Заменик-претседателот на Советот за безбедност на Русија, Дмитриј Медведев, оцени дека евентуалното приближување на Германија до поседување нуклеарно оружје би претставувало „несомнен casus belli“ (повод за војна) и причина за преземање најшироки мерки на руски одговор во рамките на доктрината за нуклеарно одвраќање.

Во текст објавен за РТ, Медведев наведе дека таквиот развој на настаните би предизвикал сериозна загриженост не само во Москва, туку и во Соединетите Американски Држави, особено во контекст на можни нови преговори за договорот СТАРТ-4 и евентуално вклучување на Кина во нуклеарните аранжмани.

Тој предупреди на, како што рече, сценарио на „нуклеарна Европа под водство на милитаристичка Германија“, тврдејќи дека дел од потенцијалниот арсенал би можел да биде надвор од контрола на НАТО, што според него би имало глобални безбедносни последици.

Медведев го обвини Западот за подготвеност да ги игнорира или прекршува меѓународните договори, вклучително и поранешните ветувања дека НАТО нема да се шири кон исток, наведувајќи дека политичките договори често се напуштаат поради „политичка целисходност“.

– Брзината и дрскоста со кои западните сили денес ги напуштаат фундаменталните меѓународни документи и принципи во корист на озлогласената политичка целисходност се вџашувачки – изјави Медведев.

Во делот посветен на Германија, тој оцени дека официјален Берлин води политика која, според него, подразбира стремеж кон стратешки пораз на Русија и поддршка за Украина, која ја опиша како посредно вклучена во поширок конфликт.

– Германците се подготвени да ги користат украинските вазали како евтина монтажна работилница за своето производство – наведе Медведев.

Тој додаде дека германското политичко раководство ја прогласило Русија за „главна закана за безбедноста и мирот“ и дека во Берлин официјално е објавена целта за нанесување „стратешки пораз“ на Москва.

Според Медведев, Германија, како и Европската Унија во целина, немале ниту повод ниту објективни причини толку силно да застанат во одбрана на Украина и да ја прогласат Русија за свој „вечен непријател“.

Тој предупреди дека Русија мора да одржува високо ниво на борбена готовност на западниот правец, повикувајќи се на историски паралели со Втората светска војна и нагласувајќи дека не смее да се повтори „трагедијата од 1941 година“.

На крајот Медведев повтори дека приближувањето на Германија кон нуклеарен капацитет или промена на европската безбедносна архитектура без, како што тврди, соодветна контрола, би можеле да предизвикаат руски одговор во согласност со руските стратешки нуклеарни доктрини.

The post ДОКОЛКУ СЕ ПРИБЛИЖИ ДО ПОСЕДУВАЊЕ НУКЛЕАРНО ОРУЖЈЕ – ТОА БИ БИЛО ПОВОД ЗА ВОЈНА Медведев упати закани до Германија appeared first on plusinfo.mk.

Администрацијата на американскиот претседател Доналд Трамп подготвила интерен список на „добри и лоши“ членки на НАТО, како дел од разгледувањето можни мерки против сојузниците кои не ја поддржале американската воена операција против Иран, се вели во текст на Политико.

Според дипломатски извори и американски претставници, земјите биле рангирани според нивниот придонес во Алијансата и нивната подготвеност за соработка со Вашингтон. Планот бил подготвен во пресрет на последната посета на генералниот секретар на НАТО Марк Руте на Вашингтон.

Овој потег се смета за уште еден сигнал дека претседателот Доналд Трамп има намера да го засили притисокот врз сојузниците кои, според него, не ги исполнуваат обврските кон НАТО и американските интереси. Воедно, тоа дополнително ги продлабочува тензиите во Алијансата, која веќе се соочува со предизвици поради ставовите на Трамп од барањата поврзани со Гренланд до заканите за можно американско повлекување од НАТО.

Американскиот министер за одбрана Пит Хегсет уште во декември ја најави оваа политика, посочувајќи дека „примерните сојузници“ како Израел, Полска, Германија, балтичките држави и други партнери ќе уживаат „посебна наклонетост“ од Вашингтон, додека оние што не вложуваат доволно во колективната одбрана ќе се соочат со последици.

