управување возило од Б категорија. Во координација со јавен обвинител возилото било одземено, а по документирање на настанот против него ќе биде поднесена соодветна пријава.

The post ВО ЕДЕН ДЕН УШТЕ 4 ОДЗЕМЕНИ ВОЗИЛА ВО БИТОЛА Возат без возачка, или со забрана на дозволата appeared first on plusinfo.mk.

Само во текот на вчерашниот ден полициски службеници при контроли во сообраќајот во повеќе македонски градови и села откриле 11 возачи, кои управувале возила без возачка дозвола или со активна забрана за управување моторно возило. Од нив двајца се малолетници, а по насока на јавен обвинител, на сите им се одземени возилата, и против нив ќе бидат поднесени соодветни кривични пријави, информира МВР на својата страница на Фејсбук.

На 05.02.2026 во 16:00 часот на ул.„Таше Милошевски” во Ресен, полициски службеници од ОВР Ресен го лишиле од слобода Д.К.(27) од с.Јанковец, ресенско. При контрола во сообраќајот, полициските службеници сопреле патничко возило „рено” со ресенски регистарски ознаки, управувано од Д.К., при што констатирале дека го управувал возилото без да се стекне со право за управување, односно без важечка возачка дозвола. Возилото било одземено.

На 05.02.2026 во 12:00 часот на регионалниот пат Прилеп-Македонски Брод, кај с.Ропотово, прилепско, полициски службеници од Полициското одделение Ропотово го лишиле од слобода И.Н.(28) од с.Гостиражни, општина Долнени. При контрола во сообраќајот, полициските службеници сопреле патничко возило „фолксваген голф” со прилепски регистарски ознаки, управувано од И.Н., при што констатираче дека го управувал возилото пред да се стекне со право за управување, односно без возачка дозвола. Возилото било одземено.

На 05.02.2026 во 19:30 часот на патот Ресен-с.Евла, ресенско, полициски службеници од ОВР Ресен лишиле од слобода 15- годишник од Штип. При контрола во сообраќајот, полициските службеници сопреле патничко возило „мазда” со ресенски регистарски ознаки, управувано од малолетникот, при што констатирале дека го управувал возилото без да се стекне со право за управување, односно без возачка дозвола. Возилото било одземено.

На 05.02.2026 во 16:45 часот на магистѕралниот пат Гостивар-Стража, полициски службеници од ОВР Гостивар го лишиле од слобода Ф.А.(24) од с.Чегране, гостиварско. При контрола во сообраќајот, полициски службеници запреле патничко возило „ауди“ со гостиварски регистарски ознаки, управувано од Ф.А и по извршени проверки е констатирано дека го управувал возилото без положен возачки испит. Возилото било одземено.

На 05.02.2026 во 14:30 часот на кеј „Димитар Влахов“ во Скопје, полициски службеници од СВР Скопје го лишиле од слобода Б.С.(23). При контрола во сообраќајот, полициски службеници запреле патничко возило „фолксваген поло“ со скопски регистарски ознаки, управувано од Б.С. и по извршени проверки било констатирано дека го управувал возилото без да поседува важечка возачка дозвола, односно без положен возачки испит.

На 05.02.2026 во 16:25 часот на регионален пат кај крстосница за село Ѓавато, гевгелиско, полициски службеници од СВР Струмица сопреле патничко возило „форд фокус“ со гевгелиски регистарски ознаки, управувано од А.З.(19) од Богданци. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи биле одземени.

На 05.02.2026 во 14:50 часот на локалниот пат с.Пиперево – с.Василево, полициски службеници од СВР Струмица сопреле патничко возило „фолксваген голф“ со струмички регистарски ознаки, управувано од 17-годишник од с.Пиперово, општина Василево. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи се одземени.

На 05.02.2026 во 19:00 часот на ул.„Цветан Димов“ во Струмица, полициски службеници од СВР Струмица сопреле товарно возило „мерцедес“ со струмички регистарски ознаки, управувано од К.П.(33) од с.Баница, струмичко. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи се одземени.

На 05.02.2026 во 10:15 часот на улица „Западен булевар“ во Кавадарци, полициски службеници од ОВР Кавадарци го лишиле од слобода Ш.Ј.(42) од Кавадарци. При контрола во сообраќајот било сопрено патничко возило „опел“ со кавадаречки регистарски ознаки, кое го управувал Ш.Ј., при што било констатирано дека возилото го управувал без положен возачки испит за управување на возило од Б категорија. Тој бил приведен во полициска станица, а возилото било привремено одземено.

На 05.02.2026 во 13:45 часот на улица „Народен Фронт“ во Кавадарци, полициски службеници од ОВР Кавадарци го лишиле од слобода Ј.В.(32) од Кавадарци. При контрола во сообраќајот било сопрено патничко возило „опел“ со охридски регистарски ознаки, кое го управувал Ј.В., при што било констатирано дека возилото го управувал без положен возачки испит за управување на возило од Б категорија. Тој бил приведен во полициска станица, а возилото било привремено одземено.

На 05.02.2026 околу 09:25 часот на регионален пат во с.Драслајца, струшко, полициски службеници од ОВР Струга сопреле патничко возило „фолксваген голф“ со струшки регистарски ознаки, управувано од Д.С.(32) од с.Корошишта, струшко. Притоа, било констатирано дека го управувал возилото со активна забрана за управување со моторно возило од Б категорија. По добиени насоки на јавен обвинител, возилото и возачките документи се одземени.

По целосно документирање на настаните, против лицата ќе бидат поднесени соодветни пријави.

The post ВО ЕДЕН ДЕН ФАТЕНИ УШТЕ 11 ШТО ВОЗЕЛЕ БЕЗ ВОЗАЧКА ДОЗВОЛА Возилата им се одземени appeared first on plusinfo.mk.

