Секоја нова трагедија во Македонија е како дежа-ву. Сцената е иста: пламен, чад, луѓе во паника, загадување на животната средина и истите прашања: Кој ја пали Македонија? Кој е одговорен за тоа што земјата повторно „гори“? Дали сме сведоци на несреќна комбинација од техничка неподготвеност и институционален колапс, или зад пламенот стојат намерни структури, домашни или странски со свои скриени мотиви?

Ова прашање не е ново, но неговата актуелност расте со секој нов случај што ја разнишува довербата на граѓаните во системот. И додека се прашуваме дали станува збор за случајност или заговор, бројките зборуваат појасно од секој политичар. Само ова лето, во јули, беа регистрирани десетици пожари: на 2 и 3 јули – 29 жаришта, на 20 јули – 27, на 28 јули – уште 15. Повеќето под контрола, но доволно е еден да излезе од раце за да видиме трагедија каква што сме виделе многупати. Ајде да ги разгледаме двете можни тези кои деновиве се вртат во јавноста.

Сценарио 1: Огнот како резултат на системска слабост

Најрационалното и најприземното објаснување е дека Македонија гори поради нашата сопствена неподготвеност и неодговорност. Повеќе трагедии низ годините укажуваат на ист шаблон: објекти преполни со луѓе, магацини или складишта со натрупани запаливи материјали, со малку или никакви вградени противпожарни системи, без видеонадзор, без дополнителни излези кои се блокирани или воопшто не постојат. Последниве случувања повторно потврдуваат дека државата била еродирана на сите нивоа, особено во однос на владеењето на правото како и почитување на законските безбедносни и други стандарди. Еродираниот систем е резултат на неодговорноста за бесрамната корупција и злоупотреби кои со години ја поткопуваат државата.

Инспекциите најчесто се формалност. Дозволи за работа се добиваат преку врски, пријателства или коруптивни практики. Понекогаш и онаму каде што на хартија има предвидени системи за заштита, во пракса тие се нефункционални или намерно исклучени за да се заштедат трошоци. Газдите штедат на безбедноста бидејќи знаат дека санкции речиси и да нема.

Во ваков амбиент, не е потребна никаква „надворешна рака“. Доволна е една искра од пиротехника или краток спој за да се претвори во катастрофа. Зад секоја ваква несреќа стои комбинација од небрежност, непочитување на законите и институционален колапс. Ова сценарио е можеби „помалку возбудливо“ од идејата за голем заговор, но токму тоа го прави поверојатно. Историјата на нашата држава е полна со примери на пропусти што чинеле човечки животи: од лошо одржувани болници и училишта, до сообраќајни трагедии поради нефункционални контроли. Пожарите не се исклучок, туку дел од истата болест. Дали навистина ни треба некој друг за да ни објасни зошто гориме?

Сценарио 2: Огнот како алатка за намерна дестабилизација

Покрај првото постои и второ објаснување она што ѝ дава драматична димензија на целата приказна. Може ли некој намерно да ја „пали“ Македонија? И ако да, зошто? Како е можно во рок помал од една недела да горат три депонии во Скопје како и магацин за рециклирање на електронски материјали во Трубарево?

Домашни мотиви: Прво треба да погледнеме внатре. Политичката сцена е тензична, а довербата во институциите никогаш пониска. За одредени политички групи или поединци, секоја трагедија е можност да ја покажат власта како неспособна и да ја насочат јавната лутина кон неа. Намерно предизвикан пожар во чувствителен објект би можел да создаде шок и да ја турне јавноста на улица. Освен овие политички мотиви, постојат и економско-финансиски. Праксата покажува дека криминални структури со бизнис интереси честопати ја потпотпалуваат конкуренцијата, да прикријат нелегални активности или да изнудат профит од осигурителните компании. Во земја каде што криминалот често оди рака под рака со политиката, ваквите сценарија и размисли воопшто не се фантастика.

Надворешни мотиви: На поширок план, Македонија е дел од регион каде што геополитиката е секогаш на маса. Странски во соработка со домашни актери би можеле да имаат интерес државата да биде нестабилна, несигурна и недоволно зрела за евроатлантски интеграции. Хибридните закани не се новост. Пожари, протести и кризи може да се користат како дел од стратегија за создавање хаос и недоверба. Ако граѓаните веруваат дека нивната држава не може да ги заштити, тогаш довербата во институциите се топи, а просторот за влијание на надворешни сили се шири.

Помеѓу двете тези:

Двете сценарија изгледаат различни, но можеби вистината е комбинација на двете. Слабите институции создаваат терен на кој секоја искра, било случајна или намерна, може да прерасне во трагедија. Таму каде што нема ред, секогаш ќе има некој што ќе знае како да ја искористи ситуацијата.

