Мерката за намалување на ДДВ на нафтените деривати од 18% на 10% не е задоцнета и со тоа го штитиме стандардот на граѓаните, вели заменик-министерот за финансии Николче Јанкуловски.

– Мерката во никој случај не е задоцнета. Ги следиме работите, а факт е дека никој, па и од академската фела, не знае кога ќе заврши конфликтот. Во Министерството за финансии имаме разработено неколку сценарија заедно со меѓуресорската комисија којашто е составена и од претставници од Министерство за енергетика, Министерството за економија и труд, Државниот пазарен инспекторат и Комисијата за заштита на конкуренцијата. Тие сценарија се разгледуваат и остануваат одредени таргетирани мерки коишто би можеле да се применат при евентуална можна ескалација на настаните на Блискиот Исток – рече заменик-министерот во гостување на ТВ 24.

Јанкуловски дополни дека е рано е да се прејудицира, но, целта е да се зачува животниот стандард на граѓаните.

– Имаме листа кои цени се зголемени и во кој обем. Пазарниот инспекторат е на терен и проверува дали влезните инпути ја диктираат таа продажна цена или има некои малверзации. Ги чекаме резултатите. Ако има нелогичности во тоа секако ќе се изречат и одредени казни – рече тој.

На дневна основа ќе се следат состојбите и во зависност од извештаите ќе се одлучи дали ќе се оди и кои таргетирани мерки ќе се преземат, додаде заменик-министерот за финансии.

Посочи дека проблем со недостиг на горивата нема и дека во наредните 60 дена нема да се случи.

Тој потенцира дека Владата од почетокот е во комуникација и со бизнис секторот и со енергетските компании и со производителите на храна и дистрибутерите и оти ова не е адхок решение како во 2021 и во 2022 година кога годишната инфлација беше 14%.

– Оваа Влада од првиот момент максимално е посветена на фискалната консолидација и на намалување на инфлацијата. Декември го завршивме со 4,1%, 3,2% во јануари и 2,9% во февруари. Знае оваа Влада што сè презеде за да го намали буџетскиот дефицит од една страна, кој е главен параметар за фискалната консолидација – од 4,4% во 2024 година, 4% во 2025 и доколку случувањата нема да ескалираат се надевам и 2026 да ја завршиме со 3,5%. Со тие параметри за финансиска консолидација и финансиска стабилност, зголемување на приходите, заедно со овие мерки што ги преземаме и ќе ги преземаме во иднина за заштита на животниот стандард, ќе го постигнеме она што сме го предвиделе со ревидираната Фискална стратегија – наведе Јанкуловски.

Буџетот е ликвиден, додаде, а Владата сериозно е посветена на економскиот раст.

– Доколку има екстремни случувања, коишто ќе имаат влијание, Владата реално, одговорно и искрено ќе ги изнесе аргументите доколку има корекција на проекциите коишто се планирани за 2026 година – рече заменик-министерот Јанкуловски.

The post ЌЕ ИМА И ДРУГИ МЕРКИ АКО ЕСКАЛИРА ВОЈНАТА НА БЛИСКИОТ ИСТОК Намалувањето на ДДВ не е задоцнето, состојбите се следат на дневна основа appeared first on plusinfo.mk.

Министерството за финансии преку Трезорот работи редовно и ќе продолжи така до 31 декември 2025 година, како и сите други државни институции. Заменик-министерот за финансии, Николче Јанкуловски, изјави дека сите обврски на државата ќе бидат реализирани до крајот на годината, а буџетот ќе се затвори во рамките на планираниот дефицит.

– Трезорот функционира нормално и врши редовни исплати. Се исплаќаат плати, социјални надоместоци, К-15, блок-дотации кон општините и сите тековни трошоци – рече Јанкуловски во гостување на ТВ 21.

Тој истакна дека сите обврски кои се евидентирани и прифатени за плаќање ќе бидат реализирани заклучно со 31 декември.

