Една граѓанска иницијатива реагира дека на избирачките места во општина Центар е забележана сериозна нерегуларност во изборниот материјал – логото на независните кандидати не било испечатено на гласачките ливчиња за градоначалници и советници.

Според нив, на листата за советници недостасувало логото на групата избирачи, како и на листата за градоначалници.

Од иницијативата посочуваат дека тоа е спротивно на членовите 97 став 1 и 98 став 1 од Изборниот законик, со што нивните кандидати биле ставени во нерамноправна положба и им било нарушено еднаквото избирачко право.

„Оваа неправилност е констатирана на целата територија на општина Центар и може да претставува основа за поништување на изборите во оваа општина,“ се вели во нивното соопштение.

Од иницијативата велат дека се обиделе да поднесат приговор преку електронската форма на веб-страницата на Државната изборна комисија (ДИК), но системот во тој момент не бил во функција. Приговорот бил поднесен по електронска пошта и во архивата на ДИК.

Во прилог, тие доставија фотографија од избирачката листа и скриншот од електронската пошта преку која, уште на 11 септември 2025 година, било испратено логото до Општинската изборна комисија (ОИК).

The post ГЛАСАЧКИТЕ ЛИСТОВИ БЕЗ ЛОГОТО НА ЕДНА НЕЗАВИСНА ЛИСТА Изборна нерегуларност во Центар appeared first on plusinfo.mk.

Уште една предизборна анкета ја потврди огромната предност на ВМРО-ДПМНЕ пред СДСМ во пресрет на локалните избори, чиј прв круг е закажан за 19 октомври. По мерењето на предизборното расположение на избирачите во септември, што го објави Институтот за политички истражувања Скопје (ИПИС), сега и анкетата на Маркет вижн, што ја нарача порталот МКД, покажа дека СДСМ на овие избори ќе доживее дебакл.

Тоа и не е вест што некого би изненадила. Она што е поинтересно е што анкетата на Маркет вижн ја навестува клучната причина за очекуваниот пораз на СДСМ – социјалдемократите веќе подолго време се соочуваат со криза на лидерство и резултатот на овие избори тоа недвосмислено ќе го потврди.

Криза на лидерство во СДСМ

Што открива анкетата на Маркет вижн?

На прашањето во кој лидер на политичка партија имате најголема доверба, 25,3% од испитаниците се определиле за Христијан Мицкоски. На прашањето за која партија ќе гласаат на претстојните локални избори, за ВМРО-ДПМНЕ се определиле 22,9% од испитаниците. Ова е очекувана разлика меѓу рејтинзите на партијата и на нејзиниот лидер, бидејќи природно е претседателот да го подига рејтингот на партијата, а не партијата да го „влече“ својот лидер.

Разликата во случајот на СДСМ покажува дека таа партија, сериозно оштетена во последните изборни циклуси, се уште има повисок рејтинг од својот веќе не така нов лидер Венко Филипче – во него доверба имаат само 4,8% од испитаниците, што го прави политичар со значително понизок рејтинг од оној на Али Ахмети (6,3%). Но, СДСМ ужива доверба од 5,9% од испитаниците. Тоа навистина е драстично лош резултат, но сепак значително повисок од резултатот на Филипче. Ова е класичен симптом на многу сериозна криза на лидерство во СДСМ.

Дека Венко Филипче е бледа фигура, со една уште побледа екипа околу него на Бихаќка, сведочи и фактот дека високи 41,9% од испитаниците веруваат дека поранешниот лидер на СДСМ Зоран Заев се уште ги контролира работите во партијата. А и настаните во СДСМ во процесот на кандидирање „тркачи“ за локалните избори потврдија дека Филипче е изгубен, дека поранешниот лидер Зоран Заев се спрема да го пушти низ вода после изборите, а инсталатите на поранешната заменик-претседателка Радмила Шекеринска се обидуваат да формираат нова политичка партија и да му зададат уште еден удар на СДСМ.

Поинаку кажано, во овој момент во СДСМ не се знае кој јаде и кој пие, единствено се знае кој плаќа. А после изборите, тој што плаќа, веројатно ќе ја испостави својата фактура до Бихаќка …

Таргети за спасување на честа

Една коректна анализа на актуелните состојби во некогаш моќниот СДСМ, во контекст на локалните избори, сепак мора да почне од објективна процена за тоа што можеа да сторат Филипче и неговиот тим, за да дојдат до резултат за кој би можело да се рече дека означува крај на кризата во партијата и почеток на обновата.

На овие локални избори СДСМ не се бори за победа, бидејќи нема човек што не знае дека тоа е невозможна мисија. На овие избори СДСМ се бори – или, попрецизно кажано, би требало да се бори – за спасување на честа. Само скор од освоени градоначалнички мандати во три клучни единици на локалната самоуправа, би можел да се протолкува како „спасена чест“: на партијата ѝ се потребни победи во општините Центар и Струмица и во Град Скопје. Би можело кон овие таргети да се придодаде и скопски Карпош, но тоа веќе би било преголемо очекување од овој СДСМ, а и приказната во оваа општина е нетипична.

Зошто се пресудни токму овие три таргети?

