Српскиот претседател Александар Вучиќ објави дека службите интензивно трагаат по двајца снајперисти во Белград. Тој изјави дека се во градот веќе три дена и дека нивното присуство е потврдено со разузнавачки податоци, јави Телеграф.

– Моментално ловиме двајца снајперисти во Белград, за кои знаеме дека се во градот. И не можеме да ги пронајдеме веќе три дена. Се надевам дека ќе успееме. Ќе видиме кои се тие и какви цели имаат. Знаеме дека пристигнале, знаеме и од каде доаѓаат парите. Верувам дека надлежните служби ќе можат да го решат тоа – рече Вучиќ.

Меѓутоа, тој нагласи дека не сака да создава паника во јавноста и дека одлучиле да не ја информираат јавноста порано, за да не се создаде впечаток дека владата ги плаши граѓаните.

– Во претходните денови и недели имавме разни разузнавачки податоци кои не беа наивни. Не сакавме да зборуваме затоа што, што и да кажете, тие ќе кажат дека владата ги плаши луѓето – додаде тој.

Понатаму, Вучиќ ги поврза овие информации со неговата теза за неуспешна „обоена револуција“, велејќи дека дел од опозицијата и странските центри се обиделе да предизвикаат нестабилност.

Притоа се осврна и на инцидентот во Чачак, каде вооружен маж рани цивил, нарекувајќи го тој настан доказ за зголемено насилство.

– Го застрелаа Милан Богдановиќ, кој не беше ниту виновен ниту одговорен. Дојдовме до таа точка. Пораката е дека е дозволено да се застрела некого невин. Секој чин на насилство што го вршат, мора да го прикријат со лаги – нагласи тој.

Сепак, српскиот претседател заклучи дека нема да прифати сила или надворешно влијание врз власта.

– Не ми паѓа на памет да прифатам сила, насилство или надворешно влијание. Постои само еден начин. Нема друг начин. Тие не можат да победат на изборите и тие го знаат тоа – изјави Вучиќ.

The post ЛОВИМЕ ДВАЈЦА СНАЈПЕРИСТИ ВО БЕЛГРАД, ВЕЛИ ВУЧИЌ Српските служби трагаат по странски платеници од „обоената револуција“ appeared first on plusinfo.mk.

Рускиот претседател Владимир Путин на пленарната седница на 22-от Валдајски клуб јавно предупредил дека западни разузнавачки структури имаат за цел да ја дестабилизираат Србија.

– Се согласувам со претседателот Вучиќ. Нашите специјални служби го потврдија: одредени западни центри се обидуваат да спроведат обоена револуција, во овој случај – во Србија – изјави Путин, според преносот на „Известија“.

Тој ја дефинирал обоената револуција како „нелегално преземање на власта“, предупредувајќи дека надворешното мешање не може да носи стабилност.

– Тоа е внатрешна работа на Србија, Русија нема намера да се меша – истакна рускиот лидер.

Притоа упатил и индиректна порака до младите:

– Секогаш има луѓе, особено млади, кои не ја разбираат целосно позадината, ниту последиците од нелегитимни промени на власта – дециден бил Путин.

Руската служба за надворешно разузнавање уште во септември објавила дека некои европски елити ќе се обидат да ја искористат годишнината од трагедијата во Нови Сад на 1 ноември за да ги активираат протестите.

– Младите во Србија се патриоти. Треба да разберат што е подобро за нивната земја – еволутивни промени со нивно учество, а не револуционерна манипулација – рече Путин.

Потсетувајќи на страдањата на српскиот народ низ двете светски војни, тој заклучил:

– Оние што ги туркаат младите на улиците сакаат Србија повторно да страда, иако тоа не го кажуваат јавно.

The post ЗАПАДОТ ВЕ МАНИПУЛИРА, ИМ ПОРАЧА ПУТИН НА МЛАДИТЕ СРБИ Се спрема ли обоена револуција во Србија? appeared first on plusinfo.mk.

