Иако обвинението против осомничените Дејан Драгијевиќ и Срѓан Јанковиќ беше потврдено по вторпат, случајот сѐ уште е обвиен со мистерија. Тие првично признаа дека го извршиле убиството, но подоцна ги повлекоа признанијата. Дополнителен шок предизвика смртта на братот на Дејан, Далибор Драгијевиќ, кој признал дека помогнал во сокривањето на телото, но почина за време на полицискиот притвор, пред да биде изведен пред обвинителството. Главното прашање што останува без одговор е – каде е телото на малата Данка?

Исчезнувањето и потрагата

Данка Илиќ исчезна на 26 март 2024 година во населбата Бањско Поље, кај Бор, додека била со мајка си и братот пред семејната ненаселена куќа. Според сведочењето на мајката, девојчето исчезнало за неколку секунди, додека таа му давала вода на синот. По безуспешната самостојна потрага, веднаш биле алармирани сопругот и полицијата. Таа вечер, за првпат во Србија, беше активиран системот „Најди ме“.

Во првите денови, полицијата и спасувачите со кучиња го пребаруваа теренот, багери расчистуваа области во близина на исчезнувањето, а беа прегледани бунари, подземни канали и шахти. Хеликоптери ја надлетуваа населбата, а беа претресени и сите куќи во селото. Покрај тоа, полицијата ги проверуваше личните карти на мештаните и собираше информации од можни сведоци.

Апсења и погрешни траги

Во текот на првите денови од истрагата, беа извршени неколку апсења. Полицаец од Бор беше приведен под сомнение дека споделувал доверливи информации од истрагата. Исто така, двајца мажи од Босна и Херцеговина беа уапсени бидејќи лажно тврделе дека имаат информации за исчезнатото девојче и барале 25.000 евра.
Родителите на Данка повеќепати биле повикувани на разговор во полиција, како потенцијални сведоци. На шестиот ден, потрагата се прошири и во Виена, каде што се појави снимка од девојче што личеше на Данка, но подоцна беше утврдено дека станува збор за друго дете.

Откритието: признание и мистерија

На десеттиот ден од потрагата, полицијата објави дека Данка Илиќ е убиена. Осомничените Дејан Драгијевиќ и Срѓан Јанковиќ беа уапсени и првично признаа дека ја удриле со автомобил, ја ставиле во багажникот и потоа телото го фрлиле на депонија кај Старобањскиот пат. Меѓутоа, кога истрагата дојде до прашањето каде точно се наоѓа телото, тие одбија да соработуваат.

Покрај нив, беше уапсен и братот на Дејан, Далибор Драгијевиќ, кој признал дека му помогнал на брат му да го сокрие телото. Тој требаше да биде сослушан во обвинителството на 7 април, но утрото почина во полициски притвор. Лишен од слобода беше и таткото на Драгијевиќ, кој од почетокот одбиваше да даде исказ.

Обвинението и нејасностите

Пред истекот на рокот за поднесување обвинение, судските власти покренаа обвинителен акт против Дејан Драгијевиќ, Срѓан Јанковиќ и Радослав Драгијевиќ. Обвинението беше поднесено на 29 септември 2024 година, шест месеци по исчезнувањето на девојчето.

Во текот на судската постапка, Дејан Драгијевиќ три пати го менувал исказот, а Срѓан Јанковиќ бил испрашуван четири пати. Обвинението беше потврдено во февруари годинава, но и понатаму нема информации за дополнителните докази или за одлуките во врска со жалбите. Не е познато кога ќе започне судењето, а мистеријата околу исчезнатото тело на малата Данка останува нерешена.

The post ПОМИНА ЕДНА ГОДИНА, А ТЕЛОТО СЀ УШТЕ ГО НЕМА Случајот со исчезнатата Данка Илиќ останува мистерија appeared first on plusinfo.mk.

„По спроведена истражна постапка, јавен обвинител од Основното јавно обвинителство Скопје поднесе Обвинителен акт против жителка на Гостивар со престојувалиште во Скопје за две кривични дела – Запуштање и малтретирање на дете од член 201 став 1 и две кривични дела – Телесна повреда од член 130 став 2 во врска со став 1 од Кривичниот законик.

Од април годинава, 34-годишната обвинета како родител, со грубо запоставување на својата должност за грижа и воспитување, ги запуштила и ги малтретирала своите две деца – едното родено 2017, другото 2019 година.

