Понудата од нула царинска стапка во трговската размена на светот со САД, нема да биде прифатена од американската администрација бидејќи тоа не е нејзина цел, велат експерти.

Според нив, администрацијата на Доналд Трамп има за цел да го намали трговскиот дефицит и јавниот долг, а дел од парите планира да ги обезбеди преку царинската политика. Доколку прифати бесцаринска трговија, според нив, Трамп ќе сака да му наплати на светот за тоа.

– Лично не верувам во сценариото за ослободување од царините, бидејќи е очигледно дека Трамп сака да ги зголеми приходите од царините и на тој начин да го намали трговскиот дефицит со светот, кој во САД се провлекува од Втората светска војна наваму кога доларот стана единствена валута во трговијата. Според тоа, барањата на државите за ослободување од царините во размената со САД не се реално остварливи. Трамп нема да ги прифати ваквите предлози, туку ќе бара да се прифатат неговите барања, со цел да го намали дефицитот и јавниот долг – вели професорот Зоран Ивановски.

Професорот Ванчо Узунов смета дека ако американскиот претседател Доналд Трамп прифати ослободување од царините ќе сака да наплати од светот на друг начин што повторно ќе биде на штета на слободната трговија.

– Тоа би било идеален случај на реализирање на слободната трговија, но Трамп бидејќи во моментов се коцка со светот и води политика на уцена, ако прифати бесцаринска трговија ќе сака да го наплати на некој начин тоа од светот. На пример, ќе бара од земјите да увезуваат повеќе стоки или услуги од САД што ќе влијае негативно на слободната трговија. А како? Некои од стоките кои ќе треба да ги увезе одредена земја од САД можат да имаат пониска цена кај друга земја извозник, а тоа значи дека се нарушуваат конкуренцијата и правилата на слободната трговија. Но да почекаме да видиме која од опциите на преговорите ќе надвладее. Дали ќе попуштат лидерите од другите земји во светот и ќе ја прифатат уцената на Трамп и ќеа му платат или истовремено ќе попуштат двете страни – вели Узунов.

Според него, во целата „коцкарска игра на уцени“ на Трамп губитници ќе бидат граѓаните како на САД кои гласаа за него, така и другите во светот кои со ништо не заслужиле да бидат дел од плановите на Трамп.

Узунов и Ивановски сметаат дека Македонија и ЕУ нема да успее да издејствува 0 царинска стапка, бидејќи за Трамп Македонија не е репрезентативен играч, а Европската унија ќе биде принудена, можеби да прифати некоја од уцените на Трамп.

– Македонија ќе се третира како и остатокот од светот, а Европската унија на крај ќе биде принудена да ја прифати понудата на Трамп за увозот на енергенси од САД со што ќе се намали разликата во трговската размена како што сака и американската администрацијата – вели Ивановски.

Според нив, не може да се предвиди што ќе се случува во трговската војна меѓу двете најголеми економии кинеската и американската бидејќи засега не се знае колку силни се чувствуваат двете економии.

Американскиот претседател веќе одговори дека не е доволен предлогот на Европската унија за целосно, реципрочно ослободување од царините за индустриски производи, вклучително и автомобили и даде предлог Унијата да увезе енергенси во вредност на трговскиот дефицит, кој според пресметките на американската администрација со ЕУ изнесуваат 350 милијарди долари.

Европската унија и нашите експерти сметаат дека Трамп не ги зема предвид вредностите на извозот на услуги и затоа трговскиот дефицит со ЕУ е далеку повисок според пресметките на САД. ЕУ тврди дека трговскиот дефицит со САД изнесува 210 милијарди долари.

– Од далеку се гледа дека Трамп воопшто не ги смета за извоз услугите кои САД ги извезуваат во другите земји, туку само она што директно влегува преку границите. Извозот на САД е многу поголем, ако се земат предвид услугите кои патем одат преку интернет, а не преку државните граници – коментира Узунов.

Дека Трамп нема намера да се откаже од царините, говори и неговата изјава дадена неколку часа пред да стапи во сила новиот пакет во обраќањето пред Националниот републикански конгресен комитет во кој наведе дека светските лидери коленичат и го молат да преговараат.