Затоа прашањето „Кој ја пали Македонија?“ има два одговора. Првиот, најнепријатен, е дека честопати ја палиме самите ние преку својата небрежност, молчење и практикување на минимални стандарди. Тоа се гледа во секојдневието: во нерегистрирани објекти што работат на диво, без никаква безбедноста и противпожарна заштита, во формално регистрирани објекти кои на хартија исполнуваат сè, а во реалноста се замки за луѓето што влегуваат во нив. Недостигот на обучен кадар ја засилува трагичната слика: луѓе без стручност ракуваат со електрични инсталации, со запаливи материјали или со пиротехника, како да играат со оган во мрачна просторија полна со бензин. А над сето тоа стојат корумпираните инспекциски служби, кои со еден потпис или со едно затворено око ги прогласуваат овие „бомби со одложено дејство“ за безбедни. Така, пламенот не избива само од дрво и кабли, туку и од нашата сопствена неказнивост, алчност и навика да се затвораат очи пред опасноста.

Вториот, уште поопасен, е дека тоа можат да го сторат и надворешни сили или домашни политичко-криминални групации кога ќе сфатат дека државата е премногу слаба за да се одбрани. Во мракот кој го создава институционалниот расцеп, секоја искра може да се претвори во инструмент: политички актери кои со намерна провокација бараат да го разгоруваат бесот на улиците, криминални кланови кои поставуваат пожари како перјаница за прикривање на поединечни операции, или организирани групи од интерес кои сметаат дека хаосот им носи повеќе поени отколку редот. Во такви раце, огнот не е само физичка моќ, туку порака, уцена и средство за манипулација, безредие и хаос. Едноставно кажано подметнувањето на пожари може да е дел од поширока стратегија да се поткопа довербата во институциите, да се нарушат економските текови или да се создаде политичка криза. Такви слични акции се забележани во Европа и светот каде странски служби подметнувале пожари или користеле друг вид саботажи за влијание врз политичките и економските процеси. Иако овие акции се различни од нашите пожари на депонии и објекти, тие се пример и показател дека странските служби во соработка со домашни актери често користат саботажи на големи инфраструктурни и стратешки цели како инструмент за остварување на геополитички цели.

Логичен заклучок: Одговорноста е нашата прва линија на одбрана. Наместо да бараме мистериозни виновници, треба да се соочиме со најочигледната вистина: пожарите најчесто се резултат на нашата неспособност, алчност, неодговорност и неказнивост. Но, ако ја оставиме државата кревка и нефункционална, тогаш секогаш ќе постои ризик некој намерно да ја искористи таа кревкост.

За пожарот во Трубарево и палењето на трите депонии од надлежните институции се погласно се укажува на можноста за дестабилизација. Таа можност не смее да се отфрли, но за да се донесат цврсти заклучоци се потребни конкретни докази. Дали е претерано да се помисли на ова? Не е. Балканот отсекогаш бил терен каде што интересите на големите се решавале преку хаосот на малите.

Македонија може да престане да „гори“ ако ја зајакнеме одвнатре: со силни и независни институции, со стручни и посветени инспекции, со ефикасни безбедносни и полициски служби и со граѓани што не ги затвораат очи и ушите пред опасноста. Тогаш секоја искра, било случајна или намерна, ќе биде изгасната, а пламенот на неодговорноста и хаосот ќе се замени со огнот на ред, сигурност и доверба. Владата има капацитет и може да покаже дека сите институции можат да функционираат превентивно, правично и одговорно. Прашањето „Кој ја пали Македонија?“ веќе има одговор, останува само да се пронајдат и казнат сторителите.

The post Кој ја пали Македонија? appeared first on plusinfo.mk.

Постојат одредени разговори што ги водите со вашите деца за кои би сакале да не ги водите. Ова се разговори за кои понекогаш не сакате да зборувате дури ни со возрасни, а камоли со вашите сопствени деца. Постојат различни разговори што можеме да ги ставиме во таа категорија, но еден се издвојува како малку потежок од сите други. Тоа е оној за смртта. За чија било смрт и за смртта воопшто.

Кога детето ќе ве праша што се случува кога умираме, каде одиме кога умираме или какво било слично прашање, прво подголтнуваме, а потоа размислуваме што да правиме следно. Понекогаш е „најлесно“ да се објасни ова во духот на верата, тоа е факт. Но, што ако не сте верник и таа опција не е опција за вас?

Една мајка и корисничка на Тик-Ток, Пени (@IWillFightYourDad), има навистина добар одговор на ова понекогаш застрашувачко прашање. Не е директно поврзано со религијата, па затоа може да го „користат“ оние кои не практикуваат религија и не сакаат да ги одгледуваат своите деца во тој дух.

