Во 32 општини во Македонија и во Градот Скопје денеска се гласа за градоначалници, а на 3 избирачки места во Шуто Оризари се повторува гласањето и за советници.

Во вториот круг се гласа за двајцата кандидати кои во првиот круг добиле најмногу гласови, а за градоначалник е избран кандидатот кој добил поголем број гласови.

Според Изборниот законик, ако и по вториот круг од кои било причини не се изврши избор на градоначалник, изборната комисија во рок од 15 дена од завршувањето на изборите ја известува Владата. По добивањето на известувањето Владата во рок од 15 дена ќе именува повереник за вршење на работите од надлежност на градоначалникот.

Владата најдоцна во рок од 15 дена по денот на именувањето на повереникот го известува претседателот на Собранието заради распишување на избори за градоначалник.

Државната изборна комисија првичните резултати од изборите добиени по електронски пат ги објавува сукцесивно, а резултатите врз основа на податоците од записниците од општинските изборни комисии, односно од Изборната комисија на Градот Скопје во рок од 12 часа по завршувањето на изборите.

Конечните резултати од изборите ДИК ги објавува веднаш, а најдоцна во рок од 24 часа од денот на нивната конечност.

Во четири општини, пак, Гостивар, Врапчиште, Центар Жупа и Маврово Ростуше денеска ќе нема гласање. Причината е недоволниот одзив на гласачи во првиот круг, поради што ќе се спроведе нова изборна постапка во рок од 60 дена од објавувањето на конечните резултати.

Според Државната изборна комисија (ДИК), во овие општини не беше постигната законската излезност од најмалку една третина (33,33 проценти) од запишаните гласачи, што е услов за изборите да се сметаат за успешни.

Согласно член 132 став 2 од Изборниот законик, во вакви случаи се повторува целата изборна постапка, а повторените избори ќе се одржат во рок од 60 дена од објавувањето на конечните резултати, без повторно условување со цензусот од една третина.

Во првиот круг беа избрани 44 градоначалници.

The post НЕМА ЦЕНЗУС ВО ВТОРИОТ КРУГ, ГРАДОНАЧАЛНИК Е ОНОЈ СО ПОВЕЌЕ ГЛАСОВИ Не се гласа во Гостивар, Врапчиште, Центар Жупа и во Маврово Ростуше appeared first on plusinfo.mk.