Ела Бити, најмладата ќерка на холивудските ѕвезди Ворен Бити и Анет Бенинг, го прави најголемиот чекор во досегашната кариера. 26-годишната актерка ја толкува Лизи Борден во четвртата сезона на антологиската серија „Monster“, која од 17 септември е достапна на Нетфликс. Станува збор за нејзината прва главна телевизиска улога.

Лизи Борден во 1892 година била обвинета дека со секира ги убила својот татко Ендру и маќеата Еби. Следната година била ослободена од обвиненијата, а случајот со децении останал еден од најпознатите нерешени криминални случаи во американската историја.

Во серијата „Monster: The Lizzie Borden Story“, Бити ја игра токму оваа комплексна историска фигура, а во актерската екипа е и Чарли Ханам.

Иако е родена во едно од најпознатите холивудски семејства, Бити не тргнала веднаш по патот на детска ѕвезда. Како дете настапувала во локален театар, во мјузиклите „Ени“ и „Кралот лав“, а потоа избрала формално актерско образование. Во 2022 година дипломирала на престижниот „Џулијард“ во Њујорк.

Нејзината професионална кариера започнала со улога во серијата „Feud: Capote vs. The Swans“, а во 2024 година дебитирала и на Бродвеј во претставата „Appropriate“, каде што ја заменила Ела Фенинг. Потоа се појавила и во филмот „If I Had Legs I’d Kick You“, со Роуз Бирн, а сега добива можност да ја носи целата сезона на една од најпознатите антологии на Нетфликс.

Бити отворено признава дека презимето ѝ носи одредена предност. Во интервју за „Vogue“ во 2024 година рекла дека е целосно свесна оти познатите родители носат „привилегија и изложеност“, но додала дека се надева оти може да понуди нешто значајно со својата работа. Нејзини родители се Ворен Бити и Анет Бенинг, а нејзина тетка е легендарната актерка Ширли Меклејн.

Интересно е што Бити веќе има следен голем проект. Таа ќе глуми и во филмската адаптација на романот „Стакленото ѕвоно“ („The Bell Jar“), во режија на Сара Поли, во кој меѓу останатите ќе се појават и Били Ајлиш и Кери Малиган.

The post 📽️ УШТЕ ЕДНО НЕПО БЕБЕ СЕ СПРЕМА ДА ГО ОСВОИ ХОЛИВУД Која е Ела Бити? appeared first on plusinfo.mk.

Клиф Бут се враќа, а со него и светот на „Беше еднаш… во Холивуд“. Квентин Тарантино го напиша сценариото за продолжението на својот филм од 2019 година, но овојпат не седна на режисерското столче. Филмот „The Further Mis-Adventures of Cliff Booth“ го режира Дејвид Финчер, додека Бред Пит повторно го игра Клиф Бут, улогата за која го освои Оскарот за најдобар актер во споредна улога.

Приказната е сместена во 1977 година, осум години по настаните од првиот филм. Клиф повеќе не е само каскадерот и човекот од доверба на актерот Рик Далтон, туку продолжува да работи во Холивуд и да им нуди свои „тајни услуги“ на пријатели од филмската индустрија. Официјалниот опис го претставува како воен ветеран, каскадер, шанкер и филмски проекционист кој и понатаму се снаоѓа во еден Холивуд што значително се променил.

Особено интересно е што Тарантино не ја продолжува приказната само на филмското платно. На 8 декември ќе ја објави и книгата „The Adventures of Cliff Booth“, негов втор роман поврзан со филмскиот свет. Книгата е романизирана верзија на новата приказна и, според издавачот, ќе понуди „своја креативна визија“ за случувањата.

 

View this post on Instagram

 

A post shared by Harper Books (@harperbooks)

Книгата ќе излезе само неколку недели по кино-премиерата на филмот. „The Further Mis-Adventures of Cliff Booth“ ќе пристигне во ИМАКС салите на 25 ноември, а од 23 декември ќе биде достапен на Нетфликс. Така, публиката прво ќе ја види филмската верзија на приказната, а потоа ќе може да ја прочита Тарантиновата верзија во книга.

