Блискиот Исток останува на работ на нова ескалација откако САД и Иран втора ноќ по ред разменија напади, а израелскиот државен и воен врв порача дека конфликтот е далеку од завршен. Во центарот на вниманието денеска беше пораката од Тел Авив дека Иран нема да добие нуклеарно оружје и дека израелската армија се подготвува за нови операции.

„Војната не е завршена“

Израелскиот премиер Бенјамин Нетанјаху порача дека кампањата против Иран продолжува и дека Тел Авив нема да дозволи Техеран да дојде до нуклеарно оружје.

– Со или без договор, Иран нема да има нуклеарно оружје – изјави Нетанјаху.

Тој истовремено најави дека израелските сили ќе останат во јужен Либан колку што е потребно и дека Израел ќе ја зачува својата воздушна супериорност во регионот.

Втора ноќ напади, 14 загинати

Според ирански извори, во последните два дена загинале најмалку 14 лица. Вашингтон соопшти дека погодил околу 90 воени цели, дел од нив во близина на Ормускиот Теснец, додека Техеран возврати со напади врз американски цели во Кувајт, Бахреин и Катар, а подоцна беа пријавени удари и во Јордан и во Ирак.

Паралелно со воените дејства, набљудувачите предупредуваат на драматично намален сообраќај низ Ормускиот Теснец, еден од најважните енергетски коридори во светот.

„На маса се нови големи планови“

Уште подиректна порака испрати началникот на Генералштабот на израелската армија, генерал-потполковник Ејал Замир.

– На маса се нови планови. Сè уште има големи операции пред нас. Бидете подготвени – рече Замир пред новата генерација пилоти на израелските воздухопловни сили.

Тој откри дека армијата и понатаму е во состојба на висока борбена готовност и внимателно ги следи случувањата во Иран и во Либан.

Арагчи ги предупреди САД

Од иранска страна, министерот за надворешни работи Абас Арагчи побара Вашингтон да се воздржи од нови воени „авантури“. Во разговори со претставници на Пакистан, Оман и Турција, Арагчи ги осуди американските напади и повика на дипломатско решение за кризата.

Иранското Министерство за надворешни работи соопшти дека сите соговорници ја нагласиле потребата од користење дипломатски канали за да се спречи понатамошна ескалација.

Ормускиот Теснец пак главна тема

Додека политичарите разменуваат закани и предупредувања, загриженоста расте и поради состојбата во Ормускиот Теснец. Според поморски набљудувачи, бројот на бродови што минуваат низ теснецот нагло се намалил по последните напади.

Токму овој воден пат е клучен за глобалната трговија со нафта и течен природен гас, па секое ново влошување на безбедносната состојба може да има последици далеку надвор од Блискиот Исток.

The post ЗА ИЗРАЕЛ ВОЈНАТА НЕ Е ЗАВРШЕНА Додека САД и Иран разменуваат напади, генерал најави „големи операции“ appeared first on plusinfo.mk.

Израелската војска уништи голем подземен тунел на Хезболах во јужен Либан, изјавија премиерот Бенјамин Нетанјаху и министерот за одбрана Израел Кац во заедничка изјава, пренесува ДПА. Либанците изјавија дека земјата се тресела за време на огромната експлозија.

Во заедничкото соопштение се наведува дека тунелот бил дел од „терористичката инфраструктура“ на либанската милиција во близина на селото Мајдал Зун.

Израел ги информирал САД однапред за операцијата за уништување на инфраструктурата, се додава во соопштението, наведува ДПА.

Во соопштението се наведува дека тунелот бил долг повеќе од 200 метри и длабок повеќе од 25 метри. Во него биле пронајдени стотици парчиња оружја и неколку силоси за лансирање наменети за напади врз израелска територија, наведоа двајцата.

Војската соопшти дека тунелот бил на околу 10 километри од израелската граница.

Tsahal détruit un tunnel du Hezbollah de 200 m au sud-Liban.

