Над десет граѓани од Битола во последните неколку месеци останале без повеќе од 60.000 евра, откако станале жртви на добро организирана телефонска измама со лажни сообраќајни несреќи.

Според информациите од Основно јавно обвинителство Битола, измамата се одвивала по исто сценарио – најчесто биле таргетирани повозрасни лица кои добивале вознемирувачки телефонски повик.

Од другата страна на линијата им се претставувале лица кои тврделе дека нивен близок е тешко повреден во сообраќајна несреќа и дека итно се потребни пари за операција. Во друга верзија на измамата, на жртвите им било кажувано дека нивен роднина предизвикал тешка несреќа и дека парите се потребни за да се избегне затвор.

– Исплашени и во паника за своите најблиски, граѓаните се согласувале да предадат големи суми пари, златен накит и други вредни предмети. Сумите се движеле од неколку десетици илјади денари до повеќе од 20.000 евра.
Парите најчесто биле предавани на различни локации низ Битола на лица кои претходно биле ангажирани преку огласи на Фејбук. Тие ги подигнувале парите директно од измамените граѓани – велат од ОЈО.

Досега обвинителството поднело обвинение против четири лица кои ги преземале парите и се гонат како соизвршители во измамите.

Истрагата покажала дека парите потоа биле пренесувани во странство, каде што завршувале кај засега непознато лице во Бугарија. Сите случаи ги поврзуваат и телефонски броеви од Романија, преку кои измамниците контактирале со жртвите.

Поради тоа, обвинителството веќе побарало меѓународна правна помош за да се открие целата мрежа што стои зад измамите.

Во меѓувреме, истражните органи предупредуваат граѓаните да бидат внимателни и никогаш да не даваат пари на рака на непознати лица, особено по телефонски повик во кој се бара итна исплата.

The post НАД 60.000 ЕВРА ИЗВЛЕЧЕНИ ОД ИЗМАМЕНИ БИТОЛЧАНИ Разоткриена мрежа што мамела граѓани со лажни сообраќајки appeared first on plusinfo.mk.

СВР Битола, до Основното јавно обвинителство Битола, поднесе кривична пријава против М.Т.(46) од Битола поради постоење основи на сомнение за сторени кривични дела „злоупотреба на службена положба и овластување”, „фалсификување исправa” и „употреба на исправа со невистинита содржина”.

Пријавениот, управител во приватна фирма од Новаци, во април и мај 2024 година, со пречекорување на границите на своите службени овластувања, а со намера да прибави противправна имотна корист, нанел штета од 5.453.7000 денари или 88.678 евра на РЕК Битола. Имено, тој извршил промена на две барања од РЕК Битола (рудник Суводол) до фирмата за набавка на ролни за јаглен за репарирање на лента за јаглен, на тој начин што извршил промена на количината, односно ги преправил првичните појдовни барања кои како документи биле изготвени и таквите фалсификувани барања ги употребил како доказ во правен сообраќај за набавка на гумени прстени.

The post СО ФАЛСИФИКАТ ГО ОШТЕТИЛ РЕК БИТОЛА ЗА 90.000 ЕВРА Кривична пријава за управител на фирма од Новаци appeared first on plusinfo.mk.

Основното јавно обвинителство Битола отвори истражна постапка против осум физички и едно правно лице за продолжени кривични дела поврзани со јавни набавки во РЕК Битола.

Петмина службени лица во комбинатот, меѓу кои тогашниот директор и четворица раководители и директори во ПЕ Рудници, се сомничат дека во текот на 2023 година како соизвршители сториле продолжено кривично дело „злоупотреба на службената положба и овластување“, така што не ја извршиле својата службена положба со намера на друг да му прибават корист, а да го оштетат комбинатот.

Според Обвинителството, тие спротивно на основниот рударски проект и на потребите на рудникот „Живојно“ организирале и реализирале јавна набавка за дислокација на погонски станици од рудникот „Осломеј“ во ПЕ Рудници – РЕК Битола.

„Правното лице — ДТПУ „Марковски Компани“, неговиот сопственик/управител и уште едно лице вработено во компанијата, се сомничат дека, иако биле свесни дека работите не се извршени, доставувале фактури врз основа на кои од РЕК Битола незаконито наплатиле 106.200.000 денари со вклучен ДДВ. Со тоа сториле продолжено кривично дело „злоупотреба на постапката за јавен повик и јавно-приватно партнерство“, наведуваат од Обвинителството.

Како што информираат од Обвинителството, предистражните дејствија биле преземени по наредба на јавниот обвинител, а ги спровела Управата за финансиска полиција во изминатите неколку месеци.

Доказите укажуваат дека петмина осомничени – службени лица во РЕК Битола, односно тогашниот директор и четворица раководители и директори, во текот на 2023 година свесно ги повредиле основните начела за економичност, ефикасност и ефективност од Законот за јавни набавки.

„Иако знаеле дека за транспортот на јаглен во рудникот Живојно не е предвидена метода со континуирана технологија, тие сепак ја организирале набавката спротивно на проектот. При дефинирањето на условите го прекршиле начелото на конкурентност, овозможувајќи една фирма, ‘Марковски Компани’, да биде единствен понудувач и да се стекне со противправна корист од големи размери“, наведуваат од Обвинителството.

