Премиерот Христијан Мицкоски, синоќа во седиштето на светската организaција во Њујорк имаше средба со генералниот секретар на ОН, Антонио Гутереш.

На средбата, како што соопшти канцеларијата на Гутереш, била истакната одличната соработка меѓу Обединетите нации и Северна Македонија.

Гутереш и Мицкоски разговарале и за европските интеграции, регионалната соработка и поддршката на мултилатерализмот.

„Особена чест беше да се потпишам во Книгата на почесни гости на Обединетите нации, како симбол на почитта кон оваа светска организација и нејзината мисија за мир, дијалог и заедничка иднина“, објави Мицкоски.

Македонскиот премиер, претходно имаше обраќање на генералната дебата на 81. сесија на Генералното собрание на Обединетите нации.

The post МИЦКОСКИ СЕ СРЕТНА СО ГЕНЕРАЛНИОТ СЕКРЕТАР НА ОБЕДИНЕТИТЕ НАЦИИ Се потпиша во Книгата на почесни гости appeared first on plusinfo.mk.

Непал побара од меѓународната заедница да обезбеди неповратна финансиска помош за обновата по катастрофалните поплави и одрони предизвикани од глацијален колапс, предупредувајќи дека земјата не смее дополнително да се задолжува за да ги санира последиците од климатската катастрофа.

Непалскиот премиер Балендра Шах во говорот пред Генералното собрание на Обединетите нации во Њујорк изјави дека потребите за обнова и реконструкција се проценуваат на околу 10 отсто од бруто домашниот производ на земјата.

Шах порача дека земјите кои се особено изложени на климатски катастрофи не треба да бидат принудени да земаат нови заеми за да ги обноват домовите, патиштата и инфраструктурата уништени во природни непогоди.

Наместо тоа, според него, на сиромашните и ранливи држави им е потребна доволна меѓународна помош во форма на грантови – средства што не треба да се враќаат.

Катастрофалните поплави го погодија Непал на 26 август, откако колапс на глечер во близина на границата со Кина предизвика огромен бран вода, кал и камења кој се спушти низ планинските долини. Последиците беа особено тешки во долината на реката Бхоте Коши и поширокиот регион на Тришули.

Во текот на катастрофата беа уништени или оштетени патишта, мостови, домови, училишта и хидроенергетски објекти, а илјадници луѓе останаа без домови и извори на приходи.

Шах предупреди дека трагедијата не е само непогода за Непал, туку и предупредување за зголемените ризици со кои се соочуваат планинските региони поради климатските промени.

Непалскиот премиер повика на промена на начинот на кој меѓународната заедница им помага на земјите погодени од климатски катастрофи.

Според него, земјите кои имаат најмала одговорност за глобалните емисии на стакленички гасови често се меѓу најтешко погодените од последиците на климатските промени, а потоа се принудени дополнително да се задолжуваат за да ја обноват инфраструктурата.

Шах истакна дека Непал сака да ја зајакне и регионалната соработка со Индија и Кина, особено во делот на превенцијата и раното предупредување.

Тој предложи размена на сателитски податоци, подобро следење на глацијалните езера, воспоставување системи за рано предупредување и заедничко дејствување во случај на нови катастрофи.

Спасувачките и потрагата по исчезнатите продолжуваат со недели по катастрофата.

Според поновите податоци, повеќе од 6.000 луѓе и натаму се водат како исчезнати, а властите предупредуваат дека дел од нив можеби никогаш нема да бидат пронајдени.

Бројот на жртвите во Непал достигна околу 1.400, додека во соседниот кинески регион Тибет исто така има жртви и исчезнати. Бројките се менуваат со текот на пребарувањето и идентификацијата на телата.

Меѓу најтешко погодените се и хидроенергетските објекти, каде што дел од работниците останаа заробени во тунели под огромни наслаги кал, камења и отпад.