Еден дипломатски извор изјавил дека Белата куќа веќе располага со документ во кој земјите се поделени на „добри“ и „лоши“ сојузници, но засега не е познато какви конкретни награди или санкции би следувале.

Портпаролката на Белата куќа порача дека САД „ќе запомнат“ кои земји не ја поддржале операцијата „Епски бес“, додавајќи дека Вашингтон со години ги штити своите сојузници со илјадници војници, без секогаш да добива соодветна поддршка за возврат.

Според извештаите, меѓу земјите кои би можеле да имаат корист од новата политика се Романија и Полска, кои важат за блиски партнери на Вашингтон и се подготвени да примат дополнителни американски сили. Полска веќе покрива голем дел од трошоците за околу 10.000 американски војници распоредени во земјата, додека романската база „Михаил Когалничеану“ има капацитет за проширување.

Од друга страна, Шпанија, како и Велика Британија и Франција, наводно ги одбиле или одложиле американските барања поврзани со операцијата. Во меѓувреме, Бугарија дискретно ја поддржала американската логистика на Блискиот Исток.

Шпанија веќе се најде под критики поради противењето на барањето трошоците за одбрана да достигнат 5 проценти од БДП, додека балтичките земји и Полска беа пофалени поради високите инвестиции во безбедноста.

Сепак, дел од поранешните американски функционери се сомневаат дека администрацијата на Трамп има доволно простор дополнително да ги влошува односите со европските сојузници.

The post ТРАМП ПРАВИ ЦРНА ЛИСТА ВО НАТО Кои земји се добри, а кои ќе бидат казнети? appeared first on plusinfo.mk.

САД ќе повлечат околу 5.000 војници од Германија, објави Пентагон.

Главниот портпарол на Пентагон, Шон Парнел, изјави дека повлекувањето се очекува да биде завршено во следните шест до 12 месеци.

Овој потег доаѓа во услови на зголемени тензии меѓу американскиот претседател Доналд Трамп и европските сојузници, особено поради несогласувањата околу војната во Иран.

Трамп претходно оваа недела се закани дека ќе го намали бројот на американски војници во Германија, по судирот со германскиот канцелар Фридрих Мерц, кој изјави дека Иран ги става САД во неповолна позиција во преговорите за завршување на конфликтот.

Американскиот претседател во средата посочи дека Пентагон веќе разгледува повлекување на дел од околу 40.000 американски војници стационирани во Германија.

Тој преку социјалните мрежи најави дека се анализира и можно прераспоредување на американските сили, имајќи предвид дека токму во Германија се наоѓа седиштето на Европската команда на САД.

The post САД ПОВЛЕКУВААТ ВОЈНИЦИ ОД ГЕРМАНИЈА Пентагон најави заминување на 5.000 припадници на армијата appeared first on plusinfo.mk.

Претседателот на Србија Александар Вучиќ, коментирајќи ја иницијативата на американските конгресмени за интегрирање на Косово во НАТО, изјави дека ќе се бори да го спречи тоа да се случи.

– Тие го направија тоа и преку Хрватска, преку воениот сојуз и Албанија, кои веќе се членки на НАТО. Наскоро ќе имаме важни вежби со нив, разговараме со нив, се надеваме дека тоа нема да се случи – изјави Вучиќ.

Тој потсети дека има четири членки на НАТО кои не го признале Косово и дека не гледа како тоа би можело „лесно да помине“.

Американските конгресмени Кит Селф, Ричи Торес и Мајк Лолер презентираа резолуција во Претставничкиот дом со која изразуваат силна поддршка за интеграција на Косово во НАТО.

Како што оценуваат конгресмените, вклучувањето на Косово во НАТО би можело да придонесе за спречување на посериозни безбедносни последици на Балканот.

Четири членки на НАТО – Грција, Романија, Словачка и Шпанија – не го признаваат Косово, што, поради принципот на консензус, го отежнува неговото вклучување во програми како што се Партнерството за мир и Акцискиот план за членство.

The post ВО САД ПОКРЕНАТА ИНИЦИЈАТИВА ЗА ПРИЕМ НА КОСОВО ВО НАТО Вучиќ остро се спротивставува appeared first on plusinfo.mk.

