Сите девет држави што поседуваат нуклеарно оружје ги модернизирале и ги прошириле своите арсенали во услови на растечки глобални тензии, се наведува во извештајот на Стокхолмскиот меѓународен институт за истражување на мирот (СИПРИ), објавен денеска.

Истражувањето покажува широк тренд на нуклеарно вооружување кај сите девет нуклеарни сили.

– Сè повеќе докази укажуваат на тоа дека државите со нуклеарно оружје ги ставаат настрана, па дури и се откажуваат од своите обврски за разоружување, и наместо тоа ја демонстрираат својата нуклеарна моќ – изјави истражувачот на СИПРИ, Ханс Кристенсен.

Според него, потпирањето на нуклеарни решенија создава нови ризици и дополнително ја поттикнува трката во вооружување.

Русија во повеќе наврати алудираше на својот нуклеарен потенцијал за време на војната во Украина со цел да ги одврати западните земји од поддршката на Киев.

Според проценките на СИПРИ, Русија и САД заедно поседуваат околу 83 проценти од сите складирани нуклеарни бојни глави во светот.

По завршувањето на Студената војна, двете држави постепено ги демонтираа повлечените боеви глави, што доведе до континуирано намалување на глобалните нуклеарни залихи.

Сепак, институтот предупредува дека овој тренд најверојатно ќе се промени во наредните години поради забавувањето на разоружувањето и распоредувањето ново нуклеарно оружје.

Истражувачите проценуваат дека деветте нуклеарни сили – САД, Русија, Обединетото Кралство, Франција, Кина, Индија, Пакистан, Северна Кореја и Израел – во јануари 2026 година поседувале вкупно 12.187 нуклеарни бојни глави.

Од нив, околу 9.745 биле дел од воените резерви подготвени за евентуална употреба.

Повеќе од 4.012 бојни глави биле распоредени на ракети и на авиони, додека меѓу 2.100 и 2.200 биле поставени на балистички ракети во состојба на највисока готовност.

Речиси сите такви системи им припаѓаат на Русија и на САД, а во помал обем и на Обединетото Кралство и на Франција.

По излегувањето на Обединетото Кралство од Европската Унија, Франција останува единствената нуклеарна сила во рамките на ЕУ.

The post СВЕТОТ ВЛЕГУВА ВО НОВА НУКЛЕАРНА ТРКА Сите девет нуклеарни сили ги прошируваат своите арсенали appeared first on plusinfo.mk.

Севернокорејскиот лидер Ким Јонг Ун повика на дополнително зајакнување на нуклеарниот арсенал на земјата, вклучително и на, како што навел, „експоненцијално“ зголемување на производството на нуклеарен материјал за оружје, објавија државните медиуми во Пјонгјанг.

Според државната новинска агенција КЦНА, Ким за време на посетата на нов производствен капацитет изјавил дека во последните пет години капацитетот на земјата за производство на нуклеарен материјал за воени цели е повеќе од двојно зголемен и дека тој тренд треба дополнително да се забрза.

Информациите засега не се потврдени од независни извори.

Северна Кореја веќе две децении се соочува со санкции од Обединети нации поради својата нуклеарна програма. Властите во Пјонгјанг тврдат дека нуклеарното оружје е неопходно за заштита од надворешни закани.

Од друга страна, САД, Јужна Кореја и Јапонија оценуваат дека нуклеарната програма на Северна Кореја претставува сериозна закана за регионалната и глобалната безбедност.

The post СЕВЕРНА КОРЕЈА ГО ЗАБРЗУВА НУКЛЕАРНОТО ПРОИЗВОДСТВО Ким најави ново јакнење на арсеналот appeared first on plusinfo.mk.

Претседателот на САД, Доналд Трамп изјави дека Иран се откажал од својата програма за нуклеарно вооружување.

Тој во поткаст на „Њујорк пост“ изјави дека веќе е постигнат договор за нуклеарното оружје на Иран.

– Не можеме да им дозволиме нуклеарно оружје. Тие веќе се согласија да немаат. Тоа беше голема работа – посочи Трамп.

Тој негираше дека Иран има предност во судирот.

– Иран нема морнарица. Нема воздухопловни сили. Имаат многу малку војници. Немаат лидерство, воопшто немаат … Нивната економија се урива. Нивната инфлација е 250 проценти. Што лошо можете да замислите, тие го имаат, наведе Трамп.

Според него и блокадата на Ормускиот Теснец набрзо ќе биде решена, додавајќи оти САД имаат „многу голем воен успех во Иран“.

The post ИРАН ВЕЌЕ Е СОГЛАСЕН ЗА НУКЛЕАРНОТО ОРУЖЈЕ, ВЕЛИ ТРАМП Дали е решен дел од договорот? appeared first on plusinfo.mk.