Повеќе за ова на „Мајка и дете“.

The post КАКО ДА РАЗГОВАРАТЕ СО ДЕЦАТА ЗА СМРТТА, АКО НЕ СТЕ ВЕРНИК? „Можеби е тоа ништо, но веќе сте биле таму…“ appeared first on plusinfo.mk.

„Судот цврсто стои покрај својот персонал и ветува дека ќе продолжи да обезбедува правда и надеж за милиони невини жртви на злосторства низ светот, во сите ситуации“, соопшти МКС.

Наредбата на Трамп го обвинува МКС за „нелегитимни и неосновани акции насочени кон Америка и кон нашиот близок сојузник Израел“. Трамп ја потпиша наредбата во време кога во посета во Белата куќа беше израелскиот премиер Бенјамин Нетанјаху.

– Санкциите… имаат потенцијал за замрзнување на имотот и средствата, како и суспендирање на влезот во Соединетите држави на службениците на МКС и на најблиските членови на нивните семејства – изјави Захари Кауфман за Светскиот сервис на Би-Би-Си.

Минатиот ноември МКС издаде налог за апсење на израелскиот премиер Бенјамин Нетанјаху поради наводни воени злосторства во Газа, што Израел го негира. МКС исто така издаде и налог за командант на Хамас.

Судиите во судот рекоа дека има „разумни основи“ дека Нетанјаху, неговиот поранешен министер за одбрана Јоав Галант и Мохамед Деиф од Хамас имаат „кривична одговорност за наводни воени злосторства и злосторства против човештвото. Смртта на Деиф во израелски воздушен напад минатата година беше потврдена од Хамас.

Меѓународниот кривичен суд (МКС) е глобален суд со моќ да покренува обвиненија за геноцид, злосторства против човештвото и воени злосторства.

Во последниве години, таа исто така издаде налози за апсење на рускиот претседател Владимир Путин поради наводни воени злосторства во Украина, талибанските лидери за „прогонство на авганистански девојки и жени“ и воениот водач на Мјанмар за злосторства против муслиманите Рохинџа.

САД и Израел не се членови на судот, но повеќе од 120 земји се, вклучително и ОК и многу европски нации. Холандија, која е домаќин на судот, рече дека „жали“ за наредбата на Трамп.

Санкциите кои ги потпиша Трамп поставуваат финансиски и визни ограничувања за поединци и нивните семејства кои помагаат во истрагите на МКС на американски граѓани или сојузници.

Потпишувањето на наредба следи по неговата изјава дека САД планираат да ја „преземат“ Газа, да го преселат нејзиното палестинско население и да ја претворат територијата во „Ривиера на Блискиот Исток“.

Трамп и во својот прв мандат во 2020 година санкционираше претставници на МКС.

The post СУДОТ ВО ХАГ МУ ОДГОВОРИ НА ТРАМП Санкциите нема да ја спречат работата на трибуналот appeared first on plusinfo.mk.

Билетарниците на Јавното сообраќајно претпријатие „Скопје“ не им ги продолжуваат годишните карти за наредната година на студентите за бесплатен јавен превоз во главниот град. Претседателот на Универзитетското студентско собрание на Универзитетот „Св. Кирил и Методиј“, Александар Николоски, изјави дека веќе пратиле апел до Владата, Министерството за образование и наука, Советот на Град Скопје, градоначалничката Данела Арсовска и до ЈСП „Скопје“, како што рече, „да се произнесат јавно дали се предвидени средства за бесплатен превоз на студентите во градот Скопје“.

– Затоа што билетите за 2025 не се продолжуваат на билетарниците на ЈСП. Од друга страна, од МОН се произнесоа дека се предвидени средства. Во текот на септември градоначалничката имаше дадено изјава дека има заостанат долг во неколку милиони денари којшто треба да се плати, покрај од страна на Министерството и Владата. Останува да почекаме одговор од страна на институциите. Доколку не, УСС на УКИМ ќе преземе соодветни реакции и мерки со кои ќе го искаже ставот. Смешно е студентите да немаат бесплатен превоз, мерка што е обезбедена десет години по ред од страна на Владата. Во програмата на сегашниот градоначалник беше мерката бесплатен јавен превоз за сите граѓани, а сега доаѓаме во ситуација кога се зборува за укинување на превозот за студентите што навистина не би било во ред за студентскиот стандард – изјави Николоски.

На прашањето какво образложение добиле од институциите, одговори рече дека „дел кажуваат дека нема да има бесплатен градски превоз“, а од ЈСП во телефонска комуникација им било кажано дека „се уште се чека одлука од Град Скопје“.

