Со развивање иновации базирани врз наука и нивна примена, глобалните компании може да еволуираат надвор од застарените структури и да изградат портфолија подготвени за иднината. Овие глобални знаења треба да се искористат на локално ниво за да се откријат иновативни пристапи за поддршка на локалните приоритети во конкретните земји, истакна Тамара Миловановиќ, генерален директор за Југоисточна Европа во Филип Морис Интернејшнл (ФМИ), на престижниот регионален Самит организиран од Македонија 2025. Оваа година, Самитот се одржа со наслов „Надвор од 2025 година: Забрзување на растот и поттикнување на лидерството“.

Миловановиќ, која беше говорник на сесијата „Иновација преку границите – Ко-креирање на иднината“, во интервјуто со коосновачот на Македонија 2025, Џон Битов, го објасни процесот на трансформација на „Филип Морис“, глобална компанија од листата Fortune 500, со силни процеси и стандарди, која до пред десетина години го црпеше својот успех од моќта на еден од најпознатите светски брендови „марлборо“, бренд со традиција од 100 години. Но, во 2016 година, ФМИ јавно објави стратешки пресврт во работењето и фокус кон иновативни производи без чад, особено на развивањето на револуционерниот иновативен уред IQOS кој само го загрева тутунот, а не го гори, со што елиминира до 95% од штетните состојки што се појавуваат при горењето на традиционалните цигари и создавањето чад. Оваа промена во стратегијата на Филип Морис подоцна стана студија на случај на Харвардската бизнис школа како една од најрадикалните корпоративни трансформации.

– Во тоа време, многумина ја оценија трансформацијата како маркетиншки потег. Но, зад него стоеја над 16 милијарди долари инвестиции, повеќе од 1.600 научници и фокус на раководството на компанијата за да го реши примарниот проблем со горењето на тутунот. Револуционерната иновација целосно го промени лицето на оваа компанија и ја претвори во машина за иновации што го опфаќа просторот на никотинот и пошироко од него – рече Миловановиќ.

Таа објасни дека иновациите во „Филип Морис“ не запреа само на IQOS, туку дополнително се засилија користејќи различни модели. Тука спаѓа и купувањето на шведската компанија „Swedish match“ и нејзиниот водечки бренд на никотински ќесички ZYN, уште еден производ без чад, што се покажа како дополнителен смел и успешен стратешки потег кој брзо се претвори во значителна вредност за акционерите.

Осврнувајќи се на влијанието на производите без чад на пазарот во Македонија, кој има долга традиција на одгледување тутун, Миловановиќ истакна дека водечкиот производ на компанијата, IQOS, сè уште има вистински тутун во својата срж, вклучувајќи го и македонскиот тутун.

– Не станува збор за заборавање на наследството во одгледување тутун, туку за негово преосмислување, со што во Македонија паралелно управуваме со сегашноста и со иднината. „Филип Морис“ е еден од најголемите глобални купувачи на македонски тутун, индустрија која поддржува илјадници земјоделски семејства во земјата. Ние комерцијализираме производи без чад, додека во исто време нашиот партнер во заедничкото вложување Тутунски комбинат Прилеп (ТКП) произведува висококвалитетни традиционални производи во фабриката во Прилеп. И со производите без чад и со традиционалните цигари, не го опслужуваме само локалниот пазар. Лоциравме регионален сервисен центар во Македонија, додека од фабриката во Прилеп почнавме да извезуваме на повеќе пазари. За нас, Македонија не е само уште еден пазар, тоа е долгорочно партнерство каде што растеме заедно со земјата – рече Миловановиќ.

Таа истакна дека тутунската индустрија, заедно со фармацевтската, историски се меѓу најрегулираните индустрии во светот, така што со секоја иновација во нив се појавуваат и силни политички дебати. Притоа, во ваква ситуација нема црно-бели одговори и лесни решенија.

– Регулаторните решенија што изгледаат едноставно и имаат намера да решат еден очигледен проблем, честопати предизвикуваат безброј несакани последици. На пример, во нашата индустрија радикалните даноци, забрани или други поедноставни регулаторни решенија честопати предизвикуваат нелегална трговија, наместо да помагаат во намалувањето на стапките на пушење – рече Миловановиќ.

Според Миловановиќ, иновациите и регулативата треба да се балансираат преку вклучување во отворен и конструктивен дијалог со владите и другите засегнати страни, како и преку споделување искуства на повеќе пазари и заедничко изнаоѓање решенија соодветни на локалниот контекст на секое општество.

The post ГЛОБАЛНИТЕ ЗНАЕЊА ДА СЕ ИСКОРИСТАТ ЗА ЛОКАЛНИ БИЗНИСИ Тамара Миловановиќ од „Филип Морис“ разговараше со Џон Битов на Самитот на Македонија2025 appeared first on plusinfo.mk.

На светот му се потребни нови, поефикасни стратегии што можат да го забрзаат падот на стапките на пушење за разлика од глобалните мерки што се преземени досега, предупредуваат Роберт Биглхол, Рут Бонита и Тики Панг, поранешни високи претставници на Светската здравствена организација (СЗО), во нивниот авторски текст во меѓународното научно списание со висок фактор на влијание, „Nature Health“.

Овие експерти со долгогодишно искуство и кредибилитет во областа на глобалното јавно здравје и контрола на тутунот велат дека сегашните мерки веројатно нема да ги намалат стапките на пушење со потребното темпо за постигнување на глобалните цели. Во текот на нивните кариери, овие експерти биле директно вклучени во обликувањето на меѓународните здравствени политики и иницијативи, вклучително и во областите на превенција на незаразни болести и контрола на тутунот. Затоа, како кредибилни и независни истражувачи, нивната позиција има посебна тежина во тековните политички и регулаторни дебати.

Како што наведуваат експертите во текстот, постигнатиот напредок преку Рамковната конвенција за контрола на тутунот (FCTC) на СЗО почна да забавува.

„Имплементацијата на мерките на Рамковната конвенција стагнираше во многу региони, а политичкиот замав ослабе. Ниту доброволната цел на СЗО за намалување на употребата на тутун за 30 отсто до 2025 година, ниту целта за одржлив развој за намалување на предвремената смртност од незаразни болести за една третина до 2030 година, не се на добар пат“, пишуваат експертите.

Сепак, според нив, се појавува нова можност за напредок.

„Брзата појава на регулирани производи со никотин без чад создаде историска можност за забрзување на крајот на епидемијата на пушење. Овие производи, како што се уредите што го загреваат тутунот, никотинските ќесички и електронските цигари, го елиминираат процесот на согорување, кој е главен извор на штетни супстанции во цигарите“, пишуваат авторите на текстот.