Ако СДСМ изгуби во Струмица на Заеви, ќе стане јасно дека ова раководство, со лидер под целосна контрола на Зоран Заев, е тотално неспособно за каква било изборна битка. Ако СДСМ ја изгуби градоначалничката фотелја во скопската општина Центар што ја држеше во изминатиот мандат (Горан Герасимовски), тоа ќе значи дека партијата е за никаде, а Филипче ќе треба дефинитивно да се пресели во Струмица, во Дубаи или на јахтата на Халкидики (ако го примат). Конечно, после еден катастрофален мандат на скопската градоначалничка Данела Арсовска, донесена на власт од ВМРО-ДПМНЕ, дури и осакатениот СДСМ можеше да се потруди со квалитетен кандидат и со добра кампања да покаже дека се враќа на сцената.

Две предадени борби

Но, како што сега стојат работите – а тие нема да се променат до изборите – две од трите добри битки за СДСМ веќе се изгубени.

Првата е онаа во Струмица. Иако има некои пикантни приказни, коректно е да се каже дека во јавно нерасветлени околности, СДСМ се откажа од Костадин Костадинов и за свој тркач избра друг партиски кадар. Неочекувано, стана извесно дека ВМРО-ДПМНЕ ќе ја добие градоначалничката фотелја во главниот град на Заеви полесно отколку што се очекуваше. Би се осмелиле да предвидиме дека и тој грев, меѓу другите, на Филипче нема да му биде простен…

Сепак, многу поинтересно е зошто Венко Филипче толку лесно ја предаде битката за градоначалник на Скопје. Според информации на Плусинфо добиени од партиски извори, во периодот кога СДСМ го токмеше и срамежливо го промовираше професорот Мишко Ралев за свој градоначалнички кандидат, Венко Филипче водел тајни разговори и со Билјана Ивановска, поранешната претседателка на Државната комисија за спречување на корупцијата (ДКСК), таа да биде кандидат за градоначалник за Скопје. И на крајот, конечниот избор неочекувано падна на – Каја Шукова.

Мала е веројатноста дека со Ралев или со Ивановска СДСМ би победил, но борбата со „булдожерот“ на ВМРО-ДПМНЕ Орце Ѓорѓиевски бездруго би била порамноправна. Ралев, на пример, сигурно би можел да демонстрира завидна експертиза во дебатите, а Ивановска можеби би успеала да го возбуди контингентот разочарани сдсмовски гласачи. Вака, Орце Ѓорѓиевски ќе се прошета на изборите, а ако излезноста биде висока (Маркет вижн предвидува 64,4%), тој ќе победи уште во првиот круг.

Но, зошто Филипче ја „анкетирал“ Билјана Ивановска? Освен што е познато дека тие двајцата имаат и персонални релации, злобниците шпекулираат дека како претседателка на ДКСК, Ивановска во фиока чувала неколку компромитирачки предмети за Филипче. Немаме потврда дека тоа е точно, но можеби и таа тема ќе се отвори во кампањата.

Кога се будат диносаурусите …

Како што е познато, на крајот, приказната со Билјана Ивановска завршува со договор таа да се појави како независен кандидат за Центар, поддржана од инсталатите на Радмила Шекеринска. Но, можеби не само од нив, можеби се разбудени и некои други „диносауруси“ во СДСМ. Повеќе интереси наводно се склопиле околу овој план. Структурите на Радмила Шекеринска наводно биле незадоволни од Горан Герасимовски. Незадоволни биле и кадрите во СДСМ со бекграунд од Соросовата фондација, на чело со Фани Каранфиловска. Сепак, не е сосема јасно зошто Венко Филипче би влегол во една ваква „трипер комбинација“ да ги подрива позициите на партискиот кандидат Герасимовски за сметка на „независната“ Ивановска.

Покрај околностите кои веќе ги спомнавме, дознаваме дека на Венко Филипче во меѓувреме му влегла во уши и една друга приказна: ако Герасимовски победи во Центар – а тоа би била единствената победа на СДСМ на овие избори вредна за фалење – тој ќе го пикира лидерското место во партијата. Велат дека Филипче се плашел од таа помисла, па дури и од фактот што Герасимовски го набилдал тимот поддржувачи околу себе. И да се разбереме – тој страв е реален. Освен како приврзок на Заев, Венко Филипче зад себе нема ниту една своја изборна победа. Евентуалната втора победа на Герасимовски по ред дефинитивно ќе го зајакне неговиот кредибилитет во СДСМ и веројатно многумина ќе го видат во улогата на нов лидер на партијата, на местото на изгубениот случај Филипче.

Да биде галиматијасот комплетен, се чини дека во овие мешетарења, меѓусебни одмерувања на силите и фемкања, Венко Филипче и инсталатите на Радмила Шекеринска во ликот на структури самонаречени „независни“ (а се отепаа и не успеаја да формираат политичка партија), изгоре уште еден „независен“ кандидат, за кого велат дека во други околности би можел да пружи многу повеќе. Тоа е Горан Марковски, декан на Градежниот факултет во Скопје. Во едно од неговите први јавни појавувања, „независните“, научени на оние инфантилни „герила акции“ од времето на Шарената револуција, го натераа професорот Марковски да се појави пред камерите со маска на диносаурус преку главата. Кој знае што го чека кутриот декан до крајот на кампањата…

Ќе му каже и другарчето од јахтата

Многу сегашни и бивши членови и симпатизери на СДСМ се исчудуваат како може луѓето од актуелното партиско раководство да бидат толку неспособни или оптоварени со некои свои лични комбинаторики, планови и фрустрации. Не е јасно зошто е предизвикана оваа ситуација никој, па ни кандидатите на таа партија, да не знаат кого всушност поддржува СДСМ.