Притоа тој се пофали и со бројките дека со промената на царинската политика САД дневно заработуваат по 2 милијарди долари. Податоците за февруари на Министерството за финансии на САД покажуваат дека во буџетот се слеале 7,25 милијарди долари од царина. Утре ќе се знаат и податоците за март.

Според портпаролката на Белата куќа, дури 70 земји изразиле желба за договор околу царинските стапки.

Засега Кина уште не одлучила да преговара. На оваа светска економска сила  Трамп ѝодреди царинска стапка од 104%.

– САД продолжуваат да ги злоупотребуваат царините за да вршат притисок врз Кина. Кина одлучно се спротивставува на тоа и никогаш нема да го прифати овој облик на насилничко однесување – изјави денеска портпаролот на кинеското Министерство за надворешни работи Лин Џијан.

Тој додаде дека ако САД навистина сакаат да ги решат проблемите преку дијалог и преговори, треба да заземат „став на еднаквост, почитување и взаемна корист“.

– Кина ќе продолжи да презема решителни и ефективни мерки за заштита на своите права и интереси – рече Лин.

Останува да се види како ќе заврши оваа војна на САД со светот, која експертите ја сметаат за војна без крв, но со огромни последици врз светскиот економски поредок.

Рецесијата можеби тропа на врата, што да се прави?

The post ДАЛИ ТРАМП ЌЕ ПРИФАТИ НУЛА ЦАРИНСКА СТАПКА СО СВЕТОТ? Експерти тврдат дека светот ќе треба да плати цена за тоа appeared first on plusinfo.mk.

Американскиот претседател Џо Бајден не можеше да ги задржи солзите додека неговата сопруга Џил зборуваше за својот „сопруг и херој“ за време на прошталната вечера на претседателот во Белата куќа.

Претседателот во заминување беше преплавен со емоции додека првата дама му оддаде чест на неговата децениска служба за време на забава во Белата куќа, заблагодарувајќи им се на демократските поддржувачи и донатори.

Џил Бајден во петокот вечерта ја пофали 40-годишната служба на нејзиниот сопруг, вклучувајќи го и четиригодишниот мандат како претседател.

– Она што те гледав како го правиш повеќе од 40 години е извонредно… Џо, она што го направи во последните четири години го одзема здивот – рече првата дама додека Бајден бришеше солзи од образот.

Откако Бајден извади марамче од џебот, неговата сопруга крена чаша и наздрави како што го нарече „нејзиниот сопруг и херој Џо Бајден“, пред да се бакнат.

– Џо и јас ја правиме оваа вечера од едноставна причина да ви се заблагодариме. Ви благодарам многу драги пријатели – рече таа.

Претседателот приреди проштална вечера за да ја покаже својата благодарност кон демократите пред да ја напушти Белата куќа на 20 јануари 2025 година, кога ќе му ја предаде претседателската функција на новоизбраниот републикански претседател Доналд Трамп.

Бајден потоа излезе на говорницата по трогателниот вовед на неговата сопруга, каде во својот говор ги истакна достигнувањата на неговата администрација и рече дека неговото време на функција е „чест на неговиот живот“.

– Едно нешто во кое отсекогаш верував за јавниот сервис, а особено за претседателството, е дека е важно да се запрашаме, дали ја оставивме земјата во подобра состојба отколку што ја најдовме? Можам со целото мое срце да кажам дека одговорот на тоа прашање е да поради вас – рече тој гестикулирајќи кон воодушевената толпа.

Тој додаде дека верува оти можат да бидат горди што „денес ја напуштаат Америка на подобро место отколку кога ја презедоа функцијата пред четири години“.

– Го следев тој стандард бидејќи немав избор. Јас сум сопруг на Џил Бајден. Тоа е титулата на која најмногу се гордеам – рече Бајден.

The post 📽️ КРОКОДИЛСКИТЕ СОЛЗИ НА ЏО БАЈДЕН Трогателен момент по говорот на Џил за време на прошталната вечера во Белата куќа appeared first on plusinfo.mk.

Премиерот Христијан Мицкоски денеска го повика Јавното обвинителство да ги провери тврдењата на СДСМ дека бегството на поранешниот припадник на ОВК Блерим Рамадани на Косово е реализирано со помош на луѓе од државни институции. Тврдењата на СДСМ, според Мицкоски, се ноторна лага.