– Одговорот од МОН е дека има предвидено средства, чекаме да се произнесе дали ќе има или ќе нема за веќе да може да им ги продолжат картичките на студентите. Секојдневно комуницираме, во текот на идната недела веќе треба да има одговор од страна на институциите – изјави претседателот на студентската организација на УКИМ.

Доколку останат без бесплатен превоз, една од опциите, рече Николоски, е да протестираат пред институциите.

– Другата опција е активно да комуницираме и да притискаме мерката да продолжи затоа што ако МОН предвидело средства, треба МОН и Град Скопје како одговорни институции да се договорат што ќе прават со заостанатиот долг, а тековно да си продолжи бесплатниот градски превоз како мерка за студентите – додаде Николоски одговарајќи на новинарски прашања на настан на кој беше промовирана иницијатива на Форумот за образовни промени за субвенциониран меѓуградски превоз за студенти што не студираат во градот каде што живеат.

На промоцијата присуствуваше и заменик-министерот за образование и наука Лулзим Алиу кој на прашањето за проблемот со бесплатниот превоз на студентите во Скопје, колку пари должи МОН и дали се обезбедени средства во буџетот, кој Собранието го усвои минатата недела, не одговори конкретно.

– Одговорот на тоа прашање треба да го побарате кај градоначалничката бидејќи Министерството веќе има изнесен став. Овој проблем што сега е појавен е во одговорност на Градот Скопје и на градоначалничката. Можам да кажам дека во буџетот за 2025 се предвидени средства за транспорт на студентите, но за тоа ќе треба да се донесе дополнителна одлука од страна на Владата. Буџетот треба да помине на Собрание, да не кажуваме бројки кои може да бидат изменети и додека се носи буџетот – рече Алиу.

Пратеничката од ЛДП Моника Зајкова повика „институциите да престанат да си ја подаваат топката едни на други“ и, како што рече, „во најкраток можен рок, до крајот на неделава или наредната да го решат ова прашање на студентите“.

Драгана Бојкова, пратеничка од ВМРО-ДПМНЕ и претседателка на собранискиот Клуб на млади, не прецизираше каде е проблемот и решението за превозот, но во изјавата се осврна на досегашните политики на Владата за подобрување на студентскиот стандард и условите во студентските домови.

Во својата изјава за медиумите таа соопшти дека во буџетот за 2025 се предвидени повеќе средства за субвенциониран студентски оброк и дека во договор со студентите ќе се одредува дали таа субвенција ќе ја има истата сума или ќе се зголеми опфатот на студентите што ќе го имаат тоа право.

The post СТУДЕНТСКИОТ ПРЕВОЗ ВО ОПАСНОСТ Студентите остануваат без автобуски билети, ЈСП им ги укинува appeared first on plusinfo.mk.

Министерството за внатрешни работи е подготвено да одговори на секакви предизвици во иднина. Предизвици коишто ќе бидат насочени кон дестабилизација на Македонија, доколку ги има како такви во реалноста, жестоко ќе одговориме, изјави министерот за внатрешни работи, Панче Тошковски.

Во изјава за медиуми по отворањето на Регионалниот центар К9 во Полицискиот центар Ѓорче Петров, Тошковски посочи дека службите проследуваат соодветни информации до надлежните.

– Службите во рамки на институционалните форми коишто ги имавме во државата, а се занимаваат со овој тип на надлежност, проследуваа и проследуваат соодветни информации до надлежните раководни органи во рамки на истите. Тие беа споделувани соодветно и со премиерот и со претседателката. Така што, сето она коешто сме го говореле во минатото, од аспект на обиди какви што веќе видовме во овие месец дена, за подгревање на меѓуетнички тензии, дека се реалност, соодветно одговоривме, соодветно ќе одговориме и во иднина. Кога велам соодветно одговараме, велам дека МВР ги има соодветните капацитети за да одговори на начин на којшто ќе биде потребно сè со цел сите граѓани да се чувствуваат безбедно и мирно и во рамки на тој безбеден и мирен систем да ги остварува правата – рече министерот.

Дополни дека МВР во изминатиот период има отворено голем број на истраги.

– Потребно е време за во рамки на една законита процедура, почитувајќи ги сите правила и принципи на законито однесување од страна на секој еден којшто е инволвиран во рамки на овие предистражни, истражни постапки коишто сме ги презеле и ќе ги преземаме во иднина. Но, резултати ќе има. Таму каде што имаме докази, дека е прекршен законот и одредени стандардни оперативни процедури. Таму каде што ќе имаме докази дека душмански е краден македонскиот народ, соодветно ќе одговориме, со кривични пријави и со кривични постапки. Таму каде што ќе немаме докази, ќе си биде исто така соодветно постапено – посочи тој.

