Маж на возраст од околу 40 години починал откако паднал за време на концерт на Оејсис на стадионот Вембли во Лондон, соопшти полицијата во неделата, објави Си-Би-Ес њуз.

Браќата Лијам и Ноел Галегер, кои годинава го обединија култниот бритпоп бенд за спектакуларна светска турнеја, изјавиле дека се „шокирани и тажни“ поради смртта на обожавателот на саботниот вечерен концерт.

Портпарол на Лондонската метрополитенска полиција соопшти дека полицајци и медицински екипи биле повикани по 22 часот поради „извештај дека едно лице било повредено“ на преполниот стадион.

– Маж, на возраст од околу 40 години, бил пронајден со повреди што одговараат на пад. За жал, бил прогласен за мртов на самото место – изјави портпаролот, повикувајќи ги сведоците да се јават.

„Нашите мисли се со неговото семејство“, се наведува во соопштението од стадионот Вембли, со додавање дека „вечерашниот концерт на Оејсис ќе се одржи како што е планирано“.

„Голем број луѓе го сведочеле инцидентот и го снимиле“

Полицијата соопшти дека стадионот бил полн и дека „веројатно голем број луѓе биле сведоци на инцидентот или можеби свесно или несвесно го снимиле со мобилен телефон“.

Во соопштението на Вембли се наведува дека медицински тим, полиција и Лондонската служба за итна помош се обиделе да го спасат мажот.

„И покрај нивните напори, обожавателот за жал почина. Нашите мисли се со неговото семејство, кое е информирано и добива поддршка од специјално обучени полициски службеници“, се наведува во соопштението на стадионот.

Последен настап на Оејсис во Лондон во рамките на 41-годишната турнеја

Неделниот концерт беше последниот настап на Оејсис во Лондон од рамките на нивната 41-концертна турнеја за повторно обединување, по 16 години оддалеченост меѓу прочуените, честопати конфликтни, браќа Галегер.

Турнејата досега има продадено околу 900.000 билети, а групата продолжува во Единбург пред меѓународниот дел кој ги носи во САД, Јапонија, Австралија и во Бразил.

Следниот настап им е во Единбург со 3 концерти на 8, 9 и 12 август, потоа продолжуваат во Ирска, Канада, САД и Мексико, пред да се вратат повторно на Вембли на 27 и 28 септември.

The post ФАН ЗАГИНАЛ НА КОНЦЕРТ НА ОЕЈСИС ВО ЛОНДОН Паднал од височина на стадионот Вембли пред очите на илјадници луѓе appeared first on plusinfo.mk.