Српскиот претседател Александар Вучиќ денес во Токио изјави дека е „благодарен“ на Руската служба за надворешно разузнавање за информациите за можен обид за насилна промена на власта на годишнината од падот на крошната во Нови Сад, наведувајќи дека српските безбедносни служби дополнително ќе контактираат со своите руски колеги во врска со овие наводи.

Во врска со вчерашното соопштение на Руската служба за надворешно разузнавање, во кое ја обвини Европската Унија за подготовка на „Мајдан“ во Србија на 1 ноември, Вучиќ им рече на новинарите дека Белград „секогаш внимателно ги анализира изјавите“ на таа агенција, „дури и кога ја критикува“ неговата влада за испраќање муниција во Украина, и дека „секогаш одговара на руските партнери и спроведува одредени мерки“.

– Оние што ја организираа обоената револуција ќе мора да направат последен обид да ја преземат власта со сила. Не се сомневам дека оние што ја организираа обоената револуција не можат само да се откажат. Вложени се премногу пари, па затоа ќе мора да направат последен обид да ја преземат власта со сила. Ние сме подготвени за тоа долго време – рече Вучиќ.

Руската служба за надворешно разузнавање вчера објави дека „немирите во Србија, со активно учество на млади луѓе, во голема мера се производ на субверзивните активности на Европската Унија и нејзините земји-членки“ и дека „евроелитата има намера да ја искористи годишнината од трагичните настани“ во Нови Сад на 1 ноември „за да ја сврти ситуацијата во своја корист“.

Во соопштението се наведува и дека Брисел „очекува дека испумпувањето средства во медиумите и невладините организации ќе го мобилизира гласачкото тело, ќе ги изведе луѓето на улиците и ќе го заврши „српскиот Мајдан“ според сценарио кое е испробано многупати“.

Претседателот на опозициската Партија на слободата и правдата, Драган Ѓилас, денес изјави дека руската служба за надворешно разузнавање „целосно го поддржала режимот на Вучиќ со реизмислување на српскиот Мајдан“.

The post РУСИТЕ НИ КАЖАА ДЕКА ВО СРБИЈА СЕ СПРЕМА МАЈДАН, ВЕЛИ ВУЧИЌ Српскиот лидер смета дека допрва ќе има обоени револуции appeared first on plusinfo.mk.

Претседателката на Народното собрание на Србија, Ана Брнабиќ, денеска изјави дека првата фаза на „обоената револуција“ во Србија е завршена, со цел да се предизвика омраза и длабока поделба во јавноста, и дека сега е актуелна втората фаза – „терор и насилство“, како подготовка за трета фаза.

Брнабиќ пред новинарите во Домот на Народното собрание оцени дека втората фаза се однесува на уништување, кршење и палење на просториите на политичките партии на неистомислениците, пред сè на Српската напредна странка (СНС), чиј член е и таа, како и на палење на државни и локални институции – обвинителства, судови и градски општини.

– Ако некој помислил дека станува збор за насилство заради насилство – не, не е. Тоа е втората фаза – терор и насилство, за да се создаде слика на целосен хаос, губење на контролата и целосна дестабилизација на нашата земја – изјави таа, пренесува Бета.

Според претседателката на Парламентот, ова се прави за да се премине во „третата фаза на обоената револуција“, односно да се појават луѓе кои ќе „наметнат решение за наводно враќање на мирот и стабилноста“. Како пример, таа го спомна неформалниот документ на директорот на Форумот за етички односи, Душан Јањиќ, кој наводно бил испратен до меѓународната заедница за решавање на кризата во Србија.

– По вчерашниот ден, сосема е јасно дека она што го гледаме 9 месеци е школски пример за обид за обоена револуција и насилна смена на власта – оцени Брнабиќ.

Според неа, се создава впечаток дека за враќање на мирот и стабилноста во земја во која е создаден хаос е потребна интервенција на странски фактор.