САД ја разгледуваат можноста за распоредување нуклеарно оружје во други европски земји-членки на НАТО, како дел од напорите за зајакнување на безбедносните гаранции за сојузниците во Европа, пишува „Фајненшл тајмс“ (ФТ).

Американските претставници покажаа отвореност да разгледаат проширување на постојниот систем за споделување нуклеарно оружје, што моментално вклучува шест европски земји кои се домаќини на авиони способни да носат нуклеарно оружје, изјавија за ФТ три лица запознаени со разговорите.

Разговорите, кои се водат во строго доверлива рамка и не мора да доведат до конкретни промени, следеа во време на зголемена загриженост кај европските сојузници поради можното намалување на американското воено присуство на континентот, објави весникот.

Според изворите, можноста дополнителни земји да станат домаќини на таканаречените авиони со двојна способност (DCA), кои можат да носат нуклеарно оружје, додека некои земји на источниот дел од НАТО, вклучувајќи ги Полска и балтичките земји, веќе се заинтересирани да примат на своја територија бази на DCA.

Полските претставници постојано јавно зборуваат за желбата Полска да биде домаќин на нуклеарно оружје.

Поранешниот претседател Анджеј Дуда ги повика САД да ја прошират иницијативата DCA на територијата на Полска, додека Варшава оваа година се придружи и на француската иницијатива за разгледување на можноста за привремено преместување на делови од системот за нуклеарно одвраќање во сојузничките европски земји.

Иако европските членки на НАТО ветија дека ќе ги зголемат трошоците за одбрана и ќе ги зајакнат конвенционалните капацитети, нуклеарниот „чадор“ сè уште се смета за клучен елемент на одвраќањето.

Генералниот секретар на НАТО, Марк Руте, по состанокот на министрите за надворешни работи на алијансата изјави дека постои „општо разбирање“ дека иако САД ќе се фокусираат повеќе на други региони, целокупното одвраќање и одбрана во Европа мора да останат на исто ниво.

„Ако некој е толку неодговорен да нè нападне, одговорот би бил катастрофален“, рече Руте.

Програмата на НАТО за споделување нуклеарно оружје моментално ги вклучува Белгија, Германија, Италија, Холандија, Турција и Велика Британија, чии сили се овластени да бидат домаќини на американски авиони со двојна способност (DCA) и претходно распоредени нуклеарни бомби.

Оружјето е под контрола на САД, кои го задржуваат единственото право да одлучуваат за неговата употреба.

The post САД СЕ ВО ПРЕГОВОРИ ЗА РАСПОРЕДУВАЊЕ НУКЛЕАРНО ОРУЖЈЕ ВО ЕВРОПА Преговорите се тајни, но во напредна фаза appeared first on plusinfo.mk.

Контролата врз Ормуската Теснина за Иран е поважна од поседување нуклеарно оружје, изјави високопоставен  претставник на Иранската револуционерна гарда.

Заменик-политичкиот командант, Јадола Џавани, изјавил дека воспоставувањето суверенитет над Ормуската Теснина претставува „стратешко оружје“ кое, според него, е поважно од нуклеарниот арсенал бидејќи и овозможува на земјата да „казнува агресори“.

Тој додал дека воената конфронтација со Соединетите Американски Држави и Израел била „неизбежна“ и дека Иран се подготвувал за таков развој на настаните.

Џавани исто така оцени дека конфликтот донел одредени „придобивки“ за Иран, тврдејќи дека земјата не само што се одбранила, туку и излегла зајакната од судирот.

Во меѓувреме, дел од светските медиуми меѓу кои и „Си-Ен-Ен“, пренесуваат дека Иран ги засилува напорите за обновување на подземните ракетни капацитети, по неодамнешните напади и затегнатите безбедносни состојби во регионот.

The post ОРМУСКИОТ ТЕСНЕЦ ПОВАЖЕН ОД НУКЛЕАРНАТА ПРОГРАМА? Иран нема да се откаже од контролата врз преминот appeared first on plusinfo.mk.

САД и Иран се поблиску до мировен договор, изјави претседателот на САД, Доналд Трамп. Тој рече дека Техеран се согласил ниту да развива, ниту да набавува нуклеарно оружје.

Во интервју за „Фокс њуз“, Трамп порача дека преговорите напредуваат, но предупреди дека воената опција останува на маса ако разговорите пропаднат.

– Би сакал да имаме договор, бидејќи можеме веднаш да го отвориме Ормускиот Теснец по потпишувањето. Единствената гаранција што ми треба е да нема нуклеарно оружје. Тие се согласија со тоа и тоа беше многу интересно – рече Трамп.