Освен една „трипер комбинација“ во Карпош, каде СДСМ се надева на Стевчо Јакимовски во вториот круг против Сотир Лукровски од ВМРО-ДПМНЕ (докторката Маја Мојсовска веќе е пуштена низ вода), не се потонати шансите на Герасимовски за победа во Центар. Но, цената на збрката е превисока. Рапидно растат шансите на кандидатот на ЗНАМ за Центар, Мирослав Лабудовиќ.

Како и да е, трката за Центар, во која во вториот круг најверојатно ќе се соочат Герасимовски и Лабудовиќ, ќе покаже уште една битна работа – дека раководството на СДСМ на чело со Венко Филипче, со сите свои мешетарења и калкулации, веројатно веќе ја пропушти шансата да победи во Центар. Да не бидеме погрешно разбрани: дури и победа на Герасимовски ќе значи пораз на Венко Филипче.

Филипче губи во секој случај. Најмалку што можеше тој да стори на овие избори беше да ги обедини осакатеното членство и разочараните симпатизери околу партиските кандидати, а не да мешетари и да мисли само на својата фотелја. Ионака после поразот ќе мора да ја напушти. А тоа ќе му го каже и другарчето од јахтата …

The post ФИЛИПЧЕ ГИ ПРЕДАДЕ БИТКИТЕ ЗА СТРУМИЦА И ЗА СКОПЈЕ, ГЕРАСИМОВСКИ СЕ БОРИ ЗА ЦЕНТАР Ќе ги пропушти ли СДСМ сите шанси да си ја спаси барем честа на овие избори? appeared first on plusinfo.mk.

Нема никакви правни пречки независните кандидати кои кандидатурите ги поткрепија со најмалку 2 потписа од граѓаните да учествуваат на претстојните локални избори. Уставниот суд денеска не поведе постапка по двете иницијативи за оценување на уставноста и законитоста на правилникот на ДИК.

Тоа значи дека правилникот што го донесе ДИК според кој може да се поднесат кандидатури за градоначалници и советнички листи со најмалку два потписа е во согласност со Уствот и со Изборниот законик.

Од судот објаснуваат дека не се прифатени наводите на подносителите кои сметаа дека со донесувањето на правилникот Државната изборна комисија се ставила во улога на законодавец.

Подносители на иницијативата до Уставниот суд се Здружението „Светски македонски конгрес“ од Скопје застапувано од претседателот Тодор Петров и Стевче Стојанов.

ДИК го донесе правилникот за да ја пополни правната празника откако Уставниот суд го укина членот од Изборниот законик  со кој се утврдуваше праг од 1 отсто за собрани потписи за кандидатура, а Собранието не успеа да донесе нова норма.

НЕЗАВИСНИТЕ КАНДИДАТИ ВИСАТ НА КОНЕЦ Како ќе им „пресуди“ Уставниот суд?

The post КАНДИДАТУРИТЕ ЗА ГРАДОНАЧАЛНИЦИ СО САМО 2 ПОТПИСА СЕ УСТАВНИ И ЗАКОНСКИ Уставниот суд не поведе постапка против правилникот на ДИК appeared first on plusinfo.mk.

Граѓанските иницијативи „Шанса за Центар“,  „Зелените за Гази Баба“ и „Групацијата 389“ се соочуваат со сериозни предизвици во собирањето потписи за формирање на политичката партија „Независни заедно“.

Иако според Законот им се потребни 1.000 потписи од граѓани, досега успеале да обезбедат околу 800, што значи дека им недостигаат речиси 200 за да го постигнат условот.

– Искрено, потешко оди отколку што очекувавме, но не се откажуваме. Сакаме да ја изградиме оваа приказна и без разлика дали тоа ќе биде во рокот до 13 септември или подоцна, политичката партија „Независни заедно“ ќе стане реалност – ни изјави Јана Белчева од иницијативата „Шанса за Центар“.

Таа додава дека рокот за поднесување независни кандидатури истекол вчера, но дека нивните кандидати за локалните избори во октомври веќе се пријавени и ќе се најдат на изборните листи.

– Дури и да не стигнеме на време со потписите за формирање партија, тоа ништо не менува. И не би сакала преку медиуми да шпекулирам што би било кога би било. Процесот ќе продолжи, колку и да трае – вели Белчева.

„Независните“ веќе го промовираа својот кандидат за градоначалник на Град Скопје, тоа е деканот на Градежниот факултет, Горан Марковски. Во трката за градоначалник на општина Центар, пак, ќе се вклучи поранешната претседателка на Антикорупциска комисија, Билјана Ивановска.

Првиот круг од локалните избори е закажан за 19 октомври, а вториот за 2 ноември.

The post ГРАЃАНСКИТЕ ИНИЦИЈАТИВИ ЗАГЛАВИЈА СО ПОТПИСИТЕ Недостигаат околу 200 потписи за „Независни заедно“ да стане партија appeared first on plusinfo.mk.

Кој ќе ја освои „црешата на тортата“ на претстојните локални избори – градоначалничката функција во Град Скопје? Досега има шест официјално номинирани кандидати – шестмина од политичките партии и еден независен кандидат. Се очекуваат уште кандидатури, пред сè од независни граѓански иницијативи, затоа што според упатството на Државната изборна комисија (ДИК), кандидатура за градоначалник и советника листа може да се поднесе со собрани два потписи од граѓани.