Светската банка оваа недела стави на располагање до 170 милиони долари итно финансирање за Непал. Средствата се наменети за итната реакција и почетокот на обновата на критичната инфраструктура и основните услуги.

Од Светската банка соопштија дека, покрај итната помош, подготвени се да поддржат и обновување на трговијата, реконструкција и инвестиции во поотпорна инфраструктура, како и подобрување на системите за подготвеност за идни катастрофи.

Катастрофата остави огромни последици врз Непал, а владата сега се соочува со задачата истовремено да ги продолжи потрагата по исчезнатите, да им помогне на преживеаните и да започне една од најголемите реконструкции во поновата историја на земјата.

The post НЕПАЛ БАРА ГРАНТОВИ ЗА ДА НЕ ТОНЕ ВО НОВИ ДОЛГОВИ Премиерот бара неповратна помош по разорните поплави appeared first on plusinfo.mk.

Израелскиот премиер Бенјамин Нетанјаху денеска пред Генералното собрание на Обединетите нации изјави дека се „заколнал“ дека ќе го спречи, како што го нарече, „иранското убиствено, диктаторско раководство“ да развие атомски бомби и нуклеарно оружје што би можело да биде употребено против Израел.

Непосредно откако Нетанјаху се појави на говорницата, десетици дипломати ја напуштија салата во која се одржува Генералното собрание. Израелскиот премиер оние што ја напуштија седницата ги нарече „морални кукавици“.

Говорејќи за Иран, Нетанјаху рече дека било тешко да се уништат иранските нуклеарни капацитети, но додаде дека за него тоа била „една од најлесните одлуки“ што некогаш ги донел како премиер.

– Ако не го направевме тоа, сите ќе бевме мртви – изјави Нетанјаху.

Осврнувајќи се на обраќањето на сирискиот претседател Ахмед ал-Шара пред Генералното собрание на ОН, во кое тој повика израелските сили да се повлечат од Голанската Висорамнина во Сирија, Нетанјаху рече дека Шара „треба да знае“ дека „еврејскиот народ е на Голанската Висорамнина уште од времето на Мојсеј“.

Тој додаде дека Израел нема да се повлече од таа територија.

Според Нетанјаху, Израел за колонијализам го обвинуваат земји како Франција и Обединетото Кралство, кои, како што рече, го измислиле тој термин.

Нетанјаху ги повтори и тврдењата на американскиот претседател Доналд Трамп дека американските и израелските сили ја уништиле иранската воена инфраструктура, а Трамп го нарече „најдобриот партнер што Израел го има“.

Тој рече дека Израел води војна „на седум фронта“ – против Хамас, Хезболах, Хутите, Иран, како и против вооружени групи во Ирак и Сирија и палестински вооружени групи.

А потоа следуваше еден од највпечатливите моменти од неговиот говор.

Зборувајќи за Хезболах, Нетанјаху извади пејџер и го покажа пред присутните.

– Се сеќавате на ова? Хезболах сигурно се сеќава – рече тој, потсетувајќи на израелската операција од септември 2024 година, кога илјадници пејџери што ги користеле припадници на Хезболах истовремено експлодираа во Либан и делови од Сирија. Во нападите загинаа 12 лица, меѓу кои и две деца, а повеќе од 3.000 беа повредени.

Нетанјаху ги отфрли и обвинувањата дека Израел извршил геноцид во Појасот Газа, велејќи дека оние што го обвинуваат Израел за тоа, меѓу кои го спомена и градоначалникот на Њујорк, Зохран Мамдани, треба да се срамат.

Тој тврдеше дека на окупираниот Западен Брег насилство врши „само шака млади делинквенти, околу 150“, кои, како што рече, фрлаат камења или сечат маслинови дрвја.

– Повремено, подметнуваат и пожари – рече Нетанјаху, нагласувајќи дека не го поддржува таквото однесување.

Тој истовремено ги минимизираше извештаите за бројот на загинати на окупираниот Западен Брег.