На децата им ги врзувала рацете, колената и стапалата со самолеплива лента и ги оставала да седат во таква состојба на стол или на нивните креветчиња додека била во станот. Со помалото дете комуницирала манифестирајќи вербална и физичка агресивност и не покажувала грижа за подобрување на неговата состојба, иако вештачењата извршени по наредба на јавниот обвинител утврдија дека станува збор за социјално и емоционално запуштено дете со психомоторна и психосоцијална зрелост под неговата реална возраст.

На 7 мај, при вршење семејно насилство, обвинетата телесно ги повредила своите деца. Додека остварувала видео повик на социјална мрежа со нејзиниот вонбрачен пратнер, видно вознемирена, започнала без никаков повод и причина да ги удира децата по нивните тела, со што им нанела телесни повреди – набиеници и подливи“ – се вели во соопштението на ОЈО Скопје.

Надлежниот јавен обвинител до Основниот кривичен суд Скопје доставил предлог да се продолжи претходно определената мерка притвор за обвинетата.

The post ГИ ВРЗУВАЛА СО САМОЛЕПЛИВА ЛЕНТА, ГИ ТЕПАЛА, ИМ СЕ ДЕРЕЛА… Обвинение за мајка-монструм од Гостивар appeared first on plusinfo.mk.

Прашана дали очекува напад од поранешните сопартијци, Рангелова рече дека не очекува, туку дека и честитале и има и пораки, бидејќи тие знаеле дека нема никаква вина.

– Не сум поддржувала насилство, тоа се докажа и во овој предмет, жал ми е што требаше четири години да се докажуваме. Со овие аргументи сега излегува токму спротивното од она што го тврдеа Мицкоски и компанија и сега можеме да се пресметаме на еден дуел доколку цени дека треба да имаме дуел. Можеби не се чувствува достоинствено да излегува со некој бивш функционер од партијата без оглед на моето партиско искуство би сакала очи во очи да се пресметаме кој одработува за оваа власт, дали ние или тој, изјави Рангелова.

Таа им порача на оние сведоци кои, како што рече лажно сведочеа против неа, да им служи на чест.

The post Рангелова: Се докажа дека сум невина, сега ќе се пресметам со тие што ме обвинуваа appeared first on plusinfo.mk.

Италијанскиот Сенат гласаше за укинување на парламентарниот имунитет на лидерот на екстремно десничарската партија Лига, Матео Салвини, со што се отвора патот за судска постапка поради случај на блокада на мигранти на море, додека тој беше член на владата.

Судот во Палермо го обвини Салвини дека ги чувал мигрантите блокирани на брод во август 2019 година во својство на министер за внатрешни работи, бидејќи одбил да дозволи брод со повеќе од 80 мигранти да влезат во сицилијанското пристаниште.

Салвини (47) се соочува со затворска казна до 15 години, доколку биде прогласен за виновен на суд.

– Горд сум што ја бранев Италија и повторно ќе го сторија тоа. Оние што мислат дека ќе ме исплашат со судење што е политичко, се лажат, рече Салвини.

The post Укинат парламентарниот имунитет на Матео Салвини appeared first on plusinfo.mk.

Јавен обвинител од Основното јавно обвинителство Скопје донесе Решение за отфрлање на кривичната пријава против три физички и две правни лица за Тешки дела против здравјето на луѓето од член 217 став 2 во врска со член 207 став 1 од Кривичниот законик, а во врска со смртта на лицето Булент Ибрахим.

Кривичната пријава од семејството на починатиот се однесуваше на лекарска интервенција извршена врз Ибрахим на 18.02.2019 година, која ја извршил еден од пријавените лекари во изнајмена операциона сала во сопственост на вториот пријавен, а со асистенција на третата пријавена. Според семејството, пријавените очигледно неподобно средство и начин на лекување, како и несоодветни хигиенски мерки со што предизвикале влошување на здравствената состојба на пациентот, кој по оперативниот зафат добил висока температура и сепса. Првопријавениот лекар кој ја извршил интервенцијата, наместо да го упати пациентот на лекување во специјализирана здравствена установа, доаѓал во домот на оштетениот и му давал инфузија. Кога на 21.02.2019 година констатирал дека терапијата што ја препорачал не дава никаков ефект и дека пациентот е во критична состојба, пријавениот со сопствено возило го однел оштетениот во ГОБ „8-ми Септември“, каде и покрај обидите на лекарите да го спасат неговиот живот, тој починал.

