Почнува реконструкцијата на улицата Загребска, една од најважните сообраќајни врски во Карпош, најави градоначалникот на Скопје Орце Ѓорѓиевски и сподели фотографии од терен

Проектот предвидува целосна санација на коловозот и подобрување на безбедноста на потегот што секојдневно го користат илјадници граѓани.

„Безбеден, функционален и достоинствен пристап до ваква значајна здравствена установа не е луксуз, туку обврска“, порачаа од Град Скопје.

Ќе се гради и потпорен ѕид

Покрај реконструкцијата на улицата, ќе се изгради и потпорен ѕид долг околу 50 метри и висок околу четири метри.

Од локалната власт велат дека со тоа ќе се зајакне стабилноста на теренот и ќе се намали ризикот од идни оштетувања.

„Станува збор за улица која со години беше во исклучително лоша состојба и чија реконструкција одамна беше неопходна“.

Карпош добива повеќе капитални проекти

Во објавата на Ѓорѓиевски се посочува дека паралелно продолжуваат работите и на мостот на Љубљанска, каде веќе се градат потпорни ѕидови по добивањето на потребните согласности.

Од Градот велат дека интензивно се работи и на клучката „Момин Поток“, каде се градат три моста и се реализира реконструкција на поширокиот потег.

Во план е и парк од 70.000 квадрати

Меѓу најавените проекти е и нов парк на просторот меѓу булеварите Илинден и Љубљанска.

Според најавите, зелената површина ќе зафаќа околу 70.000 квадратни метри и ќе биде наменета за рекреација, спорт и одмор.

„Чекор по чекор, проект по проект, го враќаме редот, динамиката и развојот во Скопје“, се наведува во соопштението.