Експертите ја оценуваат глобалната цел „без чад до 2040“, дефинирана како преваленца на дневно пушење кај возрасни под 5 отсто до 2040 година, како реална, мерлива и фер за исполнување. За да се постигне оваа цел, неопходен е комбиниран пристап.

– Традиционалните мерки, како што се оданочување, забрани за рекламирање и кампањи за јавно здравје, треба да бидат надополнети со достапност на помалку штетни алтернативи за возрасните пушачи – велат тројцата експерти.

Доказите од земјите каде што алтернативите без чад се широко прифатени покажуваат дека оваа цел е остварлива, при што се одржува силна заштита на младите од пушење и вејпинг. Примерите ги вклучуваат САД, Шведска, Јапонија и Нов Зеланд, каде што е забележан брз пад на стапките на пушење, паралелно со зголемената употреба на алтернативните производи кај возрасните пушачи. Сепак, додаваат авторите, постојат значајни регулаторни предизвици бидејќи сегашниот систем честопати не е усогласен со реалните нивоа на ризик.

„Цигарите остануваат широко достапни, додека помалку штетните алтернативи се соочуваат со построги регулаторни ограничувања. Ова несовпаѓање ризикува да ги заштити најопасните производи, а воедно да го ограничи пристапот до помалку штетните. Затоа, неопходен е пропорционален пристап кон регулацијата“, пишуваат авторите.

Тие заклучуваат дека научните докази и практичното искуство укажуваат оти крајот на епидемијата на пушење е остварлива цел, но само со подготвеност за подобрување и проширување на постојните политики. Интегрирањето на намалувањето на штетите од тутун во глобалните стратегии би можело да претставува клучен чекор кон значително намалување на бројот на пушачи и спасување на милиони животи во наредните децении.

The post АЛТЕРНАТИВНИТЕ НИКОТИНСКИ ПРОИЗВОДИ БЕЗ ЧАД МОЖАТ ДА ГО ЗАБРЗААТ КРАЈОТ НА ПУШЕЊЕТО Глобалната цел е без чад до 2040 година appeared first on plusinfo.mk.

Растот на употреба на никотински производи, како што се никотинските ќесички и вејповите, може да создаде свет „без чад“ до 2040 година, според најновото истражување на меѓународни здравствени експерти. Новата голема студија, објавена во специјализираниот магазин „Нејчр“, заклучува дека глобалните напори за искоренување на пушењето се во застој и предупредува дека примената на традиционалните стратегии може да чини милиони животи. Во текстот се наведува дека околу една милијарда луѓе сè уште пушат низ целиот свет, што резултира со повеќе од седум милиони смртни случаи годишно.

-Десетици докази покажуваат дека изложеноста на чадот од согорувањето – а не никотинот – е тоа што ги предизвикува болестите поврзани со употребата на тутун – вели авторот на истражувањето Роберт Биглхол, лекар за јавно здравје од Нов Зеланд и поранешен директор во Светската здравствена организација.

Светските медиуми пишуваат дека студијата укажува на сè поголеми докази дека алтернативните производи се значително помалку штетни од цигарите и можат да го забрзаат откажувањето од пушење во голем обем. Земјите што ги прифатиле овие алтернативи, вклучувајќи ги Шведска, Нов Зеланд, Јапонија, Велика Британија и Соединетите Американски Држави, забележале едни од најбрзите падови на стапките на пушење.

„Брзата појава на регулирани незапаливи (без чад) никотински производи создаде историска можност за забрзување на крајот на епидемијата на пушење“, се наведува во извештајот.

Извештајот поставувa aмбициозна, но остварлива глобална цел за намалување на преваленцата на пушење под 5% до 2040 година, но само ако се обезбеди широк пристап до алтернативните никотински производи преку стратегиите за контрола на тутунот. Според очекувањата, без таков пресврт напредокот ќе остане премногу бавен, а сегашните трендови сугерираат дека Европската Унија нема да достигне статусот „без чад“ до крајот на векот.

Студијата повикува на построги контроли и повисоки даноци на цигарите, но достапност до помалку штетните никотински производи. Исто така, се бара појасна јавна комуникација за да се исправат широко распространетите погрешни перцепции за релативните ризици од никотинските производи.

„Научните докази, алатките на политиката и искуството од реалниот свет се потребни за да се стави крај на глобалната епидемија на пушење која сега постои. Она што останува ограничено е политичката подготвеност целосно да се интегрира стратегијата на намалувањето на штетите од тутунот во глобалната контрола на тутунот“, се заклучува во извештајот.

Во одредени европски земји, меѓу кои и Македонија, сепак силно ќе се ограничи употребата на алтернативните никотински производи. Со предложениот нов Закон за заштита од пушење дури ќе се забрани и продажбата на никотинските ќесички кои имаат вкусови, како и нивното изложување, иако во голем дел од светот на нив се гледа како на ефикасно средство за откажување од далеку поштетните цигари.

Агенцијата за храна и лекови на САД ги дозволи никотинските ќесички за широка употреба на пазарот, а според Мери Хривна, вонреден професор на Факултетот за јавно здравје Рутгерс и основач на Институтот за студии за никотин и тутун, одлуката на ФДА сугерира дека ќесичките им овозможуваат на корисниците да ги откажат цигарите.

– ФДА очигледно заклучила дека придобивките од јавното здравје ги надминуваат ризиците. Знаеме дека никотинските ќесички содржат многу, многу помалку штетни состојки во споредба со традиционалните тутунски производи. Вкупниот број на хемикалии е сè уште многу помал од оној што обично се наоѓа во чадот од цигарите – кој може да содржи повеќе од 7.000 хемикалии – вели професорката Хривна.

Сличен став сподели и Кристин Делнево, доктор на науки и магистер по јавно здравје од Универзитетот во Њу Џерси.

– Тековната и дневна употреба на никотински ќесички беше највисока кај возрасните кои неодамна се откажаа од друг производ. Нашите резултати сугерираат дека возрасните веројатно користат никотински ќесички за намалување на штетите, со оглед на тоа што употребата на ќесичките е највисока кај оние кои неодамна се откажале од друг тутунски производ или електронски цигари – оценува Делнево.

Универзитетскиот колеџ во Лондон пак, спроведе петгодишно истражување, од 2020 до 2025 година, кое опфатило над сто илјади учесници. Анализата објавена во медицинското списание „Лансет“ истакнува дека законите треба да ги минимизираат ризиците за младите луѓе, но без да го поткопаат потенцијалот што ќесичките би можеле да го имаат за намалување на штетата поврзана со пушењето на цигари.