Тој додаде дека Иран прифатил да не дојде до нуклеарно оружје по ниту еден основ.

– Првично рекоа дека нема да развиваат нуклеарно оружје. Потоа прашав што ако го купат. Сега велат дека ниту ќе развиваат, ниту ќе купуваат оружје на каков било начин. Полека го добиваме тоа што го сакаме. Преговарачите се многу строги и потребно е време, но не брзам – изјави Трамп.

Воената опција останува на маса

Претседателот на САД рече дека очекува голем договор, но предупреди дека постои и друга можност.

– Ќе постигнеме голем договор. Во спротивно ќе се вратиме и ќе ги завршиме работите по воен пат – рече Трамп.

Сепак, тој нагласи дека повеќе би сакал дипломатско решение и избегнување на нова воена ескалација.

– Во суштина ја победивме нивната војска – додаде Трамп.

Трамп барал измени во договорот

Американскиот портал „Аксиос“, повикувајќи се на извори од администрацијата, објави дека Трамп побарал дополнителни измени во текстот на договорот што го подготвиле американските и иранските преговарачи.

Според информациите, една од забелешките се однесувала и на формулациите поврзани со отворањето на Ормускиот Теснец за меѓународниот бродски сообраќај.

The post „ПОЛЕКА ГО ДОБИВАМЕ ТОА ШТО ГО САКАМЕ“ Трамп најави договор, тврди дека Иран попушта appeared first on plusinfo.mk.

Иран се закани дека би можел да почне збогатување на ураниум до 90 % ако САД повторно извршат напад.

Заканата доаѓа од пратеникот Ебрахим Резаи, портпарол на парламентарниот комитет за национална безбедност и надворешна политика.

„Една од опциите на Иран во случај на уште еден напад би можела да биде збогатување од 90 %. Ќе го анализираме тоа во парламентот“, напиша Резаи.

Нуклеарните централи обично користат ураниум збогатен од 3 до 5 %. За нуклеарно оружје потребно е ниво од околу 90 %.

Токму затоа новата порака од Техеран се смета за сериозна ескалација.

Можни се нови напади на САД?

Заканата доаѓа откако американските медиуми објавија дека претседателот на САД Доналд Трамп размислува за нови удари врз Иран.

Според извештаите, целта е да се ослаби позицијата на Техеран во преговорите.

„Примирјето е на апарати“

Трамп претходно изјави дека примирјето со Иран е „на апарати за одржување во живот“.

– Би го нарекол најслаб во моментов, откако ги прочитав глупостите што ни ги испратија – изјави Трамп пред новинарите.

Теснецот пaк во фокус

Во меѓувреме, американскиот државен секретар Марко Рубио разговарал со британски и австралиски претставници за безбедноста во Ормускиот Теснец.

Стејт департментот соопшти дека темата била „враќање на слободата на пловидба“.

The post ИРАН СО НУКЛЕАРНА ЗАКАНА Ако САД нападнат, ураниумот може да натежне appeared first on plusinfo.mk.

Американскиот претседател Доналд Трамп изрази увереност дека САД на крајот ќе го добијат збогатениот ураниум на Иран, пренесува ДПА.

– Ќе го добиеме тоа во одреден момент со што и да сакаме – рече тој во интервју за телевизиската програма „Full Measure“.

Трамп вели дека материјалот бил „надгледуван“ од САД.

– Ако некој се приближи до местото, ќе знаеме за тоа и ќе го разнесеме – рече американскиот претседател.

Во саботата, рускиот претседател Владимир Путин предложи транспорт на збогатен ураниум од Иран и негово складирање во Русија.

Првично, имаше договор за ова, но САД потоа одеднаш го заострија својот став. Путин рече дека Русија веќе еднаш го отстранила збогатениот ураниум од Иран, во 2015 година, и дека Иран ѝ верувал на Русија, „и не без причина“.

Трамп врши притисок врз Иран целосно да ги отстрани своите залихи од високо збогатен ураниум. Тој, исто така, сака постројките за збогатување да бидат демонтирани и Техеран да не може да ја унапреди својата нуклеарна програма за развој на нуклеарно оружје.

Претходно денеска израелскиот премиер Бенјамин Нетанјаху изјави дека, и покрај прекинот на огнот, војната против Иран не е завршена сè додека не се отстрани збогатениот ураниум од земјата.

Во интервју за американската телевизиска мрежа Си Би Ес, Нетанјаху го услови крајот на конфликтот со отстранување на високо збогатениот ураниум од иранска територија и демонтирање на објектите за збогатување во земјата.