Тројца од раководителите и директори во ПЕ Рудници, како и уште едно службено лице во РЕК Битола, се осомничени и за продолжено кривично дело „измама во службата“.

Тие, иако знаеле дека работите не се извршени, потпишувале записници и извештаи дека договорот е целосно реализиран, наведувајќи дека во периодот од 26 февруари до 17 јули 2024 година е извршена демонтажа, транспорт и монтажа на погонските станици од РЕК Осломеј во РЕК Битола.

Јавниот обвинител до судијата на претходна постапка при Основниот суд во Битола ќе достави предлог за притвор за две лица, сопственикот на фирмата и еден раководител од ПЕ Рудници при РЕК Битола.
За две други раководни лица и за еден вработен во компанијата се предлагаат мерки на претпазливост — одземање на патна исправа и повремено јавување во судот.

Поранешниот директор на РЕК Битола веќе се наоѓа во притвор по друга постапка, а уште едно службено лице е под веќе активни мерки на претпазливост.

Од Управата за финансиска полиција информираат дека до Обвинителството доставиле кривична пријава против:

Б.М., управител и сопственик на „Марковски Компани“,

А.З., вработен во истата компанија,

Б.Ч., раководител во Подружница РЕК Битола – Новаци,

Д.П., технички директор на Рудници,

Д.В., технички директор на ПЕ Рудници,

В.Ј., помошник директор на производство,

П.М., директор на АД ЕСМ – Подружница РЕК Битола,

А.Ј., раководител во Рудник Суводол,

и против правното лице ДТПУ Марковски Компани Борче ДООЕЛ Битола за сторени кривични дела „злоупотреба на службена положба и овластување“ и „злоупотреба на постапка за доделување јавна набавка или јавно-приватно партнерство“.

Реакција од АД ЕСМ: „Ниту еден член од тековното раководство не е инволвиран“

По објавувањето на информациите, АД ЕСМ реагираше со официјално соопштение:

„Ниту еден член од тековното раководство на РЕК Битола не е приведен, ниту инволвиран во тековната постапка. Приведените лица се дел од поранешното раководство на РЕК Битола, а постапката се однесува на дејствија донесени во претходниот период, пред сегашното раководство да ја преземе функцијата“, соопштија од ЕСМ.

Од компанијата додаваат дека целосно го поддржуваат расветлувањето на случајот:

„Го охрабруваме целосното расветлување на случајот и ја поддржуваме работата на институциите. Во интерес на точно информирање, апелираме до медиумите и јавноста да прават јасна разлика меѓу поранешното и сегашното раководство, за да не се наруши довербата во работата на АД ЕСМ“, додаваат од компанијата.

УАПСЕН БОРЧЕ МАРКОВСКИ, ЧОВЕКОТ ЧИЈА КОМПАНИЈА ВРТЕШЕ МИЛИОНИ ЕВРА ОД РЕК БИТОЛА Финансиската полиција го сомничи за местење тендер од 100 милиони денари

The post ОБВИНИТЕЛСТВОТО ОТКРИ ШЕМА НА ПЕРЕЊЕ ПАРИ ВО РЕК БИТОЛА Испумпани 106 милиони денари преку лажни фактури appeared first on plusinfo.mk.

Основното јавно обвинителство Битола поведе постапка против 28-годишен маж од Битола поради основано сомнение дека сторил две тешки кривични дела – напад врз здравствен работник и здравствен соработник при вршење здравствена дејност, како и напад врз службено лице при вршење работи на безбедноста.

Како што информираат од Обвинителството, инцидентот се случил на 29 јуни, во едно казино во Битола, кога осомничениот физички нападнал доктор од итната медицинска служба кој се обидувал да му помогне.

– Осомничениот без никаква причина го удрил лекарот со тупаница, нанесувајќи му телесна повреда додека тој професионално ја извршуваше својата работа – велат од Основното јавно обвинителство Битола.

По инцидентот, мажот бил пренесен во Клиничката болница во Битола за натамошна медицинска грижа. Но и таму продолжил со агресивно однесување, одбивал да соработува и да биде третиран. Вработените во болницата повикале полициска асистенција.

– Кога на лице место пристигнале двајца полициски службеници од СВР Битола, осомничениот и нив ги нападнал. Им упатувал закани и ги удирал повеќепати, покажувајќи висок степен на агресија и непочитување на институциите – додаваат од ОЈО.

Ценејќи дека постои опасност од бегство и реална можност за повторување на делото, јавниот обвинител поднесе предлог за определување мерка притвор до надлежниот судија од Основниот суд Битола.

ХАОС ВО БИТОЛСКАТА БОЛНИЦА Маж нападнал полицајци додека давале асистенција на лекари

The post УДРИЛ ЛЕКАР ВО КАЗИНО, ПА СО ТУПАНИЦИ УДИРАЛ ПОЛИЦАЈЦИ Обвинителство бара притвор за 28-годишниот битолчанец appeared first on plusinfo.mk.