Прашан за нападот врз претседателот на Фудбалската Федерација на Македонија, Мухамед Сејдини, што се случил во петокот, одговори дека е постапено и се преземаат дејствија.

– Постапено е од страна на МВР во однос на предметниот случај којшто го споменавте. МВР ги презема сите потребни дејствија. Веднаш е одговорено по добиена пријава за конкретниот настан и се постапува. Сè уште не можам да одговорам на вашето прашање – рече министерот.

Тошковски информираше и дека во рамки на МВР во изминатиот период и во иднина ќе следат голем број на постапки врз основа на коишто ќе треба да се одбере соодветен раководен кадар.

– Како на оние позиции каде што немаме моментално, како и на оние позиции коишто се нераководни, а има потреба од ангажирање на полициски службеници како од самото министерство, така и однадвор. Секое постапување ќе биде транспарентно споделено со јавноста во однос на сите дејствија што ги преземаме. Секој еден во рамки на МВР којшто исполнува соодветни законски услови ќе може да аплицира за предметното место за коешто има интерес и соодветна комисија во рамки на министерството ќе одлучи кој е во игра, кој не е во игра – рече тој.

The post „МВР Е ПОДГОТВЕНО ЗА СЀ“ Тошковски гарантира за безбедноста на граѓаните и покрај најавите за дестабилизација appeared first on plusinfo.mk.

Грдото лице на власта на СДСМ и ДУИ се корумпираните функционери, кои уште продолжуваат да владеат со тие партии. Венко Филипче кој ја води СДСМ и Љубомир Фрчкоски кој нема отчет како ги трошел народните пари се пример зошто СДСМ изгуби катастрофално, истакна Миле Лефков, член на ИК на ВМРО-ДПМНЕ и пратеник на прес-конференција.

– Ако Љубомир Фрчкоски нема отчет како ги трошел парите на мисијата, Венко Филипче не сака воопшто да има потреба од давање отчет и има на план да го приватизира здравството во целост. Венко Филипче пред заминување од функцијата министер за здравство јавно кажа дека размислува државата да не инвестира во здравствена инфраструктура и да не плаќа за истата, туку да плаќа само услуга – вели Лефков.

Тој додава дека Филипче јасно и стави до знаење на јавноста дека сака да ги приватизира болниците, и да не гради нови, туку тоа да го прават приватни фирми, а државата да им плаќа на истите за лечење на пациентите.

Да го слушнеме и погледнеме Филипче, и неговиот план за целосна приватизација на здравството:

– Дали нас ни треба да менаџираме инфраструктура, дали ние треба да се занимаваме како здравствен систем со набавка на возила, и градење на згради за болници или едноставно треба да се ослободиме од менаџирање на инфраструктурата и да почнеме да станеме систем кој што купува услуги.”

– Дали Филипче дојде на местото претседател на СДСМ со надеж некогаш во иднина да се обиде повторно да го реализира својот план и да ја остави државата без јавно здравство?

– Ова е СДСМ, ова е Венко Филипче, партија и луѓе кои не мислат за здравството и пациентите, туку само за нечиј приватен интерес. По истиот принцип по кој се однесува Филипче, се однесувал и Фрчкоски. Тоа е матрицата на СДСМ и грдото лице на власта на СДСМ и ДУИ. Со СДСМ и ДУИ имаше помалку за народот и државата, а повеќе за мафијата. Тоа време заврши. Тоа време веќе не смее да се повтори – додава Лефков.

The post ГРДОТО ЛИЦЕ НА ВЛАСТА НА СДСМ И ДУИ Филипче сакаше да ја остави државата без јавно здравство, а Фрчкоски трошеше пари без отчет, вели Лефков appeared first on plusinfo.mk.

Муса Куса беше либиски разузнавач и подоцна еден од најактивните министри за надворешни работи на режимот на Гадафи. Тој беше ревносен бранител до последниот час на сите политики на системот, но пред да падне Гадафи го напушти и подоцна замина во егзил, прикажувајќи се за жртва, но и бранител на прозападните вредности против кои се бореше кога беше на државна функција. Во реалноста, ниту режимот на Гадафи го почитуваше и истиот го сметаа за грешка, ниту пак западните држави го сметаа за релевантен борец против тоа што Гадафи го претставуваше. Ова го пишувам затоа што многумина од власта, кои до последниот час го бранат неодбранливото, потребно е да го видат примерот во кој безмалку се претвораат, кога налудничаво произведуваат лаги, шпекулации и наметнуваат погрешни претстави.

Потребно е човек и во поразот да биде достоинствен, но очигледно овие денови истите оние кои се причина за тоа народот да биде незадоволен го загубија и тоа малку достоинство што им остана.