Selon l’armée israélienne, le tunnel, situé à une profondeur de 25 m, contenait des centaines d’armes et plusieurs rampes de lancement de roquettes.

Entretemps, l’accord américano-iranien stipule que la guerre… pic.twitter.com/afTjQ1qjSH

— Sputnik Afrique (@sputnik_afrique) June 29, 2026

Во јужен Либан и натаму е тензично и покрај официјалното прекин на огнот и договорот за рамковен договор меѓу Израел и Либан.

Двете земји во петокот се согласија за патот кон мир и безбедност по децении војна. Хезболах, меѓутоа, го отфрли договорот. Милицијата не беше вклучена во преговорите и цврсто го отфрли разоружувањето предвидено со договорот, потсетува германската агенција.

За разлика од барањата на раководството во Техеран и Хезболах, рамковниот договор бара од Израел целосно да се повлече од јужен Либан само откако недржавните групи како што е Хезболах ќе бидат разоружани. Договорот исто така предвидува израелската армија постепено да се повлече од две зони, кои потоа би биле под контрола на либанската армија.

The post 📽️ УНИШТУВАЊЕ НА ТУНЕЛ НА ХЕЗБОЛАХ ГО СТРЕСЕ ЈУЖЕН ЛИБАН Внатре биле најдени стотици парчиња оруже и силоси за ракети appeared first on plusinfo.mk.

Израелскиот премиер Бенјамин Нетанјаху изјави дека израелската војска ќе остане во безбедносната зона во јужен Либан „колку што е потребно“ за да ја заштити безбедноста на Израел.

– Воспоставивме безбедносна зона во Либан и ќе ја задржиме онолку долго колку што е потребно за да го заштитиме нашиот народ – рече Нетанјаху на конференција во Ерусалим.

Претходно, лидерот на Хезболах Наим Касем изјави дека Израел нема да остане во Либан и порача дека неговото движење ќе одговори на секое израелско прекршување.

Изјавите доаѓаат и покрај прекинот на огнот кој стапи во сила во петокот, додека израелските власти тврдат дека нивните сили и натаму можат да дејствуваат против заканите во Либан.

Во меѓувреме, американскиот претседател Доналд Трамп му се закани на Иран со нови напади доколку не го спречи Хезболах да „предизвикува проблеми“, а иранската делегација која преговара со САД во Швајцарија официјално протестираше поради тие закани.

The post ЌЕ ОСТАНЕМЕ ВО ЈУЖЕН ЛИБАН КОЛКУ ШТО Е ПОТРЕБНО Нетанјаху не планира повлекување на израелската војска appeared first on plusinfo.mk.

Израелскиот министер за национална безбедност, Итамар Бен-Гвир, повика на жесток одговор откако четворица израелски војници загинале во борбите во јужен Либан. Неговата изјава предизвика шок во медиумите:

„За секоја солза на израелска мајка, илјада либански мајки мора да плачат“, напиша Бен-Гвир на платформата Икс.

Израелската армија соопшти дека војниците загинале кога нивниот тенк бил погоден за време на операција во близина на Кфар Тебнит, во јужен Либан. Меѓу жртвите бил и потполковникот Дор Гедалија Бен Симхон, командант на 52. баталјон на 401. оклопна бригада.

Мирот е потпишан, борбите продолжуваат

Инцидентот се случил само неколку дена по привремениот договор меѓу САД и Иран, кој предвидува деескалација и прекин на воените активности на повеќе фронтови, вклучително и во Либан.

Но, Бен-Гвир јасно порача дека Израел не смее да попушти.

– Со сето должно почитување кон Американците, Израел мора да му покаже на светот дека крвта на нашите синови и безбедноста на нашите граѓани не се предмет на преговори. Цел Либан мора да гори – изјави министерот.

Стари контроверзии, нови реакции

Бен-Гвир и претходно предизвикуваше бурни реакции со своите настапи.