„Пронајдовме докази дека никотинските ќесички се користат сè повеќе при обиди за престанок или намалување на пушењето. Употребата на ќесички како помош за престанок со пушење се зголеми тројно во текот на периодот на студијата“, пишува во анализата.

– Клучно е да се постигне правилна рамнотежа, да се обесхрабри употребата кај младите луѓе, без да се ограничат ќесичките толку многу што луѓето ќе бидат вратени кон поштетни производи како цигарите – вели д-р Татан-Бирч која е автор на студијата.

Во анализата се додава дека една од предностите на никотинските ќесички е употребата на места каде што пушењето е забрането, што би можело да одрази одредена замена за пушење во ограничени услови.

The post АЛТЕРНАТИВНИТЕ ПРОИЗВОДИ, КАКО НИКОТИНСКИТЕ ЌЕСИЧКИ, ГО ЗАБРЗУВААТ НАМАЛУВАЊЕТО НА СТАПКАТА НА ПУШЕЊЕ Земјите кои ги прифатиле имаат најбрзи падови на стапките appeared first on plusinfo.mk.

Зошто на жените им е потешко да ја надминат зависноста од користењето на цигари е една од темите за кои се спроведени бројни студии, а една од поновите доаѓа од Универзитетот Јеил. Во таа студија се наведува дека предизвикот со лишувањето на цигари кај жените започнува уште од првиот ден. Како што пишува научничката Шери Мек Ки, која на Јеил се занимава со истражување на влијанието на пушењето врз жените и ефикасните третмани за откажување од оваа зависност, во одлуката за пушење цигари силно влијание имаат емоциите.

Според студијата, уште од самиот почеток на откажувањето, жените полесно ќе посегнат повторно по цигара во случај на проблеми и негативни емоции, а во овој потег и хормоните исто така играат улога. Се наведува дека нивоата на естроген, кои се менуваат во зависност од фазата на менструалниот циклус, влијаат на перцепцијата и желбата за никотин. Понатаму, како уште еден важен заклучок и препорака, се потенцира дека помагалата за откажување од пушење не делуваат на ист начин кај жените како што делуваат кај мажите пушачи.

„Експертите не знаат зошто заменската никотинска терапија (фластери, гуми за џвакање, инхалатори, спрејови) е помалку ефикасна кај жените. Една од теориите е дека жените го метаболизираат никотинот побрзо од мажите, а снимањето на мозокот (радиолошки тестови) покажа дека рецепторите за никотин во мозокот функционираат различно кај жените, што влијае на ефикасноста на заменската никотинска терапија“, пишува Мек Ки.

Додека македонските здравствени власти со најавениот Закон за заштита од пушење планираат силно да го ограничат пристапот до никотинските ќесички, едно од последните шведски истражувања откри огромна улога на никотинските ќесички како ефикасно средство за лишување од цигари. Она што самите Швеѓани го откриваат денес е неоспорната улога на никотинските ќесички во намалувањето на бројот на пушачи, првенствено кај жените. Ова е тема што ја покрена извештајот на организацијата „Smoke free Sweden“, глобална мрежа што ги обединува експертите за јавно здравје од повеќе од 35 земји.

Студијата за најефикасните средства и алатки за откажување од пушење вклучила речиси 900 испитаници, поранешни пушачи. Намерата била да се откријат најчесто користените методи кои им помогнале на пушачите да ја излечат оваа зависност. Истражувањето ја покажало претходно непрепознаената улога на никотинските ќесички. Имено, мнозинството жени (поранешни кориснички на цигари) ги позиционирале никотинските ќесички како најефикасно средство за помагање во откажувањето од пушење. На скала со максимум десет поени, никотинските ќесички биле оценети со 8,2, што е трипати поуспешно од користењето на вејп и 56 проценти повисоко од никотинските гуми за џвакање.

Во извештајот се вели дека ефикасноста на никотинските ќесички не била позната сè додека тие не биле воведени како посебна категорија на никотински производи во шведската национална статистика. Оттогаш, во 2016 година, тие помогнале „да се забрза падот на стапките на пушење кај двата пола, со зголемување од речиси 200 проценти на стапката на откажување од пушење кај жените“.

„Успехот на Шведска не е резултат на политики на забрана или на апстиненција, туку на храбар и прагматичен пристап кон намалување на штетите. Доказите се јасни: никотинските ќесички се ефикасни, општествено прифатливи и најефикасно оружје против пушење достапно денес. За владите ширум светот, тие претставуваат моќна здравствена алатка“, се вели во извештајот, кој ги анализира резултатите од анкетата во контекст на намалувањето на стапките на пушење во земјата за 54 проценти од 2012 година.

Професорот од Универзитетот во Франкфурт, Хајно Штовер истакнува дека податоците со години покажуваат дека на жените им е потешко да се ослободат од зависноста од цигари, што ги прави овие податоци уште поважни.

„Доколку другите земји сакаат да го постигнат успехот на Шведска во спасувањето на животи, тие мора да ги прифатат алатките што го прават откажувањето од пушење достапно и одржливо. Тие треба да ја стават науката пред идеологијата“, пишува професорот Штовер во извештајот.

Здравствените работници од регионот велат дека со години гледале како поединци развиваат болести кои можеле да бидат предвидени, но не можеле да ги спречат пациентите во тоа, затоа што тие не сакале или не можеле да престанат да пушат.

„Еден ден слушнав за пристапот за „намалување на штетата од пушење“. Мојата прва реакција беше: „Какво намалување на штетата? Тие само треба да престанат да пушат и тоа е тоа. Да се намали штетата целосно“. Но, потоа размислував за тоа. Колкумина престанаа да пушат во моите 20-ина години убедување, молење, расправии? Може ли да избројам повеќе отколку што имам прсти на едната рака? Тешко“, вели доктор Лилјана Ценан, хрватски специјалист по јавно здравје.

Докторката нагласува дека во Хрватска постоел информациски вакуум за новите алтернативни никотински производи како што се никотинските ќесички и концептот за намалување на штетата од пушењето, но пронашла информации на веб-страниците на релевантните институции за јавно здравје и владини институции во многу други земји.

