Поранешниот пратеник на ДУИ, д-р Арбен Зибери, внук на првиот албански кандидат за премиер Насер Зибери, решил да го продолжи својот политички ангажман заедно со Изет Меџити, објави порталот Газета.

Семејството Зибери е познато како семејство со интелектуална традиција и со значаен влијание, особено во Скопје. Овој развој се гледа како доказ дека по победата на локалните избори, Вреди ( исто така се консолидира и во регионот на Скопје, со проширување на својата политичка база. Д-р Арбен Зибери е познат како еден од најактивните пратеници во Собранието, но и како успешен професионалец во медицинската област.

Зибери не е единствен, бидејќи и други кадри од ДУИ неодамна одлучиле да се повлечат од таа политички формација, тврди Газета.

The post АРБЕН ЗИБЕРИ СО ИЗЕТ МЕЏИТИ Внукот на Насер Зибери од ДУИ во Вреди appeared first on plusinfo.mk.

Собраниската Комисија за прашања на избори и именувањата денеска ја утврди одлуката Фатон Сељами да биде избран за нов Народен правобранител, на местото на Насер Зибер кој замина во пензија. Комисијата предлог-одлуката ќе ја проследи до Собранието.

17 кандидати за народен правобранител

Претседателот на Комисијата, Ѓорѓија Сајкоски информира дека на огласот за избор на Народен правобранител биле пријавени 17 кандидати.

Пријавени биле: Илбер Руфати од Кичево, дипломиран правник и магистер по правни науки, Мухамед Ходаи од Тетово, дипломиран правник со положен правосуден испит, Аљбан Кардиу од Тетово, дипломиран правник, магистер со положен правосуден испит, Миле Арсениевски од Скопје, дипломиран правник со положен правосуден испит, Светислав Јовановски од Куманово, дипломиран правник, Фатон Сељами од Тетово, дипломиран правник, магистер по правни науки со положен правосуден и нотарски испит, Шемши Салаи, од Добри дол, Општина Врапчиште, дипломиран правник и магистер по правни науки, Фехми Стафа од Скопје, дипломиран правник со положен правосуден испит и нотарски испит, Доан Сулејмановски од Прилеп, дипломиран правник и магистер по казнено право со положен правосуден испит, Николче Петковски од Скопје, дипломиран правник специјалист по правнинауки со положен правосуден испит, Феузи Џафери од Гостивар, дипломиран правник и магистер по дипломатија, адвокат, Дритон Небиу од Скопје, дипломиран правник и магистер по човекови права и демократија, Шпенд Фидани од Добри Дол, Општина Врапчиште, дипломиран правник и магистер по казнено право со положен правосуден и нотарски испит, Фатмир Емрулау од Стрелци, Кичево, дипломиран правник со положен правосуден испит и работи како адвокат во сопствена адвокатска канцеларија, Илир Рамадани од Кичево, дипломиран правник и магистер по правни науки, Емран Исмаил, дипломиран правник и магистер по меѓународно право со положен правосуден испит и Фадил Џелили, дипломиран правник и магистер по правни науки со положен правосуден испит, работи како адвокат во сопствена адвокатска канцеларија.

Сељами завршил Правен факултет во Универзитетот во Тетово 

Беким Ќоку, пратеник од Коалицијата Вреди го предложи Фатон Сељами за кандидат за Народен правобранител. Ќоку истакна дека Сељами е од Тетово, оженет и татко на три деца.

Тој посочи дека Сељами има завршено Правен факултет во Универзитетот во Тетово и постдипломски студии во Универзитетот на Југоисточна Европа. Имал долго работно искуство во областа на одбрана и промовирање на човековите права. Работел во Агенцијата за информации, до 2008 работел во Комисијата за заштита на правата за слободен пристап на информации од јавен карактер. Од октомври 2008 година бил вработен во канцеларијата на Народниот правобранител во Скопје.

Во 2018 бил именуван за генерален секретар во Министерството за правда и од 2020 бил вработен во регионалната единица на Министерството за правда во Тетово. Од 2023 година работел како раководител на одделение за политички систем во Министерството за правда. Ќоку нагласи дека Сељами ги исполнува сите услови и критериуми кои се поврзани со оваа функција и побара поддршка да се изгласа неговиот предлог.