– Бројот на загинати во една или две години е околу двајца или тројца, наспроти илјадниците терористички напади врз мирните доселеници, чесни луѓе кои го почитуваат законот – рече Нетанјаху.

Нетанјаху го опиша турскиот претседател Реџеп Таип Ердоган како „тиранин“, а Турција како „последната во низата земји што се супер-ширители на антисемитски лаги“.

Тој изнесе и тврдење дека Ердоган сака да ја преземе контролата врз Сирија.

– Тоа не изненадува, бидејќи тој речиси секојдневно повикува на уништување на Израел и вели дека ќе владее со Ерусалим. Не, господине, нема да го направите тоа – рече Нетанјаху.

Говорот на израелскиот премиер беше проследен со масовно напуштање на салата од страна на дипломати, додека дел од присутните му аплаудираа. Нетанјаху, пак, порача дека Израел ќе продолжи да победува „бидејќи нема друг избор“.

The post 📽️ НЕТАНЈАХУ СО ПЕЈЏЕР ВО РАКА ПРЕД ЦЕЛ СВЕТ Се сеќавате на ова? Хезболах сигурно се сеќава! appeared first on plusinfo.mk.

Хрватскиот претседател Зоран Милановиќ отвори повеќе фронтови во едно обраќање во Загреб: ја нарече ЕУ недемократска, оцени дека Европа е во регресија и прогласи дека досегашниот меѓународен поредок практично престанал да постои. Тој зборуваше на конференцијата „Ден на големи планови“, посветена на економските предизвици што ја очекуваат Хрватска во 2027 година.

– ЕУ не е демократска. Луѓето се поставуваат на највисоките и најважните позиции во процеси кои не се демократски – рече Милановиќ.

Според него, европските гласачи сè повеќе го препознаваат тоа незадоволство.

– Сè повеќе луѓе го гледаат и го чувствуваат ова и затоа сè повеќе луѓе гласаат на начинот на кој гласаат на изборите – рече хрватскиот претседател.

Европа се „смалува во себе“

Милановиќ не застана на критиката на институционалниот модел на ЕУ. Тој изнесе многу поширока оценка за положбата на Европа во светот, тврдејќи дека континентот е во регресија во последните 100 години.

– Европа е во циклус на смалување во себе. Ништо што доаѓа од Берлин или од која било друга европска метропола не треба да се сфаќа ниту премногу сериозно ниту премногу лесно – рече Милановиќ.

Тој ја поврза европската положба и со енергетиката, оценувајќи дека континентот со децении не успева да ги реши своите сериозни енергетски проблеми. Во поширокото обраќање зборуваше и за растот на цените и потребата Хрватска да размислува за сопствена нуклеарна централа.

„Меѓународниот поредок престана да постои“

Најшироката оценка Милановиќ ја резервираше за системот воспоставен околу Обединетите Нации и колективната безбедност.

– Меѓународниот поредок престана да постои. Секоја санкција, билатерална санкција, од кој било, без верификација од ОН е нелегална – рече Милановиќ.

Тој оцени и дека најголемите финансиери на ОН се потсмеваат со организацијата и со системот на колективна безбедност. Обраќањето го започна со предупредување дека работите околу Хрватска „полека излегуваат од контрола“.

The post НЕДЕМОКРАТСКА ЕВРОПА СЕ СМАЛУВА ВО СЕБЕ Веќе нема меѓународен поредок? appeared first on plusinfo.mk.

ВМРО-ДПМНЕ со фотографија возврати на критиките од СДСМ за актуелната македонска делегација во САД, тврдејќи дека во времето на поранешниот премиер Зоран Заев во Њујорк биле потрошени пари за непотребно голема делегација во која имало од советници, новинари „па до кучињата што ги шетаат по дома“.

Партијата набројува повеќе функционери од тогашната власт, меѓу кои Венко Филипче, Насер Нуредини, Бујар Османи и Нина Ангелова, како и советници и владини службеници.

