Димензиите на декаденцијата и алчноста, проследени со рамнодушност спрема слабите и немоќните, тешко можат да се објаснат со објективно поставени критериуми.

Норвешка беше земја со силен меѓународен имиџ на Нобеловата награда за мир и со кралска династија со голема популарност меѓу широките народни маси. Објавените нови досиеја на Епстин сега длабоко ја потресуваат таквата слика за Норвешка – до срж.

Поранешниот норвешки премиер и министер за надворешни работи, Торбјорн Јагланд, е под истрага за груба корупција, по новите откритија за неговите контакти со осудениот сексуален престапник Џефри Епстин. Поранешниот високопозициониран политички лидер од редовите на социјалдемократската партија е осомничен дека примал подароци, луксузни патувања и заеми за време на неговите години како претседател на норвешкиот Нобелов комитет и генерален секретар на Советот на Европа.

Високите норвешки дипломати Терје Ред-Ларсен и неговата сопруга Мона Јул се исто така вмешани во скандалот, откако се дозна дека двојката го посетила островот на Епстин во Карибите и дека нивните деца требало да добијат неколку милиони долари во тестамент.

Контекстот на неморалноста и незаситноста се проширува. Всушност, овие сомневања, како што некои се обидуваат да забележат, ги прават контактите на норвешката крунска принцеза Мете-Марит со сексуалниот престапник Епстин делумно да изгледаат наивни и површни. Но само делумно.

Како воопшто може да се оправда нејзиното активно барање контакт со маж кој бил осуден за купување секс од малолетници. Судењето на Џефри Епстин започнало токму со 14-годишно девојче кое го обвини дека ја злоупотребувал.

Таквото однесување би ги натерало мнозинството жени да се повлечат и да ја прекинат комуникацијата со такви мрачни типови. Бидејќи секоја жена не заборава дека и таа била 14-годишно девојче, подоцна кога и самата има ќерки. А и затоа што самата помисла на постар маж кој прави недозволиви нешта со дете, би требало една нормална жена да ја исполни со гнасење.

Мете-Марит, сепак, решила да остане во контакт со Епстин, иако најверојатно била свесна за пресудата против него, дека во 2008 година бил осуден за купување секс од малолетници. Подоцна, по пребарување на Гугл, таа му напишала на Епстин: „Тоа не изгледа добро“ – проследено со „смајли“. Контактот продолжил, според објавените досиеја, уште неколку години.

Скандалот со Епстин длабоко во корен ги тресе и политиката и монархијата. Во земјата се продлабочува ментален пад како огромно свлечиште на јавната самодоверба, по објавувањето на новите досиеја минатиот викенд. Целата елита, почнувајќи од кралот Харалд Петти и премиерот Јонас Гар Сторе, веројатно се чувствуваат, најблаго речено, потресени.

Симболите на една силна и богата нација, скијањето и зимски спортови, кафеното сирење и вафлите, народните колоритни носии и популарните кралски палати, не одат заедно со сите неверојатни откритија за развратниот живот на џет-сетот на моќната елита, одлепена од овоземските димензии на реалноста.

За кралското семејство моментот на објавувањето на новите досиеја е најлошиот што можел да се замисли. Тоа се случува во исто време додека синот на крунската принцеза, Мариус Борг Хејби, ги поминува своите денови во Окружниот суд во Осло, обвинет, меѓу другото, за силување и насилство во блиска врска. Таканаречениот бонус принц е уникатен случај, отпадник во кралското семејство кој имал тешкотии да се снајде во сивата зона на славните. Но, неговата приказна на сосема јасен и мошне уверлив начин придонесува за засилување на приказната за новата норвешка декаденција.

Луѓето во демократиите, и тоа не само во скандинавските, често им се восхитуваат на оние кои се издигнати над нив врз основа на моќ и влијание. Без оглед дали го прават тоа поради сопствената искрена наивност, или, пак, од длабоко уверување во традиционално воспоставениот ред на нештата во општеството.

Ова особено се однесува за монархиите кои се засноваат на идејата дека восхитот е супериорен во однос на идејата за еднаквост. Затоа, сега во норвешките весници се поставува прашањето дали Мете-Марит може да стане кралица. Норвешкиот весник „Афтенпостен“ пишува дека она што сега се обелоденува, кога станува збор за пријателството на крунската принцеза со Џефри Епстин, е полошо од тоа што нејзиниот син е изнесен пред суд, осомничен за тешки кривични дела. Полошо е, бидејќи директно влијае на државата и нејзиниот углед.

