Ѕвездата на Баерн Минхен и германскиот репрезентативец Џамал Мусиала ги смири фановите и откри што стои зад двата негови колапса на теренот во последните четири дена.

23-годишниот фудбалер повторно колабираше во вторникот на пријателскиот натпревар против Хајденхајм, само неколку минути откако влезе во игра. Мусиала претходно доживеа сличен инцидент и на контролниот натпревар против РБ Лајпциг на 15 август.

По вториот инцидент, Мусиала се огласи на социјалните мрежи и објасни дека му биле дијагностицирани краткотрајни и привремени, но лечливи невролошки епизоди, предизвикани од невролошка дисфункција.

– Најпрво сакам да ве известам дека сум добро и да ви се заблагодарам на сите за пораките и огромната поддршка – рече тој.

Мусиала посочи дека е свесен оти сцените од натпреварите можеле да изгледаат страшно за јавноста.

– Знам дека многумина од вас се загрижени и денес сакам да ги смирам тие грижи и да објаснам што се случува. Ми беа дијагностицирани краткотрајни, привремени, но лечливи епизоди, кои се последица на невролошка дисфункција – објасни германскиот репрезентативец.

Според него, токму тие епизоди можат да ги предизвикаат моментите што се случија на натпреварите против Лајпциг и Хајденхајм.

– Знам дека на прв поглед можат да изгледаат алармантно, но за мене во моментов тие се дел од секојдневието. Добивам одлична медицинска грижа и останувам многу оптимистичен. Баерн Минхен и луѓето околу мене се целосно покрај мене и ме поддржуваат на овој пат – вели тој.

Мусиала особено нагласи дека нема дополнителен ризик по неговото здравје.

Тој објасни дека во консултација со лекарите и невролошките специјалисти одлучил да продолжи со секојдневниот живот и со она што најмногу му помага во опоравувањето – да игра фудбал.

– Со одобрение од невролозите, сакам да продолжам да се посветувам на она што најмногу ми помага во опоравувањето: едноставно да го живеам секојдневието и да продолжам да ја следам мојата страст – да играм фудбал – тече Германецот.

Мусиала зад себе има тежок период. Минатата сезона тој пропушти околу шест месеци поради сериозна повреда на глуждот, а сега се соочува со нов здравствен предизвик. Сепак, според неговата сопствена изјава, состојбата се третира, е под медицински надзор и тој добил дозвола од невролозите да продолжи да се занимава со фудбал.

The post МУСИАЛА ОТКРИ ЗОШТО КОЛАБИРАШЕ ДВАПАТИ НА ТЕРЕН Фудбалерот вели дека состојбата може да се третира appeared first on plusinfo.mk.