Наша цел е да ги задржиме странските инвестиции на сегашното ниво и да го отвориме патот на истражувачки центри кои ќе отвараат високоплатени работни места, истакна во гостувањето во емисијата “Стадион” на Канал 77, заменик претседателот на Владата и министер за транспорт, Александар Николоски.

– Мислам дека ние ќе ги стабилизираме странските инвестиции на ова ниво, од неколку причини. Првата причина е, за да било кој инвеститор инвестира надвор од сопствената држава, треба сопствената држава да има раст. ЕУ од каде што доаѓаат најголем број од инвестициите, заради војната во Украина, веќе години наназад има рецесија, и компаниите главно се затвораат внатре. Второ, автомобилската индустрија, која што е главен двигател на инвестициите во Македонија, во ЕУ е во криза. И третиот фактор е, во 2006 година, кога ние ја почнавме политиката на странски директни инвестиции, невработеноста беше речиси 40%. Денес, скоро и да нема невработен во државата, и нормално е дека апетитот за инвестирање не може да е ист. Сега наша задача е да ги одржуваме и да носиме инвеститори кои што ќе отвараат истражувачки центри, и кои што ќе даваат добро платени работни места. Тоа е следната фаза кон која се стремиме – истакна вицепремиерот Николоски.

The post НОВА ЕРА НА ИНВЕСТИЦИИ, ВО ФОКУС ИСТРАЖУВАЧКИ ЦЕНТРИ Целта е да се привлечат инвеститори кои ќе донесат високоплатени позиции appeared first on plusinfo.mk.

Македонија останува една од економски поотпорните земји на Западен Балкан, и покрај забавувањето на економската активност во целиот регион, покажува најновиот извештај на Европската комисија за земјите кандидати и потенцијални кандидати за членство во ЕУ.

Во првиот квартал од 2025 година, реалниот раст на БДП на Западен Балкан забележа пад од 3,3% на 2,3%. Сите земји во регионот покажале послаб раст, но Македонија, заедно со Албанија и Косово, останала над границата од 3%, што се смета за добар резултат во услови на економска неизвесност.

Економскиот раст беше поттикнат од домашната побарувачка. Потрошувачката остана клучен придонесувач за растот во првиот квартал од 2025 година. Потрошувачката на домаќинствата беше придружена со континуиран висок раст на платите низ целиот регион. Понатаму се наведува дека динамиката на трговијата генерално се карактеризираше со поголем увоз во споредба со извозот, што доведе до негативни придонеси на меѓународната трговија кон растот на БДП.

Стапката на невработеност се намали во повеќето земји од регионот во првите три месеци од 2025 година. Невработеноста во регионот беше на историски најниско ниво, но сепак повисока отколку во ЕУ.

Во согласност со намалувањето на економската активност, растот на вработеноста се забави на 0,2 проценти во Западен Балкан.

Во четирите квартали до март, нето приливот на странски директни инвестиции се намали во повеќето земји во регионот, особено во Македонија и Србија, во споредба со 2024 година.

Девизните резерви се намалија во некои земји во регионот.

Просечната годишна инфлација се забрза на 3,7 проценти во првиот квартал од 2025 година.

Инфлацијата во вториот квартал од оваа година, се движеше се од 2,3 проценти во Албанија до 4,3 проценти во Црна Гора.

И покрај силниот раст на приходите, буџетските расходи пораснаа со побрзо темпо, а фискалните биланси се влошија во речиси сите економии на Западен Балкан во првите пет месеци од 2025 година, освен во Македонија.

Во Турција, годишниот економски раст дополнително се забави на два проценти во првиот квартал од 2025 година.

Годишната инфлација на потрошувачки цени во земјата падна на 35 проценти во јуни, најниско ниво од ноември 2021 година, главно благодарение на пониските цени на храната.

The post ЕКОНОМИЈАТА НА МАКЕДОНИЈА СЕ ИСТАКНУВА Нов извештај на ЕУ за земјите од Западен Балкан appeared first on plusinfo.mk.