„Експертите се поделени. Некои ги оспоруваат научните докази, а други веруваат во доказите дека новите производи се помалку штетни од конвенционалните цигари, но веруваат дека овие нови производи не се користеле доволно долго за да се видат сите нивни штетни ефекти, особено оние што се јавуваат по децении употреба. И се прашувам дали треба да чекаме 20, 30 или повеќе години за докази дека нешто може да биде поштетно отколку што изгледа, и со тоа да ги лишиме сите оние кои би имале корист од овие производи (во форма на помош при откажување од пушење)? Што ако не се покажат долгорочни штетни ефекти? Што е со сите оние кои ќе се разболат и ќе умрат во меѓувреме од пушење конвенционални цигари?“, прашува докторката Ценан.

Таа заклучува дека престанувањето со пушење е најздравата одлука за пушачите, но сепак, за оние кои не можат или не сакаат да се откажат, потребни се други решенија, помалку штетни алтернативи.

The post ЖЕНИТЕ УСПЕШНО СЕ ОТКАЖУВААТ ОД ЦИГАРИ СО НИКОТИНСКИ ЌЕСИЧКИ Кај нас се ограничува пристапот до нив appeared first on plusinfo.mk.

Македонските здравствени власти се на пат да ја ограничат достапноста до никотинските ќесички, иако овој производ во голем број држави е прифатен како најмалку штетна алтернатива на цигарите. Најавениот нов Закон за заштита од пушење предвидува забрана за продажба на никотинските ќесички со вкусови, забрана за нивно изложување и ги третира како тутунски производ, додека земји кои успеваат да ја намалат стапката на пушење ги препорачуваат како заменска терапија на зависниците од цигари.

Во студија иницирана од Агенцијата за храна и лекови на САД (FDA), на која работеле експерти од кои повеќето се професори на Универзитетот за медицина во Вашингтон, се истакнува податокот дека најчестата причина за употреба на никотинските ќесички е тоа што кај 73% од пушачите тие се перцепираат како помалку штетна алтернатива на цигарите.

„Кај оралните никотински ќесички нема процес на согорување ниту пак тие содржат листови од тутун. Тие може да бидат производ со помал ризик ако се користат како замена за поштетни видови на тутун, особено запаливите“, се наведува во студијата „Никотинските ќесички и потенцијалното влијание на јавното здравје“.

Во неа се додава дека причини за нивно користење се и лесниот начин на употреба на никотинската ќесичка (кај 53% од пушачите) и помагањето да се намали (46%) или да се откаже (52%) употребата на други тутунски производи.

„Оралните никотински ќесички се чини дека се помалку токсични од цигарите и можат да им обезбедат на пушачите соодветен никотин, со што секако се потенцијално помалку штетна алтернатива на запаливите тутунски производи“, се додава во анализата на ФДА.

На ниво на Европската Унија, вклучително и Велика Британија и Швајцарија, организацијата „Considerate Pouchers“ спроведе истражување за достапноста на никотинските ќесички и нивниот третман во законите. Од организацијата наведуваат дека земји како Шведска ги прифатиле ќесичките за да ги намалат стапките на пушење кон историски најниски нивоа, а други градат законски бариери кои се закануваат да го уништат деценискиот напредок.

Според индексите за 2026, највисока оценка има Шведска, за која се нагласува дека успешно законски ги разликува ќесичките од тутунот, па дури и ги намалила даноците за ќесичките за 20% за да ги награди пушачите кои ги откажале цигарите. Добри оценки добиваат и Норвешка, Бугарија и Романија, кои обезбедиле достапност за потрошувачите. Овие држави ги оданочиле ќесичките пропорционално на ризикот и ја заштитиле разновидноста на вкусовите, бидејќи според емпириските податоци тоа е од суштинско значење за спречување на повторна употреба на цигари.

Лоши оценки добиле Германија, Холандија, Белгија и Кипар, поради целосните забрани за малопродажба и онлајн продажба. Овие политики ги намалиле најефикасните алтернативи за пушачите и потврдиле статус кво кај стапката на пушење.

– Иновацијата, а не забраната, е патот напред кон целта за Европа без чад. Кога државите погрешно ги класифицираат ќесичките како тутун, тие не ги заштитуваат младите, туку ги заштитуваат стапките на пушење со тоа што им отежнуваат на оние што ги користат ќесичките да живеат поздрав живот. Во трката за Европа да стане без чад, никотинските ќесички се појавија како клучна алатка за јавното здравје. Сепак, како што се приближуваме кон 2026 година, континентот се наоѓа на регулаторна раскрсница – вели Хуан Рафаел Таборсија, портпарол на „Considerate Pouchers“.

Токму Шведска, која доби највисока оценка, е на пат да стане првата земја во светот што ќе постигне официјален статус на „земја без чад“, со само 5,3% стапка на пушење. Во анализата „Револуцијата за побезбеден никотин: Глобални лекции, поздрава иднина“ на организацијата „Smoke free Sweden“, пишува дека пушењето на цигари во ова скандинавска земја се намалило за 54% во текот на 12 години, при што пушењето кај жените се намалило за 49% по воведувањето на никотинските ќесички во 2016 година.

„Во сеопфатните национални анкети со поранешни пушачи, никотинските ќесички ги надминаа сите други помагала за откажување од цигари, при што и мажите и жените ги рангираа никотинските ќесички како најефикасен метод. Употребата кај Швеѓаните на алтернативни производи како што се никотинските ќесички го избегнува процесот на согорување што ги создава најголем дел од токсините поврзани со тутунот. Не самиот никотин, туку начинот на неговиот внес ја одредува штетата по здравјето – што ја прави Шведска убедлив пример за тоа како промената на моделот на потрошувачка може да го подобри јавното здравје“, се вели во анализата.

Во анализата се дава осврт и на позитивните ефекти врз јавното здравје, односно дека пушачите кои преминале на никотински ќесички имаат 45% помал ризик од срцеви болести и со тоа Шведска спасила околу 3.000 животи годишно. Исто така Шведска има 61% помала стапка на смртност од рак на белите дробови кај мажите од просекот во Европската Унија.

The post СО ЗАБРАНАТА ЗА НИКОТИНСКИ ЌЕСИЧКИ СТАГНИРА СТАПКАТА НА ПУШЕЊЕ Шведска го стори спротивното и успеа  appeared first on plusinfo.mk.

Словенија е немоќна во битката против неконтролираните никотински производи коишто се продаваат на црниот пазар. Нелегалната дистрибуција се зголемила откако минатата година властите во Љубљана законски ги забранија за продажба електронските цигари и никотинските ќесички со вкусови и ароми.