Во мај објави видео во кое им се потсмева на активисти од меѓународната иницијатива „Глобална флотила Сумуд“, кои се обидувале да достават хуманитарна помош во Газа.

На снимката тој мавта со израелско знаме пред приведени активисти со врзани раце.

„Добредојдовте во Израел, ние сме господари тука“, порача тогаш Бен-Гвир.

Премиерот на Израел Бенјамин Нетанјаху тогаш оцени дека таквото однесување „не е во согласност со израелските вредности и норми“.

The post „ДА ГОРИ…ИЛЈАДА МАЈКИ ДА ПЛАЧАТ“ Израелскиот министер реагира на нападот во кој загинаа израелски војници appeared first on plusinfo.mk.

Американскиот претседател Доналд Трамп телефонски разговарал со израелскиот премиер Бенјамин Нетанјаху по израелските напади врз цели на „Хезболах“ во Бејрут, јавуваат медиумите повикувајќи се на извори запознаени со разговорот.

Разговорот се одржал само неколку часа пред очекуваното потпишување на договорот меѓу САД и Иран, додека Трамп претходно јавно ги критикуваше израелските напади.

„Израел повеќе не би требало да изведува напади никаде во Либан, но ниту другите страни, вклучувајќи го и ‘Хезболах’, не треба да го напаѓаат Израел“, изјави Трамп.

На својата социјална мрежа „Трут соушл“ тој напиша дека нападите извршени утрото не требало да се случат, особено во момент кога мировниот договор со Иран бил на дофат.

Трамп додаде дека Израел има право да се брани од закани, но оцени дека конкретната закана на која реагирал била „многу мала и безначајна“.

„Ова би можело да биде почеток на долг и убав мир – да не го уништиме“, напиша американскиот претседател.

Според израелскиот Канал 12, Трамп во интервју изразил незадоволство од одлуките на Нетанјаху и од нападите врз Бејрут.

Тој, наводно, изјавил дека му го пренел своето незадоволство директно на израелскиот премиер и оценил дека одговорот на Израел бил непропорционален на нападот на „Хезболах“, во кој немало повредени.

Израелските одбранбени сили соопштија дека нападите во бејрутската населба Дахија биле извршени како одговор на ракетен оган од „Хезболах“ кон израелска територија.

Во заедничкото соопштение на Нетанјаху и на министерот за одбрана, Израел Кац, се наведува дека Израел нема да толерира напади

The post ТРАМП БАРА ОД НЕТАНЈАХУ ДА НЕ ГИ УНИШТУВА МИРОВНИТЕ НАПОРИ Израел мора да ги запре нападите врз Либан appeared first on plusinfo.mk.

Премиерот на Израел Бенјамин Нетанјаху изјави дека израелската војска ја продлабочува офанзивата во Либан и дека во операциите учествуваат „значајни копнени сили“. Тој тврди дека армијата контролира стратешки области. Тензиите повторно растат.

Изјавата била дадена на почетокот на состанокот на израелскиот безбедносен кабинет, соопштил неговиот кабинет. Нетанјаху не прецизирал за кои локации станува збор.

„Продолжуваме со операциите“

– Ги продлабочуваме нашите операции во Либан, а израелската војска таму делува со значајни копнени сили и контролира стратешки области – изјавил Нетанјаху.

Тој додал дека армијата воспоставува „безбедносен појас“ со цел да ги заштити градовите во Северен Израел. Израелските власти со месеци предупредуваат за безбедносни закани долж северната граница. Судирите не запираат.

Најавата доаѓа и покрај прекинот на огнот што стапи на сила на 17 април со посредство на САД. Подоцна примирјето беше продолжено до почетокот на јули. Договорот сè повеќе слабее.

Примирјето на сила, нападите продолжуваат

Според либанските власти, израелската војска продолжила со напади и по стапувањето на сила на прекинот на огнот. Либанските официјални претставници тврдат дека од почетокот на март досега се убиени речиси 3.200 луѓе.

