Американскиот претседател Доналд Трамп и европските лидери имаат иста цел за Украина праведен и траен прекин на огнот, изјави британскиот премиер Кир Стармер, додека продолжуваат мировните напори околу планот предводен од САД за завршување на војната со Русија.

Стармер нагласи дека постојат голем број нерешени прашања, но ги отфрли тврдењата дека неговиот оптимизам слабее пред денешниот телефонски повик со сојузниците од Коалицијата на подготвените.

Ова доаѓа по предупредувањето на генералниот секретар на НАТО, Марк Руте, кој рече дека Европа мора да биде подготвена за можен конфликт од размерите што ги искусиле нашите баби и дедовци.

За време на посетата на Норфолк, на прашање дали има простор за напредок или неговите надежи се „исцрпени“, Стармер одговори: „Не, мора да постигнеме напредок“.

– Она што го сака претседателот Трамп, она што го сака Украина, она што го сакаат Европејците, сето тоа е исто, праведен и траен мир во Украина по речиси четири години од агресијата на Путин и Русија. Ние работиме кон таа цел – истакна британскиот премиер.

Тој додаде дека Украинците платиле многу висока цена и дека секој можен прекин на огнот мора да биде фер и долготраен.

Овие изјави следуваат по разговорот што Стармер, францускиот претседател Емануел Макрон и германскиот канцелар Фридрих Мерц го имале вчера со американскиот претседател Трамп.

Трамп соопшти дека дискутирале за можните сценарија за завршување на војната „во прилично силни термини“, додавајќи дека Европа сака средба со САД и Украина веќе овој викенд. Тој повтори дека смета оти претседателот Зеленски „мора да биде реалистичен“.

– Ќе донесеме одлука во зависност од тоа со што ќе се вратат – изјави Трамп за време на сесијата со прашања и одговори во Белата куќа.

Британската влада соопшти дека сите лидери се согласиле дека ова е критичен момент за иднината на Украина и евроатлантската безбедност. Мировните напори продолжуваат интензивно наредните денови.

Стармер копретседаваше со повик со Зеленски, Макрон, Мерц и претставници од околу 30 земји, каде беа презентирани најновите информации за мировните преговори предводени од САД.

Коалицијата на подготвените – група земји предводена од Велика Британија и Франција, вети продолжена поддршка за Украина и одвраќање на Русија во случај на прекин на огнот.

Портпаролот на британската влада изјави дека планирањето на потенцијалните мировни сили е детално и веќе се спроведуваат извидувачки мисии во Украина, со цел да се утврди кои единици би можеле да се распоредат и кои би биле нивните задачи.

– Премиерот јасно стави до знаење дека сме подготвени да испратиме војници по завршување на непријателствата – рече портпаролот.

Во меѓувреме, британските претставници потврдија дека е постигнат напредок на состаноците меѓу советниците за национална безбедност, вклучително и британскиот советник Џонатан Пауел.

Зеленски, кој повтори дека Украина нема да отстапи територии и се спротивстави на американскиот притисок за отстапки, изјави дека неговиот тим ќе ги достави своите најнови мировни предлози до американските преговарачи во среда.

Европските сојузници ја поддржуваат Украина во нејзината цел секое решение да биде праведно, да го спречи идниот руски напад и да обезбеди долгорочна безбедност на континентот.

Украина и САД ќе разговараат и за плановите за повоена реконструкција и економски развој. Киев работи на документ од 20 точки што би ги дефинирал параметрите за крај на војната.

– Оваа недела може да донесе вести за сите нас, и за ставање крај на крвопролевањето – изјави Зеленски за време на разговорите на Коалицијата на подготвените.

The post ТРАМП И ЕВРОПА ГО БАРААТ ИСТОТО Стармер тврди дека сите притискаат за „праведен и траен“ мир во Украина appeared first on plusinfo.mk.