Две лица од општина Ново Село се приведени откако полицијата открила нелегална плантажа со канабис во атарот на селото Секирник, струмичко. Од локацијата биле одземени повеќе стебла со различна висина, со вкупна тежина од околу 680 килограми.

Станува збор за З.М. (34) и А.Т.Г. (30), против кои СВР Струмица поднело кривична пријава поради сомнение за неовластено производство и пуштање во промет на наркотични дроги, психотропни супстанции и прекурсори.

Според истрагата, двајцата претходно се договориле, а потоа во скриен дел од парцела на местото викано „Матник“, во атарот на Секирник, ја обработиле почвата и засадиле семе од канабис. Растенијата биле одгледувани со цел, како што се сомнева полицијата, да се произведува марихуана.

Полицијата презела повеќе дејствија и истражни мерки со судска наредба, а во акцијата била вклучена и техничка поддршка од полициски службеници од Регионалниот центар за гранични работи Исток. Така биле обезбедени докази за поврзаноста на двајцата со одгледувањето на канабисот.

По приведувањето, З.М. и А.Т.Г. биле задржани во Полициската станица Струмица. Според МВР, во разговор со полицијата признале дека набавиле семе од канабис, ја обработиле земјата и во мај годинава ја засадиле нелегалната плантажа.

Од локацијата биле одземени повеќе стебла канабис, со различна висина и вкупна тежина од околу 680 килограми.

По поднесувањето на кривичната пријава, двајцата биле изведени пред судија на претходна постапка во Основниот суд во Струмица. За случајот понатаму ќе одлучуваат надлежните органи.

The post 680 КИЛОГРАМИ КАНАБИС ВО СКРИЕНА ПАРЦЕЛА Полицијата откри нелегална плантажа кај Секирник appeared first on plusinfo.mk.