Доналд Трамп го нарече „фантастичен“, демократите аплаудираа на спомнувањата на Магна карта, а заедничката седница на американскиот Конгрес го поздрави говорот со долги овации.

Обраќањето на кралот Чарлс пред американските законодавци, иако формално непартиско, не бегаше од политиката. И, иако претседателот не се навреди – „Одржа одличен говор, бев многу љубоморен“ – рече Трамп – јасно насочените алузии на теми кои тој претходно ги омаловажувал не ѝ промакнаа на американската јавност.

„Под слојот на шеги и протокол, кралот Чарлс испрати суптилни критики кон Трамп“ – пишува „Вашингтон пост“ во наслов. „Кралот Чарлс повикува на контрола врз извршната власт“ – наведува „Њујорк тајмс“.

– Фактот дека говорот на Чарлс беше толку внимателно склопен и изнесен со топлина и шарм, сам по себе претставуваше тивок укор за расфрланите и недисциплинирани јавни настапи на самиот претседател Трамп – оценува професорот Филип Марфи (Philip Murphy) од Универзитетот во Лондон.

Политичка порака под дипломатски плашт

Со оглед дека „специјалните односи“ меѓу Обединетото Кралство и САД се видливо разнишани, многу зависеше од овој говор – најзначајниот во досегашното владеење на Чарлс.

Во него се нагласува важноста на НАТО, се повикува на континуирана поддршка за Украина и се предупредува на ризиците од изолационизмот. Спомнувањата на Магна карта и принципот дека извршната власт мора да биде ограничена со систем на „проверки и балансирање“ беа дочекани со ентузијастички аплауз од демократите.

Посебно одекна цврстото инсистирање на „мојот премиер“, Кир Стармер, кого Трамп јавно го навредуваше, како и кралската наклонетост кон британскта Кралската морнарица, која Трамп ја исмејуваше во своите изјави поврзани за војната во Иран.

– Тешко е да се замисли дека можел да оди подалеку – и во кажаното, и во премолченото. Одлично е одмерен: многу храбро, многу паметно, многу прецизно – вели историчарот Ентони Селдон (Anthony Seldon), оценувајќи го говорот како „исклучителен“.

Како се коваше говорот

Ваквите говори се тимска работа. Добрите говорници одлично го познаваат карактерот на личноста за која пишуваат.

Клучната фигура во овој потфат е личниот секретар на кралот, сер Клајв Олдертон (Clive Alderton) – главниот посредник со „Број 10“ (No 10, односно Даунинг стрит 10 – седиштето на британската влада). Олдертон е искусен дипломат и поранешен амбасадор, кој го советувал Чарлс уште како принц од Велс, а сега и како крал, координирајќи се со Форин офисот, британското Министерство за надворешни работи.

Првата верзија на говорот ги поставува државните, дипломатските и трговските цели. Бакингемската палата, Даунинг стрит и Форин офис работеле синхронизирано – без простор за грешки.

Во процесот биле вклучени и Тео Рајкрофт (Theo Rycroft) и Тобин Андреа (Tobyn Andreae), додека од американска страна ставовите на Белата куќа дискретно ги пренесувале Кристијан Тарнер (Christian Turner) и Џејмс Роско (James Roscoe).

Нацртите се усогласувале до последен момент, а самиот крал активно интервенирал – со рачни забелешки, додавања и бришења.

Суптилни пораки, долгорочен ефект

Говорот содржеше и хумор, кој ја олесни тежината на пораката. Според Марфи, резултатот бил прифатлив за голем дел од американската политичка елита – ако не и за администрацијата на Трамп.

Но, ефектот не треба да се мери веднаш.

– Трамп веќе во понеделник ќе биде пак – Трамп – вели Селдон.

– Вистинското влијание се мери долгорочно: како ќе постапуваат републиканците и демократите во иснина; како ќе гледаат на НАТО, на војната во Украина, на унилатералното однесување на САД и на проширувањето на извршната власт надвор од рамките што ги замислиле основачите на државата – Мора да се гледа на долг рок. Повеќе од ова не можеше – додава тој.

Биографот Џонатан Димблби (Jonathan Dimbleby) смета дека говорот содржел скриен укор кон трампизмот и елоквентен повик за зачувување на демократијата и владеењето на правото.
Тој додава дека односите меѓу Европа и САД се поважни од кога било.

