На граничниот премин Табановце, царинските службеници откриле неверојатни 129,7 килограми марихуана скриени во ладилник на камион со словенечки регистарски таблици. Осомничен е 43-годишен државјанин на Србија, кој се обидел да ја пренесе дрогата во земјава, потврдија од Обвинителството во Куманово.

Според првичните информации, дрогата била распоредена во 14 големи торби, внимателно скриени во полуприколката на камионот. Возилото било во сопственост на превозна компанија од Словенија, а при редовна контрола на граничниот премин, цариниците забележале неправилности во товарниот дел и веднаш повикале полициски екипи.

„Обвинителството веднаш отвори истрага и достави предлог до судијата на претходна постапка за определување мерка притвор, со оглед на сериозноста на делото и опасноста осомничениот да се даде во бегство“, соопштија од Основното јавно обвинителство во Куманово.

Според Кривичниот законик, за делото „Неовластено производство и пуштање во промет наркотични дроги“ е предвидена казна затвор до 10 години.

Обвинителството и Царинската управа продолжуваат со истрагата за да утврдат дали Србинот делувал сам или бил дел од поголема меѓународна нарко-мрежа, која ја користи трасата преку Македонија како дел од балканската рута за шверц на дрога.

The post ФАТЕН НА ТАБАНОВЦЕ СО 130 КИЛОГРАМИ МАРИХУАНА Обвинителството бара притвор за Србинот кој се обидел да внесе дрога во Македонија appeared first on plusinfo.mk.

Криминал од милионски размери го потресе Куманово, откако 37-годишна вработена во јавно претпријатие е пријавена дека во период од речиси четири години успеала да присвои над 8.276.000 денари, односно околу 134.500 евра, во дури 410 наврати, манипулирајќи со службени податоци и документи.

Како што соопшти Секторот за внатрешни работи Куманово, против М.А. (37) е поднесена кривична пријава за „проневера во службата“ и „фалсификување или уништување деловни книги“, додека нејзината колешка Ј.А. (52), раководителка на одделение за сметководство и финансова оператива, се товари за „несовесно работење во службата“.

Според обвинението, М.А. на позиција благајник во јавното претпријатие, од 2020 до 2024 година во 410 наврати присвојувала пари што граѓаните ги плаќале во готово, а наместо да ги евидентира и уплати на сметката на претпријатието, таа задржувала дел од средствата. Притоа, таа фалсификувала документи во компјутерскиот систем, дуплирајќи веќе постоечки броеви и спецификации, а дел од изготвените документи и извештаи намерно ги уништувала за да ја сокрие трагата.

Од Основното јавно обвинителство Куманово потврдуваат дека е отворена предистражна постапка.

– Обвинителството постапува по поднесената пријава и ќе бидат извршени сите потребни истражни дејства. Станува збор за сериозно и организирано прекршување на службени овластувања што резултирало со финансиска штета за јавното претпријатие – велат од ОЈО Куманово.

Случајот го открила внатрешна ревизија, а полицијата во соработка со обвинителството собира дополнителни докази. Истражителите не ја исклучуваат можност да бидат опфатени и други лица.

The post УКРАЛА НАД 134.000 ЕВРА ОД ЈАВНО ПРЕТПРИЈАТИЕ Кумановка фалсификувала и уништувала докази за своја корист appeared first on plusinfo.mk.