– Добро е што конечно излегоа со тврдење. Го охрабрувам Јавното обвинителство уште денес да влезе, го повикувам јавниот обвинител кој е избран од СДС и ДУИ веднаш да влезе и да констатира фактичка состојба, а јас ви тврдам дека тоа што го изнесе пратеникот на СДСМ е ноторна лага – изјави Мицкоски по посетата на Агенцијата за катастар на недвижности.

Мицкоски го охрабри и раководството на МВР да поднесе тужба за клевета.

– Мораме на ваков начин да се заштитиме од ваквите лаги и конструкции. Чудно е што се конструираат вакви монструозни работи и практично тоа нам ни дава одговор со какви луѓе сме имале работа овие седум години кога тие сега од опозиција ова го конструираат. Практично, тие така и владееле, така функционирале – рече Мицкоски.

Пратеникот на СДСМ Митко Трајчулески денеска на прес-конференција соопшти дека имаат докази од „свиркачи“ дека Рамадани ја напуштил државава и заминал во Косово на 10 август со Наим Рамука, началник на северната граница со Косово, а на 14 август, кога и избегал од земјава, бил превезен од вработен во општина Чаир по наредба на Рамука. И во двата случаја границата на Блаце ја поминале по лентата за товарен сообраќај без никаква контрола.

Трајчулески побара од Основсното јавно обвинителство (ОЈО) итна истрага на случајот, да се декласифицираат снимките од камерите на ГП Блаце за да може и целата јавност да увиди дека е вистина тоа што го тврдат, како и неотповиклива оставка од Тошковски и сите лица за кои имаат информации дека се вклучени во организација на бегството на Рамадани.

Рамадани, врз основа на меѓународната потерница издадена до Интерпол од Србија, беше уапсен на 17 јули годинава на граничниот премин Јажинце и однесен на 30 дена екстрадиционен притвор во затворот во Шутка. На 1 август, мерката на Рамадани му беше преиначена во „куќен притвор“  и со оваа одлука се предвидуваше тој да остане во „куќен притвор“ до 16 август. На 15 август од страна на надлежен судски орган доставена е документација до МВР за распишување на централна потерница за Блерим Рамадани, бидејќи тој е недостапен за органите на прогонот.

The post ОБВИНИТЕЛОТ ИЗБРАН ОД СДСМ И ОД ДУИ НЕКА ГИ ПРОВЕРИ ТВРДЕЊАТА ЗА БЕГСТВОТО НА РАМАДАНИ Премиерот тврди дека СДСМ лаже appeared first on plusinfo.mk.

„На 3 март, на улицата Христо Татарчев, првообвинетиот, заедно со лицето кое се наоѓа во бегство и други непознати лица, извршиле грабнување на едно лице, со закана дека ќе го лишат од живот. Намерата им била да го натераат оштетениот да плати претходно украдена наркотична дрога – хероин во количина од 4 килограми.

Второто лице опфатено со Обвинителниот акт со умисла им помогнало, ставајќи им на располагање средство за извршување на кривичното дело – автомобил „Волво В40“ со скопски регистарски ознаки.

Со возилото обвинетите го однеле оштетениот на непознато место спротивно на неговата волја. Во следните неколку дена, преку пораки на мобилни апликации од непознати испраќачи, членови на семејството и блиски лица на оштетениот добивале пораки со барање за уплата на средства за наводно преземена, а неисплатена наркотична дрога.

Со цел да се прикријат трагите, возилото со кое е извршено кривичното дело и во кое последен пат бил виден оштетениот, било опожарено во Драчево.

Јавниот обвинител, со поднесување на обвинението, предложи да биде продолжена мерката притвор за првообвинетиот, додека за помагачот претходно определените мерки на претпазливост да се заменат со мерка куќен притвор“ – информира ЈО.

The post ФИЛМСКА ПРЕСМЕТКА НА НАРКО БАНДИ ЗА 4 КИЛА ХЕРОИН Го киднапирале, му се заканувале дека ќе го убијат, запалиле кола во Драчево appeared first on plusinfo.mk.