Самата крунска принцеза се извини, укажувајќи на сопствена „лоша проценка“, нарекувајќи ја, сепак, дека била „срамна“. Но дали тоа може да ѝ помогне на норвешката монархија да се справи со бурата од незадоволство насочена кон неа?

Скандалите се нижат еден по друг. Во секој случај, американскиот претседател Доналд Трамп сега може да наздрави следејќи го развојот на настаните. Новите документи на Епстин не само што го прикажуваат предметот на омраза на движењето Мага – европската елита – како корумпирана и дегенерирана. Тие исто така ја оцрнуваат Нобеловата награда за мир, која апсорбираше толку многу од енергијата на Трамп откако се врати во Белата куќа. Тој отворено посакуваше да ја добие.

За време на кризата со Гренланд во јануари, Трамп му пиша на норвешкиот премиер Јонас Гар Сторе дека повеќе не се чувствува должен да размислува исклучиво за мир. Претседателот Трамп, всушност, го обвини норвешкиот Нобелов комитет дека му ја одзел Наградата за мир.

Но, дел од сенката сепак паѓа врз Нобеловиот комитет во Осло под водство на Торбјорн Јагланд, кој му ја додели Нобеловата награда за мир на претходникот на Трамп, Барак Обама, по само девет месеци како претседател на САД. Ретроспективно, се покажа дека Белата куќа реагирала негативно на наградата. Според истражувањата на шведската телевизија, шефот на кабинетот на Обама му упатил сериозно предупредување на норвешкиот амбасадор во Вашингтон.

Колку и да е неправедно тоа спрема Обама, актуелните обвинувања против Јагланд значат дека одлуката за наградата за мир сега е уште повеќе оцрнета. Исто онака како што е затемнет хоризонтот над моралноста и веродостојноста на високата, супербогата кралска и политичка елита.

Моќници кои седат на пари додека го набљудуваат животот на обичните смртници. И едновремено зборуваат на каков начин треба да се „решаваат“ проблемите на малите и обесправените.

The post Декаденција на западни елити одлепени од реалноста appeared first on plusinfo.mk.

Норвешкиот Нобелов комитет соопшти дека онлајн шпионажа е најверојатната причина за предвременото истекување информации дека венецуелската опозициска лидерка Марија Корина Мачадо ќе биде добитничка на Нобеловата награда за мир за 2025 година.

– Со сигурност може да се каже дека имало лица кои на незаконски начин дошле до информацијата за одлуката – изјави портпарол на Нобеловиот институт.

Постојаниот секретар на Норвешкиот Нобелов комитет, Кристијан Берг Харпвикен, прецизираше дека не е утврдено што точно се случило и кој стои зад пробивот, но дека се смета оти тој е извршен преку компјутерскиот систем на комитетот.

Сомнежите за протекување информации се појавија на 10 октомври, неколку часа пред официјалното објавување на лауреатот во Осло, кога шансите Мачадо да ја добие наградата нагло пораснаа на некои онлајн платформи за обложување. Според Харпвикен, почетниот износ на обложени средства за Мачадо изнесувал околу 2,2 милиони долари, но набрзо значително се зголемил.

Медиумите посочуваат дека Мачадо претходно не била споменувана како фаворит ниту од експертите, ниту од медиумите, што дополнително ги зајакнало сомнежите за протекување информации.

Во истрагата била вклучена и една од норвешките разузнавачки служби, со цел да се утврди дали станува збор за интерно протекување на информации или за шпионажа од страна на криминална или државна структура.

Засега не е јасно кој стои зад пробивот и дали целта била финансиска добивка преку обложувања или намерно нарушување на довербата во Нобеловата награда за мир. Харпвикен истакна дека комитетот веќе работи на мерки за спречување вакви ситуации во иднина.

Марија Корина Мачадо беше наградена со Нобеловата награда за мир за 2025 година за нејзината борба против авторитарното владеење во Венецуела. Таа наградата ја посвети на венецуелскиот народ и на политичките затвореници во земјата.

The post НЕКОЈ СО ОНЛАЈН ШПИОНАЖА ПРЕДВРЕМЕ ДОЗНАЛ КОЈ ЌЕ ЈА ДОБИЕ НОБЕЛОВАТА НАГРАДА ЗА МИР Норвешките разузнавачи истражуваат дали се работи за криминална или за државна структура appeared first on plusinfo.mk.

Белата куќа остро реагирала по веста дека Нобеловиот комитет ја доделил наградата за мир на венецуелската опозиционерка Марија Корина Мачадо, наместо на поранешниот американски претседател Доналд Трамп.