Дали македонските здравствени власти ризикуваат да го пресликаат словенечкото сценарио со усвојувањето на најавениот Закон за заштита од пушење?! Упатените истакнаа дека предложениот текст кај нас е изготвен по словенечкиот модел и исто така предвидува рестрикции за ваквиот вид алтернативни никотински производи. Но, од друга страна, медиумите во Словенија пишуваат дека една година подоцна ваквите мерки резултирале со голем број негативни ефекти, особено поради фактот што корисниците сега употребуваат незаконски вејпови кои воопшто не подлежеле на лабораториски контроли.

Како што пишува „Журнал24“, на крајот на април 2025 година, во Словенија стапи во сила забрана за ароми во електронските цигари, што било претставено како важна мерка за јавното здравје. Главното образложение била заштитата на населението, особено на младите, бидејќи законодавците сметале дека аромите во електронските цигари се една од најчестите причини за започнување со нивна употреба.

„Проценките од истражувањето на организацијата Empty pack покажуваат дека во времето пред забраната во Словенија имало приближно 40.000 корисници на ароматизирани електронски цигари. Државниот буџет собирал речиси 4 милиони евра годишно од електронски цигари во 2024 година, а пазарот бил целосно регулиран, како во однос на квалитетот на производот, така и во однос на контролата и продажбата“, се истакнува во статијата.

Како што се додава, во тој период претставници на стручната јавност, на индустријата и невладините организации предупредиле за потенцијалните негативни ефекти од таквата рестриктивна политика. Една од наведените причини била дека забраната на производ кој е легален и е во пораст во сите соседни земји нема да ја намали неговата употреба, туку ќе го префрли поголемиот дел од корисниците на црниот пазар. Односно, дека побарувачката за овие производи нема да исчезне, туку ќе се насочи кон неконтролирани и нелегални канали.

„Настаните што следуваа по воведувањето на забраната во голема мера ги потврдија предупредувањата. Десет месеци по спроведувањето на целосната забрана за ароми, структурата на пазарот на електронски цигари во Словенија значително се промени. Забраната за ароми доведе до криминализација на активност што претходно законски беше регулирана“, се додава во текстот.

Според студијата на организацијата „Empty pack“, нелегалниот и нерегулиран пазар моментално снабдува приближно 90 проценти од приближно 40.000 словенечки корисници на електронски цигари. Преовладувале нерегулирани производи, главно произведени во Кина, а државата ја изгубила контролата врз квалитетот и продажбата. Како резултат на тоа, Словенија исто така изгубила приходи, а корисниците останале без заштита. Според студијата, за само седум месеци од воведувањето на забраната, легалниот пазар на електронски цигари во Словенија речиси целосно се трансформирал во нелегален.

„Во 2024 и 2025 година, повеќе од 99,7 проценти од е-цигарите на словенечкиот пазар биле легални, што значи дека овие производи биле предмет на строги државни прописи. Овие ограничувања вклучувале проверка на квалитет и состојки, нивоа на никотин, продажба, контрола на продажни места, етикетирање на производи и забрана за продажба на малолетници. Државата го контролирала и пазарниот сегмент со акцизи. Во февруари 2026 година, дури 87,9 проценти од сите е-цигари на словенечкиот пазар биле од нелегално потекло. Се вели дека клучната причина за јазот е забраната за ароми, кои остануваат најбараната карактеристика на производот кај потрошувачите и во голема мера ги одредуваат нивните навики за купување“, потенцираат словенечките медиуми.

Тие додаваат дека моменталната ситуација, според резултатите од студијата, тешко е да се опише како успех од перспектива на јавното здравје или регулаторната регулатива. Последиците од забраната се повеќеслојни и се протегаат на јавното здравје, како и на економијата и функционирањето на државата. Пристапот до нерегулирани производи станал полесен поради воведувањето на забраната за ароми, што го ставило јавното здравје во поголем ризик, особено кај младите. Сегашната ситуација го покренала поширокото прашање за ефикасноста на рестриктивните политики кои не го зеле предвид вистинското однесување на потрошувачите и динамиката на пазарот. Во овој случај, мерката за забрана на ароми не ги постигнала дефинираните цели, туку создала нови предизвици кои се значително потешки за контрола.

Имаат ли македонските институции стратегија и план при вакво сценарио? Уште од информирањето на јавноста и најавата за новиот Закон за заштита од пушење кон почетокот на годинава, Царинската управа неколку пати информираше за заплена на нелегални алтернативни никотински производи, како што се електронски цигари и никотински ќесички со вкусови и ароми. Европол, поучен од искуствата од земјите кои вовеле ваква или слична забрана, веќе предупреди дека последниве години има „последователно зголемување на фалсификувани производи за вејпинг што влегуваат на пазарот на ЕУ и на многу од овие фалсификувани производи и делови за е-цигари им недостасуваат контроли за квалитет и не ги исполнуваат безбедносните и здравствените барања, што претставува ризик за потрошувачите“.

Податоците покажуваат дека во Естонија, каде што забраната за вкусови беше воведена во 2020 година, речиси 60 проценти од корисниците на електронски цигари денес купуваат ароматизирани производи на нелегалниот пазар. Примерот на Данска, каде што забраната беше воведена во 2022 година, покажува сличен модел, а повеќе од половина од корисниците сè уште користат нелегални производи со вкусови. Холандскиот пример покажува дека една година по забраната, употребата на е-цигари кај младите се зголемила за приближно 25 проценти, а заплените на забранети производи достигнале рекордни нивоа.

The post ЕДНА ГОДИНА ПО ЗАБРАНАТА СЛОВЕНЦИТЕ КОРИСТАТ Е-ЦИГАРИ СО АРОМИ, НО КУПЕНИ ОД ЦРНИОТ ПАЗАР Македонскиот Закон за пушење е пресликан од словенечкиот appeared first on plusinfo.mk.

Голем број европски научници остро реагираа на изјави на еврокомесарот за здравство Оливер Вархеји. Неговата намера е во новите политики на Унијата поврзани со пушењето, да ги изедначи даноците предвидени за цигарите и за алтернативните никотински производи, како што се никотинските ќесички, вејповите и уредите на загревање. Дел од државите пак, ја стимулираат употребата на алтернативните производи за пушачите да се откажат од користењето на цигари. Поради ова, 23 експерти ѝ пишаа отворено писмо на претседателката на Европската комисија, Урсула фон дер Лајен, во кое наведуваат дека се длабоко загрижени од неодамнешните тврдења на комесарот Вархеји дека употребата на алтернативните никотински производи може да се спореди со ризиците од пушењето на цигари. Според нив, ваквите тврдења и размислувања можат да имаат несакани последици.

