САД ќе им предадат две исклучително високи командни места во НАТО – во Неапол, Италија и Норфолк, Вирџинија на европски офицери, изјави вчера воен извор за британските медиуми.

Одлуката е во согласност со барањата на американскиот претседател Доналд Трамп европските нации да преземат поголема одговорност за сопствената безбедност.

Неговата администрација сака НАТО, долго доминиран од САД, да стане „НАТО предводен од Европа“.

Како дел од реконструкцијата на командата, европските офицери ќе ја преземат Здружената команда на сојузничките сили на НАТО во Неапол и Здружената команда на силите во Норфолк, кои моментно ги предводат американски адмирали, изјави изворот под услов да остане анонимен.

САД ќе преземат три хиерархиски пониски команди.

Прашан за планираните промени, функционер на НАТО рече:

– Сојузниците се согласија за нова распределба на одговорностите на високите офицери во командната структура на НАТО во која европските сојузници, вклучувајќи ги и најновите членки на НАТО, ќе играат позначајна улога во военото раководство на Алијансата.

Американскиот амбасадор во НАТО, Метју Витакер, претходно ги отфрли критиките кон САД, тврдејќи дека САД „не се обидуваат да го расклопат НАТО“, објавија француските медиуми.

– Се обидуваме да го зајакнеме НАТО, а не да се повлечеме од него или да го отфрлиме, туку да го направиме функционален како што беше замислен, односно како сојуз од 32 силни и способни сојузници – додаде тој.

The post САД СЕ ПОВЛЕКУВААТ ОД ДВЕ ВАЖНИ ЕВРОПСКИ КОМАНДИ ВО НАТО Трамп сака Алијансата да е предводена од Европа appeared first on plusinfo.mk.