„Таму и кучињата по дома ги земале на шетање во САД“, вели ВМРО-ДПМНЕ.

Партијата прави директна споредба со сегашната владина посета на САД и тврди дека овојпат во делегацијата немало луѓе без потреба, ниту непотребни трошоци.

„Денес нема непотребни членови на делегацијата и нема луксузирање“, се наведува во соопштението.

Како аргумент за резултатите од посетата, ВМРО-ДПМНЕ ги посочува средбите на Мицкоски со американски функционери и неговото учество на Генералното собрание на Обединетите нации.

„На оваа посета уште еднаш беше потврдено и зацврстено стратешкото пријателство со САД и можностите ова пријателство да се претвори во инвестиции и економски развој“, порача ВМРО-ДПМНЕ.

Од ВМРО-ДПМНЕ велат дека сегашната посета на премиерот Христијан Мицкоски е поинаква и како аргумент ги наведуваат средбите со американски функционери.

The post ЗАЕВЦИ ВО ЊУЈОРК ГИ НОСЕЛЕ И КУЧИЊАТА И СОВЕТНИЦИТЕ „Епската“ делегација на СДСМ ги вклучи Али Баба и 40 разбојници appeared first on plusinfo.mk.

Бразил, Германија, Индија и Јапонија вчера изјавија дека Советот за безбедност на Обединетите нации има потреба од итна реформа за да може повторно да го одржува меѓународниот мир и безбедност.

„Со оглед на сè попредизвикувачката геополитичка средина, реформата на Советот за безбедност на Обединетите нации е понеопходна од кога било порано“, изјавија шефовите на дипломатиите на четирите земји во заедничка изјава.

Четворицата дипломати се состанаа вчера на маргините на 81-та сесија на Генералното собрание на Обединетите нации.

ЕРДОГАН БАРА ДА СЕ УКИНЕ ВЕТОТО ВО СОВЕТОТ ЗА БЕЗБЕДНОСТ ВО ЕУ Не може неколку држави да одлучуват за целиот свет

The post БРАЗИЛ, ГЕРМАНИЈА, ИНДИЈА И ЈАПОНИЈА БАРААТ ИТНА РЕФОРМА Советот за безбедност на ОН мора да го чува светскиот мир appeared first on plusinfo.mk.

Францускиот претседател Емануел Макрон во својот последен говор пред Генералното собрание на ОН во својот мандат повика на зачувување на меѓународниот поредок заснован на правила, предупредувајќи дека светот ризикува да се врати во ера во која „законот на посилниот“ ќе го замени меѓународното право.

Макрон го бранеше мултилатерализмот и улогата на ОН, но истовремено повика на негово реформирање, оценувајќи дека државите мора да најдат заеднички одговор на војните, климатските промени и новите технологии.

Најостриот дел од настапот беше посветен на Газа и американската политика. Макрон го оспори тврдењето на американскиот претседател Доналд Трамп дека во Газа е постигнат вистински мир. Посочи дека прогласувањето дипломатски договор не значи автоматски прекин на страдањата на цивилното население. Тој побара почитување на меѓународното право и непречен пристап за хуманитарна помош.

Францускиот претседател остро ја критикуваше меѓународната пасивност и ја нагласи потребата од конкретна акција.

– Пред една година, токму во оваа сала, десетина земји ја признаа Палестина. Го слушам цинизмот на поединци: „Признавањето е само парче хартија, погледнете ја реалноста“ – рече Макрон.

Тој ја удираше говорницата со тупаница, а потоа продолжи:

– Но, каков кредибилитет имаме ако продолжиме да бидеме пасивни пред она што се случува во Појасот Газа? Некои се фалат со наводниот мир. Но, тој мир ниту за момент не го отвори пристапот до хуманитарна помош. Дали едноставно да стоиме настрана и да ја гледаме оваа претстава од која сите треба да се срамиме? – рече тој.