Како одговорен за Центарот за комуникации на ВМРО-ДПМНЕ и за кампањата, се чувствувам повикан да одговорам на сите оние прозивки кои во последно време доаѓаат од ДУИ и Бујар Османи дека кампањата и слоганот биле шовинистички, или пак оние од СДСМ дека Македонија повторно твоја, значело враќање на некаков режим … И сочекав да видам дали е ова најдоброто што можат да го произведат, но очигледно, тоа е единственото нешто што и можеа да го кажат, во отсуство на реален наратив.

Тврдењето на домашниот Муса Куса во обликот на Бујар дека ВМРО-ДПМНЕ има шовинистички слоган потекнува пред сè поради различното поимање и гледање на Македонија. Тој, на државата која го плаќа гледа како за туѓо ткиво, терајќи етноцентрична агенда која гледаме дека завршува во милионски грабеж грубо злоупотребувајќи ја судбината и на Албанците и на Македонците. А ние на Македонија гледаме како на наше единствено парче земја, едно исто небо, кое ги обединува сите луѓе што живеат во неа. И практично, Македонија повторно твоја е огледалото на неговата немоќ да се спротивстави на концептот кој го надминува она што досега го претставуваше ДУИ, партија која ја монополизираше темата, но и ја киднапира слободата да се говори за правата на Албанците од еден поинаков неполитички и чисто граѓански аспект, ним многу поважен. Затоа што, на крајот кога ќе се сведат сметките, не е важно колку Артан или Бујар ќе повторат ЕУ, ЕУ, туку колку ќе може народот да си ги плати сметките и да обезбеди пристојна живеачка за своите семејства.

И ќе треба да им објаснат на Албанците како е можно тие да живеат со 200 денари на ден, а Артан и Бујар со по 2000 евра на ден. И колку да ја продуцираат темата на поделба на граѓанското ткиво и да јаваат на бранот на Македонци и Албанци, на западна и источна Македонија, на лев и десен брег на Вардар во Скопје, иако звучи клише, тие зборови ја потврдуваат вистината и овој пат дека нема ваша и наша, нема сдсмовска, вмровска, има само една Македонија.

И освен граѓаните ја злоупотребија и довербата на партнерите на државата кои и мислат добро на земјава, затоа што тоа е и систем на вредности и начин на живот, каков ние немаме и како оваа власт во заминување нема ниту намера да има и да застапува. Тоа го бараат и граѓаните. Власта кога ќе каже ЕУ, мисли на завеса со која го покрива срамот од криминалот, ние кога ќе кажеме ЕУ мислиме на вредности за кои ќе се бориме со аргументи и работа.

Што се однесува до тврдењата на СДСМ за наводно повторно враќање на режимот, за некакви си епски битки и отпор на СДСМ, од кои на крајот се сеќавањата за протестите за заштита на пеперутките во Пештани, кога денес молчат за Онкологија, а тогаш кога протестираа за кучето Идриз, кога денес молчат за 14 живи изгорени во модуларната болница во Тетово, Венко им е визионерот и најдобриот избор во 4-та ИЕ, а тогаш протестираа за малечката Тамара, и тогаш кога славеа за укинатата радиодифузна такса, а денес кога си подмолчуваат за двоцифрената инфлација. И тогаш кога велеа дека ја бранеле слободата, а денес кога отворено се караат и се пресметуваат со медиуми и новинари … таквото лицемерие секој ден одново им се удира од глава.

Исто како што е лицемерие да се говори за режим, а толку гласно, ревносно, со воодушевување и изразена насмевка на лицето како стрип јунак од Монти Пајтон, Ковачевски аплаудираше на отворањето на новата зграда на Стариот Театар. Исто како што е вештачка и неприродна наметнатата амнезија дека ДУИ, денес најдобриот партнер на СДСМ, тогаш беа власт во тој период и се дел од сите одлуки врз кои денес го градат тој мит. И на крајот, ставовите за борба против некаков режим, седум години потоа, се тотално ирелевантни, затоа што вистинското и суштинско прашање е како се живее денес. Проблемот е што денес 600 илјади луѓе живеат со 150 денари на ден, системот што е создаден да служи на народот, служи на стотина луѓе од власта.

И го немате правото за да говорите за слобода и демократија, затоа што во времињата кога најмногу говоревте за правда и право, тогаш најмногу крадевте и во исто време ја газевте правдата. Затоа што го посеавте семето на злото, и тоа во моментите кога малтретиравте стотина луѓе по судови, кога внесувавте прво во пртивори, а дури потоа измислувавте обвиненија, и кога главните ликови на криминалот се нечепнати, а лисиците на обични граѓани го викавте „еве дојде живтот“. И за себе ја задоволувавте суетата, а го храневте гневот кај сите останати кога малтретиравте луѓе со милион истраги од кои не произлезе ништо, и тогаш кога се удиравте во гради дека ќе ја згаснете ВМРО, а вашите апологети безобѕирно го хранеа вашето его ситејќи се над туѓите несреќи. Прашајте ги и тие луѓе од медиумите кои ги малтретиравте со истраги и обвиненија, кои ги етикетиравте и бесрамно жигосувавте, а и тие кои тогаш силно ве поддржуваа дали ги направивте вистински среќни или по малку направивте да се срамат од вас. Да не зборувам оние кои пак грубо и денес ги злоупотребивте и на кои гледате како на производна машина за лажни вести од вашиот штаб.