Како што информираат од ЈО, јавен обвинител од Основното јавно обвинителство за гонење на организиран криминал и корупција донесе Наредба за спроведување на истражна постапка против двајца македонски државјани за кои постои основано сомневање дека сториле по едно кривично дело – Служба во непријателска војска од чл. 322 ст.1 од Кривичниот законик.

„Денеска во раните утрински часови, под раководство на предметниот јавен обвинител  беше спроведена синхронизирана полициска акција во Скопје и во Република Франција која е резултат на повеќемесечна меѓународна и меѓуинституционална соработка. Во акцијата во Скопје се лишени од слобода две лица, додека во Франција едно лице – македонски државјанин. Осомничените, во 2014 година ја напуштиле територијата на РМ, по што пристигнале во Сирија, место кое било под вооружен судир помеѓу припадниците на Исламска држава – ИСИС и меѓународните коалициони сили“, се наведува во соопштението на ЈО.

Оттаму информираат дека осомничените учествувале во вооружени судири од месец април до месец август 2014 година, како македонски државјани и граѓани, станувајќи припадници на терористичката организација – Исламска држава – ИСИС.

„Осомничените ќе бидат изведени пред судија на претходна постапка при Основниот кривичен суд Скопје. Јавниот обвинител кој постапува во предметот ценејќи дека постојат околности што го оправдуваат стравот oд опасност од бегство, дека ќе ги сокријат, фалсификуваат или уништат трагите на кривичното дело и дека со влијание врз сведоци и соучесниците ќе ја попречат истрагата, до судијата на претходна постапка при Основниот кривичен суд Скопје ќе достави предлог за определување на мерката притвор за осомничените“, велат од ЈО.

Исламска држава – ИСИС од страна на ОН е прогласена како терористичка организација и согласно одредбите во Кривичниот законик, граѓанин на Северна Македонија кој за време на војна или вооружен судир служи во непријателска војска или во други непријателски вооружени формации ќе се казни со затвор најмалку три години.​

The post СЛУЖЕЛЕ ВО ИСИС Истрага за две лица appeared first on plusinfo.mk.

ЈО ги даде деталите во соопштение до јавноста:

„По севкупно спроведена истражна постапка против 19 лица во предметот познат во јавноста под името „Империја“, предметниот обвинител од Основното јавно обвинителство за гонење на организиран криминал и корупција до Основниот кривичен суд Скопје поднесе Обвинителен акт против преостанатите три лица. Според Обвинителниот акт прво и второобвинетиот сториле кривични дела Злоупотреба на службена пложба и овластување и Перење пари и други приноси од казниво дело, освен овие кривични дела на товар на првообвинетиот му се става и кривичното дело Измама за кое се товари и третообвинетиот.

Според опишаните дејствија во Обвинителниот акт, прво и второобвинетиот и веќе едно осудено лице, во периодот од месец мај до месец август 2013 година како соизвршители ги искористиле своите овластувања како одговорни лица – членови на Одбор на директори на правно лице и претставници на акционерскиот капитал. Тие заедно по претходен договор, со умисла помогнати  од сведок – соработник на правдата и веќе осудено лице во предметот, прибавиле значителна имотна корист во износ од 4.000.000 евра за три правни лица, а на штета на оштетеното правно лице и 150 малцински акционери. Со намера да го прикријат изворот од казненото дело, прво и второобвинетиот паричните средства ги пренесувале на жиро сметки на други правни лица.

Во периодот од месец октомври 2013 година до месец јануари 2014 година двајца сведоци – соработници на правдата, заедно, како соизвршители со прво и третообвинетиот, со намера за себе и за друг да прибават значителна противправна имотна корист, довеле во заблуда едно физичко и едно правно лице. Со цел по пониска цена да ги земат акциите што во друго правно лице ги поседувале оштетената и оштетеното правно лице, лажно прикажувајќи факти ја довеле во заблуда оштетената да преземе дејствија со кои нанела значителна имотна штета од 283.591.535,00 денари на себе си и правното лице за сметка на акциите што ги поседувале и што биле продадени на физички и правни лица за износ од 433.592.465,00 денари.  Откако со извршување на кривичното дело Измама била прибавена корист за правно лице во кое еден од сведоците на правдата бил сопственик и управител, за да ги прикрие парите дека потекнуваат од кривично дело, по основ на позајмици ги пренел на три правни и едно физичко лице, а потоа уделот од правното лице што го поседувал го пренел на трите правни лица на кои им биле дадени позајмици, па откако имотната корист прибавена со кривичното дело им била исплатена како дивиденда од по 107.833.000,00 денари, правното лице било пренесено на  оф шор компанија од Белизе и ликвидирано.