Владејачката ВМРО-ДПМНЕ за кандидат за градски татко на Скопје го номинираше актуелниот градоначалник на Кисела Вода и претседател на ЗЕЛС, Орце Ѓорѓиевски.

Опозицискиот СДСМ ја кандидираше потпретседателката на партијата Каја Шукова, која е поранешна министерка за животна средина и просторно планирање.

Опозициската Левица „ќе се трка“ со кандидатот Амар Мециновиќ, кој е пратеник во Собранието.

Коалицискиот партнер во Владата, коалицијата на партии на Албанците – Вреди, за градоначалник на Скопје го кандидираше Башким Бакиу, кој во моментов ја извршува функцијата директор на Дирекцијата за општи услуги во Универзитетскиот клинички центар во Скопје.

Опозициската коалиција на албанските партии, Европски фронт, пак, во Скопје ќе настапи со Скендер Реџепи Зејд, кој е пратеник во Собранието и лидер на партијата Народното движење.

Најнова е кандидатурата на професорот Горан Марковски, декан на Градежниот факултет при УКИМ, која е поддржана од граѓанската платформа „Независни заедно“, во која се обединети граѓански иницијативи од три скопски општини – „Шанса за Центар“, „Зелените за Гази Баба“ и „Групација 389“.

Кандидатурата ја потврди за медиумите и Александар Рашковиќ, професор по дизајн на Европскиот универзитет, кој ќе настапи како независен кандидат поддржан од партијата ТМРО.

Освен овие седум кандидати, до крајниот рок за поднесување на кандидатурите се очекуваат уште номинации. Граѓанската иницијатива „Зелен хуман град“ најави дека ќе има своја кандидатка за Град Скопје, но во последен момент ја откажа промоцијата, затоа што кандидатката се откажала поради здравствени причини. Не е познато која беше кандидатката и не е познато дали оваа иницијатива ќе номинира друг кандидат.

Крајниот рок за поднесување на листите на кандидати, според роковникот на ДИК е 13 септември на полноќ.

Првиот круг од локалните избори ќе се одржат на 19 октомври, во ден недела, во кој ќе се изберат членовите на локалните совети, како и градоначалниците кои ќе го освојат потребното мнозинство.

Во вториот круг, кој ќе се одржи на 2 ноември, ќе се бираат градоначалници во оние општините каде ќе нема победник во првиот круг.

За победа во првиот круг од локалните избори потребно е најмалку една третина од регистрираните гласачи да излезат на гласање во конкретната општина и еден од кандидатите да освои мнозинство гласови.

Според Изборниот законик победник е оној кој ќе добие мнозинство гласови од избирачите што излегле на гласање, но излезноста е најмалку една третина од вкупниот број регистрирани гласачи во Избирачкиот список за соодветната општина. Доколку во првиот круг не излезат една третина од вкупниот број гласачи, се повторува целата изборна постапка за соодветната општина.

Ако ниту еден од кандидатите нема мнозинство гласови, тогаш вториот круг се одржува во рок од 14 дена, а учествуваат двајцата кандидати кои имале најмногу гласови во првиот круг. Победник е кандидатот што освоил повеќе гласови.

Изборот на советници се затвора во првиот круг, а нивната распореденост се пресметува според Донтоновата формула.

The post ДОСЕГА СЕДУММИНА КАНДИДАТИ ЗА ГРАДОНАЧАЛНИК НА СКОПЈЕ Шестмина се партиски, еден е независен appeared first on plusinfo.mk.

Премиерот Христијан Мицкоски реагираше на критиките кои се појавија по најновата одлука на Државната изборна комисија (ДИК) – независните кандидати за градоначалници и советници да можат да се појават на гласачкото ливче со само два потписа.

– Не знам што треба да направиме за некои луѓе конечно да бидат задоволни. Кога имаше бројка, не им чинеше. Сега има само два потписа, пак не им е доволно. Како и да го свртиш, крај не им се фаќа – изјави Мицкоски.

Премиерот потсети дека оваа измена не е произволна одлука на Владата, туку резултат на уставна обврска.

– Ова е реакција на одлука на Уставниот суд. Тоа се институционални процеси, а не политички трикови – додаде тој.

Одлуката на ДИК доаѓа откако Уставниот суд поништи делови од Изборниот законик кои бараа високи прагови за поддршка на независни листи.

Според новите правила, доволни се два потписа – што значително ја олеснува кандидатурата за оние без партиска поддршка.

Но, токму тоа отвори лавина реакции – некои аналитичари предупредуваат на можен хаос на гласачките ливчиња, со огромен број „лажни“ кандидати, кои би можеле да ги збунат гласачите.

Мицкоски, сепак, смета дека целата врева е политички мотивирана.

– ДУИ е во опозиција по 20 години и тешко го поднесува тоа. Се обидуваат со трикови и инсинуации да направат притисок и повторно да станат дел од власта – рече премиерот, додавајќи дека Владата останува фокусирана на реформите, а не на политичките калкулации.

The post „ШТО И ДА НАПРАВИШ ЌЕ ТИ НАЈДАТ МААНА“ Мицкоски во одбрана на одлуката на ДИК appeared first on plusinfo.mk.

Само два потписа ќе бидат доволни за независните кандидати да влезат во изборната трка за октомвриските локални избори – решение што на хартија изгледа демократско, но во пракса отвора сериозни проблеми.

Правните експерти предупредуваат на три големи ризици: поплава oд кандидати без сериозна намера, злоупотреба со слични или позајмени имиња на кандидати кои ќе ги збунат гласачите, како и километарски долги гласачки ливчиња.