„Целта на известувањето до буџетските корисници за доставување налози до 15 декември беше чисто организациска“, појасни заменик-министерот, додавајќи дека тоа им овозможува на службите на Трезорот навремено да ги испланираат сите расходи и да обезбедат фискална дисциплина.

Тој ги отфрли шпекулациите за наводно затворање на Трезорот и недостиг на средства, оценувајќи ги како дезинформации пласирани од опозицијата.

Јанкуловски најави дека до крајот на месецот се очекуваат дополнителни приливи по основ на данок на добивка, ДДВ и социјални придонеси.

– Во овој период голем дел од компаниите исплаќаат бонуси и регреси, па очекуваме дека приходната страна на буџетот ќе биде целосно реализирана – нагласи заменик-министерот.

The post ТРЕЗОРОТ ФУНКЦИОНИРА, ДО КРАЈОТ НА ГОДИНАТА ЌЕ СЕ ИСПЛАТАТ ОБВРСКИТЕ Буџетот ќе се затвори на планираното ниво appeared first on plusinfo.mk.

Собранието попладнево донесе одлука дека предлоготт за изменување и дополнување на Законот за данокот на додадена вредност е прифатлив и го проследи на натамошно второ читање.

Заменик-министерот за финансии Николче Јанкуловски при образложувањето предложениот текст пред пратениците истакна дека се предлага укинување на постојното ослободување од ДДВ за увоз на пратки со мала вредност до 22 евра, испорачани од странство до примачи во Македонија.

– Предлогот предвидува и ослободување од ДДВ за мали пратки од некомерцијална природа пратени од физичко лице од странство до физичко лице – примач во земјава со вредност до 22 евра. Предвидени се и исклучоци од ова ослободување, кое не се применува за одредени категории производи: алкохол и алкохолни пијалаци, парфеми и тоалетна вода и тутун и преработки од тутун – рече Јанкуловски.

Според Јанкуловски, основна причина поради која се врши изменување и дополнување на постојното законско решение е да се создаде појасна правна рамка, да се спречуат злоупотреби и да има пофер услови за стопанисување.

– Се задржува сепак можноста граѓаните да примаат лични пратки од странство до 22 евра без плаќање ДДВ што од социјален аспект е многу значајно -потенцира заменик-министерот.

Тој потсети дека со директива од ЕУ од 2021 година е укинато ослободувањето од плаќање ДДВ за мали комерцијални пратки.

Пратеникот на Социјалистичката партија на Македонија, Малиша Станковиќ нагласи дека ваквото законско решение треба да биде поддржано, бидејќи, како што рече, на овој начин се стават во рамноправна положба малите македонски трговци.

– Сакаме да градиме нови патишта, болници, градинки, училишта, сакаме зголемување на минималната плата и слично. Но, тоа не можеме да го правиме доколку македонскиот денар завршува на странските пазари. Мораме ние малку да имаме една елементарна почит кон нашите луѓе, кон нашата држава. И затоа сметам дека ваквото законско решение е добро. Мора да се справиме со сивата економија – рече Станковиќ.

Пратеникот на Левица, Реџеп Исмаил истакна дека законот треба да биде повлечен. Потенцира дека наместо регресивна даночна политика која ја казнува сиромаштијата, треба да се полни буџетот со зголемување на даноците на добивка.

– Вие сте спремни сè да прифатите со ЕУ, дури и на директна штета на граѓаните. Ова ништо позитивно нема да придонесе во Македонија од економски аспект. Ако мислите да го наполните буџетот со оданочување на шноли, господин заменик-министер, мислам дека е нереално тоа да се очекува. Со ова ги задоволувате барањата на вашите геостратешки стопани и тоа на директна штета на граѓаните кои ве избрале – рече Исмаил.

The post НАСКОРО ЌЕ ПОЧНЕ ДА СЕ ПЛАЌА ДДВ И НА ПРАТКИТЕ ДО 22 ЕВРА Предлог-законот оди во следната фаза од усвојувањето appeared first on plusinfo.mk.