Жителите на Општина Пласница во наредниот период не треба да ја користат водата од јавната водоводна мрежа за пиење, подготовка на храна и други намени поврзани со исхраната, откако лабораториските анализи покажале дека таа е бактериолошки неисправна.

Надлежните институции соопштија дека водата во моментов не е здравствено безбедна за консумирање и апелираат до граѓаните да ги почитуваат препораките сè додека не се потврди дека квалитетот на водата е повторно во согласност со здравствените стандарди.

Во меѓувреме, надлежните служби спроведуваат активности за утврдување на причините за бактериолошкото загадување на водоводната мрежа. По отстранувањето на причините ќе бидат извршени нови лабораториски анализи, по што јавноста ќе биде навремено информирана дали водата повторно е безбедна за употреба.

Од институциите ги повикуваат жителите редовно да ги следат официјалните известувања и да постапуваат согласно препораките, со цел да се заштити јавното здравје.

The post ВОДАТА ВО ПЛАСНИЦА НЕ Е ЗА ПИЕЊЕ Лабораториските анализи открија бактериолошка неисправност appeared first on plusinfo.mk.

Струмица е четврт ден без чиста и безбедна вода од водовот откако во петокот „Комуналец“ соопшти дека анализите на Центарот за јавно здравје покажале дека водата содржи недозволени количини манган и бактерии, поради што не е исправна за пиење. По ова инспектор на АХВ со решение ја забрани водата од водоводната мрежа за пиење и за готвење.

„На јавното претпријатие му е наложено да го информира месното население да не ја користи за пиење водата од градскиот водовод, односно, да обезбеди пивка вода за граѓаните, сè до обезбедување на безбедна вода во градскиот водоснабдителен систем“, соопшти Агенцијата за храна и ветеринарство.

Според комуналното претпријатие причина за ваквата ситуација е неповолната хидролошка состојба, односно, водата содржела многу кал и не било возможно да се исфилтрира до ниво на консумација.

Се очекува градоначалникот на Струмица, Костадин Костадинов и раководителот на „Комуналец“ Стојан Ефтимов попладнево да ја образложат ситуацијата и да ги кажат решенијата за струмичани да добијат пивка вода.

И во Гостивар неколку дена е забранета водата од градскиот водовод, а според последните информаци, квалитетот се подобрува. Од петокот се вршат вонредни анализи, откако претходно гостиварски „Комуналец“ соопшти дека поради присуство на бактерии водата не е безбедна за пиење.

Според локалните медиуми резултатите од првите земени мостри се микробиолошки и хемиско исправни. Се чекаат резултатите од останатите примероци земени викендов, кои најверојатно ќе се комплетираат утре.

„Земени се мостри три дена по ред, првите се исправни, а за останатите ги чекаме резултатите. Мислам дека утре веќе ќе ги имаме, за да се каже дефинитивно дали водата може да се користи за пиење“, рече д-р Берун Мустафа, специјалист по хигиена од Центарот за јавно здравје во Гостивар.

Од јавното претпријатие „Комуналец“ велат дека водата во градскиот водовод редовно се хлорира.

До конечните резултати останува препораката водата да не се користи за пиење.

Во гостиварската вода, исто како и во струмичката беа пронајдени колиформни бактерии, односно ешерихија коли.

The post ВОДATA ВО СТРУМИЦА И ВО ГОСТИВАР ПОЛНA СО БАКТЕРИИ И натаму трае забраната од Агенцијата за храна за пиење и готвење од двата водовода appeared first on plusinfo.mk.