French President Emmanuel Macron criticized Gaza diplomacy at the UN General Assembly, calling it a ‘spectacle that shames us all’ and urging action to reopen humanitarian routes https://t.co/aUCWx2Bqui pic.twitter.com/UmsTeCfH5r

— Reuters (@Reuters) September 23, 2026

Погледнете што се случува на Западниот Брег, каде што правата се кршат секој ден, додаде.

– Во чие име? Хамас никогаш не дејствувал на Западниот Брег. Она што се случува таму ден по ден го прави невозможен проектот што треба да се базира на почитување на легитимното право на палестинскиот народ да постои – рече Макрон.

Претходно, во својот говор Трамп потсети дека пред една година, кога се обратил пред ОН, „војната во Појасот Газа сè уште беснееше со сета своја свирепост“.

– Неколку недели подоцна ја завршивме војната во Појасот Газа и спасивме незамисливи илјадници животи – рече  Трамп.

Тел Авив остро реагираше на говорот на Макрон, кој, исто така, ги критикуваше и постапките на Израел на Западниот Брег и тврдеше дека Хамас никогаш не бил активен во таа област.

„Гротескната апсурдност на изјавата на Емануел Макрон е зачудувачка“, соопшти кабинетот на премиерот Бенјамин Нетанјаху.

Во соопштението се вели дека терористите на Хамас „ги напаѓаат Евреите речиси секојдневно“ и дека тие „убивале безброј израелски цивили во Јудеја и Самарија“ (израелските имиња за Западниот Брег).

„Незнаењето не е изговор за бришење на нивната крв“, се додава во соопштението.

Канцеларијата на Нетанјаху го коментираше нападот на Западниот Брег, кој го опиша како терористички, во кој беше убиен Нетанел Шукрун, кој исто така имаше и француско државјанство.

Гади Ајзенкот, лидер на партијата Јашар и главен ривал на Нетанјаху на претстојните избори, се придружи на осудите. Тој ја нарече изјавата на Макрон „целосно отфрлена од реалноста“.

„Јас командував со Дивизијата Јудеја и Самарија и се борев против тероризмот на Хамас, па затоа сум многу запознаен со операциите на организацијата во областа и заканата што таа ја претставува за граѓаните на Израел. Нема преговори за борбата против тероризмот и ние нема да прифатиме меѓународно лицемерие на сметка на безбедноста на израелските граѓани“, напиша Ајзенкот на платформата Икс.

Голем дел од говорот на Макрон беше посветен и на Украина. Тој оцени дека руската агресија не е само европско прашање, туку прашање што го засега целиот меѓународен систем. Повика на прекин на нападите врз цивилната и енергетската инфраструктура и предложи мораториум на таквите напади, како и на воените дејства во Црното Море, со цел да се создадат услови за пошироки дипломатски разговори. Во исто време, тој нагласи дека секој мировен договор мора да ја гарантира долгорочната безбедност на Украина.

The post 🎥 МАКРОН УДИРАШЕ СO ТУПАНИЦА ПО МАСАТА ЗБОРУВАЈЌИ ЗА ГАЗА ВО ОН Го оспори Трамп дека е постигнат мир appeared first on plusinfo.mk.

Најочекуваното обраќање на отворањето на Генералното Собрание на Обединетите Нации беше на американскиот претседател Доналд Трамп, кој говореше денеска, како втор говорник, по бразилскиот претседател Лула да Силва.

Во својот говор, Трамп најави дека светот влегува во ера на вештачката интелигенција, односно, како што тој побара сите да ја нарекуваме во иднина – супериорната супер-интелигенција, за која рече дека ќе донесе период на благосостојба за сите.

Трамп воедно најави скорешен крај на војната во Украина, додека за конфликтот со Иран рече дека тој ќе запре по ноемвриските конгресни избори во САД, на кои се очекува војната и инфлацијата да имаат пресудна улога меѓу гласачите.