Иако Тарантино го напиша сценариото, одлучи режијата да му ја препушти на Финчер. Со тоа продолжението станува и своеобразна средба на двајца познати режисери преку ликот што го игра Пит. Финчер и Пит веќе соработувале на „Седум“, „Боречки клуб“ и „Необичниот случај на Бенџамин Батон“, па новиот проект повторно ги спојува.

Покрај Пит, во актерската екипа се и Елизабет Дебики, Скот Кан, Карла Гуџино, Јахја Абдул-Матин Втори, Питер Велер и Тимоти Олифант. Засега не е потврдено дека Леонардо ди Каприо и Марго Роби ќе ги повторат своите улоги од оригиналниот филм.

Тарантино, во меѓувреме, продолжува да ја проширува приказната за својот измислен Холивуд и надвор од филмовите. Покрај двата романа и книгата „Cinema Speculation“, тој работи и на сценска претстава, додека неговиот план за десетти и последен филм во последните години повеќепати се менуваше. По „Беше еднаш… во Холивуд“ од 2019 година, тој досега не режирал нов долгометражен филм.

The post 📽️ БРЕД ПИТ ПОВТОРНО ВО УЛОГАТА НА ЛЕГЕНДАРНИОТ КАСКАДЕР Тарантино го напиша сценариото за продолжението на приказната за Клиф Бут appeared first on plusinfo.mk.

Продуцентот Сајмон Афрам поднесе тужба против Нетфликс во вредност од 105 милиони долари, обвинувајќи ја стриминг-компанијата за сериозен пропуст што, според него, ја загрозил иднината на неговиот филм „Fortitude“. Станува збор за воена шпионска драма сместена во Втората светска војна, во која главната улога ја толкува Николас Кејџ.

Според судските документи, продукцијата во јуни доставила мастер-копија од филмот до канцелариите на Нетфликс во Холивуд за интерна проекција и можни преговори за дистрибуција. Само девет дена подоцна, од компанијата биле известени дека од канцеларијата биле украдени повеќе хард-дискови, меѓу кои и оној што го содржел филмот.

Афрам тврди дека со тоа практично е уништена комерцијалната вредност на проектот. Неговата правна екипа наведува дека потенцијалните дистрибутери би можеле да избегнат купување филм за кој постои ризик да се појави на пиратски платформи пред официјалната премиера. Според тужбата, во проектот биле вложени повеќе од 45 милиони долари, а неговата реализација траела седум години.

Нетфликс ги отфрла обвинувањата и тврди дека не е одговорен за штетата. Од компанијата посочуваат дека филмот бил доставен без вообичаените безбедносни механизми што се користат во филмската индустрија за заштита на чувствителни материјали. Исто така наведуваат дека активно соработуваат во истрагата и ги следат пиратските канали за да проверат дали содржината се појавила на интернет.

„Fortitude“ го режира британскиот режисер Сајмон Вест, познат по филмовите „Con Air“ и „Lara Croft: Tomb Raider“. Освен Николас Кејџ, во актерската екипа се и Бен Кингсли, Мајкл Шин, Метју Гуд и Рон Перлман, што дополнително го зголемува интересот за проектот.

Случајот веќе предизвика големо внимание во Холивуд бидејќи отвора прашања за безбедноста на филмските материјали во дигиталната ера. Додека судската постапка допрва започнува, иднината на „Fortitude“ останува неизвесна, а јавноста со интерес ќе следи дали филмот ќе стигне до публиката или ќе остане запаметен како еден од најнеобичните правни спорови во филмската индустрија.

The post ПРОДУЦЕНТ ГО ТУЖИ НЕТФЛИКС ЗА 105 МИЛИОНИ ДОЛАРИ Исчезнал филм со Николас Кејџ и Бен Кингсли appeared first on plusinfo.mk.