Според истите податоци, повеќе од 9.600 лица биле ранети, додека над 1,6 милиони жители се раселени. Независна потврда за бројките засега нема. Хуманитарната криза се продлабочува.

Израелските власти претходно соопштуваа дека операциите во Либан се насочени кон спречување напади врз северниот дел на земјата. Ситуацијата останува крајно нестабилна. Новата ескалација предизвикува загриженост.

The post НЕТАНЈАХУ НАЈАВИ ПРОШИРЕНА ОФАНЗИВА ВО ЛИБАН Израел испраќа копнени сили и покрај примирјето appeared first on plusinfo.mk.

Британија, Полска, Канада и Италија ги повикаа израелските амбасадори поради видеото што го објави министерот за национална безбедност на Израел Итамар Бен-Гвир. Снимката прикажува приведени активисти од флотилата за Газа. Реакции стигнаа и од Европската Унија, додека дел од приведените активисти започнаа штрајк со глад во израелските затвори.

Бен-Гвир објави видео на кое се гледаат како активистите врзани со пластични стеги клечат на земја. Според израелски и меѓународни медиуми, активистите биле приведени откако израелските сили ја пресретнале флотилата „Глобал Сумуд“ во меѓународни води.

Лондон соопшти дека снимката и однесувањето кон активистите предизвикале сериозна загриженост.

„Таквото однесување ги крши најосновните стандарди на почит кон луѓето и нивното достоинство“, се наведува во соопштението на британското Министерство за надворешни работи кое бара објаснување од Израел за условите во кои се држат активистите.

„Понижување и бес“ ја тресат Европа

Полскиот министер за надворешни работи Радослав Сикорски објавил дека израелскиот вршител на должноста во Варшава ќе биде итно повикан на разговор. Варшава побарала извинување поради, како што навел Сикорски, „крајно несоодветното однесување“ на член на израелската влада.

Полска истовремено побарала итно ослободување на своите државјани кои биле дел од флотилата.

Бен-Гвир веќе е под санкции од Канада

Канада исто така го повикала израелскиот амбасадор поради притворањето на активистите од флотилата „Глобал Сумуд“. Канадскиот премиер Марк Карни соопштил дека официјална Отава бара гаранции за безбедноста на канадските државјани кои учествувале во мисијата. Организаторите тврдат дека во флотилата имало 11 канадски државјани.

„Одвратниот третман на цивилите на флотилата, вклучително и оној документиран во видеото што го сподели Итамар Бен-Гвир, е неприфатлив“, напишал Карни на Икс.

Карни потсетил дека Канада веќе вовела санкции против Бен-Гвир, меѓу кои замрзнување на средства и забрана за патување.

ככה אנחנו מקבלים את תומכי הטרור

Welcome to Israel pic.twitter.com/7Hf8cAg7fC

— איתמר בן גביר (@itamarbengvir) May 20, 2026

„Неприфатливо и погрешно“ 

Италијанската премиерка Џорџа Мелони побара официјално извинување од Израел поради третманот на италијанските активисти. Италијанскиот министер за надворешни работи Антонио Тајани го повикал израелскиот амбасадор за да побара објаснување.

Рим оценил дека израелските власти покажале целосно непочитување кон барањата на италијанската влада.

Портпарол на Европската комисија го опишал третманот кон активистите како „целосно неприфатлив“.

Високата претставничка на ЕУ за надворешна политика и безбедност Каја Калас, пак, изјави:

– Однесувањето на израелскиот министер Итамар Бен-Гвир е недостојно за секој што извршува функција во демократска држава – изјавила Калас.

Реакција испратил и претседателот на Европскиот совет Антонио Кошта. Тој навел дека е потресен од начинот на кој биле третирани активистите и побарал нивно итно ослободување. Сличен став објавила и британската министерка за надворешни работи Ивет Купер.