– Во сите законски документи и регулации од денеска вештачката интелигенција ќе биде позната под името супер-интелигенција. Јас нема да дозволам да се попречува развојот на нешто што ќе биде поголемо од индустриската револуција, поголемо од интернетот. Напротив, ќе го поттикнеме развојот на супер-интелигенцијата, изјави Трамп.

Тој оцени дека САД имаат огромна предност пред Кина во развојот на вештачката интелигенција и дека ќе продолжат да ја градат таа предност.

За критиките дека се работи за опасен изум, Трамп рече дека повиците за запирање на развојот на вештачката интелигенција доаѓаат од истите кругови кои го попречуваат развојот на енергенсите на човештвото под превезот на климатските промени.

– Истите што викаат дека ќе не убие вештачката интелигенција, дека ќе не ловат роботите, претходно велеа дека ќе не убие глобалното затоплување, ме обвинуваа за соработка со Русија, се залагаат за отворени граници. Тој што ќе победи во развојот на супер-интелигенцијата, тој е победникот, рече Трамп.

Претседателот на САД го обвини Иран дека одбивал да постигне договор за укинување на нуклеарната програма, како и за кршење на договорот за прекин на огнот, со кој требаше да се нормализира текот на нафтата низ Ормудскиот теснец.

Трамп ја правдаше својата одлука да го почне конфликтот со Иран велејќи дека таа држава спонзорирала тероризам насекаде низ светот, а со добивање на нуклеарно оружје ќе станела многу поопасна.

– Замислете само ако овој одвратен режим почне да врши големи терористички напади скриен зад нуклеарен штит. Тоа беше реалноста со која моравме да се соочиме, а која многумина сакаа да ја игнорираат. Јас сум решен дека Иран никогаш нема да има нуклеарно оружје. Ги повикувам сите држави да ни се приклучат, да спроведеме економска изолација на Иран додека не ги запрат нивните напади врз трговските бродови, се откажат од своите нуклеарни амбиции и ја запрат поддршката на тероризмот, изјави Трамп.

Иранската делегација ја напушти салата на Обединетите Нации кога Трамп почна да зборува за нив.

– Војната во Украина ќе заврши многу поскоро отколку што мислиме. Работам многу тесно со лидерите на Русија и на Украина, и ќе го решиме тој проблем, истакна Трамп, додавајќи дека не може веќе да поднесе да ги гледа фотографиите од бојното поле и од жртвите на двете страни.

За безбедноста на Европа, Трамп силно го пофали генералниот секретар на НАТО Марк Руте, велејќи дека издејствувал зголемување на буџетите за одбрана на членките на НАТО од два на пет проценти од бруто домашниот производ. „Тоа значи дека сега ќе добијат повеќе заштита“, додаде Трамп.

The post ТРАМП НАЈАВИ КРАЈ НА ВОЈНИТЕ ВО ИРАН И ВО УКРАИНА Почнува ера на супер-интелигенцијата appeared first on plusinfo.mk.

Премиерот Христијан Мицкоски објави видео од неговиот престој во Њујорк САД со дел од средбите што ги одржа на високо ниво, како и фотографии од отворањето на Генералното собрание на Обединетите нации.

„Реализиравме низа значајни средби со претставници од американската администрација и бизнис-заедницата. Продолжуваме со посветена работа за создавање нови можности, привлекување инвестиции и градење на стратешки партнерства кои носат развој и напредок за нашата држава“, објави тој на Фејсбук.

На отварањето на отворањето на Генералното собрание на Обединетите нации премиерот присуствуваше заедно со пефот на дипломатијата Тимчо Муцунски.

„Денеска бевме дел од отворање на Генералното собрание на Обединетите нации. Настан кој ги обединува претставниците на државите од целиот свет и претставува важна платформа за разговори за глобалните предизвици, мирот, безбедноста и за иднината на меѓународната соработка. Со гордост ја претставуваме Македонија на местото каде што се носат важни одлуки за светот и каде што се градат партнерства засновани на почит, дијалог и заеднички интереси“, објави Мицкоски на Фејсбук.

