Кинеската армија успешно тестираше стратешка ракета лансирана од подморница, јави Синхуа.

Морнарицата соопшти дека денеска напладне по локално време, стратешка нуклеарна подморница успешно тестирала стратешка ракета со лажна боева глава во правец на релевантни области на отворено море во Тихиот Океан.

„Ракетата слета во прецизно одредени води“, соопшти војската на Пекинг.

Јапонија соопшти дека остро побарала од Кина да го преиспита својот ракетен тест над Тихиот Океан, откако Пекинг однапред ја известил за пробата.

„Силно инсистиравме оваа проба со балистичка ракета да биде преиспитана за да не претставува закана за безбедноста на Јапонија – вклучително и да не поминува низ нашиот воздушен простор“, се вели во заедничкото соопштение од неколку јапонски министерства, вклучувајќи ги министерствата за одбрана и надворешни работи, издадено пред лансирањето.

Австралија предупреди дека кинескиот ракетен тест може да го „дестабилизира“ регионот на Јужниот Пацифик.

Министерот за надворешни работи на Нов Зеланд, Винстон Питерс, изрази длабока загриженост по тестот на ракета за која рече дека е со долг дострел и „способна да носи нуклеарна боева глава“.

„Пацификот е океан на мирот и ние сме длабоко загрижени од тестирањето на оружје од страна на Кина способно да испорача нуклеарна боева глава“, се вели во неговото соопштение.

Лансирањето „не е во согласност со стабилноста во регионот“, додаде Питерс.

The post КИНА ТЕСТИРАШЕ РАКЕТА ШТО МОЖЕ ДА НОСИ НУКЛЕАРНА БОЕВА ГЛАВА Јапонија, Австралија и Нов Зеланд негодуваат appeared first on plusinfo.mk.