Камен темелник за нов малопродажен објект на германската компанија „Лидл“ денеска се постави на влезот на Гевгелија. Маркетот ќе се гради на местото на поранешното транспортно претпријатие „Трансбалкан“, на површина од 2 356 квадратни метри, со предвидени 130 паркинг места.

Од компанијата велат дека изградбата на првиот маркет на „Лидл“ во Гевгелија, е дел од нивниот долгорочен инвестициски план во земјава, и потврда за довербата што ја имаат во потенцијалот на македонскиот пазар.

Со новата инвестиција, како што велат од компанијата, се дава значаен придонес кон локалниот економски развој, отворање нови работни места и унапредување на понудата за потрошувачите, како и можност за продлабочување на соработката со домашните производители.

– Со стартот на изградбата на маркетот во Гевгелија продолжуваме со стратегијата за ширење на продажната мрежа. Нашата цел е да изградиме продажни места кои се пространи, светли и современи, со модерен изглед, со еколошки материјали и со фокус на енергетската ефикасност. Да создадеме удобно искуство за нашите потрошувачи, но и квалитетна работна средина за нашите вработени. Посебно сме горди што преку продажната мрежа на „Лидл“ за 2025 година е остварен извоз на македонски производи во вредност од 15.5 милиони евра, имајќи предвид дека се уште не сме оперативни на македонскиот пазар – рече Гоце Гаврилов, директор за недвижнини во „Лидл Северна Македонија“.

На поставувањето камен – темелник се обрати и градоначалникот на Гевгелија, Андон Сарамандов кој изрази задоволство што во последните две години општината има три поголеми инвестиции кои треба да придонесат за подобрување на локалниот економски развој и да дадат дополнителен поттик на економијата.

-Нашата отвореност како локална самоуправа за соработка со секој кој има намера да инвестира во Гевгелија, денеска вроди со уште една значајна инвестиција. Гевгелија е меѓу првите градови во Македонија во кои почнува изградба на маркет на „Лидл“, инвестиција која дополнително ќе ја засили атрактивноста на нашата општина. Ќе придонесе за нови можности за вработување и зајакнување на локалната економија. Општина Гевгелија излезе во пресрет на инвеститорот и овозможи целосна логистичка поддршка за реализација на проектот. Верувам дека соработката со „Лидл“ ќе продолжи успешно и во идниот период – посочи Сарамандов.

Досега компанијата изгради логистички центар во Куманово и ја почна изградбата на маркети во Штип и на две локации во Скопје, во Аеродром и во општина Гази Баба.

„Лидл“ е позната германска компанија во малопродажната индустрија на храна во Европа, која работи со околу 12 600 маркети и над 382 000 вработени на меѓународно ниво.

The post „ЛИДЛ“ ПОЧНА ИЗГРАДБА НА ПРОДАЖЕН ОБЈЕКТ ВО ГЕВГЕЛИЈА Зафаќа 2.356 квадратни метри appeared first on plusinfo.mk.