Зибери исполни услови за старосна пензија

Сајкоски нагласи дека Собранието не било известено дека Народниот правобранител исполнува услови за старосна пензија и затоа веднаш по добивањето на информацијата дека му истекува мандатот врз основа на пензионирање ги вложиле сите напори за да се отпочне постапка за избор на Народниот правобранител.

Досегашниот Народен правобранител Насер Зибери на 12 јули 2025 година исполни услови за старосна пензија. Собранието на седницата одржана на 10 јули 2025 година донесе одлука за распишување оглас за избор на Народен правобранител, кој траел 10 дена.

Согласно член 5 од Законот за Народен правобранител, тој се избира за време од осум години со право на уште еден избор. Согласно член 9 став 1 од Законот за Народниот правобранител, функцијата Народен правобранител престанува кога тоа сам го бара, е избран или именуван на друга јавна функција или ги исполнува условите за старосна пензија.

Согласно член 6 став 1 од Законот за Народен правобранител може да биде избрано лице за народен правобранител кое ги исполнува општите услови определени со закон за основање на работен однос – да е државјанин на Република Македонија, да е дипломиран правник кој има работно искуство над 9 години на правни работи и лице чија активност е докажана во областа на заштита на правата на граѓанинот и ужива углед за вршење на функцијата Народен правобранител.

The post ФАТОН СЕЉАМИ ПРЕДЛОЖЕН ЗА НАРОДЕН ПРАВОБРАНИТЕЛ Доаѓа од местото раководител во Министерство за правда appeared first on plusinfo.mk.

Претседателот на Собранието, Африм Гаши на почетокот на денешната седница соопшти дека на 12 јули 2025 година му престанала функцијата Народен правобранител на Насер Зибери поради исполнување на условите за старосна пензија.

– Ве известувам дека народниот правобранител Насер Заибери на 12.07.2025 година исполни услови за старосна пензија. Констатирам дека врз основа на член 9 став 1 од точка 3 од Законот за народниот правобранител на народниот правобранител Насер Зибери му престанува функцијата Народен правобранител на 12 јули 2025 година поради исполнување на условите за старосна пензија – рече Гаши.

The post КОЈ ЌЕ БИДЕ НОВ НАРОДЕН ПРАВОБРАНИТЕЛ? Насер Зибери замина во пензија appeared first on plusinfo.mk.

Институцијата Народен правобранител во нашата земја се соочува со сериозни проблеми во функционирањето, иако има фундаментална улога во насока на промоција, афирмација и заштита на човековите права и слободи, истакна денеска народниот правобранител, Насер Зибери, на конференцијата „Поврзување на политиката и праксата Зајакнување на парламентарниот надзор во промоција и заштита на човековите права“ која се одржа во Собранието во организација на Институтот за европска политика – Скопје.

– Недостигот на целосна финансиска, организациска и функционална независност, отсуство на средства за реализација на проекти и промоција и заштита на правата на граѓаните, кои се надлежност на oмбудсманот, а и недостигот на кадровскиот потенцијал, претставуваат сериозен проблем кој влијае директно врз квалитетот и ефикасноста на нашата работа. Институцијата Народен правобранител има фундаментална улога во насока на промоција, афирмација и заштита на човековите права и слободи. Од друга страна, пак, оваа улога нѐ товари со поголема одговорност со цел на сите граѓани, врз сите основи согласно Уставот и законите, да им се помогне во реализацијата на нивните права. Верувам дека како институција сме на добар пат во постигнувањето на оваа цел, нешто што го докажуваат многу извештаи, но и последниот извештај на Транспаренси Македонија која минатата година ја рангираше институцијата Народен правобранител на трето место според проценката за интегритет, иако лично мислам дека има простор за повеќе работа и ефикасност. Државата како регулатор е тука. Пред сѐ Собранието, како претставнички и законодавен орган, преку системот да обезбеди и пристап до правата за секоја личност – рече омбудсманот, потенцирајќи дека релацијата Собрание-Народен правобранител треба да се зајакне уште повеќе.