– Ние не тврдиме дека овие производи се „безбедни“ или „безопасни“, туку само дека тие се, без никакво сомневање, многу помалку штетни од цигарите – пишуваат истражувачи од институции како што се Империјал колеџ во Лондон, Универзитетот „Квин Мери“ во Лондон, Универзитетот во Женева и во Лувен, заедно со експерти како Дејвид Нат, Питер Хајек, Жан-Франсоа Етер, Карл Лунд и Клајв Бејтс.

Во писмото, тие го цитираат германскиот Федерален институт за проценка на ризик, според кој „научните студии покажуваат дека самите електронски цигари се многу помалку опасни од конвенционалните цигари“. Дополнително, наведен е и заклучокот од францускиот Национален институт за карцином, кој тврди дека „кога пушите електронски цигари, ароматизираната течност (која може да содржи никотин) се загрева и се претвора во капки од пареа и воздух и на овој начин, ги избегнувате повеќето канцерогени супстанции што се наоѓаат во цигарите“.

Во писмото се истакнува и мислењето на Кралскиот колеџ на лекари од Лондон, според кој, користењето на вејпови ги изложува корисниците на многу потесен опсег на токсини отколку пушењето на цигари, додека нивоата на токсини апсорбирани од вејповите се генерално ниски. Исто така, додаден е и заклучокот на Комитетот за токсикологија на Велика Британија, кој оценува дека „употребата на орални никотински ќесички, како замена за пушење цигари, веројатно е поврзана со намалување на вкупниот ризик од негативни здравствени ефекти“.

Научниците апелираат европските власти да го имаат предвид увидот на американскиот професор Мајкл Расел од 1976 година, кој истакнал дека „луѓето пушат поради никотинот, но умираат од катранот“. Истражувачите сугерираат Брисел да го следи американскиот стратешки пристап, на раководството на Агенцијата за храна и лекови на САД, кој се води од идејата дека никотинот не е примарна директна причина за болести и смрт што произлегуваат од пушењето, туку тоа се токсините од чадот од цигарите. Агенцијата оценува дека „никотинот, иако не е бениген, не е директно одговорен за ракот предизвикан од тутун, заболувањата на белите дробови и срцевите заболувања што убиваат стотици илјадници Американци секоја година“.

„Неправилното разбирање на ризикот ќе доведе до прекумерна регулација на производите што Европејците сакаат да ги користат за да ги намалат ризиците поврзани со сегашното пушење и идното пушење. Опасноста води кон низа предвидливи несакани последици: (i) повеќе пушење отколку што би имало инаку; (ii) поголема нелегална трговија и преземање на пазарот од нелегални производи со никотин со руско или кинеско потекло, кои понекогаш се снабдуваат преку криминални мрежи; (iii) низа потенцијално ризични заобиколни решенија од страна на потрошувачите и добавувачите што можат да го зголемат вкупниот ризик и да ги поткопаат регулаторните цели“, предупредуваат научниците.

Тие потенцираат дека предвидените мерки можат да наштетат и на важните цели за јавно здравје на ЕУ поврзани со ракот, односно на Планот на Европа за борба против ракот и Планот за кардиоваскуларните заболувања. Според овие два плана, пушењето е главен фактор на ризик што може да се модифицира, преку практични технологии кои овозможуваат миграција кон употреба на никотин со низок ризик.

– Раководството на Комисијата, или другите институции, мора брзо да дејствуваат за да ги исправат опасните, лажни и заведувачки изјави дадени од комесарот Вархеји и да обезбедат дека креирањето политики се темели на здрава наука, бидејќи тие можат да спасат или да загрозат животи на милиони граѓани на ЕУ. Во основа, европските институции можат да го поддржат ставот на комесарот или можат сериозно да ги сфатат своите одговорности за креирање политики. Тие не можат да ги сторат и двете – истакнуваат експертите.

Дебатата се покрена во ист период кога и македонските власти имаат намера да усвојат нов Закон за заштита од пушење. Домашните власти со предлог текстот ја поистоветуваат употребата на цигари и на алтернативни никотински производи, па дури и ја забрануваат продажбата на ароматизирани производи, за кои постојат сѐ повеќе информации дека се предмет на нелегална трговија во Македонија.

The post НЕ СМЕЕ ДА СЕ ИЗЕДНАЧАТ ЦИГАРИТЕ И АЛТЕРНАТИВНИТЕ НИКОТИНСКИ ПРОИЗВОДИ Научниците контра комесарот Вархеји appeared first on plusinfo.mk.

Дел од државите ширум светот кои успеале драстично да ја намалат стапката на пушење ги направиле достапни на пазарот алтернативните никотински производи, особено никотинските ќесички. Во оваа листа предничат Шведска, Велика Британија и Нов Зеланд. Но, постојат и спротивни примери. Земји како Словенија, Белгија, Латвија и други, ја ограничија употребата и продажбата, па сега се соочуваат со наплив на никотински ќесички и електронски цигари со сомнително потекло, на црниот пазар. Дел од познавачите оценуваат дека Македонија со новиот Закон за заштита од пушење одлучила да го следи словенечкиот пример. Државата е на пат да ги забрани никотинските ќесички со ароми, освен со вкус на тутун, иако дел од лекарите сметаат дека токму овој производ може да им помогне на пушачите да се откажат од цигари. Забраната ќе важи и за вејповите со вкус, како и за патроните за уредите на загревање.

Воведувањето на забраната ризикува и во Македонија да се пресликаат негативните искуства. Законот во Латвија и во Словенија често бил заобиколуван со нарачки преку интернет или пак со нелегална продажба под маса на шверцувани никотински ќесички од непознат производител. Освен дилемите за производителот, голем број прашалници се отвораат и за составот на ќесичките на црно, со оглед на фактот дека тие не ги поминуваат контролите за составот во релевантни лаборатории. Во Македонија, уште со најавата на новото законско решение, се забележува незаконски внес на вакви производи.

Минатиов викенд Царината соопшти дека Секторот за контрола и истраги открил и спречил обид за криумчарење на 4.800 пакувања со никотински ќесички со вредност од 1,2 милиони денари, а против сторителот ќе биде поднесена кривична пријава за „криумчарење“.

„Осомничениот е застанат за контрола од страна на мобилен царински тим, во внатрешноста на државата, веднаш по влезот во државата преку граничен премин Табановце, при што се пронајдени 4.752 пакувања со никотински ќесички со никотин и 48 пакувања никотински ќесички – снус кои содржат никотин и тутун. Стоката и возилото се запленети, а осомничениот е приведен на сослушување од страна на инспекторите за истраги“, се вели во соопштението.

