Наместо кон прогрес, СДСМ е партија ориентирана кон пропаст – меѓу низата направени катастрофални штети на државата, со Законот за високо образование кој го донесоа во 2018 година предизвикаа драстично намалување на квалитетот на високото образование во Македонија и го избришаа единствениот македонски универзитет од пошироката Шангајска ранг листа, соопшти ВМРО-ДПМНЕ во одговор на денешната прес-конференција на претседаѕелот на СДСМ, Венко Филипче.

„Промени се потребни, тоа е општата констатација на целата научна и академска фела во државата. Тим од над 60 академски професори, експерти, претставници на институции, органи на студентите, изработија предлог законско решение, за кое во тек е јавна дебата. Ниту е конечно, ниту насилно ќе се истурка, како што СДСМ милува да паничи во јавноста“, соопшти ВМРО-ДПМНЕ.

Традиционална реторика на опозициската партија е дека со законот се врши упад во автономијата на универзитетите, а тоа е апсолутно неточно, се додава во соопштението.

„Единствено се бара отчетност од универзитетите за трошењето на јавните финансии, а патем, откако ВМРО-ДПМНЕ ја раководи Владата значително се зголемени износите кои ги добиваат. Во 2024 година затекнавме буџет за високо образование од 5 милијарди денари, а оваа година изнесува над 7,5 милијарди денари. Буџетот за наука пак, го зголемивме од 380 милиони денари на 773 милиони денари. Ова можеше да го направи и СДСМ доколку ги скратеше парите за Заевци, Артанци и други „другари“ од коалицијата кои нагло се збогатија и исчезнаа од државата“, се вели во соопштението на ВМРО-ДПМНЕ.

Новиот предлог закон дава предност при вработувањето на државните универзитети на најдобрите студенти од генерацијата, на студентите добитници на Инженерски прстен и на оние кои студирале на некој од најдобрите 100 светски универзитети, додава партијата.

„Така најдобрите умови ќе ги задржиме во државата, а сите ќе ги стимулираме што повеќе да се заложуваат за личен и професионален развој. Потсетуваме дека во време на владеењето на СДСМ и на ДУИ, бројот на ученици се намали за 17.000, а на студенти за 7.000 за само 7 години. Тој тренд го спречивме, а дел од младите и се враќаат во својата земја“, порачува ВМРО-ДПМНЕ.

Законот, се вели во соопшението, предвидува и враќање на одредени права на студентите, кои со законот на Рената Дескоска, министерка на СДСМ, беа укинати во 2018 година, а најмногу тоа го почувствуваа студентите со попреченост на кои им беше скратено правото да студираат бесплатно на сите три циклуси на студии.

„Точно е дека се зајакнуваат критериумите за напредување во звања. Нема ништо лошо во тоа да се стимулира научниот труд на наставно-научниот кадар на универзитетите. Законот предвидува секој кој сака да напредува во академската кариера да изработува научно-истражувачки трудови, од кои дел треба да бидат објавувани во меѓународни научни списанија со импакт фактор, а за што Министерството за образование и наука секоја година ги покрива трошоците на авторите за што се објавуваат јавни конкурси, така што, разобличуваме уште една лага на лидерот на СДСМ. Потсетуваме дека за еден универзитет да се најде помеѓу најдобрите 1.000 на Шангајската ранг листа, треба годишно да објавува најмалку 1.200 научни трудови. Законот на СДСМ од 2018 година доведе до тоа нашите универзитети да паднат на бројка од 300 до 500 трудови годишно“, се вели во реакцијата.

Ред мора да постои и меѓу приватните високо образовни установи, додава ВМРО-ДПМНЕ,

„СДСМ не успеа да воспостави ред и затоа сега им е чудно дека секој треба да го почитува законот и да исполнува услови за работа. Автономијата на високообразовните установи е поврзана со отчетност и не може да функционира надвор од правниот поредок. Министерот за образование и наука отсекогаш имал право да запре акт кој не е во согласност со законот, така што ова не е новина како што СДСМ презентира. Докторски студии пак, согласно предлогот, ќе можат да организираат првите 4 државни универзитети, што ќе стимулира конкурентност, а конкуренцијата носи квалитет. Дополнително, новиот закон е насочен кон интернационализација на македонското високо образование, вмрежување на домашните со странски универзитети, организирање заеднички студиски програми и издавање двојни дипломи“, соопшти ВМРО-ДПМНЕ.

Ги охрабруваме СДСМ, се додава, наместо само критики, во јавноста да изнесат и сугестии за подобрување на содржината на нацрт законското решение – така ќе покажат државност и грижа  навистина да се подобри квалитетот на високото образование, а сé друго е водење дневна политика, манипулации и обиди за собирање политички поени.

Претседателот на СДСМ, Венко Филипче денеска на прес-конференција побара да се повлече законот, кој, според него, е катастрофално лош, води кон владина контрола над универзитетите и рушење на автономијата на универзитетите и врши дискриминација кај младите.

The post НЕ СЕ ПРАВИ УПАД ВО УНИВЕРЗИТЕТИТЕ, ТУКУ СЕ БАРА ОТЧЕТНОСТ Кастрофални грешки во образованието направи СДСМ, а ВМРО-ДПМНЕ ги решава проблемите appeared first on plusinfo.mk.

Зголемени се средствата за поддршка на научно-истражувачките проекти, рече премиерот Христијан Мицкоски, одговарајќи на новинарско прашање за плановите на Владата во областа на образованието во новата година.