Зибери истакна дека одложувањето на донесувањето на измените на Законот за Омбудсманот директно ја одзела можноста на примената и акредитацијата во меѓународно тело во Обединетите Нации за преземање на статус А, кое како што рече, значи целосно независна национална институција за заштитата на правата и слободите на граѓаните.

– Нешто што речиси сите институции од регионот, иако формирани многу подоцна од нас, го постигнале овој статус. Неизборот на заменици на Народен правобранител, кои актуелно се седуммина, директно влијае во организирање на работата на нашата институција. Нивниот неизбор влијае и во падот на квалитетот на актите и одлуките кои ги разгледува Омбудсманот. Ја користам можноста да се обратам до претседателот на Собранието и пратениците да се заложат да се финализираат измените на Законот за Народниот правобранител – рече Зибери.

Собранието мора да биде првиот дом на граѓаните и чувар на нивните права

Претседателот на Собранието, Африм Гаши, уверува дека Собранието останува посветено на зголемување на капацитетите, градење одржливи партнерства и на делување како мост меѓу граѓаните и Владата, со што, како што рече, се обезбедува транспарентност и отчетност. Убеден е дека само со инклузивен пристап, стратегии и со вистински реформи, може да се гарантира подостоинствен живот за секој граѓанин каде што сите ќе ги почитуваат правата на секој граѓанин.

– Собранието е првиот дом на секој граѓанин. Дома луѓето сакаат да се чувствуваат заштитени, а наша одговорност е да ги заштитиме нивните права и глас. Од суштинско значење е да се погрижиме нивниот глас да биде слушнат и секоја политика, секој закон и секоја одлука да биде во согласност со нивните права. Нашата стратешка ориентација кон Европската унија, како и нашите предизвици во овој критичен момент од процесот на интеграција, се јасна покана и можност за размислување, дејствување и за напредок во зајакнувањето на надзорната улога на законодавниот дом во гарантирањето на човековите права. И не само заради интегративниот процес, туку пред сѐ за да се вратат достоинството на Собранието и довербата на граѓаните во оваа институција. И за да бидеме успешни на овој пат, потребно е повеќе од политичка волја. Потребни се посилни, попрофесионални, поефикасни институции, соработка со граѓанското општество, активно вклучување на меѓународните тела за човекови права и колективна искреност и свест – рече Гаши.

Вклучувањето на ромската заедница е на подобро ниво

Заменик шефот во Делегацијата на Европската Унија во Северна Македонија, Бен Нупнау, нагласи дека човековите права не се случајно во кластерот кој прв ќе биде отворен и кој последен ќе биде затворен.

– Човековите права со граѓанска, политичка, економска демократија обезбедуваат човековото достоинство да биде на прво место. Легислативата треба да се почитува на подемократски начин. Во последните години вклучувањето на ромската заедница и слични е на подобро ниво, но останува уште да се направи. А последната година и во периодичниот извештај земјата имаше 205 препораки, а 193 беа поддржани со тоа во следните 4 години се обврзаа да ги почитуваат и да ги исполнат. За човековите права, условите во затворите, за канцеларијата на Народниот правобранител, 2 години по прегледот треба да се постигнат првите резултати. Ќе се мониторира процесот и ќе се известува и ќе се следи со цел да се види дали има подобрување во состојбата. Отчетноста, инклузивниот дијалог се клучни за прогрес и европската делегација е тука за да се подобри и да се даде поддршка во помагањето во овој процес – рече тој.

Нупнау потенцира дека невладините организации треба постојано да бидат чувари во однос на следењето на однесувањето и работењето на институциите.

– Кога нема средства, капацитет и политичка волја да се смени статус квото, сепак е важно да се продолжи со работа. Доколку гледате наназад, ќе видите дека има прогрес, а тоа беше благодарение на вас и на вашата неуморна работа. Европската унија останува поддржувач на човековите права и на земјата да се подобрат механизмите и законодавството на патот кон ЕУ – рече Нупнау.

Парламентарниот надзор е клучен чувар на човековите права и демократската одговорност

Генералната секретарка на Собранието, Марина Димовска, истакна дека ефективниот систем за заштита на човековите права не може да постои без парламентарен надзор кој е активен, информиран и одговорен. Димовска потенцира дека надзорот не значи само следење на Владата, туку, како што рече, значи барање отчет за секој потег кој ги засега граѓаните, инсистирање на транспарентност поттикнување политики што ги почитуваат човековите права.