– Нема ништо во говорот што „Број 10“ не би го одобрил; голем дел е изработен токму од владата и Форин офис – изјави Димблби за Би-би-си.

Поранешниот амбасадор Ким Дарок (Lord Darroch) оценува дека говорот бил храбар, одлучен и навистина одличен – иако без директни напади, полн со индиректни укори. Тој ги посочува темите како климатските промени и поддршката на НАТО за САД по нападите на 11 септември како суптилни сигнали, спротивни на ставовите на Трамп.

Реакции од републиканците

Републиканскиот конгресмен Мајкл Баумгартнер (Michael Baumgartner) оцени дека Чарлс завршил одлична работа за Велика Британија, но воедно додаде:

– Не се важни зборовите, туку делата. Ќе треба да видиме конкретни чекори од британскиот народ за исполнување на тие ветувања. Во кралот видовме токму тоа што традиционално го очекуваме од Велика Британија – рече Баумгартнер.

КРАЛОТ ЧАРЛС ТРЕТИ МУ ОДРЖА ЛЕКЦИЈА НА ДОНАЛД ТРАМП Брилијантниот британски хумор го освои Конгресот

The post КАКО СЕ KАЛЕШЕ ГОВОРОТ ЗА КРАЛОТ ЧАРЛС ВО КОНГРЕСОТ Тимската работа вроди брилијантен плод appeared first on plusinfo.mk.

Администацијата на американскиот претседател, Доналд Трамп размислува за намалување на бројот на американските војници стационирани во Германија.

Оваа најава следува по неговата вербална расправија со германскиот канцелар Фридрих Мерц во врска со политиката кон Иран.

„Соединетите Американски Држави во моментов ја разгледуваат можноста за намалување на нашето воено присуство во Германија. Одлуката ќе биде донесена многу скоро“, напиша Трамп на мрежата Трут соушл.

Во 2024 година во Германија биле распоредени повеќе од 35.000и0 американски војници, додека според германските медиуми нивниот број во моментов е приближно 50.000.

И двата претседателски мандати на Трамп се обележани со отворени критики кон НАТО, како и со најави за намалување на американското воено присуство во Германија и во други европски земји.

Изјавата доаѓа еден ден откако Трамп упати критики кон Мерц, обвинувајќи го дека „не знае што зборува“ во врска со Иран, откако германскиот канцелар претходно оцени дека Вашингтон нема јасна стратегија и оти Техеран ги понижува САД.

По размената на острите зборови, американскиот државен секретар Марко Рубио телефонски разговарал со германскиот министер за надворешни работи Јохан Вадефул за состојбата со Иран и за потребата од обезбедување слободна пловидба низ Ормускиот Теснец.

Во меѓувреме, Мерц се обиде да ги ублажи тензиите, нагласувајќи дека односите со Трамп остануваат добри и покрај несогласувањата околу Иран.

The post САД ЌЕ ГО НАМАЛАТ БРОЈОТ НА ВОЈНИЦИТЕ ВО ГЕРМАНИЈА Трамп најавува дека одлуката ќе биде донесена наскоро appeared first on plusinfo.mk.

Од Европската Унија  многу се заинтересирани за Коридор 8. Го прогласија за втор најзначен безбедносен коридор во НАТО Алијансата, затоа што почнува во Италија преку Драч, Тирана, Охридското Езеро, Скопје, Деве Баир, Софија, Бургас и Врана и завршува во Одеса, и е многу значаен во овие глобални случувања, изјави вицепремиерот и министер за транспорт Александар Николоски.

Николоски посочува дека од ЕУ се заинтересирани и за  Коридор 10,  најдолгиот и највитален коридор, кој почнува во пристаништето Пиреја и завршува во Хелсинки. Така што многу се заинтересирани за двата коридора.

– Ние имаме среќа што двата паневропски коридори се сечат источно од Скопје, а третиот европски Коридор 4 поминува паралелно со нас во Бугарија, така што имаме уникатна положба и се обидуваме да ја искористиме. Оваа географска позиција сакаме да ја искористиме и да донесе економски бенефит за граѓаните и подобар живот на граѓаните вели Николоски во разговор во поткаст на порталот Курир.