Паричните средства прибавени од кривично дело и исплатени по основ на дивидендата на правното лице каде членовите на семсјтвото на првообвинетиот биле сопственици,за да се прикрие дека потекнуваат од кривично дело по насоки на првообвинетиот 62.000.000,00 денари по основ на позајмица биле префрлени на неговата лична сметка, а останатите во износ од 45.833.000,00 денари правното лице ги пуштило во оптек за плаќање по разни основи.

Од досегашните постапки во предметот „Империја“ , освен Обвинителниот акт против три лица произлегоа:

–          пресуди за седум лица врз основа на предлог спогодби,

–          истражната постапка што се однесува за МПМ и е против четири лица, меѓу кои едно лице е сведок – соработник на правдата во друг дел од предметот, е доставена на надлежно постапување во Основното јавно обвинителство Скопје

–          за две лица донесена е Наредба за запирање на истражната постапка врз основа на чл.304 бидејќи за дејствијата што им се ставаат на товар извршени во период 2002-2004веќе е донесено решение за истата работа од страна на друго обвинителство

–          за едно лице истражната постапка е запрена поради настапување на застареност на кривично гонење

–          за две лица меѓу кои е и лице кое за дел од истражната постапка се спогоди со обвинителствотое донесена Наредба за прекин на истрага поради настапување на околности што привремено го спречуваат кривичното гонење, а се однесува на укинувањето на пресудата за предметот Трезор каде против лицето се водеше постапка за предикативното дело на кривичното дело Перење пари , а во овој предмет се овде за перење и други приноси од казниво дело опфатено во овој предмет и

–          за дејствија од 2009-2015 година за три лица меѓу кои се и двајца сведоци – соработници на правдата се донесени решенија за непреземање на кривично гонење врз основа на член 44 ст.1 т.3 од ЗКП.

Воедно, со одлука на судот, а по предлог на Основното јавно обвинителство за гонење на организиран криминал и корупција во корист на РС Македонија е конфискуван имот во вредност од 10.676.653,00 евра, а со Обвинителниот акт е доставен и предлог во корист на државата од тројцата обвинети да се конфискува имот во вкупна вредност од 292.333.000,00 денари или 4.753.382 евра“, соопштуваат од Јавното обвинителство.

The post ПОДНЕСЕНО ОБВИНЕНИЕ ЗА УШТЕ ТРОЈЦА ОСОМНИЧЕНИ ВО „ИМПЕРИЈА“ Се товарат за перење пари, измама и за злоупотреба на службената должност appeared first on plusinfo.mk.

Синот на претседателот (52) се „бањал“ на зелено светло, се снимал како лежи гол на грб во водата. Погледнете.

На видеото се гледа и како тој наводно пали џоинт, а потоа пие од конзерва. Во еден момент се приближува до камерата и гледа директно во неа, додека во позадината тивко свири музика.

Извештаите до кои дојде Дејли Мејл потврдуваат дека видеото со Хантер е снимено во Велнес центарот во Масачусетс, каде Хантер закажал терапија на 30 јануари 2019 година. Тој бил поттикнат од еден пријател да ја посети таа бања, а Хантер му се обратил за помош во борбата против дрогата.

Само еден месец претходно, во декември 2018 година, Хантер му пишал на својот татко и се пожалил дека нема доволно пари за тој третман покрај сите сметки што ги плаќал и издршката.

„Може ли да ми дадете уште еден краток заем, ќе ви го вратам најдоцна во рок од 10 дена“, напишал Хантер.

„Навистина ми е непријатно да ве прашам и знам дека е неправедно од моја страна да ве ставам во таа позиција“, рече тој.

Татко му, му одговорил дека нема проблем, а потоа во друга порака рекол дека му испратил 75.000 долари.

