Младиот Лионел Меси во 2007 година позираше за серија фотографии со бебе во соблекувалната на стадионот Камп Ноу во Барселона за годишниот календар на клубот во рамки на хуманитарна акција. Аргентинецот Меси, кој тогаш имаше 20 години, веќе имаше изградено фудбалско име, а со текот на времето стана еден од најдобрите фудбалери на светот на сите времиња.

Фотографијата на која Меси бања бебе беше една од главните приказни за време на Европското првенство во Германија 2024 година. Тоа бебе е Ламин Јамал, кој блесна на тоа Европско првенство во дресот на Шпанија. Шпанија ја освои титулата првак на Европа, а тогаш 16-годишниот Ламин Јамал беше еден од најдобрите играчи. Со 16 години и 362 дена, погодокот против Франција во полуфиналето го направи најмладиот фудбалер кој постигнал гол во историјата на европските првенства.

Долго заборавената фотографија на Меси и Јамал повторно се појави откако таткото на Јамал ја објави на Инстаграм за време на Европското првенство со коментар: „Почеток на две легенди“. Фотографиите ги направи Џоан Монфорт, кој работи како слободен фотограф за Асошиејтед прес.

Две години подоцна, за оваа фотографија повторно се зборува, а причината е што Меси, сега 39-годишник, ќе игра токму против Ламин Јамал во финалето на Светското првенство 2026 година. На Меси ова ќе му биде трето финале на светските првенства во кариерата, што досега му успеало на уште само еден играч – Бразилецот Кафу.

Аргентина се пласираше во финалето по спектакуларниот пресврт против Англија со 2:1, додека Шпанија ѝ одржа фудбалска лекција на Франција со 2:0. Ова ќе биде прво финале на Светско првенство меѓу две земји во кои се зборува шпански јазик уште од првото издание на Мундијалот во 1930 година во Уругвај. Тогаш во финалето играа Уругвај и Аргентина, а Уругвајците ја освоија единствената титула првак на светот во својата историја (4:2).

Како настанала фотографијата?

До снимањето дошло откако УНИЦЕФ организирал томбола во градот Матаро, каде што живеело семејството Јамал.

– Се пријавија за наградната игра за да се сликаат на Камп Ноу со играч на Барселона и победија на томболaта – раскажа Монфорт за Асошиејтед прес.

– Задачата не беше едноставна, Меси беше прилично интровертно момче, срамежлив. Излегуваше од соблекувалната и одеднаш се најде во друга просторија со пластична када полна со вода и бебе во неа. Беше комплицирано. На почетокот не ни знаеше како да го држи бебето – се сеќава фотографот.

Исто како и Меси, Јамал заигра за првиот тим на Барселона, станувајќи најмладиот стартер и стрелец во историјата на клубот, како и најмладиот стрелец во шпанската лига.

Монфорт немал поим дека на фотографиите е Ламин Јамал сè додека пријател не му пратил порака за време на Европското првенство 2024 година, кога тие се ширеа на интернетот како торнадо.

– Многу е возбудливо да бидеш поврзан со нешто што предизвикува таква сензација. Да ви кажам искрено, тоа е многу убаво чувство – рече Монфорт, кој има долга кариера како фотограф и ја следи Барселона ширум светот од 1991 година.

Трето финале на светските првенства во кариерата на Меси

Лионел Меси го игра последното Светско првенство во кариерата. Пред четири години во Катар, во спектакуларното финале против Франција, Аргентина ја освои титулата првак на светот, трета во нејзината историја. Меси веќе влезе во фудбалската легенда и за многумина е најдобриот играч што барал со топката откако се знае за фудбалот. Некои ќе речат дека тоа е друг Аргентинец, Диего Марадона, трети дека е Бразилецот Пеле, четврти ќе гласаат за Кристијано Роналдо. Работа на вкус, но бројките се неумоливи.

Меси на Мундијалот во САД, Канада и Мексико испиша нова историја. Стана водечки стрелец во историјата на светските првенства со вкупно 21 гол. Овој турнир го започна со германскиот репрезентативец Мирослав Клозе на врвот на листата на најдобри голгетери на сите времиња на светските првенства со 16 голови. Но, тогаш Меси, а потоа и Французинот Килијан Мбапе (20 голови) го престигнаа Германецот.

Меси и Мбапе водат борба и за најдобар стрелец на ова Светско првенство. Двајцата постигнаа по осум голови, а ако бидат изедначени, ќе се сметаат асистенциите. И Меси и Мбапе имаат уште по еден натпревар на овој Мундијал. Меси ќе игра за нова титула првак на светот, а Мбапе против Англија за бронзениот медал.

„Затоа е крал“

Пред четири години, се чинеше како приказната на Лионел Меси да е завршена. Конечно го освои Светското првенство, на 35 години, и изјави дека тоа бил неговиот последен натпревар на најголемиот фудбалски турнир во светот. Четири години пред тоа, на 31 година, многумина, а имаше и некои од неговата околина, сметаа дека го одиграл својот последен натпревар на Светско првенство и дека ќе ја заврши кариерата без титула.

А сега на 39 години, значително придонесе за победата на Аргентина над Англија и за тоа неговата земја да стигне до второто финале на Светските првенства по ред. Двете асистенции на Меси му помогнаа на јужноамериканскиот тим да го пресврти резултатот и да победи со 2:1, со што го подобри својот учинок на овој Мундијал на четири асистенции – покрај осумте гола.

Аргентина ќе игра против Шпанија, земјата во која Меси го помина најголемиот дел од својата кариера.

– Тој е најдобриот играч во историјата, не знам што уште би морал да направи за да го докаже тоа. Многумина во Шпанија го сакаат – рече аргентинскиот селектор Лионел Скалони.

Поранешниот англиски фудбалер Мајка Ричардс, сега коментатор на Би-Би-Си, вака го прокоментира полуфиналето:

– Аргентинците го имаат Лионел Меси. Го имаат GOAT (Greatest of All Time). Најголемиот на сите времиња. Мислевме дека одлучувачки фактори би можеле да бидат Џуд Белингем или Хари Кејн, но Меси покажа зошто е крал (на фудбалот).

The post МЕСИ ГО БАЊАЛ ЈАМАЛ КАКО БЕБЕ, СЕГА ЌЕ СЕ БОРАТ ЗА ТИТУЛАТА СВЕТСКИ ПРВАК Историска фотографија повторно е актуелна  appeared first on plusinfo.mk.