Портпаролот Стивен Чунг изјавил дека комисијата „ја ставила политиката пред мирот“.

– Претседателот Трамп ќе продолжи да склучува мировни договори, да завршува војни и да спасува животи. Тој има срце на хуманитарец и никој нема да биде како него – нагласил Чунг, додавајќи дека Нобеловиот комитет „ја жртвува правдата за симболика“, јави Си-Ен-Ен.

Понатаму, аналитичарите потсетуваат дека американскиот лидер веќе еднаш бил номиниран во 2021 година заради посредништвото во блискоисточните договори меѓу Израел и Обединетите Арапски Емирати, но наградата тогаш ја добила Програмата за светска храна на Обединетите Нации.

Исто така, овогодишната одлука на Комитетот повторно ја отворила старата дебата околу критериумите на Нобеловиот комитет. Според официјалните правила, номинациите се затвораат секоја година на крајот на јануари.

Од друга страна, уште не е познато дали добитничката на наградата, Марија Мачадо Корина, физички ќе присуствува на доделувањето. Таа повеќе од една година се крие поради безбедносни закани.

Корина, која со години е симбол на отпорот против режимот на Николас Мадуро, станала првата Венецуелка што ја добила оваа награда. Врховниот суд на Венецуела ја дисквалификувал во јануари 2024 година од политички живот за 15 години, поради, како што се наведува, „коруптивни практики“.

The post „НОБЕЛОВИОТ КОМИТЕТ ТЕРА ПОЛИТИКА, НИКОЈ НЕМА СРЦЕ КАКО ТРАМП“ Белата куќа негодува за одлуката за наградата за мир appeared first on plusinfo.mk.

Нобеловиот комитет соопшти дека добитничка на Нобеловата награда за мир за 2025 година е венецуелската опозициска лидерка Марија Корина Мачадо.

„Таа ја добива Нобеловата награда за мир за својата неуморна работа во промовирањето на демократските права на народот на Венецуела и за нејзината борба за праведна и мирна транзиција од диктатура кон демократија“, се наведува во соопштението на Комитетот.

Понатаму во образложението се вели:

„Наградата за 2025 година оди кај храбар и посветен борец за мир, кај жена што го одржува пламенот на демократијата во време на растечка темнина“.

Во него се истакнува и дека „како лидерка на Демократските сили во Венецуела, Марија Корина Мачадо претставува еден од највпечатливите примери на граѓанска храброст во Латинска Америка“.

„Во последно време, госпоѓа Мачадо стана клучна обединувачка фигура во некогаш длабоко поделена политичка опозиција – опозиција што најде заедничка основа во барањето за слободни избори и претставничка власт“, се наведува во соопштението на Нобеловиот комитет.

The post НОБЕЛОВАТА НАГРАДА ЗА МИР КАЈ ВЕНЕЦУЕЛСКА АКТИВИСТКА Марија Мачадо се бори за демократија, велат од Комитетот appeared first on plusinfo.mk.

Американскиот претседател Доналд Трамп изјави дека не ги запира војните за да ја добие Нобеловата награда за мир, туку за да спаси човечки животи. Тој нагласи дека за девет месеци успеал да прекине осум вооружени конфликти, додавајќи дека неговата цел не била признание, туку зачувување на мирот и животите, пренесува „Гардијан“.

Трамп истакна дека е оптимист за решавање на преостанатите прашања поврзани со Газа, но одби да заземе став околу можноста за формирање палестинска држава. „Немам став за тоа. Ќе прифатам што и да се договорат“, изјави тој, според „Си-Ен-Ен“.

Американскиот претседател најави дека ќе отпатува во Египет за официјалното потпишување на договорот за прекин на огнот меѓу Хамас и Израел, како и дека е поканет да говори во израелскиот парламент — Кнесетот.

Во меѓувреме, израелскиот премиер Бенјамин Нетанјаху на платформата X сподели фотографија генерирана со вештачка интелигенција, на која Трамп е прикажан со Нобелова награда околу вратот, со коментар: „Дајте му ја Нобеловата награда за мир на Доналд Трамп – тој ја заслужува“.

Поддршка за ваквата идеја даде и украинскиот претседател Володимир Зеленски, кој изјави дека Трамп треба да биде номиниран за наградата ако успее да донесе шанса за прекин на огнот во Украина. Нобеловиот комитет денеска треба да го објави добитникот на овогодинешната награда за мир.

The post НЕ БАРАМ НАГРАДИ, ТУКУ СПАСУВАМ ЖИВОТИ! Трамп негира дека целта му е да стане Нобеловец appeared first on plusinfo.mk.