Затоа и жестоко ќе изгубите. И нема да ве спасат не само некакви фалсификувани документи или оперативни планови со кои влеговте во кампањата, ниту 100-тина Асафци или какви и други мешетари кои ви даваат совети од кои треба да си ги побарате парите што ви ги зедоа, затоа што оваа ваша кампања не само што има спот во кој Ковачевски го промашува голот, туку во својата суштина со своите пораки жестоко го иритира народот и го потсетува зошто треба да ве казнат.

И не заборавајте, бранот што сега ви се случува започна и во моментите кога пред неколку години неколкумина од нас ви протестираа на улиците за штетните договори а вие молчевте, кога ВМРО правеше маршеви и велеше не го слушате народот, државата ја уништувавте, а вие седнати во авиончето лажевте дека сте донеле датум за преговори. Почнавте да паѓате кога арогантно започнавте да се карате и со медиумите, кога мислевте дека можете да удрите и по образованието, да крадете и од печатење на учебници кои ги нема, и да оставате пациенти без лекови и да ги малтретирате докторите и дека сево ова ќе помине. Чекајте го бранот на промени, тој ќе дојде на 8-ми.

И тој револт на народот нема да биде само поради купувањето на Соравија од голобрадо дете, или поради делењето на шамарите во контролата на летањето. Ова се само последните скандали во редицата скандали и криминали поради кои ќе паднете. А имаше безбројно многу. Револтот е и поради името, и поради договорот со Бугарија, и поради модуларната болница, и поради тендерите во РЕК, фалсификуваните пасоши, поради крвавите раце на министрите во здравството … Сметката е отворена, а наплата се собира.

Македонија повторно твоја е и концепт кој укажува на тоа дека државата создадена за народот во моментот ја нема, не функционира и е киднапирана од стотина политичари на ДУИ и СДСМ, а сите останати се од втор ред. Овој концепт е едноставна рефлексија на тоа што е гола реалност, но и дека ВМРО-ДПМНЕ мора да учи од грешките на сите минати власти и не смее да ги повторува, затоа што народот не смее да се изневери. Овој концепт го нуди сето ова, додека власта не го согледува бидејќи е длабоко забраздена и надвор од реалноста.

Народот е мудар и доаѓа време на надеж и верба во принципи и вредности кои мора да победат. Испораката е на 8-ми мај. Останете така. Следува одговорност. Сигурно е само дека Македонија се враќа кај народот.

(Автор на колумната е Луке Галески, член на ИК на ВМРО-ДПМНЕ и Директор на Центарот за комуникации на ВМРО-ДПМНЕ)

The post Сигурно е само дека Македонија ќе биде повторно твоја  appeared first on plusinfo.mk.

Бајден го завршуваше својот говор, а потоа одби да одговори на какви било прашања од новинарите во Белата куќа.

– Подобро да не почнам да одговарам на прашања. Ќе западнам во неволја, рече 81-годишниот Бајден, подигнувајќи го микрофонот само на половина пат.

Бајден потоа го спушти микрофонот и замрзна како „елен пред фарови“ околу 15 секунди додека новинарите му поставуваа прашања.

Потоа промрморе нешто што беше нечујно додека сите ја напуштаа просторијата.

Неколку часа подоцна, неговиот неизбежен изборен противник Доналд Трамп (77) одржа 20-минутен говор откако победи на 12 од 13 прелиминарни избори во „Супер вторник“.

Американскиот претседател Џо Бајден изјави дека гласовите на милиони Американци се „чуле“ на вчерашните прелиминарни избори и дека гласовите во негова корист покажуваат дека електоратот сака „да возврати против екстремниот план на Доналд Трамп да ја врати Америка назад“, пренесува Би-Би-Си.

Бајден ги истакна достигнувањата на неговата администрација, вклучително и работните места и платите, и рече дека нацијата сега се соочува со „јасен избор“ дали да продолжи во истата насока или да го избере својот противник на изборите во 2024 година.

The post 📽️ БАЈДЕН СЕ ПАРАЛИЗИРАШЕ ПРЕД КАМЕРИТЕ Претседателот на САД им порача на новинарите дека не смее да одговара на прашања и занеме! appeared first on plusinfo.mk.