– Туку се заокружува целата приказна, имате целосна окупација на земјата и одземање на секој суверенитет – смета Брнабиќ.

Таа наведе дека во споменатиот документ се предлага решение кое подразбира ставање под целосна контрола и надзор на претседателот на Србија, Народното собрание, безбедносните и разузнавачките структури, Советот за национална безбедност и Државниот центар за податоци.

Таа го отфрли овој документ, испраќајќи порака до, како што рече, „странците“, да не помислуваат да зборуваат за него или за сличен документ.

– Во Белград и Србија нема да има нов Мајдан, ќе се бориме со сите демократски средства, преку нашите институции, Собранието и ќе пружаме отпор на секое место – не со терор и насилство, зашто тие би сакале да видат граѓански судири и војна. Ќе се бориме зачувувајќи ги нашите институции и нашата земја. Нашиот одговор е не – изјави Брнабиќ.

The post „ТЕРОРОРОТ Е ВТОРАТА ФАЗА НА ОБОЕНАТА РЕВОЛУЦИЈА“ Брнабиќ тврди дека некој сака да создаде слика на хаос во Србија appeared first on plusinfo.mk.

Српскиот претседател Александар Вучиќ го посети полицаецот Лазар Бакиќ кој беше нападнат за време на седумчасовната блокада на српската радиотелевизија РТС во протестите кои избувнаа во понеделникот.

– Tој е ужасно повреден, има сериозни физички повреди – изјави Вучиќ додавајќи дека нема повеќе да ја толерира „обоената револуција“ и дека ќе биде уапсен секој што ќе врши насилство.

 

View this post on Instagram

 

A post shared by Aleksandar Vučić (@buducnostsrbijeav)

Полицаецот се здобил со тешки повреди на окото пред зградата на Јавната служба. Според српски Б92 бил нападнат одзади. На социјалните мрежи се појави снимка од моментот на нападот:

@andamiros0Blokada RTS-a♬ original sound – andamiros0

Според Вишото јавно обвинителство во Белград, кое ѝ наложи на полицијата итно да ги идентификува напаѓачите, „постојат основи за сомнение дека неколку лица нападнале припадници на жандармеријата и ги удирале одзади, во момент кога припадниците на жандармеријата минувале за да ја обезбедуваат зградата на РТС“.

Српски Н1, пак, тврди, дека полицаецот не бил нападнат од демонстрантите туку од друг полицаец. Повикувајќи се на снимка објавена на социјалната мрежа Икс, Н1 пишува дека жандарм удрил маж во цивилна облека на улицата Абердарева и дека врз основа на облеката која ја носи нападнатиот, наводно може да се заклучи дека тоа е Лазар Бакиќ.

The post 📷 📽 ВУЧИЌ СЕ СЛИКАШЕ СО ПОВРЕДЕНИОТ ПОЛИЦАЕЦ ВО ПРОТЕСТИТЕ Кој го нападна Лазар Бакиќ? appeared first on plusinfo.mk.

Критичарите на српскиот претседател велат дека се изгледа дека историјата ќе се повтори – додека Александар Вучиќ го најавува „најголемиот митинг во историјата на Србија“, повикувајќи ги илјадниците приврзаници на неговата Српска напредна партија (СНС) да се соберат во центарот на Белград денеска (петок, 26 мај), на интернет кружи снимка од 5 октомври 2000 година. Тогаш илјадници српски граѓани го принудија Слободан Милошевиќ следниот ден да застане пред телевизиските камери и да објави дека повеќе не е претседател на СР Југославија и дека „ќе им се посвети на семејството и внукот Марко“.

На социјалните мрежи кружи уште едно видео – последниот митинг на Чаушеску во Букурешт, кој собра ни помалку ни повеќе туку 1 милион луѓе. Тоа не му помогна да остане на власт.

– Тогаш беше доволно само едно, единствено „уа“ – вели белградската новинарка Снежана Чонградин, потсетувајќи на подоцнежното брутално соборување на романскиот автократ.

