„Дали имате намера да се вклучите во шпионажа, саботажа, кршење на законите за извозна контрола или во какви било други незаконски активности додека престојувате во Соединетите Американски Држави?“

„Дали имате намера да имигрирате во Соединетите Американски Држави или да останете трајно, спротивно на условите на визата што ја барате?“

Внимавајте да нe згрешите – кога барате виза за САД, вашиот одговор на овие две прашања мора да биде „не“.

Американските власти воведуваат построги критериуми за издавање визи, при што апликантите ќе мора да одговорат со „не“ на овие две клучни прашања – во спротивно, нивното барање може автоматски да биде одбиено.

Станува збор за дел од пошироката стратегија за заострување на имиграциската политика, каде што контролата на потенцијалните мигранти и посетители станува сè поригорозна. Новите правила се однесуваат на безбедносни и миграциски ризици, а прашањата се директно поврзани со можни злоупотреби на визниот систем.

Според објаснувањата, кандидатите мора да негираат дека имаат намера да останат нелегално во САД или дека би можеле да претставуваат безбедносен ризик. Доколку на некое од тие прашања одговорат потврдно – или ако нивните одговори предизвикаат сомнеж – американските власти имаат основ веднаш да ја одбијат визата.

Оваа мерка доаѓа во време кога администрацијата во Вашингтон веќе презема низа чекори за ограничување на миграцијата, вклучително и построги проверки и собирање дополнителни лични податоци за апликантите.

Паралелно, европските земји веќе предупредуваат дека дури и валидна виза или одобрение за влез не гарантира преминување на американската граница, бидејќи конечната одлука секогаш ја носат граничните службеници.

Експертите оценуваат дека ваквите прашања не се новост сами по себе, но нивната примена станува сè построга и построго се толкува. Практично, секој одговор што би можел да се протолкува како ризичен – дури и индиректно – може да значи крај на апликацијата.

Во позадина на овие мерки е стравот од злоупотреба на туристичките визи, особено од лица кои влегуваат легално, но потоа остануваат и работат нелегално. Американските власти веќе подолго време предупредуваат дека токму тоа е една од клучните слабости на системот.

Затоа, новите правила се гледаат како дел од поширок обид за филтрирање на апликантите уште во рана фаза – преку едноставни, но суштински прашања што можат да ја одредат нивната судбина уште пред да стапнат на американско тло.

The post АКО НЕ ОДГОВОРИТЕ „НЕ“ НА ОВИЕ ДВЕ ПРАШАЊА, НЕМА АМЕРИКАНСКА ВИЗА Заострени правила за влез во САД appeared first on plusinfo.mk.