Остануваат уште неколку дена до истекот на акцијата на ЈП Водовод и канализација што овозможува отплата на заостанатите долгови без пресметка на камата за доцнење.

Можноста може да се искористи најдоцна до 5 јуни. До тогаш корисниците можат да склучат договор за отплата на долгот на рати и да избегнат дополнителни трошоци по основ на камата.

„Без разлика дали станува збор за редовен или тужен долг, корисниците можат да ја искористат поволноста и да го регулираат долгот под поповолни услови“, наведуваат од ЈП Водовод и канализација – Скопје.

Одлуката не ги опфаќа органите на државната и локалната власт, како и државните институции, агенции, фондови, јавни установи и јавни претпријатија основани од државата, Град Скопје или општините.

The post УШТЕ НЕКОЛКУ ДЕНА БЕЗ КАМАТА „Водовод“ ги повика должниците да ги подмират сметките до петок appeared first on plusinfo.mk.

Рускиот енергетски гигант Гаспром денеска соопшти дека од 05 часот на 1 јануари – ќе го запре извозот на гас за Молдавија поради неплатени долгови.

Компанијата соопшти дека го задржува правото да преземе какви било активности, вклучително и раскинување на договорот за снабдување на Молдавија.

Прекинот на испораките е предвесник на целосно запирање на извозот на руски гас преку Украина и во Европа, од каде продолжува кон Словачка, Австрија, Унгарија и Италија, по истекот на актуелниот транзит-договор со Украина на 31 декември.

Русија ја снабдува Молдавија со околу 2 милијарди кубни метри гас годишно преку Украина. Населението на Молдавија од 2,5 милиони луѓе се подготвува за продолжени прекини на електричната енергија откако Киев рече дека нема да го продолжи својот транзит-договор со Гаспром.

The post МОЛДАВИЈА ОСТАНУВА БЕЗ РУСКИ ГАС На 1 јануари Гаспром ќе ги затвори вентилите appeared first on plusinfo.mk.

Во Скопје 27 објекти имаат прекин на довод на струја во топлинските потстаници. Во 43 објекти екипите на операторот на дистрибутивниот систем немаат пристап до топлинската станица, а 100 објекти засега не можат да добијат испорака на топлина од системот за централно греење поради дефекти во внатрешните инсталации, соопшти ЕСМ.

Компанијата ги повика потрошувачите и заедниците на сопственици да соработуваат, за успешен старт на грејната сезона на 15 октомври. За информации или пријави на дефекти и завршени интервенции, потрошувачите може да се јават во Центарот за грижа за потрошувачи на телефонските броеви 023076200 и 075400100.

Градоначалникот на општина Карпош, Стевчо Јакимовски, ја повика Владата да ги покрие трошоците за греење на општинските основни училишта, во висина од 8,3 милиони денари, затоа што локалната самоуправа не е должна да го прави тоа.

Јакимовски нагласи дека минатата година, за децата да не останат без греење, општината издвоила 6 милиони денари за оваа намена, затоа што тогашната Влада не сакала да ги плати сметките.

Локалната самоуправа само управува со основните училишта, а сите обврски кон училиштата ги покрива Владата, односно Министерството за образование. Тие ги исплаќаат средствата преку т.н. блок-дотации, кои што стигаат до општините, а тие само ги пренесуваат до училиштата.

– За жал, средствата што ги исплаќаат од министерството за образование до училиштата, ни од далеку не достасуваат за основните потреби на училиштата, а тоа е да се покријат основните трошоци за електрична енергија, да ги покријат трошоците за парно, за ѓубретарина, за вода итн. Не станува збор за тековно и инвестиционо одржување. Сето тоа го покрива локалната самоуправа, а ние имаме обврска само да управуваме. Сето тоа треба да биде на товар на Владата,  така пишува во законот – вели Јакимовски во соопштение до јавноста.

The post ЌЕ ИМА ЛИ МНОГУ СТУДЕНИ РАДИЈАТОРИ НА СТАРТОТ НА ГРЕЈНАТА СЕЗОНА? Неизвесно е во 170 објекти во Скопје appeared first on plusinfo.mk.