По приемот на пријавата, Основното јавно обвинителство Скопје го спои овој предмет со предметот кој веќе беше оформен врз основа на допис од Државниот санитарен и здравствен инспекторат за спроведен здравствен надзор врз здравствените установи каде била извршена интервенцијата врз пациентот.

Постапувајќи во рамките на своите надлежности, јавниот обвинител ја обезбеди целокупната медицинска документација за третманот на починатото лице и ја проследи до Лекарската комора и до Институтот за судска медицина, криминалистика и медицинска деонтологија од кои побара да изготват стручно мислење по однос на постапувањето на докторите во конкретниот случај.

Лекарската комора со допис го извести Обвинителството дека по спроведен стручен надзор едногласно констатирала дека лекувањето на лицето Булент Ибрахим, условите и начинот на лекување, односно на укажување здравствена заштита билe спроведени без стручни пропусти, согласно упатствата на медицината базирана на докази.

Институтот за судска медицина, пак, постапувајќи по наредбата од Основното јавно обвинителство Скопје со допис одговори дека со оглед на тоа што не е извршена ниту судско-медицинска ниту патолошка обдукција врз починатото лице, не може да се утврди причината за смртта на Ибрахим, односно причинско-последичната врска меѓу извршената интервенција и смртта на пациентот. Јавниот обвинител се интересираше за можноста да се изврши ексхумација на телото на починатиот, при што доби одговор дека таква обдукција не би била од корист во смисла на доказна вредност, бидејќи органите и ткивата веќе би биле трулежно променети.

Подносителите на пријавата во текот на постапката приложија и приватно вештачење изготвено од лекар – судски вештак од областа на хирургија и трауматологија, кој извршил вештачење врз медицинската документација која му била доставена од семејството и констатирал причинско-последична поврзаност меѓу извршениот оперативен зафат и смртта на пациентот. Јавниот обвинител го повика на распит вештото лице, а при неговото испитување, заради професионална помош од областа на судската медицина, ангажираше и двајца технички советници од Институтот за судска медицина. Во текот на распитот вештакот наведе дека е тешко да се утврди постоење на сепса и таа да се поврза со смртта на пациентот без притоа да биде направена обдукција и во целост се согласи со техничките советници дека е потребно да постои обдукционен протокол, односно дека во конкретниот случај отсуствуваат релевантни докази. Тој се изјаснил дека во конкретниот случај сепсата била една од можностите за настапување на смртта, но не и единствена можност и дека отсуствуваат битни докази за да се утврди причинско-последичната врска.

Првопријавениот лекар, кој го извршил оперативниот зафат, пред јавниот обвинител го негираше сторувањето на кривичното дело и потенцираше дека Државниот санитарен и здравствен инспекторат, Лекарската комора и формираната стручна комисија во Министерството за здравство не констатирале пропусти во однос на неговото постапување како доктор.

За постоење на кривичното дело –Тешки дела против здравјето на луѓето од член 217 став 2 во врска со член 207 став 1 од Кривичниот законик потребно е да се утврди значително отстапување од правилата на медицинската наука и струка што како последица придонело за влошување на здравствената состојба на пациентот. Делото е конструирано како деликт на повреда, што значи дека не се инкриминирани лекарски грешки што остануваат во границите на дозволениот ризик, односно немаат таква последица.

Врз основа на утврдените факти и прибраните докази во предметот, со оглед на тоа што причинско-последичната врска во конкретниот случај беше невозможно да се утврди, Основното јавно обвинителство Скопје донесе Решение за отфрлање на кривичната пријава против трите пријавени физички лица. Против двете правни лица, пак, кривичната пријава е отфрлена, бидејќи законските одредби од цитираните членови не предвидуваат кривична одговорност за правни лица.

Решението за отфрлање на кривичната пријава е доставено до подносителите на пријавата, кои согласно член 288 став 2 од Законот за кривична постапка имаат право на жалба до Вишото јавно обвинителство Скопје во рок од 8 дена по приемот.​

The post Отфрлена кривичната пријава за лекарска грешка во случајот со пациентот Булент Ибрахим appeared first on plusinfo.mk.