Американскиот режисер и сценарист Карл Ринш e осуден на две и пол години затвор во Њујорк, откако судот го прогласи за виновен за оштета на Нетфликс од 11 милиони долари. Тој во декември бил прогласен за виновен за федерална измама преку електронски средства, како и за уште неколку кривични дела. Според обвинението, Ринш од стриминг-платформата побарал дополнителни 11 милиони долари за завршување на научнофантастичната серија „Бел коњ“ („White Horse“). Според достапните информации, парите ги префрлил на неговите лични сметки.

– Дел од средствата ги изгубил преку неуспешни инвестиции само неколку месеци по добивањето на парите. Останатиот дел го има вложено во криптовалути, по што средствата ги префрлил на својата банкарска сметка, навеле обвинителите на судењето.

Според податоците од обвинителството, парите ги искористил за купување луксузни автомобили, часовници и облека во вредност од 652.000 долари. Меѓу купените производи биле и два душеци од 638.000 долари, како и постелнина од 295.000 долари.

– Дел од парите биле искористени за покривање на долгови од кредитни картички во износ од речиси 1,8 милиони долари, нагласија обвинителите.

Овој 48-годишен режисер пред судот се бранел дека делата ги сторил поради нарушеното ментално здравје и употреба на лекови.

Според судијата Џед С. Ракоф, проблемите со менталното здравје може да го објаснат неговото однесување, но тоа не го менува фактот дека Ринш намерно се обидел со измама да добие голема сума пари од Нетфликс и да ги злоупотреби.

За ова кривично дело обвинителството побара петгодишна затворска казна. Донесената одлука не била прифатена од страна на одбраната.

Освен изречената затворска казна која треба да биде спроведена во септември, познатиот режисер мора да плати глоба од 11 милиони долари.

Карл Ринш е познат по филмот „47 самураи без господар“ од 2013 година.

The post ГО „ЗАКРПИЛ“ НЕТФЛИКС ЗА 11 МИЛИОНИ ДОЛАРИ, ПА ТРОШЕЛ КАКО ЛУД Режисерот Карл Ринш осуден на 2,5 години затвор appeared first on plusinfo.mk.

Австралиската пејачка Кајли Миног (57) откри дека во 2021 година имала втора дијагноза за рак, велејќи: „Бев лушпа од човек“.

Ова го откри во нејзината нова документарна серија од три дела на Нетфликс, насловена „Кајли“.

Таа ги увери обожавателите во документарецот дека „повторно го преживеала тоа и дека сè е во ред“.

 

View this post on Instagram

 

A post shared by Kylie Minogue (@kylieminogue)

Во 2005 година, Кајли Миног откри дека има рак на дојка. На само 36-годишна возраст, пејачката се избори со болеста, а со тоа што отворено зборуваше за својата битка, успеа да ја зголеми свесноста за ракот на дојка.

Во документарецот Кајли зборува за своето второ соочување со истата дијагноза во 2021 година. Вели дека овој период се чувствувала толку лошо и физички и психички, што воопшто не сакала да излегува од дома.

Кајли додава дека пробувала да го најде вистинскиот миг за да им каже на фановите за новата битка, но не можела и затоа молчела цели пет години.

57-годишната пејачка била дијагностицирана за време на рутинска проверка, а додека раскажува за тешкиот период, едвај се воздржува да не заплаче.

Кајли имаше голем камбек во 2023 година со песната Padam Padam која ѝ донесе и Греми награда, но приватно уште водела битка со ракот.

Кајли вели дека документарецот ѝ дал можност да се наврати на најзначајните моменти од нејзиниот живот, а борбата со ракот била токму ваков момент.

Додава и дека се надева дека ќе ги поттикне другите жени да се проверат.

– Раната детекција е од огромна помош и благодарна сум што можам да кажам дека денес сум добра. За среќа, повторно ја победив болеста и сега сè е во ред – вели пејачката во документарецот.

За потсетување, Кајли Миног беше на врвот на кариерата во 2005 година и се подготвуваше да настапи на Glastonbury кога првпат ја доби дијагнозата.

Поради ракот, го откажа настапот на фестивалот, а откажа и низа концерти во Лондон.