Двајца возачи од Охрид се соочуваат со кривични пријави откако предизвикаа сообраќајна несреќа, иако имале изречени забрани за управување со возило, а едниот од нив возел и под дејство на алкохол, соопшти МВР.

Несреќата се случила на 4 февруари 2026 година околу 20:30 часот на улицата „АСНОМ“ во Охрид. Во судирот учествувале три патнички возила – „фолксваген амарок“, „ланчија“ и „мерцедес“, сите со охридски регистарски таблички.

„Фолксвагенот“ го управувал 24-годишниот В.В.М. од Охрид, „ланчијата“ 37-годишниот Ј.П., исто така од Охрид, додека „мерцедесот“ го возел П.Н. (35).

По извршените полициски проверки било утврдено дека В.В.М. возел под дејство на алкохол, при што алкотестот покажал 0,71 промили алкохол во крвта. Дополнително, тој имал дури три активни забрани за управување со моторно возило од „Б“ категорија. И кај Ј.П. било констатирано дека има една забрана за возење од истата категорија.

За случајот бил известен јавен обвинител, по чии насоки полицијата ги одзела возилата на В.В.М. и Ј.П. По целосно документирање на настанот, против двајцата ќе бидат поднесени соодветни кривични пријави за „безобѕирно управување со возило“, по член 297-а од Кривичниот законик.

The post ПОЛИЦИЈАТА ОДЗЕДЕ ДВЕ ВОЗИЛА ОД ДВАЈЦА ВОЗАЧИ ОД ОХРИД Предизвикаа сообраќајка иако имале забрана за возење appeared first on plusinfo.mk.

Ромите кои вчера го блокираа магистралниот пат Битола–Ресен поради одземени возила, денеска повторно поставија блокади и го затворија овој патен правец, палејќи гуми, отпад и други предмети, како и претходниот ден.

Од Авто-мото сојузот на Македонија (АМСМ) потврдуваат дека сообраќајот е целосно во прекин. Според нивната информација, во 14:30 часот на магистралниот пат А3 Битола – Ресен, кај населбата Баир во Битола, патниот сообраќај е запрен поради јавен собир, а возилата се пренасочуваат низ градот Битола.

Претходно во текот на денот, истата група граѓани протестираше и пред зградата на СВР Битола, изразувајќи револт поради новите законски измени со кои полицијата има право да ги одзема возила на лицата кои ги управуваат без возачка дозвола.

Протестантите бараат укинување на законот што неодамна стапи во сила, тврдејќи дека е дискриминаторски и дека голем дел од нив немаат услови да положат за возачка дозвола поради незавршено образование.

Во врска со вчерашните и денешните случувања реагираше и премиерот Христијан Мицкоски, кој најави остар одговор од институциите.

„Разговарав денеска утрово со министерот за внатрешни работи и она што го побарав од него е за секој оној кој го прекршил законот, се заканувал или го загрозил мирот и безбедноста на граѓаните, жестоко да се одговори. И ќе биде одговорено жестоко за да не се повтори дивеењето од вчера“, изјави Мицкоски, одговарајќи на новинарско прашање.

Во меѓувреме, на социјалните мрежи граѓани масовно изразуваат поддршка за спроведувањето на законите за безбеден сообраќај и за системот „Безбеден град“, барајќи државата да не попушта пред закани и блокади.

Инаку, вчера групи граѓани од ромска националност со палење гуми, дрва и отпад блокираа повеќе патишта низ државата, при што упатуваа и сериозни закани. Протестите се однесуваа на мерките на полицијата за одземање возила на лица кои управуваат без положен возачки испит.

Од АМСМ информираат и дека од 11:30 часот е во прекин сообраќајот и на магистралниот пат А1 Прилеп – Градско, кај крстосницата за селото Ореовец на планинскиот превој Плетвар, каде околу 150 лица поставиле возила, гуми и други предмети на коловозот.

The post СО ЗАПАЛЕНИ ГУМИ ГО ЗАПРЕА СООБРАЌАЈОТ НА ПАТОТ БИТОЛА-РЕСЕН Нови блокади поради одземени возила appeared first on plusinfo.mk.

Регионалниот пат Битола–Охрид е привремено блокиран, откако група граѓани организираа протест со палење пластика и отпад, поради што сообраќајот на оваа фреквентна делница беше прекинат одреден период.

Протестот беше проследен со извици „нема правда, нема мир“ и „бараме правда“, а густ чад од запалениот отпад се забележуваше и од поголема оддалеченост, што дополнително ја отежна безбедноста на сообраќајот.

Според неофицијални информации, повод за протестот е одземањето на возила на лица кои управувале без положен возачки испит, мерка што стапи на сила со последните измени на Законот за прекршоци. Дел од присутните јавно негодуваа поради, како што наведуваа, високата вредност на одземените автомобили, а на видеоснимки од настанот може да се слушне извикување: „Кола од 5.000 евра ми земавте“.

Протестирачите изразија незадоволство и поради, како што тврдат, дискриминација, посочувајќи дека дел од нив немаат завршено образование, што им оневозможува да полагаат за возачка дозвола.

На местото на настанот биле присутни и полициски службеници кои ја следеле состојбата и го обезбедувале просторот. Засега нема официјални информации за приведени лица, ниту за точната должина на траењето на блокадата, како и дали ќе следуваат дополнителни мерки од надлежните институции.

 

View this post on Instagram

 

A post shared by Скопје1 / Skopje1.mk (@skopje1mk)

The post 📽️ „КОЛА ОД 5.000 ЕВРА МИ ЗЕМАВТЕ“ Граѓани палат ѓубре, блокиран патот Битола-Ресен appeared first on plusinfo.mk.