Одлуката ја донесе Државната изборна комисија (ДИК) на синоќешната седница со шест гласа „за“ и еден „против“. Таа е привремено решение, поради тоа што во мај Уставниот суд укина одредби од Изборниот законик со кои се регулираше бројот на потребни потписи.

Три големи проблеми

Досегашниот модел бараше најмалку 1% потписи од избирачите во конкретната општина или во Град Скопје. Тогаш граѓанските иницијативи се жалеа дека условот е претежок. Но сега, по укинувањето на членот, дојде спротивната крајност – двајца луѓе се доволни за кандидатура.

– Ова е премин од една екстрема во друга. Од премногу висок праг, до речиси никаква бариера – велат упатените.

Првата последица е повеќе од очигледна: секој што сака ќе може да се најде на гласачкото ливче. Ако порано беше тешко да се обезбедат стотици потписи, сега доволни се двајца пријатели или соседи. Тоа носи ризик од преплавување на изборите со имиња кои немаат ниту програма ниту сериозна намера да работат во интерес на граѓаните.

Вториот проблем е уште позагрижувачки. Историјата на избори во земјава веќе покажа дека постои пракса на поднесување кандидатури со слични имиња на познати политичари – таканаречени „лажни двојници“. Со новиот праг од два потписа, ваквите злоупотреби може да станат секојдневие.

Третиот проблем е чисто технички. Ако се пријават стотици кандидати, гласачките ливчиња ќе бидат километарски долги. Наместо да избираат со леснотија, гласачите ќе се соочат со хаос, забуни и грешки при заокружувањето.

Масло на ДУИ

Пратеникот Антонио Милошоски од редовите на ВМРО-ДПМНЕ смета дека вистинската цел на оваа промена е да се создаваат изборни компликации.

Не би ме чудело доколку биде ангажирана и специјална партиска логистика која ќе има задача да предизвика хиперинфлација на кандидати за советници и за градоначалници.

Антонио Милошоски Пратеник, ВМРО-ДПМНЕ

– Ова е масло на ДУИ. Целта е се внесе несигурност и да се предизвика политичка криза. Партијата на Али Ахмети очигледно решила да создава изборни компликации. Не би ме чудело доколку биде ангажирана и специјална партиска логистика која ќе има задача да предизвика хиперинфлација на кандидати за советници и за градоначалници – истакна Милошоски.

На тој начин, додава тој, планираат да ја отежнат работата на Државната изборна комисија (ДИК), како и да се искомплицира работата на медиумите затоа што секој кандидат ќе треба да добие подеднакво медиумско внимание како и останатите.

– Плус, ќе се изврши и удар врз буџетот затоа што секој освоен глас на независен кандидат на изборите се плаќа 45 денари. Во секој случај, нѐ очекува бурен и тензичен период – предвидува Милошоски.

Актерката Софија Куновска, поранешна претседателка на Градската организација на СДСМ, во разговор за Плусинфо вели дека таа лично е силен поборник на автентичниот граѓански активизам како алтернатива на рововскиот инает на големите партии кои сѐ уште соодветно не ја вреднуваат пораката на гласачите дека нивните погубни политики се прочитани и затоа сѐ помалку луѓе им веруваат.

– Сепак, морам да истакнам дека предолгото тактизирање со затворањето на уставно-правната празнина ми мириса на тактика кроена во штабовите на ВМРО-ДПМНЕ и на СДСМ, кои сега ќе стимулираат „независни“ кандидати по нивен терк, со калкулација да му наштетат на политичкиот противник. Стравувам дека оваа состојба се креира со цел да се девалвира опцијата на граѓански кандидати за градоначалници и советници. Претстои тешка борба за разобличување на триковите на „големите“ партии кои се многу инвентивни кога се работи за нивните интереси. Мислам дека демократската битка започнува, но не завршува со локалните избори – вели Куновска.

На локалните избори во 2021 година за независни гласаа 56.000 граѓани, со што внесоа свои независни претставници во 33 општини и во Градот Скопје.

Нѐ очекува хаотичен изборен период

Разумно ми звучеше 0,5% како праг за независните кандидатури за советнички листи и вистинска штета е што не се изгласа, па сега ризикуваме тотален хаос и отворање на можноста некој кој би сакал да го претвори изборниот процес во тотален дебакл и на пример да ја обвини власта за истото, може да организира 100-200 независни кандидатури во повеќе општини каде има за цел да го руши процесот, а за нив да му требаат 200-400 потписи, ни изјави новинарот и ТВ-водител Богдан Илиевски-Бетмен Велит.

Кому не би му одговарало да има хаотични избори со по 50 кандидатски листи во некоја општина? На оној кој според анкетите очекува сигурна победа, или на оној кој според анкетите оди во амбис и во политичка пензија?

Богдан Илиевски ТВ-водител

– Друго прашање е што концептот на „независни“ советнички листи ми е малку неразбирлив, имајќи предвид дека не постои такво нешто. Секој „независен советник“ за да ги спроведува точките од својата програма треба да соработува со политичките партии, односно да зависи од поддршката на поголемите партии. Независен може да биде некој кандидат за градоначалник, кој од бизнис секторот на пример влегува во политика, но по изборот и неговата работа стриктно ќе зависи од политичките партии и преговорите со нив. И трето, добар дел од т.н. независни советнички листи, како онаа на Поинаку во Битола, функционираат како политичка структура, со организација, со хиерархија, со сите одлики на една партија. Не гледам причина зошто не би се формирале како партија, освен ако целта не е друга, да симулираат „независност“, за да откинуваат гласови кои би завршиле во власта, со популистичка реторика – знаејќи дека никогаш нема да имаат целосна „контрола“ над советот на општината. А инаку би биле гласови кои поинаку не би завршиле директно на контото на СДСМ. Не зборувам само за Битола, туку за секаде – објсанува Илиевски.

