Две лица од селото Корешница се осомничени за грабнување на жител од Неготино, кого го киднапирале, тепале и му се заканувале со пиштол, со цел да го принудат да признае наводно силување, информираше Основно јавно обвинителство Кавадарци.

Според обвинителството, двајцата осомничени – 37-годишник и 30-годишник – на 12 април го пресретнале оштетениот во дворот на неговата куќа и насилно го внеле во автомобил.

„Осомничените го качиле оштетениот во возило и се упатиле по стариот пат кон Демир Капија, при што цело време му се заканувале по живот и физички го напаѓале“, велат од обвинителството.

За време на грабнувањето, еден од осомничените употребил пиштол, кој го репетирал и му се заканил на оштетениот. Тие му го одзеле телефонот и му ставиле црни ќеси на главата за да не може да види каде го носат.

„Кога пристигнале во шума, го извадиле од возилото и го принудувале да слуша аудио снимки и да признае дека тој е лицето од снимката, но оштетениот одбивал“, соопшти обвинителството.

Откако одбил да признае, осомничените продолжиле со закани и физичко насилство, удирајќи го со боксови и пластична цевка, при што му нанеле тешки телесни повреди.

Сепак, пред да му го одземат телефонот, оштетениот успеал да испрати порака за помош до полицијата, а соседи го забележале моментот кога бил внесен во возилото. Врз основа на тие информации, полицијата ги идентификувала осомничените.

„Откако дознале дека се откриени, осомничените сами го однеле оштетениот во полициската станица во Неготино“, додаваат од обвинителството.

Поради тежината на делото, јавниот обвинител предложил притвор за двајцата осомничени, оценувајќи дека постои опасност од бегство и можност да го повторат делото доколку се бранат од слобода.

The post ГО КИДНАПИРАЛЕ ОД ДВОР И БРУТАЛНО ГО ТЕПАЛЕ Му ставиле ќеса на глава и му се заканувале со убиство appeared first on plusinfo.mk.

Членови на ловечко друштво од Неготино склучувале незаконски договори за „закуп под закуп“ издавајќи дневни дозволи за лов за домашни и странски ловци. Министерството за внатрешни работи соопшти дека 56-годишник и 36-годишник се пријавени за повеќе кривични дела.

Земајќи пари на рака, иако немале договор за концесија тие успеале да го оштетат друштвото за околу 40.000 евра, односно над 2,5 милион денари.

„Во периодот од 2021 до 2025 година, двајцата како вработени во ловечко друштво „ЗЛД Вардар“ Неготино, издавале дневни дозволи за лов за ловишта ‘Корешница’ и ‘Бесвица’, иако немале договор за концесија за тие ловишта, односно направиле договор ‘закуп под закуп’ спротивно на законските одредби. Паричните средства од гости ловци, странски државјани ловци и членарината од членовите ги земале во готовина без да издадат соодветен документ.“

Според соопштението, парите што ги собирале двајцата осомничени не биле целосно евидентирани, туку делумно биле прикажувани како донации на сметката на друштвото, додека остатокот го задржувале за себе. Дополнително, преку видео надзор ги следеле активностите во ловиштата и кога ќе забележеле незаконит лов, барале пари од лицата за да не ги пријават, што укажува на систематско изнудување.

„Тоа го правеле на тој начин што кога на камерите од видео надзорот забележувале лица што вршат незаконит лов им барале одреден паричен надомест да уплатат на сметката на ловечкото друштво како донација за да не ги пријават во полиција. Потоа, Д.М. во својство на претседател на друштво, и К.М., без оправданост подигнувале пари од сметката на друштвото и ги задржувале за себе.“

Истрагата покажала и дека едниот од пријавените вршел уцени и влијаел врз сведоци во постапките, наведувајќи ги да даваат лажни искази, со што дополнително ја попречувал правдата.

Со судски наредби биле извршени претреси во домовите и службените простории, при што биле одземени документи поврзани со работењето на друштвото. Во меѓувреме, дел од членовите на управниот одбор, поради сомневањата за злоупотреби, поднеле оставки.

Пријавите се поднесени до Основното јавно обвинителство Кавадарци, а опфатени се дела како проневера, несовесно работење, уцена и попречување на правдата.

The post ИЗДАВАЛЕ ДОЗВОЛИ НА „ЦРНО“, РЕКЕТИРАЛЕ ЛОВЏИИ И СТРАНЦИ Членови на ловечко друштво во Неготино се „офајдиле“ со 40.000 евра appeared first on plusinfo.mk.

64-годишната Ангелина Ангелова од Неготино го загуби животот во трагична сообраќајна несреќа, откако во неа удрил возач на товарно возило кој немал важечка дозвола и бил речиси целосно слеп. Основното јавно обвинителство Кавадарци поднесе обвинителен акт против лицето за кривично дело „Тешки дела против безбедноста на луѓето и имотот во сообраќајот“ по член 300 став 2 во врска со член 297 став 1 од Кривичниот законик.

Според обвинението, несреќата се случила на 3 декември 2024 година, на регионалниот пат Р1103, на делницата Пепелиште – Неготино, кај местото викано „Лаки“. Обвинетиот управувал товарно возило „цитроен џампер“ со велешки таблички иако во тој момент не поседувал важечка возачка дозвола, таа му била со истечен рок.

Како што информира Обвинителството, обвинетиот „не обрнал внимание на пешаците кои се движеле покрај коловозот“ и со страничниот ретровизор удрил во главата на Ангелина Ангелова. Ударот бил фатален, жената паднала од патот, а добиените повреди, скршен череп, пршлени и повеќе коски, биле смртоносни.

Во соопштението се наведува и дека „на оштетената ѝ се констатирани одредени пропусти, бидејќи имала можност визуелно да го забележи возилото и да се отстрани“, но тие се оценети како секундарни.

Дополнителен шок во истрагата било откритието дека обвинетиот имал попреченост, слепило со 99% намалена видна функција, за што примал инвалидска пензија и додаток. И покрај тоа, тој управувал со возило, а во текот на истражната постапка успеал дури и да ја продолжи возачката дозвола.

„Постапуваме по сите индиции што укажуваат на можна злоупотреба на документација и системски пропусти. Побаравме од ОВР Неготино да ги провери условите под кои обвинетиот добил возачка дозвола и инвалидска пензија“, изјавија од Основното јавно обвинителство Кавадарци.

Оваа несреќа отвори прашања за контролата при издавање на возачки дозволи, особено кај лица со сериозни здравствени пречки.

The post ЈА УДРИЛ СО РЕТРОВИЗОР ВО ГЛАВА, ЗАГИНАЛА ВЕДНАШ Обвинетот бил слеп 99% и возел со истечена возачка дозвола appeared first on plusinfo.mk.