нов премиер Archives - plusinfo.mk

ШЕФОТ НА „НАФТОГАС“ Е НОВИОТ УКРАИНСКИ ПРЕМИЕР Зеленски менува премиер по четврти пат

плусинфо — Thu, 16 Jul 2026 11:54:16 +0000

Украина доби нов премиер, четврти во мандатот на претседателот Володимир Зеленски. Врховната рада денеска го избра Сергиј Корецки за шеф на владата, а неговото назначување го поддржаа 289 пратеници.

Корецки ја наследува Јулија Свириденко, чиј мандат траеше помалку од една година. Со нејзината оставка автоматски беше разрешен и целиот владин состав.

Пред нив украинската влада ја водеа Денис Шмихал, а претходно Олексиј Хончарук.

Од нафта и гас до премиерска функција

Новиот премиер има 48 години и доаѓа од енергетскиот сектор, каде изгради кариера како менаџер во дел од најголемите украински компании.

Пред изборот за премиер, Корецки беше претседател на Управниот одбор на „Нафтогас Украина“. Претходно раководеше со државните компании „Укрнафта“ и „Укртатнафта“, кои преминаа под државна контрола во 2022 година.

Под негово водство, „Укрнафта“ од компанија со милијардни загуби се претвори во едно од најпрофитабилните претпријатија во Украина. Во периодот 2023-2024 година оствари нето-добивка од околу 40 милијарди гривни.

Корецки претходно беше дел и од групацијата „Континуум“, која обединуваше повеќе од 200 компании, како и од синџирот бензински пумпи „ВОГ“.

Човек за воената зима

Украинскиот претседател при образложувањето на кандидатурата посебно го истакна искуството на Корецки во енергетиката. Според Зеленски, токму тоа искуство го прави најсоодветен кандидат за подготовка на земјата за претстојната зима, во услови кога руските напади врз енергетската инфраструктура остануваат една од најголемите закани за Украина.

Вчера претседателот официјално ја достави кандидатурата до парламентот, а претходно Корецки ја претстави својата визија пред пратеничката група на владејачката партија „Слуга на народот“.

Избор во период на политички тензии

Гласањето за новиот премиер се одржа во време кога во Киев и во други украински градови се одржуваат протести поради смената на досегашниот министер за одбрана Михајло Федоров.

Денеска беше објавено и дека Федоров ја одбил понудата на Зеленски да стане негов советник.

Поранешниот министер за одбрана изјави дека имал несогласувања со главниот командант на украинските вооружени сили, Олександр Сирски, кого го обвинил дека блокирал дел од иницијативите на Министерството за одбрана.

The post ШЕФОТ НА „НАФТОГАС“ Е НОВИОТ УКРАИНСКИ ПРЕМИЕР Зеленски менува премиер по четврти пат appeared first on plusinfo.mk.

„СЛОБОДЕН ПЕЧАТ“ ОТКРИВА Нема да има реконструкција, туку нова влада со нов премиер

плусинфо — Thu, 18 Nov 2021 14:42:03 +0000

Реконструкција на владата нема да има, туку ќе има нова влада што ќе ја состави нов премиер, кој ќе биде и лидер на СДСМ, открива весникот Слободен печат, повикувајќи се на добро упатени извори од Кабинетот на премиерот Зоран Заев.

Како што објави весникот, по окрупнувањето и по зацврстувањето на парламентарното мнозинство кое се очекува да се случи во блиска иднина, премиерот Заев ќе ги активира оставките што ги најави по дебаклот на локалните избори, а по официјализирањето на оставките ќе следува избор на нов лидер на СДСМ кој ќе биде и мандатар за состав на новата влада.

„Според нашиот извор, Заев ќе го одложува поднесувањето на оставките сè до моментот кога ќе го обезбеди мнозинството. Штом ќе се случи тоа, веднаш СДСМ на непосредни избори ќе добие нов партиски лидер. Засега не се открива наследникот на Заев. Тој ќе биде избран од повеќе предложени кандидати од кои членството на директни избори ќе го изгласа новиот претседател. Тој ќе биде и новиот мандатар за новата влада, ќе состави свој кабинет, што значи дека ќе нема реконструкција на актуелната влада. Заев и лидерот на Алтернатива, Африм Гаши, разговорите ќе ги почнат во Клубот на пратениците. Под претпоставка да се договорат таа партија да му се приклучи на владејачкото мнозинство, тогаш и министерските позиции за Алтернатива ќе бидат во пакет со кадровските решенија за новата влада. Во таков случај, со оставката на премиерот Заев, во оставка ќе биде и целата влада. Новиот мандатар ќе предложи до претседателот на државата Стево Пендаровски програма и нов состав на владата. Се претпоставува дека некои од актуелни министри ќе си ги задржат позициите и во новата влада, а извесно е дека нема да бидат сменети министрите од ДУИ“, пишува весникот.