И Нетанјаху го прекори министерот

Реакција стигна и од Израел.

Израелскиот премиер Бенјамин Нетанјаху изјавил дека Израел има право да спречува, како што рекол, „провокативни флотили на поддржувачите на Хамас“, но оценил дека начинот на кој биле третирани активистите не е во согласност со вредностите и нормите на Израел.

Флотилата „Глобал Сумуд“ соопштила дека Израел ги запленил сите 50 бродови од конвојот за помош за Газа. Во мисијата учествувале 428 лица од 44 држави, кои испловиле од Мармарис, Турција, со намера да ја пробијат блокадата на Газа што трае од 2007 година.

Активстите ќе бидат депортирани во Турција

Активистите денеска се ослободени и во текот на денот ќе бидат депортирани во Турција.

Во соопштението на израелската организација за човекови права „Адалах“ се наведува дека околу 430 активисти се ослободени од затвор во јужен Израел и ќе бидат депортирани преку аеродромот „Рамон“ во близина на Еилат на Црвено Море.

Претходно, дел од приведените активисти започнале штрајк со глад во израелските затвори. Организаторите на флотилата тврдат дека најмалку 87 лица се приклучиле на протестот. Тие навеле дека штрајкот претставува солидарност со  над 9.5000 палестински затвореници што се наоѓаат во израелските затвори.

The post 📽️ ЕУ „ЗОВРЕ“ ПОРАДИ ВИДЕОТО НА БЕН-ГВИР Повикани амбасадори на Израел, се бара ослободување на активистите appeared first on plusinfo.mk.

Американскиот претседател Доналд Трамп и израелскиот премиер Бенјамин Нетанјаху имале тензичен телефонски разговор околу натамошниот пристап кон Иран, објави Си-Ен-Ен, повикувајќи се на информации од „Аксиос“ и на „Волстрит џурнал“.

Разговорот открил сериозни разлики меѓу Вашингтон и Тел Авив околу тоа дали треба да продолжат нападите врз Иран или да ѝ се даде шанса на дипломатијата.

Според информациите, Трамп првично му соопштил на Нетанјаху дека САД размислуваат за нови целни удари врз Иран, во рамки на операција со кодно име „Операција Чекан“.

Но, само еден ден подоцна американскиот претседател ги стопирал нападите.

Заливските држави барале пауза

Според Си-Ен-Ен, одлуката за стопирање на ударите била донесена по барање на Катар, Саудиска Арабија и Обединетите Арапски Емирати.

Овие држави, заедно со пакистански посредници, се обидуваат да изградат рамка за нови разговори меѓу Вашингтон и Техеран.

– Во последните фази сме со Иран. Ќе видиме што ќе се случи – изјавил Трамп.

Тој додал дека или ќе има договор или ќе следуваат „непријатни потези“.

Нетанјаху барал продолжување на нападите

Израелскиот премиер, според извештаите, бил незадоволен од дипломатскиот пристап. Нетанјаху сметал дека секое одложување му оди во прилог на Иран.

За време на едночасовниот разговор тој наводно побарал продолжување на нападите и му порачал на Трамп дека паузата е грешка.

Но, американскиот претседател и натаму инсистирал на можност за дипломатско решение. На прашањето што му порачал на Нетанјаху, Трамп кратко одговорил:

– Тој ќе направи тоа што сакам да направи.

Иран и САД повторно разменуваат пораки

Во меѓувреме, Иран потврдил дека продолжуваат индиректните контакти со Вашингтон преку посредство на Пакистан.

Според портпаролот на иранското Министерство за надворешни работи, разговорите се водат врз основа на документ од 14 точки предложен од Техеран.

– Пораките се разменети во неколку наврати, ги добивме ставовите на американската страна и во моментов ги разгледуваме – изјавил портпаролот.

Сепак, според Си-Ен-Ен, клучните разлики остануваат. Прашањата за нуклеарната програма на Иран и замрзнатите средства сè уште не се решени.