The post МАКЕДОНИЈА ИМА УНИКАТНА ПОЛОЖБА НА ВКРСТУВАЊЕ НА ДВА КОРИДОРА Николоски вели дека Европската унија е заинтересирана за нивна изградба appeared first on plusinfo.mk.

Северноатлантскиот договор, со кој е формиран сојузот НАТО воопшто не содржи одредба што предвидува можност за исклучување на земја-членка од организацијата, вели претставник на Алијансата.

Реакцијата доаѓа откако дел од западните медиуми објавија, повикувајќи се на интерен документ на Министерството за одбрана на САД, дека администрацијата на претседателот Доналд Трамп размислува за замрзнување на членството на Шпанија во НАТО поради несогласувањата поврзани со политиката кон Иран.

„Основачкиот договор на Алијансата не предвидува никаква одредба за замрзнување на членството или за исклучување на земја“, коментираше за Би-Би-Си претставник на Алијансата.

Од друга страна, портпаролката на Пентагон, Кингсли Вилсон, за британскиот јавен сервис истакна дека и покрај сè што САД направиле за своите сојузници, тие „не биле со нив“.

Таа нагласи дека Министерството за војна ќе му обезбеди на претседателот Трамп „сигурни опции за да гарантира дека сојузниците веќе нема да бидат тигар од хартија, туку ќе си ја завршат својата работа“.

Шпанскиот премиер Педро Санчез денеска изјави дека неговата земја ќе остане членка на НАТО.

– Шпанија е лојална членка на Алијансата која ги исполнува своите обврски, но во рамките на меѓународното право – изјави Санчез на Самитот на ЕУ на Кипар.

Тој е еден од најгласните критичари во Европа на американско-израелската војна против Иран, поради што повеќепати беше вербално нападнат од американскиот претседател Доналд Трамп.

Западните медиуми претходно објавија дека во Пентагон циркулира белешка со предлог-мерки против неколку членки на НАТО кои не ја поддржале американската војска во војната против Иран.

Во случајот со Шпанија се споменува можност за суспензија на нејзиното членство на иницијатива на САД.

– Ние не работиме врз основа на електронски пораки, туку врз основа на официјални документи и ставови на владата на САД. Ставот на шпанската влада е јасен: апсолутна соработка со сојузниците, но секогаш во рамките на меѓународното право – рече Санчез.

Владата во Мадрид ја оцени војната против Иран како „нелегална“ и спротивна на меѓународното право, па им забрани на САД да ги користат воените бази на југот на земјата за напади врз Иран. Исто така, го затвори воздушниот простор за американски воени авиони кои учествуваат во нападите.

Во интерната комуникација на Пентагон се споменува и Обединетото Кралство, кое би можело да ја изгуби поддршката на САД во спорот со Аргентина околу Малвинските (Фолкландските) Острови.

Лондон првично, исто така, забрани користење на своите бази за напади врз Иран.

Италија и Германија денеска застанаа зад Шпанија по медиумските извештаи за можна суспензија на земјата од НАТО.

– Мислам дека НАТО мора да остане обединет. Тоа е нашата сила – изјави италијанската премиерка Џорџа Мелони во Никозија, каде што учествува на самит на ЕУ.

Поддршка за Шпанија изрази и Германија. Портпаролот на германската влада изјави дека членството на Шпанија во НАТО не е доведено во прашање.

– Шпанија е членка на НАТО и не гледам причина тоа да се промени – рече портпаролот на редовната прес-конференција во Берлин.

Американскиот претседател, исто така, ѝ замерува на Шпанија што одбива да ги зголеми трошоците за безбедност на 5 проценти од БДП до 2035 година, од кои 3,5 проценти би биле наменети исклучиво за воени расходи, како што беше договорено на минатогодишниот самит на НАТО во Хаг.

Мадрид смета дека може да ги исполни целите за воени капацитети поставени од НАТО со ограничување на воените трошоци на 2 проценти од БДП.

The post ДОГОВОРОТ ЗА НАТО НЕ ПРЕДВИДУВА ИСКЛУЧУВАЊЕ НА ЗЕМЈИ ЧЛЕНКИ Италија и Германија со поддршка на Шпанија, по објавите дека САД сакаат да ја исклучат од Алијансата appeared first on plusinfo.mk.

