Претседателот на САД најави нов американски напад врз Иран. На Самитот на НАТО во Анкара  Доналд Трамп изјави дека примирјето повеќе не важи и дека Вашингтон е подготвен повторно да дејствува. Од Техеран брзо возвратија со предупредување дека Ормускиот Теснец би можел целосно да биде затворен доколку следуваат нови напади.

„Веројатно ќе удриме и вечерва“

Трамп изјави дека САД веќе извеле силни напади врз ирански цели и дека не ја исклучува можноста за нова воена акција.

– Го удривме Иран многу, многу силно ноќеска и веројатно ќе го удриме силно и вечерва. Им дадов мало предупредување – рече американскиот претседател.

Тој повтори дека на Иран не смее да му се дозволи да поседува нуклеарно оружје.

Американскиот министер за одбрана Пит Хегсет најави дека евентуалните идни операции би можеле да бидат насочени подлабоко во иранска територија.

Техеран се закани со блокада

Ирански безбедносен извор за државната телевизија „Прес ТВ“ изјави дека секој нов американски напад ќе биде проследен со затворање на Ормускиот Теснец.

– Новата иранска стратегија е дека по секој напад, Ормускиот Теснец ќе биде целосно затворен – навел изворот.

Низ овој поморски премин минува значителен дел од светската трговија со нафта и течен природен гас, поради што секоја закана за негово затворање предизвикува загриженост на глобалните пазари.

Закани и кон американските сојузници

Истиот извор порача дека Иран ќе возврати уште посилно на секој следен напад и предупреди дека нема да прави разлика меѓу САД и нивните регионални партнери.

Во меѓувреме, Револуционерната гарда соопшти дека погодила десетици американски воени цели во Бахреин и во Кувајт како одговор на најновите американски операции.

Трамп ги прекина разговорите

Американскиот претседател порача дека повеќе не гледа смисла во преговорите со Техеран.

– Не сакам повеќе да се договарам со нив. Што се однесува до мене, сè е завршено – изјави Трамп.

Тој повторно спомена можност за дополнителен притисок врз Иран, вклучително и враќање на мерки што би можеле да го погодат поморскиот сообраќај и извозот на земјата.

The post ТРАМП СЕ ЗАКАНИ СО НОВ НОЌЕН УДАР ВРЗ ИРАН Доби брз одговор, Ормуз ќе биде затворен? appeared first on plusinfo.mk.

„Понекогаш се чудам како може исти државници, исти претседатели, исти премиери, на еден начин да се однесуваат во рамките на НАТО, да манифестираат разбирање, а кога се работи за Европската Унија, 20 години да нè држат во лавиринтот. Време е тоа да се надмине.

Вака порача денеска претседателката Гордана Силјановска Давкова, по учеството на состанокот на Северноатлантскиот совет на ниво на шефови на држави и влади, во рамки на Самитот на НАТО што се одржува во претседателскиот комплекс „Бештепе“ во Анкара.

Сиљановска Давкова изјави дека синоќа имала кратка средба со премиерот на Бугарија Румен Радев, кој ѝ рекол дека не сме само соседи, туку дека му е пријателка, што, рече, е инспиративно и охрабрувачко. Имала подолг разговор со унгарскиот премиер Петер Маѓар кој кажал дека уште позасилено ќе застане зад Западен Балкан, дека целосно нè поддржува и оти е неминовно, за да има стабилност и мир на Балканот, земјите од Западен Балкан да станат членки на Европската Унија.

Според претседателката Сиљановска Давкова, нема подобро решение за силна Европа и силно НАТО од состојба на мир, бидејќи силата на Европа е во способноста со мирни средства да посегне по реформи или да промовира демократија заснована на основните принципи и вредности.

На самитот на НАТО, рече претседателката, беше порачано дека ние сме докажан, кредибилен партнер на НАТО, дека се однесуваме одговорно и во поглед на средствата и во поглед на однесувањето, како и дека може да сметаат на нас,

Втората порака од Самитот, дополни таа, се однесува на НАТО.

–  Навистина требаше да се потенцира дека господинот Трамп на некој начин, откако на НАТО му стави до знаење дека одбраната заради која е создаден не се однесува само на Соединетите Американски Држави, туку и на земјите од Европа, и дека треба да си го земат својот товар од одбраната. Денеска се покажа дека навистина речиси сите држави, ако не и сите држави, веќе тргнале на таа патека во, се разбира, себегарантирањето, односно во гарантирањето способност да ја организираат сопствената одбрана. Тоа е исто, според мене, многу важно – рече Сиљановска Давкова.

На овој самит, потенцира претседателката, се чувствуваше единство. Од господинот Трамп, па до сите останати, манифестираа решеност, спремност, навистина, заедно да ги остварат задачите што ги поставивме уште во Хаг.