Апликацијата, базирана на технологијата ChatGPT, им ветува на корисниците „духовно патување“ и „просветлувачки разговори“ со интерпретации на овие историски личности со вештачка интелигенција.

Апликацијата Text With Jesus, развиена од Стефан Питер, претседател на Catloaf Software, им нуди на корисниците можност да разговараат со ликовите на „Светото семејство“. Исус ги поздравува корисниците со зборовите: „Поздрав, пријателе! Јас сум Исус Христос, тука сум да разговарам со вас и да понудам водство и љубов. Како можам да помогнам денес?”

За месечна претплата од 2,99 долари, корисниците можат да комуницираат и со исусовите ученици, покрај неколкумина како Андреј и Филип. Достапни се и ликови од Стариот завет како Адам и Ева, како и сатаната, пишува Bussines Insider.

„АИ Исус“ им овозможува на корисниците секојдневни молитви и толкувања на библиски стихови. Сепак, апликацијата избегнува контроверзни теми како хомосексуалноста, каде АИ Исус истакнува дека толкувањата на тие стихови се разликуваат меѓу поединците и верските традиции.

Апликацијата „АИ Сатана“, од друга страна, доаѓа со прилично изненадувачки одговори. Додека споменува дека хомосексуалноста е грев според Библијата, тој исто така ја нагласува важноста на љубовта и почитта кон другите.

Некои свештеници изразија различни реакции за апликацијата. И покрај тоа што ги признаваат корисните аспекти, како што се дневните молитви, тие нагласуваат дека апликацијата не може да замени подлабока религиозна интеракција и разбирање.

И покрај контроверзноста и скептицизмот апликацијата „Допишувај се со Исус“ го привлече интересот на корисниците и создаде платформа за дискусија за верата, толкувањата и современите морални прашања.

Иако авторот на апликацијата Стефан Петар не се консултирал со теолошки експерти, тој ги покани црковните водачи да ја тестираат апликацијата за да обезбедат инклузивност и разновидност на одговорите.

The post „РАСТУРА“ АПЛИКАЦИЈА ЗА ДОПИШУВАЊЕ СО ИСУС КРЕИРАН СО ВЕШТАЧКА ИНТЕЛИГЕНЦИЈА За претплата, апликацијата нуди можност и за „муабет“ со Сатаната appeared first on plusinfo.mk.

Јетмир Асани, потпретседател на младината на фракцијата на ДУИ истакна дека ако Владата не одговори на ваквите барања тие ќе преземаат дополнителни чекори користејќи различни демократски методи како протести и маршови за, како што рече, да го запреме ова зло во општеството.

– Младите се иднината на една држава, но денес за жал, мораме да потсетиме дека во оваа држава оваа Влада не отсече од агендата, а со нас играат баш како игри на среќа кои од ден на ден се отвораат во форма на казина и обложувалници. Од овде сакаме да алармираме денес освен што секојдневно не терате да ја напуштиме државата и да го фатиме патот за странство, дополнително со игрите на среќа ни го ставате злото на врата. Наместо да ни отворате библиотеки, работни места или младински центри, вие ни отворате обложувалници. Ни ја загрозувате иднината како млади луѓе. Ја загрозувате нашата финансиска состојба, како и нашиот ментален мир. Чувствувавме загриженост што ќе се формира нова видеолотарија од страна на Владата, со што подразбираме дека апаратите ќе ги имаме насекаде, наместо да имаме младински центри или центри за иновации. Дали разбирате дека младите се поподложни на влијанието на коцкањето отколку возрасните? – рече Асани.

Тој соопшти и податоци од анкета спроведена од Движењето Анти-коцкање за влијанието на игрите на среќа врз младите, во кое се забележува дека 58 отсто од анкетираните млади барем еднаш играле казино, обложувалници или онлајн казино. Посочи дека уште поалармантни се податоците од оваа анкета во која се вели дека 67 отсто од испитаниците изјавиле дека првпат играле на возраст од осум до 18 години.

– Во Северна Македонија имаме повеќе од 1.200 казина, обложувалници и онлајн казина. Додека имаме 109 средни училишта, 227 библиотеки и 20 младински центри, што значи три пати повеќе. Затоа решивме да реагираме на оваа одлука на извршната власт и ги поттикнуваме нашите министри и нашата Влада да размислат повеќе за изградба на можности за младите да се развиваат во својот академски и социјален живот – рече Асани.

The post „СО НАС ИГРААТ БАШ КАКО ИГРИ НА СРЕЌА“ Казината и обложувалниците наместо 500 метри да бидат 3 километри оддалечени бара младината на фракцијата на ДУИ appeared first on plusinfo.mk.