Одеше на радиотерапија и хемотерапија во Париз, каде најголема поддршка ѝ беа семејството и тогашниот партнер Оливие Мартинез.

Во документарецот Кајли открива дека извесен период го одложувала лекувањето бидејќи сакала да стане мајка.

Пред да почне да се лекува, таа направила неколку ин витро процедури.

– Имав 36 години кога ја добив дијагнозата, па размислував за деца. И пробав, дури и ја одложив хемотерапијата за да се обидам, а беше навистина страшно.

Пејачката додава дека иако била исплашена, знаела дека ако не се обиде, ќе зажали, без разлика што не очекувала да забремени.

– Ако забременев, тоа ќе беше чудо. Но, животот не функционира така.

Пејачката нема деца, но во документарецот покажа емотивно писмо кое му го напишала на детето што можеби ќе го има во иднина.

 

View this post on Instagram

 

A post shared by Kylie Minogue (@kylieminogue)

Во документарецот зборува и сестра ѝ, Дани Миног, која вели дека искрено се надева дека еден ден пејачката ќе се оствари во улогата на мајка:

– Јас никогаш не се гледав себеси како мајка, но Кајли отсекогаш се гледала така и ова ми го крши срцето.

The post КАЈЛИ МИНОГ ЈА ДРЖЕЛА ВО ТАЈНОСТ ВТОРАТА БИТКА СО РАКОТ „Бев само лушпа од човек“ appeared first on plusinfo.mk.

Австралиската поп-ѕвезда Кајли Миног отворено ќе зборува за својата бурна врска со починатиот пејач на INXS, Мајкл Хачинс, во нов документарец за нејзиниот живот, кој наскоро ќе се појави на Нетфликс.

Поп-иконата, која сега има 57 години, ќе сподели со обожавателите досега нераскажани приказни за нејзината двегодишна романса со харизматичниот музичар кој почина во 1997 година на 37-годишна возраст.

Спомени за Мајкл Хачинс

Пејачката родена во Мелбурн се осврнува на својата врска со Хачинс, која траеше од 1989 до 1991 година, во претстојниот документарец наречен „Кајли“.

– Кога се запознавме, имав 21 година и бев подложна на туѓи влијанија… И го мислам тоа на најдобар можен начин – вели Кајли. Таа признава дека Хачинс имал огромно влијание врз нејзиниот живот и дека сè уште често мисли на него – пишува Дејли Меил.

– Тој имаше огромно влијание врз мене. Беше паметен, љубезен, длабок, уметнички и интересен човек. Нашата врска беше прекрасно патување. Неговата смрт во 1997 година беше загуба за многумина, вклучувајќи ме и мене – вели таа.

Конечно, таа додаде дека легендарниот пејач ѝ отворил врата кон нови искуства, за кои е благодарна.

– Луѓето прашуваат зошто тоа сè уште ме погодува толку многу денес… Постојат многу причини. Една од нив е што тој претставуваше еден од моите први големи исчекори во светот на возрасните, во еден поширок свет – рече таа.

– Свет на можности и откритија – патувања, литература, ексцеси, врски, уметност, уметнички израз, изведби и сè друго! Бев на совршена возраст за тој момент.

Борба со сериозна болест

Покрај нејзиниот љубовен живот, документарецот ќе открие и детали за борбата на Кајли со ракот на дојка. Пејачката, позната по чувањето на приватноста, во најавата за серијата низ солзи зборува за стравот што го чувствувала.

– Се чувствував исклучена од сопственото тело, бев толку исплашена од она што доаѓа – вели . Во серијата од три дела, за тешкиот период зборува и нејзината сестра Дани.

– Не знаевме дали некогаш ќе се опорави. Само сакав да бидам со сестра ми. Музиката нè одржуваше.

На пејачката ѝ беше дијагностициран рак на дојка во рана фаза во мај 2005 година, на 36-годишна возраст. По лумпектомија и хемотерапија во Париз, во 2006 година беше објавено дека се опоравила.