Непосредно пред Нова Година, Хантер му испратил порака на својот татко убедувајќи го да му уплати за тримесечна програма од 20.000 долари во установа за детоксикација во Њујорк. Неговиот татко му се јавил на 2 јануари и му рекол дека ќе го извести кога ќе помине трансферот на пари.

Сепак, видеата на Хантер од мобилниот телефон подоцна ќе покажат дека тој отишол во Велнес центар во Масачусетс подоцна истиот месец.

Видеото и соодветните пораки се најновиот инкриминирачки материјал што е изваден од таканаречениот „лаптоп од пеколот“ на Хантер. Во неколку други пораки кои се пронајдени, Хантер се фали дека неговиот татко го плаќа целото лекување.

Нема сугестии дека персоналот во велнес центар знаел за злоупотребата на дрога на Хантер или дека некој знаел дека таткото на пет деца имал намера да лежи гол и сам за време на третманот во резервоарот за сензорна депривација.

Најновото видео кое го компромитира Хантер доаѓа неколку недели откако Дејли Мејл откри дека, и покрај неговите негирања, Џо Бајден разговарал со својот син за неговите матни зделки во странство.

Говорната пошта откриена во документите на Хантер потврдува дека Бајден му се јавил на Хантер на 12 декември 2018 година, велејќи му дека треба да разговараат за извештајот на Њујорк Тајмс кој го поврзува Хантер со кинескиот нафтен гигант ЦЕФЦ.

The post СИНОТ НА БАЈДЕН СЕ СНИМАЛ КАКО ПУШИ И ПИЕ ГОЛ ВО КАДА Наместо на рехабилитација, отишол во „велнес“ центар (ВИДЕО) appeared first on plusinfo.mk.

Бајден ова го кажа во присуство на потпретседателката Камала Харис. Видеото од лапсусот го обиколи Твитер.

“America is a nation that can be defined in a single word. Asfutmsifwffutsh.”pic.twitter.com/4QTkDfTIvQ

— James Melville (@JamesMelville) June 22, 2022

На сите им беше јасно дека ова е лапсус (кој знае кој по ред) и дека не му беше намерата да го каже тоа, но тие неколку секунди беа доволни за да започне лавината од коментари на социјалните мрежи.

Да потсетиме, претседателот на САД минатата недела имаше мала сообраќајна несреќа кога падна од велосипед. Претходно, тој на двапати при завршетокот на своите говори симнувајќи се од говорницата се вртеше за да се поздрави со некого, ракувајќи се со воздухот.

The post НОВИОТ БИСЕР НА БАЈДЕН Америка може да се опише со зборот „АУСУФУТИМАЕХЕА“…(ВИДЕО) appeared first on plusinfo.mk.

Како што соопшти ЈО, осомничениот синоќа околу 22.30 часот во домот во кој живеел во заедница со својата сопруга и ќерка, започнал расправија по што ги нападнал и им нанел телесни повреди.

„Тој побарал парични средства, но откако сопругата му кажала дека нема, започнал да ја удира со шлаканици. Потоа побарал пари и од ќерката, но откако не му биле дадени се упатил да го земе нејзиниот мобилен телефон за да го продаде. Кога ќерката се обидела да повика полиција, осомничениот зел нож од кујната и замавнал кон неа, во што бил спречен од сопругата. Тој продолжил со намерата, удирајќи ја сопругата со каиш во пределот на грбот и левата натколеница, нанесувајќи и телесни повреди.  Нападот го спречил нивен роднина“, се наведува во соопштението.

Од ЈО посочуваат дека осомничениот кривичното дело „загрозување на сигурноста“ го сторил на штета на неговата ќерка, бидејќи неколкупати праќал пораки на нејзиниот мобилен телефон со закани дека „ќе ја обеси“ и дека „ќе ги заколе неа и нејзината мајка“.

– Бидејќи сторените кривични дела се против јавниот ред или моралот, а особено бидејќи постојат околности кои го оправдуваат стравот дека осомничениот ќе го повтори делото или дека ќе го изврши кривичното дело со кое се заканува, јавниот обвинител до Основниот суд Гостивар поднесе Предлог за определување мерка притвор за осомничениот“, се додава во соопштението.​

The post СОПРУГАТА И ЌЕРКАТА НЕ МУ ДАЛЕ ПАРИ, ПА ГИ ПРЕТЕПАЛ Обвинителството бара притвор за насилникот од Гостивар appeared first on plusinfo.mk.