Но, ете, продолжува тој, состојбата во моментов е таква да нѐ очекува потенцијално многу хаотичен изборен период во кој сметам дека би било коректно кон граѓаните т.н. независни листи кои функционираат поорганизирано да се формираат како партии, па така да излезат на мегдан и со понуда пред граѓаните.

– А имајќи ја предвид негативната селекција децении наназад во дел од претставничките тела (совети, собрание) не би ме чудело во секое маало да има по двајца кандидати за советници кои, гледајќи кој ги претставува, си велат – „еј, па и јас можам да бидам функционер“. И веројатно се во право, по тој критериум. И не заборавајте, кога размислувате како дојдовме дотука, да се има предвид следното – кому не би му одговарало да има хаотични избори со по 50 кандидатски листи во некоја општина? На оној кој според анкетите очекува сигурна победа, или на оној кој според анкетите оди во амбис и во политичка пензија? – прашува Илиевски.

Што мислат партиите?

Од СДСМ велат дека им е криво поради тоа што се пропуштила шансата за прифатлива фер рамка.

– Се ризикува изборите да се претворат во хаос. Мора многу внимателно да се разгледаат сите правни аспекти. Жалиме што се пропушти шансата да се стави рамка која беше добра и прифатлива за сите – изјави Богданка Кузеска, портпаролка на СДСМ.

Од ВМРО-ДПМНЕ велат направиле сѐ што можеле да направат, но ДУИ решиле да го блокираат процесот.

Стравувам дека оваа состојба се креира со цел да се девалвира опцијата на граѓански кандидати за градоначалници и советници.

Софија Куновска Поранешна претседателка на Градската организација на СДСМ

„Во однос на правните нерегуларности поднесовме предлог измени на изборниот законик, за намалување на прагот од 0,95% кој потоа беше дополнително намален за 0,5% и прифатен од наша страна и од коалицијата. Но, проблемот е во тоа што ДУИ е исплашена од пораз на следните избори и од страв не ги поддржа измените на изборниот законик“, велат од ВМРО-ДПМНЕ.

Од ДУИ, пак, се повикуваат на одредбата на Уставниот суд во делот на резидентното и неразидентното население поради што не ги поддржаа измените, укажувајќи дека без нивните гласови не може да поминат одлуки со двојното мнозинство, односно според Бадентеровиот принцип.

Предлогот за намалување на прагот беше дочекан на нож од страна на независните кандидати.

„Пратениците повторно одлучуваат во име на независните кандидати без да ги земат предвид нашите барања. Новиот противуставен предлог повторно се сервира иако пред повеќе од два месеца до сите пратеници доставивме информации за бројот на потребни потписи во други европски земји, а им ги доставивме и меѓународните препораки за добри практики иако тоа се информации што веќе тие самите би требало да ги имаат“, велат од Зелен хуман град.

The post ЛАЖНИ ДВОЈНИЦИ ЌЕ ГИ ЗБУНУВААТ ГЛАСАЧИТЕ НА ЛОКАЛНИТЕ ИЗБОРИ Се заканува ли девалвација на кандидатските листи? appeared first on plusinfo.mk.

За изборните единици во дијаспората, пак, останува јасно дефиниран праг – најмалку 1.000 потписи пред службени лица на дипломатско-конзуларните претставништва или конзуларните канцеларии, на образец пропишан од Државната изборна комисија (ДИК).

Предложените измени опфаќаат и нови дефиниции за интернет порталите согласно Законот за медиуми, како и усогласувања со Законот за организација и работа на органите на државната управа.

Според групата пратеници кои стојат зад иницијативата, целта е да се обезбеди транспарентен и фер изборен процес, да се надминат досегашните недоследности и да се зајакне правната рамка.

Измените доаѓаат откако ДИК ја стави вон сила сопствената упатство од 2024 година за собирање потписи, поради одлука на Уставниот суд со која се укинаа членови 61 и 62 од Изборниот законик.

The post ОД 1% НАМАЛЕНО НА 0,95% СОБРАНИ ПОТПИСИ Намален прагот за независните кандидати, утре ќе се гласаат измените appeared first on plusinfo.mk.

Претседателот на Државната изборна комисија (ДИК), Борис Кондарко вечерва истакна дека е потребен нов Изборен законик и оти тоа е крајна одлука на Собранието и политичките партии.

– Од 2006 година па навака, 19 години повеќе од 30 пати се направени измени и дополнувања на Законот. Најголем проблем со кој се соочуваме е всушност самиот закон. Нас ни треба навремено донесен еден комплетно нов Изборен законик, каде што сите чинители во изборниот процес ќе партиципираат и ќе дадат свои предлози, искуства, интерактивна дискусија со стручната јавност. Се разбира крајната одлука е на Собранието, на политичките партии, тоа е нивна одговорност. Знаеме дека Изборниот законик се носи со поширок политички консензус и тоа така треба да биде заради довербата во процесот – рече Кондарко во вечерашното гостување на „Тема на денот“ на Телевизија Сител.