Но, ова не е првиот случај. Царината пред еден месец веќе информираше за случај на пронајдени вејпови без бандерола, иако Законот сѐ уште не е усвоен. Настанот се случил во дуќан во Струга, а производите биле во вредност од над 1,8 милиони денари.

Додека Македонија најавува забрана за најголемиот спектар од алтернативните никотински производи, студии покажуваат дека пушачите кои преминуваат на никотински ќесички можат да ја намалат својата изложеност на некои од најопасните хемикалии што се наоѓаат во цигарите и тоа до нивоа блиски до оние кои се забележуваат кај пушачите што целосно се откажале од цигари.

Студијата „Никотински ќесички: помагало за откажување од пушење или нова опасност по јавното здравје?“, објавена во специјализирано списание Internal and Emergency Medicine, заклучува дека никотинските ќесички се наоѓаат на „најниската скала на ризик од токсични материи“ меѓу никотинските производи и би можеле да претставуваат значајна можност за намалување на штетата за пушачите кои не можат или не сакаат целосно да се откажат од никотинот.

Студијата на Константинос Фарсалинос, професор на Универзитетот на Западна Атика и Универзитетот во Патра во Грција, ги собира податоците за хемиските својства, токсикологијата, биомаркерите и трендовите на популацијата.

„Никотинските ќесички би можеле да претставуваат ветувачки производ за намалување на штетите, со ризик веројатно близок до фармацевтските заменски никотински терапии, а лекарите би можеле да ги сметаат за замена за цигарите кај пушачи кои не можат или не сакаат да се откажат од пушењето со моментално одобрени методи“, оценува кардиологот и истражувач д-р Константинос Фарсалинос.

Тој ги зема предвид и показателите од Шведска, каде стапката на пушење се приближува до 5%. Според анализите, оваа стапка е постигната со широк достап на никотинските ќесички, кои особено биле прифатливи за женската популација.

„Доказите покажуваат дека никотинските ќесички се најефикасната алатка за да им се помогне на пушачите – а особено на жените – да се откажат од цигарите. Низ здравствените податоци, анкетите и животното искуство на жените, се појавува истата приказна. Никотинските ќесички одговараат на современиот живот. Тие се чисти, општествено безопасни и ефикасни. Тие даваат резултат таму каде што другите методи не успеале“, вели бихејвиоралистот проф. Марева Гловер.

Освен шведските, и британските власти никотинските ќесички не ги третираат во истата група со тутунските производи, туку како „потрошувачки производи“, освен ако не се продаваат со медицинска намена како средство за откажување од пушење. Во Британија стапката на пушење за 2025 година изнесува околу 10%, додека во Македонија е над 40%.

The post РАСТЕ ШВЕРЦОТ НА АЛТЕРНАТИВНИ НИКОТИНСКИ ПРОИЗВОДИ КОИ СЕ НА ПАТ ДА СЕ ЗАБРАНАТ?! Ризик од негативни искуства во Македонија appeared first on plusinfo.mk.

Македонските власти со новиот предлог Закон за заштита од пушење ги изедначија цигарите со алтернативните никотински производи, како што се електронските цигари, вејповите и никотинските ќесички. Сепак, голем број примери ширум светот покажуваат дека ваквиот пристап не го дава посакуваниот резултат. Напротив, во намерата за намалување на стапката на пушење успеале државите кои овозможиле широка употреба на помалку штетните никотински производи наспроти предвидените рестрикции кај нас.

Според дел од медицинските лица, мора да се направи разлика помеѓу користењето на тутун и користењето на никотин. Пошироката јавност, но често и стручната, го поистоветува користењето на никотин единствено со цигарите.

– Никотинот сам по себе не е причина за рак. Штетните ефекти од пушењето се резултат на токсичните соединенија што се создаваат со согорување на околу 900°C кај традиционалните цигари – нагласува д-р Хуго Тан.

Според него, случајот е многу поразличен со алтернативните никотински производи, кај кои ги нема штетите од согорувањето.

– Има логика во охрабрувањето на некои пушачи да се префрлат на научно проценети производи со намален ризик. Пијалоците со помалку шеќер, безбедносните појаси во автомобилот, алтернативните никотински производи… каква е врската? Станува збор за концептот на намалување на штетата – додава доктор Тан.

Ваквиот пристап кон намалување на стапката на пушење се покажал успешен во голем број земји, меѓу кои и Шведска и Јапонија.

– Примерите како шведскиот покажуваат дека долготрајната употреба на производи без чад може да биде поврзана со драстичен пад на пушењето, од околу 30 проценти на околу 5 проценти. Шведска сега има најниска стапка на болести предизвикани од пушење во ЕУ – заклучува д-р Хуго Тан.

Анализата „Safer nicotine works“ покажува дека земјите што широко ја овозможиле употребата на алтернативни никотински производи бележат намалување на стапките на пушење двојно побрзо од глобалниот просек. Како пример, никотинските ќесички станаа најбрзо растечкиот алтернативен никотински производ на скандинавскиот пазар, а Шведска продолжува да има најниска стапка на пушење во Европа. Во оваа земја иако бројот на пушачи е намален, уделот на населението што користи никотин се чини дека останал ист. За ова да се случи постоеле голем број дебати и различни законски решенија. За разлика од предлогот кај нас, актуелните шведски закони дозволуваат вејпови и ќесички со ароми и вкусови, но пак затоа имаат различни акцизи.

„Стратегијата за оданочување на тутунот во Шведска се базира на пропорционална акциза што го одразува понискиот ризик поврзан со алтернативите на цигарите. Никотинските ќесички имаат најниска акцизна стапка во споредба со акцизата што се применува на цигарите“, се наведува во анализата.

Во неа се прави корелација и на широката достапност на алтернативните никотински производи со податокот од Светската здравствена организација кој покажува дека Шведска има најниска инциденца на рак на белите дробови (17,7 на 100.000) во ЕУ и најниска инциденца на смртност од рак на белите дробови (14,4 на 100.000).

Успешен пример е и Јапонија каде претходно имало лоши резултати – за повеќе од четиринаесет години, стапката на пушење се намалила само за помалку од два проценти, од 21,6% во 2003 година на 19,8% во 2017 година.

Сепак, намалувањето на стапката на пушење неодамна се забрзало благодарение на воведувањето производи за загревање на тутун и од 2016 година до 2019 година е намалена на 17,8%.

