Жители на Иловица даваат поддршка за реализацијата на проектот за рудник за бакар. Според нив, оваа инвестиција може да го заживее регионот и да помогне во целта младите да имаат добро платени работни места и да останат во југоистокот, односно да се спречи иселувањето. Никола Стаменов, кој е поранешен претседател на Федерацијата на фармери и е дел од локалната иницијатива „И здравје и работа“, за Канал 5 ТВ изјави дека ако се почитуваат светските еколошки стандарди за заштита на животната средина има начин како и државата да постигне финансиски бенефит.

– Ние сме за отворање на рудникот за бакар во Иловица. Имаше неколкумина кои беа противници за отворањето, со напомена дека ќе се загадела животната средина, ќе се загаделе воздухот и подземните води, почвата… Меѓутоа, со најсовремената европска и светска технологија, имаме целосна гаранција дека до тоа нема да дојде – изјави Стаменов како жител на Иловица.

Тој и претходно има истакнато дека поради бесперспективност неговите деца заминале во странство, а во селото останале постарите жители. Во своите јавни излагања, Стаменов апелираше надлежните институции да ги слушнат оние што го поддржуваат отворањето на рудникот и повика да се формира независно мониторинг тело кое ќе го контролира ископот на рудата и дали тоа се врши според пропишаните стандарди.

Како жител на Иловица, Стаменов истакна дека има повеќемина кои сметаат дека покрај можностите за вработување се отвораат и големи можности за економски бенефит и станува збор за инвестиција која ќе донесе пораст на бруто домашниот производ, нова инфраструктура во населените места, а ќе имаат бенефит и општините и регионот и државата.

Од локалната иницијатива „И здравје и работа“ веќе нагласија дека во Македонија дебатата за рударството не треба да се сведе на изборот „или екологија или рударство“.

„Дебатата треба да се води околу тоа дали можеме да имаме рударство кое ги почитува највисоките еколошки стандарди, а истовремено да создава економска вредност за државата и граѓаните. Одговорот треба да го дадат науката, стручната јавност и институциите, а не стравот и политичките поделби“, истакнаа од „И здравје и работа“.

Според иницијативата, критичката јавност е неопходна, но критиката не смее да значи однапред донесен заклучок дека секој рударски проект е опасен.

„Никој не треба од јавноста да бара слепо да верува во кој било рударски проект. Но, исто така, никој не треба да бара од јавноста да верува во обвинувања кои не се поткрепени со стручни анализи и релевантни докази. За секој проект треба да зборуваат фактите, техничката документација, научните проценки и законските процедури“, се додава во соопштението.

Претходно, повеќе домашни експерти нагласија дека во период кога расте на цената на бакарот на светските берзи, капацитетите во Иловица, но и оние од други наоѓалишта на критични минерали, се значајни и за домашната економија. Дел од нив потврдија дека современите технологии овозможуваат безбедна експлоатација на минерали, со контролирани процеси и заштита на природата. Коментирајќи го технолошкиот процес за ископ на бакарна руда во Иловица, тие велат дека таквите технолошки процеси се бенигни и не се деструктивни кон природата.

The post ЖИТЕЛИ НА ИЛОВИЦА ГО ПОДДРЖУВААТ РУДНИКОТ ЗА БАКАР Со почитување на еколошките стандарди сите ќе имаат бенефит appeared first on plusinfo.mk.