Предвидено е Мицкоски да има обраќање пред Генералното собрание на ОН.

Генералната дебата на 81. сесија на Генералното собрание на ОН ќе трае од денеска до 28 септември, а светските лидери ќе дискутираат за глобалните предизвици и приоритети на темата „Обнова на довербата, управување со трансформацијата: Обединети нации што им служат на сите“.

Речиси 130 шефови на држави и влади лично ќе присуствуваат во седиштето на светската организација во Њујорк за да ја испратат својата порака до светот.

The post 🎥📷 МИЦКОСКИ ОБЈАВИ ВИДЕО ОД СРЕДБИТЕ ВО ЊУЈОРК Нови можности за партнерства, инвестиции и развој appeared first on plusinfo.mk.

Јапонија побара да се промени новата карта на светот што деновиве беше усвоена од Обединетите нации, бидејќи на неа спорните Курилски Острови изгледаат како руска територија, а Токио ги смета за свои Северни територии.

Новата карта ги прикажува континентите во пореалистичен размер. Континентите Европа и Северна Америка, како и островот Гренланд се помали, а Африка е поголема.

Генералното собрание на ОН гласаше за усвојување на новата повелба минатиот петок, а Јапонија беше меѓу 164 земји-членки кои ја поддржаа резолуцијата. И покрај ова, Токио сега се спротивставува, бидејќи Курилските Острови се обоени во иста боја како Русија.

Портпаролот на јапонската влада Минору Кихара изјави дека новата карта, позната како проекција „Една Земја“, содржи прикажување кое е во спротивност со ставот на јапонската влада.

– Испративме протест до операторот на веб-страницата на картата преку дипломатски канали и побаравме корекција на овој приказ – рече Кихара.

Тој одби да каже кога владата го забележала проблемот, но нагласи дека Јапонија „мора да спречи ширење на заблуди за нашите територии и географски имиња“.

ОН соопшти дека целта на новата мапа е да обезбеди „попрецизен приказ“ на копнените маси во споредба со традиционалните Меркаторови проекции, односно до скоро официјалната мапа на светот.

Курилските острови се вулкански архипелаг во Источна Азија кој се протега во должина од околу 1.300 километри помеѓу полуостровот Камчатка (Русија) и островот Хокаидо (Јапонија), разделувајќи го Охотското Море од Тихиот Океан.

Територијалниот спор околу островите датира од крајот на Втората светска војна. Поранешниот Советски Сојуз ги окупираше островите во 1945 година и го протера јапонското население од нив.

Односите меѓу Јапонија и Русија значително се влошија минатиот месец, откако рускиот претседател Владимир Путин ја оствари својата прва ненајавена посета на спорниот архипелаг.

Веднаш по посетата, Јапонија го викна рускиот амбасадор на разговор. Јапонската премиерка Санае Такаичи изјави дека посетата на Путин „ги повредува чувствата на јапонскиот народ“ и ја нарече „целосно неприфатлива“.

Таа рече дека островите се „неотуѓив дел од јапонската територија, и историски и според меѓународното право“.

Москва брзо одговори и рече дека „категорично“ ги отфрла ваквите изјави, кои ги смета за „политички несоодветни, навредливи и, се разбира, правно неосновани“.

КИЕВ БЕСЕН ПОРАДИ НОВАТА МАПА НА СВЕТОТ Обединетите нации усвоија нова карта на светот на која Крим е визуелно одвоен од Украина

The post ЈАПОНИЈА ЛУТА ПОРАДИ НОВАТА КАРТА НА СВЕТОТ, БАРА КОРЕКЦИЈА Курилските Острови се прикажани како руски, а Токио ги смета за свои appeared first on plusinfo.mk.