Воената опција останува на маса

И покрај дипломатските напори, Трамп повторно предупредил дека воената опција не е исклучена.

– Ако не ги добиеме вистинските одговори, тоа ќе се случи многу брзо. Сите сме подготвени да продолжиме – изјавил американскиот претседател.

The post 📽️ „ЌЕ НАПРАВИ КАКО ШТО ЈАС ЌЕ МУ КАЖАМ!“ Трамп и Нетанјаху имале жесток разговор за Иран appeared first on plusinfo.mk.

Израелскиот премиер Бенјамин Нетанјаху се надева дека ќе го одвикне Израел од американската воена помош во рок од една деценија, бидејќи неговата земја се стреми да ги зајакне врските со земјите од Заливот, рече тој во вчера објавено интервју за американската телевизиска мрежа Си-би-ес.

– Сакам да ја намалам на нула американската финансиска поддршка, финансиската компонента на воената соработка што ја имаме – рече Нетанјаху во емисијата „60 минути“ на американската телевизија.

Израел добива секоја година околу 3,8 милијарди долари американска воена помош, рече тој. САД се согласија да обезбедат вкупно 38 милијарди долари воена помош за Израел од 2018 до 2028 година.

Но, сега е апсолутно вистинското време за евентуално ресетирање на финансиските односи меѓу САД и Израел, рече Нетанјаху.

– Не сакам да чекам до следниот Конгрес – изјави тој за Си-Би-Ес.

– Сакам да почнам сега – рече Нетанјаху, објави Ројтерс.

Иако Израел долго време имаше двопартиски консензус во рамките на американскиот Конгрес за воената помош, поддршката од пратениците и јавноста е поделена од почетокот на војната во Газа во октомври 2023 година.

The post НЕТАНЈАХУ САКА ДА ГО ОДВИКНЕ ИЗРАЕЛ ОД АМЕРИКАНСКА ПОМОШ Тел Авив добива околу 3,8 милијарди долари секоја година appeared first on plusinfo.mk.

Израелскиот премиер Бенјамин Нетанјаху вечерва го потврди 10-дневниот прекин на огнот во конфликтот на Израел со либанската милиција Хезболах, поддржана од Иран, но рече дека израелските војници ќе останат во „засилена безбедносна зона“ во јужен Либан, јави ДПА.

– Се согласив на привремен прекин на огнот од 10 дена – рече Нетанјаху во видео порака по објавата на американскиот претседател Доналд Трамп дека договорил примирје меѓу Израел и Либан.

Целта е да им се даде шанса на разговорите за мировен договор со Либан, кои започнаа со состанок на претставници од двете земји во Вашингтон во вторникот, рече Нетанјаху.

Израел има две главни барања: разоружување на Хезболах и договор за траен мир меѓу двете држави, нагласи премиерот, пренесува германската агенција.

За време на прекинот на огнот, израелската армија ќе остане во „засилена безбедносна зона“ во јужен Либан, рече Нетанјаху.

Тој рече дека зоната се протега од Медитеранот до сириската граница и е широка околу 10 километри. Според Нетанјаху, намерата е да се заштитат градовите во северен Израел од нападите на Хезболах.

– Имаме можност да склучиме историски мировен договор со Либан – рече Нетанјаху.

Израелскиот премиер потврди дека Трамп ги поканил него и либанскиот премиер Џозеф Аун на разговори за таков договор, како што објави Трамп на социјалните мрежи.

– Оваа можност постои само затоа што Израел постигна фундаментална промена во рамнотежата во борбата против Хезболах во последните години – рече израелскиот лидер.

The post НЕТАНЈАХУ ГО ПРИФАЌА ПРИМИРЈЕТО СО ЛИБАН, НО НЕ ЈА ПОВЛЕКУВА ВОЈСКАТА Ќе остане во „засилена безбедносна зона“ appeared first on plusinfo.mk.