– Јас доаѓам од образованието, универзитетски професор сум, и логично е дека образованието ќе биде еден од врвните приоритети. Ценам дека без квалитетно образование и без квалитетна наука не можеме, ниту како нација да јакнеме, ниту како држава да јакнеме. И во име на тоа ги зголемуваме средствата кои се за поддршка на научно-истражувачките проекти. Ако започнавме со една состојба од 340 милиони денари во 2023, веќе во 2024 и 2025 се доближивме до ставката од 680 милиони денари, за сега веќе за следната година да имаме преку 770 милиони денари токму за ова. Дали е доволно? Не е. Дали треба повеќе? Треба. Но е многу повеќе, би рекол, од тоа што беше состојба која што ја затекнавме. Така што очекувам во годините кои што следат, и со измените во Законот за високо образование, во кој што моите колеги кои ќе сакаат да градат академска кариера ќе треба малку повеќе да пишуваат трудови, научно-истражувачки трудови кои ќе бидат објавувани во списанија со фактор на влијание и кои ќе бидат дел од базата на Томсон Ројтерс – изјави премиерот.

Доколку како држава сакаме еден универзитет да биде во првите илјада според Шангајската листа, мора да се зголеми бројот на научни трудови во списанија со фактор на влијание.

– Бидејќи направивме една анализа која што нè води кон тоа дека, ако сакаме да имаме универзитет кој што ќе биде во првите илјада според Шангајската листа, мораме меѓу осум и десет пати да го зголемиме бројот на научни трудови коишто, како држава, како универзитети, треба да ги објавуваме во научни списанија со фактор на влијание, а се дел од базата Томсон Ројтерс или позната како Web of Science – рече тој.

Според Мицкоски, со последните зголемувања, прилично се достоинствени примањата на редовните професори, на вонредните, на доцентите и на асистентите.

– И мислам дека сега треба да се свртиме кон науката и за тоа што е основна дејност на еден професор. Покрај образовната, тој има и научна дејност, односно обврска да твори и во науката. Очекувам во годините кои следат, по усвојувањето на новиот Закон за високо образование, да имаме плодотворна активност на моите колеги и, на крајот на овој мандат од оваа влада, да се радуваме на параметарот во кој ќе имаме барем еден универзитет во првите 1.000 според Шангајската листа – додаде премиерот.

The post МАКЕДОНСКИТЕ ПРОФЕСОРИ ТРЕБА ДА ПИШУВААТ 10 ПАТИ ПОВЕЌЕ НАУЧНИ ТРУДОВИ Се вложуваат пари за поддршка на научно-истражувачките проекти appeared first on plusinfo.mk.

Професорите, научниците, истражувачите од  јавните универзитети и од МАНУ ќе можат бесплатно да ги користат научните бази на платформата Web of science, најави министерката за образование Весна Јаневска која ја промовираше соработката со сопственикот на базата – Clarivate.

Владата на седница оваа пролет ја донесе одлуката за соработка, а Министерството за образование и наука во јули го склучи договорот за пристап до Web of science со сопственикот Clarivate.

Претставникот на оваа компанија, Радек Бучиковски, со неговиот тим денеска во Скопје ги претставија можностите на платформата Web of science пред членовите на македонската академска и научна заедница.

– Clarivate е многу горда на оваа нова соработка и навистина ја цениме довербата што ја имате во нас. Ние имаме над 6 години искуство работејќи со влади, универзитети и со академски заедници во многу земји низ светот. Веруваме дека тоа искуство ќе ѝ помогне на Северна Македонија за унапредување на истражувањата и на иновациите – изјави Бучиковски.

Министерката за образование Весна Јаневска соопшти дека со користење на оваа база, научниците, професорите и истражувачите ќе имаат пристап до 26.000 списанија и 182 милиони записи.

– Тоа е важно бидејќи на нашите научници ќе им ја олесни нивната работа, ќе им даде пристап до најновите достигнувања и, она што е во моментов актуелно во светот, ќе им олесни да ги креираат своите трудови, своите проекти. Оваа соработка ќе придонесе за поголема видливост на нашата научно-истражувачка работа во светот и соработка со видни универзитети. Но, основно е она што ние го имаме за цел – еден од нашите универзитети да го ставиме меѓу првите 1.000 на Шангајската листа. За да се позиционира таму, потребно е годишно да објавуваат 1.200 трудови во списанија со импакт-фактор. За жал, кај нас тоа објавување е на ниско ниво. Очекувам соработката со Web of science да го поткрене нивото – и на квалитетот на трудовите, но и на квантитетот и брзината со која ние ќе можеме да ги исполнуваме условите – изјави Јаневска.

Посочи дека ќе бидат потребни и измени на законите за високо образование и за научно-истражувачка работа во кои, како рече, „критериумите за избор ќе бидат малку построги“.

– Државата ќе побара од научниците, професорите, истражувачите, кои сега имаат услови, да ѝ возвратат на државата со тоа што ќе истражуваат и ќе пишуваат и да поткренеме барем еден од нашите универзитети погоре на таа листа – рече Јаневска.

Министерката додаде дека Владата продолжува да инвестира во науката со тоа што годинава е издвоен буџет од 680 милиони денари од кои 370 милиони денари се веќе распределени.

– Финансираме објавување на трудови, објавување трудови во списанија со импакт-фактор, учество на наши научници и истражувачи на меѓународни конференции, објавуваме повици за научно-истражувачки проекти, финансираме и поддржуваме меѓународни проекти. Тоа е важно, за да го направиме нашето општество попродуктивно, поиновативно и попросперитетно во иднина. Со овој пристап, де факто нашите научници можат да придонесат за развој на општеството – нагласи Јаневска.

The post БЕСПЛАТЕН ПРИСТАП ДО ПЛАТФОРМАТА WEB OF SCIENCE На располагање им се 26.000 списанија и 182 милиони записи на научниците, професорите и на истражувачите appeared first on plusinfo.mk.