The post „СЛОБОДЕН ПЕЧАТ“ ОТКРИВА Нема да има реконструкција, туку нова влада со нов премиер appeared first on plusinfo.mk.

ШЕКЕРИНСКА ЌЕ СЕДНЕ ВО ПРЕМИЕРСКАТА ФОТЕЛЈА НА ЗАЕВ? Министерката за НАТО засега со најголеми шанси

плусинфо — Thu, 04 Nov 2021 18:41:59 +0000

Министерката за одбрана Радмила Шекеринска, најискусниот кадар во овој состав на СДСМ, има најголеми шанси да седне во премиерската фотелја, откако Зоран Заев ќе ја официјализира својата оставка, дознава Плусинфо.

Нашите извори тврдат дека Шекеринска има најголема поддршка од странските дипломати, а како нејзин најголем адут се смета членството на Македонија во НАТО, најголемото достигнување на владата на СДСМ и на ДУИ.

Од друга страна, се смета дека изборот на Шекеринска на чело на новата влада ќе предизвика најмалку турбуленции во СДСМ, но и најмалку недоумици кај коалициските партнери.

Во последниов период Шекеринска беше воздржана и посветена на своите активности во Министерството и во НАТО. Целосно отсуствуваше од кампањата за локалните избори, на кои СДСМ доживеа катастрофален пораз.

The post ШЕКЕРИНСКА ЌЕ СЕДНЕ ВО ПРЕМИЕРСКАТА ФОТЕЛЈА НА ЗАЕВ? Министерката за НАТО засега со најголеми шанси appeared first on plusinfo.mk.

Нова влада на Косово, премиер Албин Курти

МИА — Mon, 22 Mar 2021 20:47:05 +0000

Собранието на Косово го изгласа денеска со 67 гласа „за“, 30 „против“ и ниеден воздржан лидерот на Движењето Самоопределување (ВВ), Албин Курти за нов премиер и го усвои неговиот предлог за состав на новата Влада на Косово, јави дописникот на МИА од Приштина.

Кабинетот на Курти го сочинуваат 18 членови,од кои тројца вицепремиери: Прв вицепремиер, задолжен за евроинтеграции, развој и дијалог е Бесник Бислими, втора вицепремиерка, задолжена за надворешни работи и дијаспора, e Доника Грвала, додека трета вицепремиерка, задолжена за малцински и човекови права, е Емилија Реџепи.

Нов министер за финансии е Хекуран Мурати, за правда Албулена Хаџиу, за здравство Арбен Витиа, за образование и наука Арберие Нагавци, за култура Хајрулах Чеку, за локална самоуправа Елберт Красниќи, за екологија, просторно планирање и инфраструктура Либурн Алиу, за земјоделство Фатон Пеци, за одбрана Арменд Мехај, за внатрешни работи Џељаљ Свечља, за индустрија и трговија Розета Хајдари, за економија Артане Ризваноли, за заедници и враќање Горан Ракиќ и за регионален развој Фикрим Дамка.

Во своето обраќање по повод изборот за премиер, Курти ги изложи приоритети во развојот на економијата, борбата против невработеноста, борбата против пандемијата на ковид-19, развојот на човековите права, јакнење на безбедноста на државата и на човековите права на сите граѓани без оглед на нивната припадност. Посебно ќе се залага за подигнување на квалитетот на образованието и за поголема социјална правда.

Во однос на наворешната политика, Курти најави јакнење на врските со земјите сојузнички, пред се со Албанија и Соединетите Американски Држави, како и јакнење на заложбите за зачленување во НАТО и Европската унија. Курти порача дека неговата влада ќе се залага за добри односи со сосседните држави, додека од Србија очекува да се соочи со своите злосторства во Косово и најави дека ќе бара обесштетување за економските, финансиските и другите штети од војната и пред неа.

По изгласувањето на Владата, за време на првото обраќање на Курти како нов косовски премиер, опозициските пратеници ја напуштија собраниската сала.

The post Нова влада на Косово, премиер Албин Курти appeared first on plusinfo.mk.