Под покровителство на претседателката Гордана Сиљановска Давкова денеска во Галичник е промовирана иницијативата на Месната заедница Галичник за зачувување, обновување и одржлив развој на еден од најпрепознатливите симболи на македонскиот културен идентитет и традиција.

Пред претставниците на дипломатскиот кор, меѓународните организации и бизнис секторот, како и во присуство на градоначалникот на Општина Маврово и Ростуше, Онер Јакупоски, преставниците на Месната заедница Галичник преводени од претседателот Огнен Караѓозовски презентираа иницијатива за зачувување, унапредување и ставање во функција на објекти од исклучително историско, културно и општествено значење за Галичник.

Иницијативата опфаќа активности за заштита и ревитализација на вилата „Доста“, Културниот дом, Административниот објект и на Галичка фурна.

Учесниците на настанот, покрај објектите опфатени со иницијативата, посетија и повеќе знаменитости на Галичник, како што се традиционалната галичка куќа „Филиповска“, куќата на Ѓоргија Пулевски, црквата „Света Петка и црквата „Св. Петар и Павле“, каде беше направен осврт на Галичката свадба како една од најпрепознатливите културни манифестации.

Сиљановска Давкова во обраќањето рече дека Галичник е многу повеќе од музеј под отворено небо, бидејќи неговото наследство живее во камените куќи, црквите, песните, обичаите и во спомените на генерациите кои постојано му се навраќаат. За неа, секој вложен напор во Галичник е вложување во заедничкото културно наследство и во иднината на државата.

Поздравувајќи ја иницијативата на Месната заедница Галичник, таа повика на пошироко партнерство меѓу државните институции, локалната самоуправа, деловната заедница, иселеништвото и сите поддржувачи на културното наследство за да се обезбеди долгорочна заштита и развој на Галичник.

Претседателката порача дека зачувувањето на Галичник не значи само грижа за минатото, туку и создавање инспиративна основа за иднината, покажувајќи дека традицијата и напредокот можат успешно да чекорат заедно.

На настанот, Месната заедница Галичник ѝ додели посебно признание на претседателката Сиљановска Давкова за покровителството, поддршката и личниот придонес во афирмацијата на Галичник и на Галичката свадба, како и за поддршката на иницијативите насочени кон зачувување на културното наследство и развојот на Галичник.

The post ГАЛИЧНИК Е МНОГУ ПОВЕЌЕ ОД МУЗЕЈ ПОД ОТВОРЕНО НЕБО Иницијатива за зачувување, обнова и за одржлив развој appeared first on plusinfo.mk.