The post 🎥 КАЈЛИ МИНОГ ПРОГОВОРИ ЗА ВРСКАТА СО МАЈКЛ ХАЧИНС Во документарецот на Нетфликс поп-ѕвездата ќе сподели досега нераскажани приказни appeared first on plusinfo.mk.

Сè поголем број истражувања покажуваат дека изложеноста на хемикалиите во пластиката, како што се бисфенол А (BPA) и фталати, може да му наштети на здравјето, особено на хормоналниот систем, поради што се препорачува ограничување на употребата на пластика, пишува TODAY.com.

Новиот документарец на Netflix, „Детокс од пластика“, следи пет пара со необјаснета неплодност кои се обиделе да ја избегнуваат пластиката колку што е можно повеќе во текот на 12 недели. По експериментот, три пара успеале да забременат, но експертите предупредуваат дека ова не докажува дека пластиката предизвикува неплодност.

Документарецот е базиран на истражување кое укажува на пад на бројот на сперматозоиди низ целиот свет од 1970-тите, иако постои дебата за обемот на ова опаѓање и квалитетот на достапните податоци.

Повеќе за ова на порталот „Мајка и дете“.

The post ПОМАЛКУ ПЛАСТИКА, ПОВЕЌЕ СПЕРМАТОЗОИДИ Нов документарец на Нетфликс следи пет пара со необјаснета неплодност appeared first on plusinfo.mk.

Борбата за холивудскиот гигант доби драматичен пресврт. Нетфликс соопшти дека нема да ја зголеми понудата за Ворнер Брос Дискавери, откако подобрената понуда на Парамаунт Глобал беше оценета како „надмоќна“.

Стрим-платформата порача дека ревидираната понуда ја прави трансакцијата „повеќе непривлечна од финансиско гледиште“. Иако управата на „Ворнер“ претходно ја опиша понудата на „Парамаунт“ како највисоко прифатлива, препораката за договорот со „Нетфликс“ формално останува во сила до гласањето на акционерите на 20 март.

„Нетфликс“ понуди околу 83 милијарди долари за филмските студија и стрим-операциите на „Ворнер“. Извршните директори Тед Сарандос и Грег Питерс оценија дека договорот ќе донесе вредност и регулаторна извесност.

„Сепак, секогаш сме биле дисциплинирани и по цената што е потребна за да се изедначи со најновата понуда на ‘Парамаунт скајденс’, договорот веќе не е финансиски привлечен… оваа трансакција отсекогаш била ‘убаво да се има’ по вистинската цена, а не ‘задолжителна’ по која било цена“, истакнаа тие.

Неколку дена по обврзувачкиот договор меѓу „Нетфликс“ и „Ворнер“ во декември, „Парамаунт“ директно им се обрати на акционерите со понуда од 108,4 милијарди долари за целата група, вклучувајќи ги и телевизиските мрежи како Си-Ен-Ен.

Разликата е огромна. Исходот може да го редефинира односот на силите во американската забавна индустрија.

The post БОРБАТА ЗА ХОЛИВУДСКИОТ ГИГАНТ ДОБИ ДРАМАТИЧЕН ПРЕСВРТ Нетфликс се повлече во последен момент appeared first on plusinfo.mk.

Стриминг-компанијата Нетфликс повторно воведува промени што ќе влијаат врз милиони корисници. Според најавите, услугата наскоро повеќе нема да биде достапна на одредени постари уреди кои не ги исполнуваат техничките услови за најновите верзии на апликацијата.

Ова значи дека корисниците што користат постари модели на паметни телевизори, конзоли и други уреди за стриминг ќе треба да размислат за надградба доколку сакаат да продолжат да ја користат платформата.

Од компанијата посочуваат дека одлуката е поврзана со подобрување на безбедноста, перформансите и квалитетот на услугата. Со оглед на технолошкиот напредок, дел од старите уреди повеќе не можат да ги поддржат новите функции и стандарди за стриминг.

Промената е дел од пошироката стратегија на Нетфликс за модернизација на платформата и оптимизација на корисничкото искуство, но истовремено ќе значи дека милиони корисници ќе останат без пристап доколку не ги обноват своите уреди.

