Новиот државен јавен обвинител Ненад Савески, говорејќи за модернизација на обвинителството, вели дека притворот ќе биде една од темите за кои ќе воведе промени. Тој важеше за судија кој не ги прифаќаше секогаш барањата на обвинителството некому да му се изрече притвор.

– Сето она што произлегува од праксата на Судот во Стразбур, односно од одлуките, особено одлуките коишто се однесуваат и нè коригираат нас во постапувањето, секој јавен обвинител да ги има предвид – рече обвинитело Савески во интервју за „360 степени“ на МРТ .

Додаде дека притоа мисли и на мерката притвор, којашто се регулира со член 5 од Европската конвенција за човекови права и слободи.

На прашање кој е неговиот генерален однос кон определувањето притвор, кога и колку треба да се определува таа мерка, државниот бвинител истакна дека Македонија е сиромашна држава, а притворот е скапа мерка.

– Притворот е најригорозна мерка од мерките коишто ги нуди Законот за кривична постапка. Меѓутоа и најскапа и најнехумана. Еден ден во притвор значи одвојување на парични средства од буџетот. Како сиромашна држава треба да водиме сметка и за тоа. Да се однесуваме согласно нашите можности. Ако куќниот притвор може да ги задоволи потребите за обезбедување на конкретен обвинет во една постапка, зошто секогаш да почнеме од најстрогата мерка, којашто кажувам дека е најскапа и најнехумана? Кога го спомнувам и тоа дека таа мерка сама по себе не е хумана, тука ги имам предвид и условите во коишто се издржуваат притворите. Нашите казнено-поправни установи, институциите каде што се издржува мерка притвор, според извештаите од меѓународниот фактор, не се на задоволително ниво. Напротив, условите во коишто се издржуваат овие мерки се нехумани. Тоа треба да се има во предвид за нас од финансиски аспект, за имиџот на нашата држава пред меѓународниот фактор од аспект на хуманост – рече Савески.

Трета работа којашто е битна, додаде, е дека секогаш треба да се има предвид дека треба да се почне од најблагата мерка, па до најстрогата.

– Прво треба да се елиминира најблагата, ако со неа не може да се обезбеди присуство на обвинетиот, па потоа… Јас, на пример, и како судија и претходно кога сум бил обвинител, сум бил поборник секогаш да применам поблага мерка, а мерката притвор да ја избегнам – рече Савески.

Тој потврди дека не само што ќе се обиде да го пренесе овој пристап во Јавното обвинителство, туку и дека тоа ќе биде негов начин на воспоставување стандарди на постапување.

Во врска со тоа дека домашната јавност секој куќен притвор го доживува како заговор за политичка или друг тип поддршка, Савески дека ја анализирал таа перцепција и смета дека веројатно се должи на сите претходни одлуки коишто ги носеле Јавното обвинителство или судството.

– Меѓутоа, токму и затоа сакав да го објаснам мојот став на вака подетален начин, за да разбере јавноста дека мерката притвор не оди секогаш со секое поднесување на обвинение или отворање на истрага – рече тој.

Во врска со тоа како да се спречат бегства, државниот јавен обвинител рече дека можат многу ефикасно да се спречат со гаранции.

– Гаранциите се доста ефикасна мерка за обезбедување присуство. Тоа е мерка којашто упатува токму на моиве ставови коишто претходно ги изразив. Доколку некој побегне, а оставил гаранција – тој имот, недвижен или подвижен имот, како и да е, има одредена вредност. Таа вредност, доколку побегне, останува сопственост на нашата држава. Имаме финансиска состојба за којашто треба да водиме сметка – тие финансиски средства, тој капитал, со продажба станува дел од буџетот и е на располагање на сите граѓани, вклучително и на правосудните институции – вели Савески.

Почестата употреба на гаранцијата како мерка за обезбедување присуство наместо притворот, смета Савески, нема да придонесе за повеќе бегства особено од богатите, кои можат да си дозволат да ја остават гаранцијата. Според него, висината на гаранцијата се определува сообразно со висината на богатството.

– Тој што создал капитал, логично е да се претпостави дека сака и да го задржи – вели државниот обвинител Савески.

The post ПРИТВОРОТ ДА НЕ СЕ КОРИСТИ ПРЕЧЕСТО, ПОВЕЌЕ ДА СЕ БАРААТ ФИНАНСИСКИ ГАРАНЦИИ Колку се побогати обвинетите, толку повисоки ќе бидат гаранциите appeared first on plusinfo.mk.

Не чувствувам ниту товар, ниту обврска кон актуелната власт, вели новиот државен јавен обвинител Ненад Савески за тоа што неговиот избор во Собранието беше поддржан единствено од пратеници од владејачкото мнозинство.