Полскиот премиер Доналд Туск денеска изјави дека прашањето е дали САД ќе бидат „лојални“ на својата посветеност кон НАТО за одбрана на Европа во случај на руски напад и ја повика Европската Унија да стане „вистински сојуз“ за заштита на континентот.

Туск за „Фајненшл тајмс“ изјави дека „најголемото и најважното прашање“ за Европа е дали САД се подготвени да бидат лојални, како што е предвидено во договорите на НАТО, и предупреди дека Русија би можела да нападне членка на НАТО во „месеците“ што доаѓаат.

– За целото источно крило, моите соседи… прашањето е дали НАТО е сè уште организација подготвена, политички и логистички, да реагира, на пример, против Русија ако се обидат да нападнат – рече Туск.

Тој додаде дека некои членки на НАТО, предводени од САД, „се преправале дека ништо не се случило“ кога околу 20 руски дронови го нарушиле полскиот воздушен простор минатата година.

– Ова е нешто навистина сериозно. Зборувам за краткорочни перспективи, а не за месеци или години. Навистина е важно за нас да знаеме дека сите ќе ги сфатат обврските на НАТО толку сериозно како што ги сфаќа Полска – нагласи Туск.

Тој рече дека нема „никакви комплекси“ во врска со односите меѓу САД и Полска.

– Вашингтон се однесува кон Полска како кон свој најдобар и најблизок сојузник во Европа. Но, за мене вистинскиот проблем е што ќе се случи во пракса ако нешто се случи – рече Туск, кој додаде дека сака да верува дека Член 5, кој предвидува дека НАТО ја брани која било од своите земји-членки ако биде нападната, сè уште важи.

Полска веќе ја исполнува целта на НАТО да троши пет проценти од својот бруто-домашен производ за одбрана, како што побара американскиот претседател Доналд Трамп, што повеќето земји-членки сè уште не го достигнале.

The post САД НЕ СЕ СИГУРЕН ПАРТНЕР, ЕУ ДА СТАНЕ ОДБРАНБЕН СОЈУЗ Полска сѐ повеќе скептична кон НАТО appeared first on plusinfo.mk.

Малите држави во НАТО немаат пресудна моќ при носењето на одлуките, но знаат да ја искористат ситуацијата во своја корист кога за тоа постои можност, изјави албанскиот премиер Еди Рама, коментирајќи ја позицијата на Албанија на глобалната политичка сцена.

Рама, во своето излагање за надворешната политика и односите во Северноатлантската алијанса, во разговор за грчкиот весник „Катимерини“ појасни дека во меѓународната дипломатија одговорноста за неуспесите најчесто паѓа врз големите сили, додека малите членки се идентификуваат со позитивните резултати.

– Ние сме членка на НАТО, но не одлучуваме многу таму. Кога Алијансата ќе направи нешто добро, како што беше ослободувањето на Косово, ние велиме дека сме направиле одлична работа. Кога НАТО прави грешки, како повлекувањето од Авганистан, велиме дека тоа е нивна вина. Логиката е едноставна: големите ја преземаат вината, а малите ги преземаат заслугите кога ќе се случи нешто позитивно – истакна Рама.

Во врска со прашањето за енергетските рути во регионот и можноста Албанија да стане нова влезна точка за природен гас во Европа, премиерот Рама нагласи дека за вакви стратешки прашања е неопходна тесна координација со Соединетите Американски Држави. Тој потенцира дека за одредени теми може да се разговара независно од европските партнери, но соработката со САД е од суштинско значење и без нивна согласност не се откриваат детали за вакви планови.

Албанскиот премиер се осврна и на билатералните односи со Италија, карактеризирајќи ги како одлични, особено во областа на миграциската политика. Тој додаде дека Албанија во континуитет одговара позитивно на барањата од официјален Рим, нагласувајќи ја притоа силната соработка со италијанската премиерка Џорџа Мелони.

The post РАМА НЕ МОЖЕ ДА ЗБОРУВА ЗА ЕНЕРГЕТСКИТЕ ПЛАНОВИ БЕЗ ДОЗВОЛА ОД САД Албанија како мала земја не одлучува многу во НАТО appeared first on plusinfo.mk.