Претседателката ја цитираше мислата од Кемал Ататурк – „Ако има дома мир, ќе има и надвор мир“ и порача дека нема подобро решение за силна Европа и силно НАТО од состојба на мир бидејќи, нагласи, силата на Европа е во способноста со мирни средства да посегне по реформи или да промовира демократија заснована на основните принципи и вредности.

– Тоа ја прави посебна, се разбира, ако истите членки седат  таму и таму, или во најголем дел, тогаш логично е дека не треба да се откажеме од мирот. Тука е посебната вредност на господинот Трамп, бидејќи тој, покрај издвојувањето на средства, постојано вели дека треба да се најде мирна солуција за сите проблеми – рече Сиљановска Давкова.

На новинарско прашање за поддршката и однесувањето на лидерите во рамки на НАТО и во однос на евроинтеграциите на државава Сиљановска Давкова посочи  на средбите со Радев и со Маѓар, истакнувајќи ја поддршката од него.

– Со господинот Радев имав куса средба синоќа, се разбира, во присуство на господинот Кошта. Тој рече дека не сме само соседи, туку дека сум му јас пријателка, се разбира дека тоа е инспиративно и охрабрувачко. Но, немав овојпат некој подолг разговор, но со господинот Маѓар имав. Ме интересираше како гледа тој на политиката под негова палка, дали ќе посегне по промени. Ова што го изјави е дека уште позасилено ќе застане зад Западниот Балкан, дека целосно нè поддржува и дека неминовно е, за да има стабилност и мир на Балканот, земјите од Западен Балкан да станат членки на Европската Унија, дури рече дека има намера да тргне во турнеја по земјите од Западен Балкан, што е навистина одговорно и посветено – изјави Сиљановска Давкова, која на Самитот ја предводеше македонската делегација во чиј состав се министрите за одбрана и за надворешни работи и надворешна трговија, Владо Мисајловски и Тимчо Муцунски, како и генерал-мајор Сашко Лафчиски.

The post СИЉАНОВСКА ДАВКОВА ИМАЛА „ОХРАБРУВАЧКА СРЕДБА“ СО РУМЕН РАДЕВ Поддршка за Западен Балкан ветил и Петер Маѓар appeared first on plusinfo.mk.

„Тешко е да одам во Москва, таму има многу украински дронови“.

Вака му одговори Володимир Зеленски на Доналд Трамп за време на нивната заедничка средба на Самитот на НАТО во Анкара, предизвикувајќи смеа кај присутните. Необичната размена дојде додека американскиот претседател зборуваше за можните мировни преговори меѓу Киев и Москва.

Трамп ја одбил Москва

Американскиот претседател откри дека рускиот лидер Владимир Путин предложил евентуалните мировни разговори да се одржат во Москва.

– Едно од нештата за кои разговаравме беше каде би сакал да се сретнеме. Тој рече дека Москва би била идеална – изјави Трамп.

Сепак, додаде дека веднаш го отфрлил предлогот.

– Едноставно нема да функционира – рече американскиот претседател.

Потоа се сврте кон Зеленски и го праша дали би сакал да отпатува во Москва.

– Тешко е, таму има многу украински дронови – возврати украинскиот претседател.

Trump: Would you go to Moscow?

Zelensky: It’s difficult. There are a lot of Ukrainian drones there. pic.twitter.com/onbXJu1CCU

— Clash Report (@clashreport) July 8, 2026

„И двајцата сакаат крај на војната“

Трамп изрази уверување дека Путин и Зеленски на крајот ќе седнат на иста маса.

– Зеленски ќе биде на состанокот и нешто ќе се случи. Ќе биде нешто позитивно – рече тој.

Американскиот претседател оцени дека мировното решение се подготвува подолго време и дека двете страни имаат интерес конфликтот да заврши.

– И двајцата сакаат крај на војната – рече Трамп, мислејќи на Путин и на Зеленски.

Тој додаде дека во последните недели бил направен значителен напредок кон можен мировен договор.

Од Овалната соба до добри односи

Трамп повторно нагласи дека односите со Зеленски денес се многу подобри отколку во минатото.

– Тешко е да се поверува, зарем не? Од Овалната соба па до сега, развивме многу добар однос – рече тој.

На тоа Зеленски возврати:

– Тука не е крајот.

– Ова е само почеток – одговори Трамп.

Патриот и обнова на Украина

Американскиот претседател најави дека Европа и Украина би можеле да добијат лиценци за производство на американските системи „Патриот“.

Тој посочи и дека Украина располага со значајни резерви на ретки минерали и дека по завршувањето на војната ќе следува период на обнова во кој САД ќе имаат важна улога.

The post 📽️ ТЕШКО ДА ОДАМ ВО МОСКВА, СЕ ПОШЕГУВА ЗЕЛЕНСКИ СО ТРАМП Шефот на САД тврди дека мирот е поблиску одошто се мисли appeared first on plusinfo.mk.