Демократска обнова на Македонија (ДОМ) ја препознава реалната состојба на ниски плати и растечка сиромаштија со која се соочуваат голем број граѓани и ја поддржува потребата од отворање сериозна јавна и институционална дебата за подобрување на животниот стандард на работниците, соопшти партијата.

Во таа насока, ДОМ дава поддршка на денешните протести и на заложбите на синдикатите за подостоинствен живот за сите работници.

„Истовремено, сметаме дека прашањето за зголемување на минималната плата, вклучително и предлогот таа да изнесува 600 евра е комплексно и треба да се базира на пресметки кои ја одразуваат состојбата на сите засегнати страни во тој домен. Потребно е внимателно да се согледаат реалните економски ефекти, вклучително и можниот притисок врз работодавачите, особено малите и средните претпријатија, како и ризикот од дополнително подгревање на инфлацијата што може да ја намали реалната вредност и на таа повисока плата“, соопшти ДОМ.

Ова прашање, се додава, отвора и пошироки структурни предизвици на пазарот на труд кои мора да се адресираат како дел од суштинско и долгорочно решение.

„Факт е дека во Македонија постојат и структурни искривувања на пазарот на труд кои мора да се адресираат: различни модели на формално пријавување со минимални примања, неусогласеност меѓу реалната економска активност и официјално прикажаните приходи, како и други појави кои го прават системот нефункционален и социјално неправеден“, соопшти ДОМ.

Ниските плати и сиромаштијата, додава партијата, се реален и сериозен проблем, но решенијата треба да бидат внимателно осмислени за да не се создадат дополнителни економски ризици и несигурност – и за работниците и за работодавачите.

„Сметаме дека е потребно реално, системско и социјално праведно решение, засновано на дијалог меѓу синдикатите, работодавачите и институциите. Ова е натпартиско прашање кое не смее да биде предмет на дневнополитички препукувања, туку заедничка одговорност за обезбедување одржлив и достоинствен животен стандард за граѓаните“, соопшти ДОМ.

The post ПОВИСОКИТЕ ПЛАТИ МОЖАТ ДА ЈА ПОДГРЕАТ ИНФЛАЦИЈАТА Поддршка ДОМ за работниците, но со одговорен економски пристап appeared first on plusinfo.mk.

Минатата година, околу 27.000 странски работници кои веќе имале договори за квалификувани работни места ја напуштиле Германија, бидејќи германската Агенција за вработување проценила дека нивните плати не се доволно високи, што било повод да не добијат работна дозвола.

Ваквата состојба е честа иако германските компании имаат потреба од работна сила која сакаат да ја обезбедат од странство. За главен виновник за состојбата се посочува бирократското однесување на  Агенцијата за вработување (Bundesagentur für Arbeit) која се придржува кон законот за престој кога се утврдува висината на платата. Агенцијата дава мислење дали се исполнети условите странецот да се вработи врз основа на официјалниот регистар на плата (Entgeltatlas)  кој е клучна алатка за одредување на минималните плати. Ова мислење го користи Агенцијата за миграција при давањето работна дозвола.

Правниците кои ги консултирал Феникс Магазин за подготовка на текстот, предупредуваат дека тоа води до непотребни одбивања и дополнително го отежнува вработувањето на странски експерти.

Познавачите на состојбите велат дека „Entgeltatlas“ – клучна алатка за одредување на минималните плати – ги покажува просечните вредности, а не реалните приходи на одредени фирми. Па, така фирмите кои даваат пониски плати не можат да вработат странци.

Лани германската Агенцијата за вработување одбила 90.000 барања за вработување странски работници, а во 27.000 случаи образложението било дека платата не е доволна согласно член 39 од Законот за престој (со кој странците се штитат од полоши услови од домашните работници). Тоа е 75% повеќе отфрлања од 2023 година.

Енгелхард Мазанке, директор на Агенцијата за миграција во Берлин вели дека на тој начин институциите  создаваат само трошоци, фрустрации и се прави невозможна интеграцијата на странците.

The post 27.000 СТРАНСКИ РАБОТНИЦИ МОРАЛЕ ДА ЈА НАПУШТАТ ГЕРМАНИЈА Причина за тоа била ниската плата appeared first on plusinfo.mk.

Урсула фон дер Лајен утрово од пленарната седница на Европскиот Парламент во Стразбур го одржа редовниот годишен говор за состојбата на Европската Унија, во кој таа се осврна на војната во Украина, и последиците врз енергијата и цените.

Генералниот секретар на Конфедерацијата, Лука Висентини, истакна дека „реалната состојба на Унијата е што работниците ширум Европа се смртно загрижени за тоа како ќе ги загреат своите домови зимово кога паѓаат платите, додека директорите и акционерите уживаат растечки профити и дивиденди“.

Иако Висентини го поздрави фактот што фон дер Лајен спомена теми како ограничувањето на цените на енергијата и привремена такса за енергетските компании, тој смета дека е „неверојатно“ што ниту еднаш таа не ги спомена платите на работниците, ниту пак фер корпоративен данок, неопходен за финансирање на јавните услуги.

– Втора година по ред претседателката држи говор кој е многу слаб во однос на социјалните права. Не се споменаа ниту правата на жените и покрај жртвата што ја дадоа пред сѐ работничките со ниски плати за време на пандемијата – истакна генералниот секретар на Европските синдикати.

За заштитниците на синдикалните права во ЕУ говорот на претседателката е далеку од доволен со оглед на кризата без преседан што ги очекува граѓаните на ЕУ, пред сѐ работниците. Синдикатите бараат да се ревидираат и фискалните правила на ЕУ темелно и да се дозволи поголем маневарски простор за јавни инвестиции, посилен јавен сектор, и социјална заштита.

Овие фискални правила беа суспендирани за време на кризата со ковид-19, но Конфедерацијата на синдикати смета дека тие треба целосно да се сменат.

– Дупките во овој говор ја нагласуваат важноста за ЕУ и националните влади во соработка со синдикатите да изготват и испорачаат итно мерки кои се потребни за да се стави крај на кризата на цените на живеење – рече Висентини.

The post ОД ФОН ДЕР ЛАЈЕН НИТУ ЗБОР ЗА НИСКИТЕ ПЛАТИ Синдикалците гневни од говорот на еврокомесарката appeared first on plusinfo.mk.