Иран со години тврди дека нема намера да развива нулерано оружје и оти неговата нуклеарна програма е за чисто цивилна употреба.

The post ПУТИН ПРЕДЛОЖИЛ ДА ГО СКЛАДИРА ИРАНСКИОТ УРАНИУМ Трамп го притиска Иран целосно да ги отстрани залихите appeared first on plusinfo.mk.

Заменик-претседателот на Советот за безбедност на Русија, Дмитриј Медведев, оцени дека евентуалното приближување на Германија до поседување нуклеарно оружје би претставувало „несомнен casus belli“ (повод за војна) и причина за преземање најшироки мерки на руски одговор во рамките на доктрината за нуклеарно одвраќање.

Во текст објавен за РТ, Медведев наведе дека таквиот развој на настаните би предизвикал сериозна загриженост не само во Москва, туку и во Соединетите Американски Држави, особено во контекст на можни нови преговори за договорот СТАРТ-4 и евентуално вклучување на Кина во нуклеарните аранжмани.

Тој предупреди на, како што рече, сценарио на „нуклеарна Европа под водство на милитаристичка Германија“, тврдејќи дека дел од потенцијалниот арсенал би можел да биде надвор од контрола на НАТО, што според него би имало глобални безбедносни последици.

Медведев го обвини Западот за подготвеност да ги игнорира или прекршува меѓународните договори, вклучително и поранешните ветувања дека НАТО нема да се шири кон исток, наведувајќи дека политичките договори често се напуштаат поради „политичка целисходност“.

– Брзината и дрскоста со кои западните сили денес ги напуштаат фундаменталните меѓународни документи и принципи во корист на озлогласената политичка целисходност се вџашувачки – изјави Медведев.

Во делот посветен на Германија, тој оцени дека официјален Берлин води политика која, според него, подразбира стремеж кон стратешки пораз на Русија и поддршка за Украина, која ја опиша како посредно вклучена во поширок конфликт.

– Германците се подготвени да ги користат украинските вазали како евтина монтажна работилница за своето производство – наведе Медведев.

Тој додаде дека германското политичко раководство ја прогласило Русија за „главна закана за безбедноста и мирот“ и дека во Берлин официјално е објавена целта за нанесување „стратешки пораз“ на Москва.

Според Медведев, Германија, како и Европската Унија во целина, немале ниту повод ниту објективни причини толку силно да застанат во одбрана на Украина и да ја прогласат Русија за свој „вечен непријател“.

Тој предупреди дека Русија мора да одржува високо ниво на борбена готовност на западниот правец, повикувајќи се на историски паралели со Втората светска војна и нагласувајќи дека не смее да се повтори „трагедијата од 1941 година“.

На крајот Медведев повтори дека приближувањето на Германија кон нуклеарен капацитет или промена на европската безбедносна архитектура без, како што тврди, соодветна контрола, би можеле да предизвикаат руски одговор во согласност со руските стратешки нуклеарни доктрини.

The post ДОКОЛКУ СЕ ПРИБЛИЖИ ДО ПОСЕДУВАЊЕ НУКЛЕАРНО ОРУЖЈЕ – ТОА БИ БИЛО ПОВОД ЗА ВОЈНА Медведев упати закани до Германија appeared first on plusinfo.mk.

Претседателот на САД Доналд Трамп навести дека веројатно нема да го прифати најновиот предлог на Иран за окончување на конфликтот, кој предвидува повторно отворање на Ормуската Теснина со одложување на решавањето на нуклеарното прашање.

Според извори запознаени со ситуацијата, Трамп го изнел ставот на состанок со високи претставници за национална безбедност, изразувајќи резервираност кон планот што Техеран го доставил деновиве, пренесе „Си-Ен-Ен“.

Американски претставници оцениле дека отворањето на теснината без решавање на прашањето за збогатувањето ураниум би ја ослабело преговарачката позиција на САД, додека понатамошна блокада би продолжила да го поттикнува растот на цените на енергенсите, вклучително и на горивата во САД.

Притоа не се прецизирани следните чекори на Администрацијата во САД, а официјални лица изразиле загриженост поради можни поделби во иранското раководство и нејаснотии околу прашањето кој е крајниот фактор што ги носи одлуките во Техеран.

Белата куќа одби да ги коментира деталите од преговорите, наведувајќи дека станува збор за чувствителни дипломатски разговори и оти САД ќе прифатат само договор што ја исклучува можноста Иран да дојде до нуклеарно оружје.

The post ТРАМП НЕМА ДА ПРИФАТИ ДОГОВОР БЕЗ РЕШЕНИЕ ЗА УРАНИУМОТ Неприфатливо е Иран да направи нуклеарно оружје appeared first on plusinfo.mk.