The post НЕТФЛИКС НЕМА ДА МОЖЕ ДА СЕ ГЛЕДА НА ЗАСТАРЕН ТЕЛЕВИЗОР ИЛИ КОМПЈУТЕР Компанијата воведува строги стандарди за стриминг appeared first on plusinfo.mk.

Риалити шоуто „America’s Next Top Model“ беше првиот чекор во модната индустрија за многу млади жени.

Сепак, речиси десет години по емитувањето на последната, 24-та сезона, сè уште излегуваат скелети од плакарот, покажувајќи колку работи се случувале кога камерите ќе се исклучат.

Водителката и поранешна супермоделка Тајра Бенкс се соочува со бран критики по објавувањето на „Reality Check: Inside America’s Next Top Model“ на Netflix, кое ја открива темната страна на еден од најпопуларните риалити формати од 2000-тите.

Поранешните натпреварувачки тврдат дека биле подложени на психолошки притисок, манипулација и несоодветни ситуации за време на снимањето.

Еден од најголемите скандали беше поврзан со фотосесија во четвртата сезона во која моделите мораа да ја променат својата раса, вклучувајќи користење на blackface.

Концептот предизвика негодување, а дополнителни критики се појавија поради снимањето во кое натпреварувачките глумеа бездомнички и позираа со вистински бездомници.

Натпреварувачката Дион Волтерс откри дека морала да учествува во фотосесија со тема на местото на злосторството, иако продуцентите знаеле дека нејзината мајка е жртва на пукање. Продуцентот Кен Мок подоцна призна дека таквото славење на насилството е погрешно.

Едно од најшокантните признанија доаѓа од Шанди Саливан од втората сезона, која тврди дека нејзината наводна афера со италијански модел всушност била сексуален напад бидејќи се онесвестила, а никој не реагирал. Продукцијата тврдеше дека шоуто било третирано како документарец со камери присутни 24 часа на ден, додека Тајра избегнала детален коментар.

Бројни натпреварувачки проговорија за коментарите поврзани со тежината и физичкиот изглед. Жизел Самсон призна дека забелешките за нејзиниот широк задник ја обележуваат до ден-денес, додека Киња Хил била наречена пиги шик. Витни Томпсон, првата победничка плус-сајз, откри дека плачела секој ден под тушот – единственото место без камери.

Киња исто така тврдеше дека за време на снимањето во Африка, машки модел ја допрел несоодветно, без продукцијата да преземе мерки. Тајра денес се извини за нејзиниот совет во тоа време да користи женски шарм за да се одбрани.

Стоматолошките процедури во шестата сезона, исто така, предизвикаа посебна контроверзност. Победничката Дани Еванс беше под притисок да го затвори јазот меѓу забите бидејќи тоа „не беше комерцијално одржливо“, додека Џоани Додс беше подложена на часови операција без целосно да ја разбере процедурата.

– Постојано туркавме сè подалеку. Вие го баравте тоа! Гледачите сакаа сè повеќе и повеќе. Да, има глупости. Мислам, навистина глупости – признала Бенкс, тврдејќи дека сите овие сценарија се случиле затоа што гледачите барале драма. Иако таа се извини за некои постапки, многу поранешни натпреварувачки тврдат дека нивните трауми останале трајни.

Дваесет години по својот врв на популарност, „America’s Next Top Model“ повторно се најде во центарот на вниманието – овој пат поради прашања за етика, одговорност и цената на славата.

И покрај ова, многу корисници на социјалните мрежи коментираат дека овој документарец не се приближил ни приближно до прикажување на сите скандали, главно затоа што Бенкс учествувала во продукцијата. Се очекува втор документарец за оваа емисија да биде објавен во рок од неколку недели, кој уште подлабоко би истражил сè што било ставено под тепих.

The post 🎥 ТEМНАТА ТАЈНА НА КУЛТНОТО ШОУ Документарец разоткри што се случувало зад камерите appeared first on plusinfo.mk.