Потенцира дека жали што Собранието не ги усвои измените на Изборниот законик кои, како што рече, ќе помогнеа во интерес на олеснување на работата на ДИК.

– Мене многу ми е жал што не се усвоија тие измени кои беа предложени речиси од сите пратенички групи во Собранието. Тие ќе помогнеа не само за оваа прашање, туку и за многу други прашања кои се во интерес на процесот и во интерес на олеснување на работата на ДИК, значи за технички работи. Не се работи за никакви политички прашања што ќе ја подобреа и олеснеа работата на ДИК – рече тој.

Кондарко нагласи дека независните кандидати ќе можат да учествуваат на локалните избори без собирање на потписи.

– Ние во неколку наврати уште на денот на распишување на избори, на јавна седница многу прецизно и недвосмислено ја информиравме јавноста што е во интерес на изборниот процес на навремено информирање на сите потенцијални учесници дека група избирачи ќе можат да учествуваат на изборите со поднесување на свои листи без собирање на потписи. Бидејќи Уставниот суд ги укина одредбите од законот за бројот на потребни потписи, меѓутоа правото предвидено во законот постои. Тоа никој не може да го оспори, ниту ДИК може да одлучува во врска со тоа, едноставно директно го применува законот. Правото е неспорно и ние сме сепак сериозен изборен орган кој држи до тоа што ќе соопшти во јавноста. Она што го кажавме, тоа и ќе го спроведеме. ДИК ја гарантира целосно применета на законот подеднакво за сите учесници во изборите, тоа е политички партии, коалиции, група избирачи. Сите имаат еднакви услови и критериуми. Има и други видови на услови со кои оние што сакаат да учествуваат се должни да бидат запознаени. ДИК ќе ги објави навреме. Планираме уште во текот на оваа недела на јавна седница, со оглед на новонастанатата ситуација, бидејќи во меѓувреме во Собранието не се изгласаа измените на Изборниот законик, нашиот постојан правилник за поднесување на кандидатски листи каде што се утврдени сите видови услови за кандидирање да го прецизираме, односно да го дополниме во смисла на директна примена на член 60 од Изборниот закон. Независните кандидати можат да учествуваат на изборите без собирање потписи – рече Кондарко.

Претседателот на ДИК истакна дека Правилник за собирање на потписи е еден вид на акт, а Упатството за поднесување на кандидатски листи е сосема друг вид на подзаконски акт.

– Правилникот за собирање на потписи, ние го ставивме вон сила, односно го укинавме бидејќи одредбите 61 и 62 се укинати од Уставениот суд. Кога не постои законски основ, не може да постои ниту подзаконска одредба, не може да постои ниту подзаконски акт. Затоа е укинат тој правилник. Меѓутоа, Правилник за собирање на потписи е еден вид на акт, а Упатство за поднесување на кандидатски листи е сосема друг вид на подзаконски акт. Во случајов Упатството за поднесување на кандидатски листи постои, само тоа ќе биде прецизирано во смисла на директна примена на член 60. ДИК не е законодавец, со Упатството не воспоставува ново право, не одзема ново право, не го  менува законот, не го толкува законот. ДИК има законска обврска да го примени правото дадено во законот, тоа и ќе го сториме – рече тој.

Кондарко изјави дека согласно одредбите од Изборниот законик, нема предвремена кампања затоа што, како што рече, се уште нема поднесено листи на кандидати, нема учесници во изборната кампања и нема потврдени листи на кандидати.

– Постојано се отвора прашање дали евентуално има таканаречена предвремена кампања. Согласно одредбите од член 69а од Изборниот законик предвремена кампања нема затоа што се уште нема поднесено листи на кандидати, нема учесници во изборната кампања и нема потврдени листи на кандидати. Нема основ против кој да се води некоја постапка. Согласно Изборниот законик, ДИК по службена должност не ја следи изборната кампања. Единствено може да реагира по приговор од учесник во изборна кампања. Ние се уште немаме учесници во изборна кампања и потврдени листи. Не знаеме кој ќе конкурира на изборите и на кој ќе му бидат потврдени листите, ако ги исполнува условите. Рокот за поднесување на листи е 35 дена пред избори, а изборната кампања почнува 20 дена пред избори. Во овој меѓупериод согласно законот, сите учесници дури имаат право да организираат по еден јавен настан за промоција на свои веќе  потврдени листи на кандидати. Предметот на заштита единствено во Изборниот законик е трошењето на државни пари, за што се надлежни да водат контрола ДКСК и ДЗР. Таму не смеат пред почетокот на кампањата, учесниците кои отвораат посебна трансакциска сметка, да трошат од тие пари и тоа е предметот на заштита – посочи Кондарко.

Во однос на Избирачкиот закон, потенцира дека ДИК го ажурира Избирачкиот список редовно четири пати годишно.

– Тој е поставен на веб-страната на ДИК. Граѓаните можат онлајн непрекинато да си ги проверуваат своите податоци. Согласно закон, податоците за Избирачки список ги доставува МВР, бидејќи таа е единствена институција во државата која го поседува регистарот на население. Откако ќе ги добиеме овие податоци, по член 43 од законот тие понатаму се обработуваат од Државниот завод за статистика. Што значи, дека избирачкиот список поминува низ повеќе институции, еден филтер на проверка. Досега не сме имале никакви проблеми со избирачкиот список. Јавниот увид ќе започне 15 дена по распишувањето на избори и ќе трае 20 дена во сите подрачни одделенија и канцеларии – прцизира Кондарко.