За критиките од СДСМ дека „предлагачот е толку компромитиран што ја инфицира и биографијата на Савески“, новиот државен обвинител вели дека не се согласува, зашто законот е тој што предвидува дека предлогот треба да дојде од Владата.

Савески повтори дека очекувал поголема поддршка од пратениците, но додава дека бројот на гласови бил доволен за негово именување.

– Јас сум човек од системот и токму во моментот кога сум размислувал да аплицирам на оваа позиција, да конкурирам, знаев каква е постапката. И за мене нема ништо тука спорно, ниту сум во позиција да го менувам тоа, ниту воопшто ми пречело кога е нешто системски така поставено. Така што, мојот став околу тоа да чувствувам товар конкретно, апсолутно – не. Немам потреба да чувствувам товар, затоа што јас со мојата биографија, со моето сиви и сето она што сум го имал зад себе како активности и што беше и презентирано во моето претставување од Владата, е доволен основ да верувам и кога аплицирав, дека е голема веројатноста да бидам поддржан, односно предложен – рече Савески, во интервју за „360 степени“ на МРТ 1.

Тој вели вели дека во текот на процесот на избор немал никакви контакти со Владата, ниту со премиерот. На директно прашање дали бил контактиран од Владата, односно од премиерот, кусо одговори: „не.“ Додаде дека и самиот бил изненаден од таквиот развој на настаните, но го оценува како знак на водење грижа за интегритетот на процесот.

– Меѓу тие многумина коишто биле зачудени, бев и јас. Да бидам искрен, очекував да бидам повикан од професионален аспект, како некој којшто евентуално би бил предложен или разгледуван да биде предложен. Сметав дека е сосема легитимно да бидам повикан и да имаме средба на којашто јас би ги презентирал своите идеи – вели Савески.

Тој смета дека ваквиот пристап од Владата имал за цел да избегне сомнежи за политичко влијание врз неговата кандидатура.

– Јас така гледам на тоа и искрено, мене тоа ми причинува огромно задоволство. Верувам дека намерите на Владата со таквиот однос кон мене се токму да се испрати порака дека не сакаат да остават простор дека јас сум нивни предлог или има некоја позадина – нагласи Савески.

Во врска со идната комуникација со институциите, државниот обвинител најавува дека самиот ќе иницира средби со претставници на извршната власт, но исклучиво во насока на институционална соработка и реформи.

– Видете, ниедна институција не може изолирано да функционира. Соработката помеѓу институциите е неопходна, просто самиот „чекс-енд-балансис систем“ на којшто уставно е изграден нашиот правен поредок бара меѓуинституционална соработка. Јас би побарал лично средба со премиерот и со конкретни министри со коишто би сакал да поразговарам, откако ќе ја мапирам состојбата во Обвинителството – рече државниот обвинител.

Сепак, потенцира тој, на таквите средби нема да се разговара за конкретни предмети.

– Секако не. Секако не -категориен е обвинителот.

За критиките од премиерот Христијан Мицкоски за правосудството, државниот обвинител вели дека нема да ги коментира директно, но смета оти секоја критика треба да се анализира.

– Секоја критика, според мене, е само начин да видиме каде сме, каде треба да се коригираме и во кој правец треба да продолжиме – изјави Савески, нагласувајќи дека тие не смеат да влијаат врз независноста на обвинителството, туку да послужат како основа за подобрување.

Во врска со пораката од пратеникот на ВМРО-ДПМНЕ, Јован Јаулески, дека новиот обвинител има обврска „институционално да расчисти со последиците од СЈО“, Савески вели – нема што да се расчистува, институцијата не е дел од правосудниот систем.

– Секој којшто се обраќа во јавноста, а тоа обраќање се однесува на правосудството, вклучително еве и за мојата позиција, треба да се слушне, треба да се има во предвид, јавноста секогаш е тука да биде слушната. Меѓутоа, тоа не се стандардите, ниту параметрите, ниту законските основи во коишто секој јавен обвинител би постапил. Секој предмет има свое значење. Сите тие странки во сите тие предмети очекуваат еднаков третман. Така што, во секој предмет важат истите законски основи. Сè што би било поинакво постапување, би било спротивно на закон. Редоследот по којшто се делат предметите, редоследот по којшто се постапува по предметите, фазите во коишто се носат јавнообвинителските одлуки во рамките на јавното обвинителство и со таквите одлуки доколку се истапи пред судот, има рокови, има законски процедури и не останува ништо друго освен да се почитуваат процедурите – додаде Савески.

The post НЕ ЧУВСТВУВАМ ОБВРСКА КОН ВЛАСТА Предложен сум од Владата, оти таква е законската постапка за избор на државен обвинител appeared first on plusinfo.mk.