– Целиот случај е пријавен во МВР, за што е изготвена и кривична пријава. Еве ја … но истата според нашите информации претрпела измени во ЈО или во МВР, и е изваден делот каде што се спомнува Вице. Кој, зошто и дали го направил тоа и фалсификувал јавна пријава треба да утврди ЈО, исто како што треба да се утврди одговорност за рекетарите. Бидејќи Русковска вели дека не е запознаена, еве шанса да се запознае и да и ја освежиме меморијата. Впрочем ова е тест за обвинителството. Бараме ЈО да почне да си ја работи работата и веднаш да ги повика Вице Заев, Стојан Чифлигароски, Горан Крстев, Лазе Велковски и Оливер Спасовски, да ја прибави целокупната документација и да постапи согласно закон. Одговорност мора да има – рече Лефков.

Тој објаснува дека според документите,  сагата и притисокот со цел изнуда на пари врз Рубитон почнува при самото склучување на договорот со РЕК Битола.  Рубитон склучува договор за ископ на јаловина во РЕК Битола на 13.08.2018 година. На 24.08.2018 кога побарале влез во РЕК Битола на механизацијата Васко Василев добива повик од тогашниот директор на РЕК Битола, Васко Ковачевски, да се сретнат, што и се случило во хотел Епинал во Битола. На средбата Ковачевски побарал од Василев да отстапи 50% од работата на СВ Инвест на Стојан Чифлигаровски. На што Василев одговорил дека согласно потпишаниот договор ваквото барање е недозволиво.

– Наредниот ден Василев добива повик од Ковачевски со барање на СВ Инвест да му отстапи 75% од работата. Откако Василев повторно одбил наредниот ден ги повикал сопствениците на Рубитон – Василев и Радивчев на состанок во менувачницата Саат кула, сопственост на Стојан Чифлигаровски, газда на СВ Инвест со барање целосно да ја отстапат работата на СВ Инвест со надомест од 10.000 евра како трошок за тоа што учествувале на тендерот. По што сопствениците чувствувајќи огромен психолошки притисок рекле дека не им треба ништо, само сакаат правно да се раскине договорот без да одговараат. По оваа средба повторно се случува нова, сега веќе четврта, во хотелот Епинал помеѓу Василев, Радивчев и Ковачевски и Чифлигаровски. На која сопствениците на Рубитон му кажале на Ковачевски дека не постои можност за пренос на работата, на која тој им кажал да му дадат 250.000 евра во готово или да му ги однесат лично на Вице во Струмица. По што им го дал и бројот на Вице, стои и е наведено во овие документи кои ќе ги предадеме во обвинителството – вели Лефков.

Тој додава дека Василев, според сведочењето, организирал средба со Вице преку стар познаник од Струмица по што тие дошле на договореното место во Хотел Вила Парк во Струмица, каде Вице не дошол со образложение дека средбата не била договорена за 9 вечерта, а не сабајле. По што сопствениците на Рубитон си заминеле. А врз нив почнал огромен притисок и терор.

– Како што стои наведено во документите Василев добива порака од Вице – Многу лош впечаток сте оставиле, недостапен си бил, а седиш во кафуле. Имам слики. По што следи и Вибер повик на кој како што е наведено во овие документи му било кажано: – Ќе си ја тераш твојата работа, а ние нашата, па ќе видиме до каде ќе стигнеш. По овие пораки им следува цело сценарио според Василев, кое завршува со раскинување на договорот и наплата на банкарската гаранција со што на Рубитон и е нанесена штета од 30.000.000 денари. По раскинување на договорот РЕК Битола пристапило кон склучување на договор со второ рангираниот на јавниот повик, кој не прифатил, со третиот како што кажува Василев не било преговарано, и договор се склучува со 4-то рангираната фирма – СВ Инвест, со која е склучен договор во 4 очи со непосредно преговарање – вели Лефков.

The post Лефков достави документи во ЈО според кои Ковачевски и Вице барале 250.000 евра провизија appeared first on plusinfo.mk.