Околу уредите за отпечаток на прст нагласи дека откако се воведени немале никакви проблеми во функционирањето.

– И во минатите изборни циклуси откако е воведен фингер принтот во 2021 година немаше никакви проблеми во функционирањето со уредите. Ние имаме ангажирано експертска група од ИТ лица, професори, ИТ лица кои работат од МВР кои на денот на изборите и на денот на доставувањето на резултатите се грижат за одржувањето и безбедноста на системот. Ги проверуваме, ги тестираме ИТ уредите. Во наредниот период ќе се избере комплетно нов состав на избирачките одбори. Ги тестираме батериите за секој случај, сукцесивно како потрошен материјал. Ќе обезбедиме целосна функционална примена – истакна Кондарко.

Тој потенцира дека брзината на објавувањето на резултатите ќе зависи од брзината на составувањето на записниците во избирачките одбори. Се надева да нема да има никаков проблем со објавувањето на резултатите.

The post ПОВЕЌЕ ОД 30 ИЗМЕНИ ЗА 19 ГОДИНИ Кондарко бара целосно нов Изборен законик appeared first on plusinfo.mk.

Претседателот на Собранието, Африм Гаши смета дека Собранието треба да го измени Изборниот законик на начин што ниту еден граѓанин, група избирачи или независен кандидат за градоначалник или за советник нема да биде незадоволен и ќе нема чувство дека постапката за кандидирање е нефер. Тој на денешниот брифинг со новинарите истакна дека очекува пратениците да ги донесат законските измени, но штом независните кандидати и невладините организации не се согласуваат со предложеното решение, рече дека има можност предлогот да се повлече и да се усогласи нов. За да не настане хаос со кандидирањето на претсојните локални избори, можно е Собранието да оди и со автентилно толкување.

Правниот вакуум во Изборниот законик настана откако Уставниот суд на 20 мај ги укина членовите 17 и 18, со кои беше кренат прагот за собирање потписи за независните кандидати и листи што планираат да учествуваат на избори. Овие членови предвидуваа дека за кандидатура се потребни потписи од 1 отсто од вкупниот број гласачи запишани во конкретната изборна единица, ако станува збор за парламентарни избори или од конкретната општина, ако станува збор за локални избори. Пред овие измени, беа доволно 1.000 потписи за некој независен кандидат да се најде на избирачкото ливче. По укинуваката одлука на Уставниот суд пратениците се согласија независните кандидати за влез во изборната трка да мора да соберат најмалку 100 и најмногу 3.500 потписи во зависност од бројот на избирачи. Невладините организации, пак, предложија праг од 50 потписи и ја повикаа претседателката Гордана Сиљановска Давкова да не го потпише указот на законските измени, ако бидат изгласани во Собранието. Тие сметаат дека најновото решение не е во духот со препораките на уставните судии.

Но, законските измени заглавија. Општиот претрес заврши и се чека предлогот да буде ставен на гласање на пленарна седница, но засега нема Бадентерово мнозинство.

Доколку не се утврди колку потписи се потребни за кандидатура, можно е да настане хаос со кандидирањето, затоа што според сегашната состојба во законот, независните имаат право да учествуваат, но не се знае со колку потписи, па се создава можност некој да се кандидира и со потпис од само еден граѓанин, па дури и без потписи.

– Јасно е дека ова е комплексно прашање, не очекувајте од мене концизен одговор, не зависи од мене. По одлуката на Уставен суд, пратениките групи во Собранието разговарале за тие препораки и изготвиле ново решение. Јас се видов со преттсавниците на невладините организации и со независните советници, кои не се согласуваат со новото репение. Ова им го посочив на координаторите на пратениките групи, но, тие сметаат дека новото решение е во согласност со препораките на Уставнуот суд – рече претседателот на Собранието.

Ако не се донесат измените на Изборниот законик, додаде Гаши, ќе бидеме во некој правен вакуум.

– Ќе треба да се прави некаква интерпретација, за да одредиме што ќе правиме. Јас ќе настојувам на следната координација да го вратам ова прашање, да најдеме решение кое ќе биде на задоволството на сите. Можно е да одиме и на автентчино толкување. Но, јас би сакал да имаме законско решение. За тоа ќе треба да имаме мнозинство и мал Бадентер. Се очекува овој закон да се донесе. Ако не се донесе, има опција и да се повлече и да се седне да се разговара, за сите страни да се задоволни. Јас би сакал да одиме на локални избори без никакви примедби од кој било граѓанин или група, за никој да не се чусввува дека битката за совеник или градоначалник е нефер – рече Гаши.

НЕ СЕ ЗНАЕ КОЛКУ ПОТПИСИ ТРЕБА ДА СОБЕРАТ НЕЗАВИСНИТЕ КАНДИДАТИ ЗА ИЗБОРИ По укинувањето на прагот од 1% Собранието треба да го дополни Изборниот законик

The post НЕЗАВИСНИТЕ КАНДИДАТИ ЌЕ СЕ НАЈДАТ НА ГЛАСАЧКО ЛИВЧЕ И БЕЗ ПОТПИСИ АКО НЕ СЕ ИЗМЕНИ ИЗБОРНИОТ ЗАКОНИК?! Гаши очекува да се утврди прагот за собрани потписи на задоволство на сите appeared first on plusinfo.mk.