„Владата не ја дестимулираше употребата на алтернативните никотински производи преку воведување ограничувања за нивната употреба, но истовремено и не ги поддржуваше активно овие производи како одржлива алтернатива на пушењето цигари“, се вели во анализата „Safer nicotine works“.

Но, јапонските власти направиле јасна разлика за тоа каде е дозволено пушењето на цигари, а каде може да се користат алтернативните производи.

„Употребата на алтернативните никотински производи е дозволена во барови и ресторани над 100 квадратни метри и во оние што ги управуваат поединци или мали и средни претпријатија, под услов да е истакнат знак за предупредување. Во спротивно, производот може да се користи само во одредени области. Во пракса, повеќето барови и ресторани во Јапонија се квалификуваат за оваа можност која дозволува употреба на алтернативни никотински производи во објектите. Спротивно на тоа, пушењето цигари е забрането во сите ресторани, хотели и канцеларии од април 2020 година“, се додава во анализата.

Во Јапонија, откако производите за загревање на тутун за првпат биле воведени на пазарот во 2016 година, продажбата на цигари е намалена за 32% за само пет години.

The post РЕСТРИКЦИИТЕ НЕ ДАЛЕ РЕЗУЛТАТ Употребата на никотин преку вејпови и ќесички може да ја намали стапката на пушење appeared first on plusinfo.mk.

Иновативните алтернативни никотински производи кои се помалку штетни за здравјето претставуваат катализатор во шведскиот напредок кон остварувањето на целта за општество без чад – во кое помалку од 5% од населението ги користи традиционалните цигари. Ова го покажува анализата од истражувањето „Моќта на никотинските ќесички“, кое било спроведено во април и во мај 2025 година во Шведска, на 892 испитаници кои се бивши пушачи, преку метод на интервјуа и фокус групи.

„Оваа револуција во јавното здравство не е резултат на политиките засновани на забрани, туку поради смелото и прагматично прифаќање на политиките за намалување на штетите. Ова истражување открива дека постигнувањето на извонредниот успех е олеснето преку прифаќањето на оралните никотински ќесички во Шведска – иновација без чад и тутун што помогна да се забрза намалувањето на стапките на пушење во последниве години, особено кај жените“, пишува во анализата.

Во неа се додава дека откако Шведска во 2016 година го овозможила користењето на никотинските ќесички како помалку штетен никотински производ, со тоа се забрзало намалувањето на стапките на пушење кај двата пола, со раст од речиси 200% на стапката на откажување на цигари кај жените. Пред појавата на никотинските ќесички, потрошувачката на цигари кај Швеѓанките се намалила за само 16% помеѓу 2009 и 2015 година, во споредба со 27% кај мажите во истиот период. Но, од 2016 година па до 2024 година, трендот се сменил: стапката на откажување од пушење кај жените всушност се забрзала, надминувајќи ја онаа кај мажите. Стапката на пушење кај Швеѓанките е намалена на 5,7% за разлика од 11,2% во 2015 година, што претставува забележителен пад од 49%.

„Лансирани во 2016 година, никотинските ќесички се модерни производи без чад и тутун кои испуштаат никотин без согорување или вдишување. Овие производи се состојат од мали ќесички кои содржат никотин и се поставуваат помеѓу усната и непцата, олеснувајќи ја апсорпцијата преку оралната мукозна мембрана. Отсуството на согорување, чад или плунка, во комбинација со недостатокот на мирис, ги прави особено привлечни за пушачите кои бараат алтернатива на цигарите. Истражувањата покажаа дека никотинските ќесички се најбезбедниот метод за испорака на никотин затоа што не содржат тутун, избегнуваат изложеност на белите дробови со испорака на никотин преку апсорпција на орално ткиво и имаат хемиски состав сличен на производите од терапијата со замена на никотин (NRT), кои се дефинирани како основни лекови во терапијата за откажување од страна на Светската здравствена организација (СЗО)“, се потенцира во анализата „Моќта на никотинските ќесички“.

Испитаничките одговориле дека доколку нивните преферирани никотински ќесички повеќе не бидат достапни на пазарот во Шведска, една од три жени (34%) би ги побарале на друго место, наместо да преминат на друг метод за откажување од пушење, што е јасен показател и за ефикасноста и за емоционалната инвестиција на ќесичките во откажувањето од пушење. Дополнително, 16% од жените испитанички изјавиле дека би можеле повторно да пушат доколку ќесичките не се достапни.

– Анализата на здравствените податоци, националните анкети и сведоштвата на жените покажуваат дека никотинските ќесички се најбезбедната, општествено најприфатлива и еколошка алтернатива на цигарите што одговара на денешниот начин на живот. Тие се прагматични, ефикасни и нудат најсветла надеж за свет без чад. Шведските докази се кристално јасни: никотинските ќесички се најефикасната алатка за да им се помогне на пушачите – а особено на жените за да се откажат од цигарите – вели коавторката на анализата, д-р Марева Гловер.

– Кога жените имаат пристап до чисти алтернативи без стигма, стапките на откажување од пушење се зголемуваат. Креаторите на политики мора да го напуштат својот прохибионистички начин на размислување и да го следат шведскиот пример базиран на докази. Погрешните забрани и бариери го блокираат пристапот до овие производи што можат да спасуваат животи – истакнува коавторот на анализата, д-р Делон Хјуман.

Според истражувачите, на светот повеќе не му се потребни теоретски дебати или хипотетички модели за да разбере како да се победи пушењето. Тие тврдат дека Шведска го обезбедила планот и сега е време и другите нации да го следат примерот – со прифаќањето, а не со попречувањето, на улогата на модерните орални никотински ќесички во постигнувањето на иднина без чад.

Меѓу најупотребуваните во Шведска се никотинските ќесички Velo кои истовремено ослободуваат и вкус и никотин. Овие алтернативни никотински производи без чад, нудат посебна сензација во устата што не се чувствува како при пушењето цигари. За разлика од цигарите, овој производ не испушта аеросол. Ова им дава можност на возрасните потрошувачи да користат алтернативни производи без да влијаат штетно на оние околу нив. Производителот на Velo информира дека овие никотински ќесички се направени од висококвалитетни состојки. Тие содржат никотин, вода, билни состојки, ароми и засладувачи. Исто така, постојат никотински ќесички со различни вкусови и различни дози на никотин, кои се достапни и на пазарот кај нас. Сепак, овој производ не е без ризик и содржи никотин, состојка која создава зависност.

The post НИКОТИНСКИТЕ ЌЕСИЧКИ И ОТКАЖУВАЊЕТО ОД ЦИГАРИ Истражувањата покажале извонредни резултати appeared first on plusinfo.mk.