На протестите на граѓаните власта одговара со поголем протест

Како реакција на илјадниците граѓани кои веќе три петоци излегуваат на улиците на Белград, под слоганот „Србија без насилство“, поттикнати од масовните убиства во белградското основно училиште „Владислав Рибникар“, а два дена подоцна и од злосторствата во селата околу Младеновац, Вучиќ најави контрамитинг на симпатизерите на неговата Српска напредна партија. Тој ги нарече антивладините протести обид за насилно преземање на власта, ветувајќи дека тоа нема да се случи.

– Нашите сестрински служби од Истокот ни велат дека ова се обиди за обоени револуции – рече Вучиќ, но не даде повеќе детали.

Земјата ќе застане на 26 мај. Весникот „Данас“ пишува за притисокот врз вработените во јавните претпријатија кои мора да дојдат да го поддржат Вучиќ. Весникот цитира седум опозициски партии кои поднеле писмо до Основниот јавен обвинител во Ниш, поради „многу честа појава на принуда“ на вработените во јавните претпријатија, јавните комунални претпријатија и јавните институции да присуствуваат и активно да учествуваат на митингот на Вучиќ на 26 мај во Белград.

Опозициските медиуми пишуваат и за други случаи на узурпација на државни ресурси за потребите на митингот на Вучиќ, меѓу кои и за презакажување на операта во Ниш. На социјалните мрежи корисниците сведочат и за откажување на училишните екскурзии за в петок да има што повеќе бесплатни автобуси за да ги донесат приврзаниците на Вучиќ во Белград од далечните делови на Србија.

Вучиќ влегува во предизборна кампања

Јово Бакиќ, професор на Филозофскиот факултет во Белград, вели дека Вучиќ со голем состанок на неговата партија всушност ја започнува кампањата за изборите што би можел да ги распише оваа есен, охрабрувајќи ги сопствените гласачи дека неговата политика не е загрозена и дека Србија под негово раководство е сè уште силна, но и натаму перципирана како регионален лидер.

– На него му е потребно да ги галванизира своите поддржувачи, да ги наполни повторно со оптимизам по големиот удар, да им каже дека ништо не се случило по голема трагедија, дека тоа се случува во другите развиени земји и дека Србија сè уште останува економски тигар на Балканот.

За Вучиќ, клучен проблем може да биде ona што новинарот Чонградин го нарекува „органски“ протест на граѓаните, кој не е поттикнат и предводен од опозицијата во Србија.

Иако Вучиќ остана на власт 11 години и покрај бројните афери, поврзани со криминалното подземје, притисокот на Западот поради одбивањето на Белград да воведе санкции кон Русија по нејзината инвазија на Украина, системот овој пат беше сериозно поткопан поради смртта на децата, што ја разбуди емпатијата кај големиот број граѓани. Општеството погодено од најголемите трагедии што можат да го снајдат, тешко ќе се врати на „стариот пат“. Според Чонградин, српскиот претседател овојпат тешко ќе се извлече.

– Без разлика колку тој турка во автобуси, заплашува, уценува јадни и сиромашни луѓе да дојдат на неговиот митинг, тие луѓе ќе си одат дома знаејќи што всушност се случува – вели Чонградин.

Аида Ќоровиќ, граѓански активист и поранешен пратеник во Собранието, вели дека чувствува страв во потезите на Вучиќ, додека тој ја губи стабилноста под неговите нозе. Затоа за неа кризата е многу поопасна и понеизвесна отколку што изгледа во моментов.

– Можни се конфронтации во самото општество во Србија – предупредува Ќоровиќ.

Ал Џезира Балкан / МИА

The post ВУЧИЌ СТРАВУВА ОД „ОБОЕНА РЕВОЛУЦИЈА“ Што може да се очекува после „најголемиот митинг во историјата на Србија“? appeared first on plusinfo.mk.