– Парламентот, како претставнички дом на граѓаните, има суштинска улога во обезбедувањето на транспарентноста, отчетноста и одговорноста на извршната власт. Надзорот, кој го врши Собранието, не е само уставна обврска. Тоа е клучен инструмент за заштита и промоција на човековите права и слободи. Собранието има одговорност не само да ги усогласи законите со меѓународните и со регионалните норми за човекови права, туку и да ратификува меѓународни договори и да ја следи нивната примена преку соработка со останатите институции, а парламентите можат да бидат движечка сила за вистинска промена. Парламентарниот надзор во овој контекст не е само алатка, тоа е и обврска да се следи, поттикнува доследната имплементација на меѓународните стандарди за човековите права – рече Димовска.

The post ИНСТИТУЦИЈАТА НАРОДЕН ПРАВОБРАНИТЕЛ СЕ СООЧУВА СО ПРЕДИЗВИЦИ Зибери посочи дека има напредок, но и простор за подобрување appeared first on plusinfo.mk.

Тој забележува дека условите за живеење во институциите се несоодветни од аспект на хигиената (нехигиена и немање соодветни хигиенски средства за одржување, дезинсекција, дезинфекција и нередовна дератизација), во однос на минималниот индивидуален простор за сместување на осудените лица и притворените лица, како резултат на што повторно има пренатрупаност во овие институции.

– Состојбата е најлоша во три области: недостаток на сместувачки капацитети, најизразена во затворот „Идризово“, каде што се сместени половина од затворениците во државата и во Затворот во Штип, потоа недоволен број на вработени полицајци, образовен е здравствен кадар, како и санитарно-хигиенските услови. Преземени се активности за реконструкција на установите (на пример, реновирано и пуштено е во употреба петтото крило во затворениот дел на Казнено-поправната установа Идризово), но и покрај извршената реконструкција, досегашните активности не се доволни, потребно е одржување, континуирано почитување на минималните стандарди предвидени за установите за сместување на осудени и притворени лица. Здравствената нега е голем проблем. На пример, половина од затворите немаат лекар, додека затворениците можат да направат медицински преглед само два пати неделно. Замислете, во најголемиот затвор „Идризово“ со повеќе од 1.200 затвореници да има само еден општ лекар, две медицински сестри и психијатар ангажиран по потреба. Во кумановскиот затвор сè уште не се нуди метадонска терапија, иако и овде на издржување затворски казни се праќаат и наркозависниците, а да не зборуваме за процесот на ресоцијализација, кој не постои, а слична е ситуацијата и со можноста за завршување на образованието – оцени Зибери.

The post ВО „ИДРИЗОВО“ ИМА САМО ЕДЕН ЛЕКАР ЗА 1.200 ЗАТВОРЕНИЦИ Зибери не е задоволен од состојбата во затворите appeared first on plusinfo.mk.

Народниот правобранител, Насер Зибери на денешната прес-конференција истакна дека анализата покажува дека мал е бројот на институции, установи, единици на локалната самоуправа и субјекти формирани од нивна страна, кои имаат солиден учинок во остварувањето на начелото на соодветна и правична застапеност, за разлика од оние кои не ги задоволуваат законски пропишаните норми и кои отстапуваат на сите полиња.

– Со соодветна и правична застапеност која ја отсликува реалната состојба на бројот на населението по етничка структура може да се пофали Собранието на Република Северна Македонија, неколку министерства, може да се пофалат неколку единици на локална самоуправа без оглед дали е доминантно македонското или албанското население. Но, има многу институции каде отстапуваат од ова правило и јас при објавувањето на минатогодишниот извештај ги цитирав и по име. Промена или подобрување нема и во моментов можам да ги спомнам Македонската академија на науките и уметностите, каде од 91 вработен, 90 се Македонци, само еден е Албанец и ниту еден од друга етничка заедница. Може да ги спомнам и јавните државни претпријатија како што е МЕПСО, како што е ЈП за стопанисување со станбен и деловен простор, кадешто етничката застапеност е крајно непочитувана и е под 10 отсто, односно, само 6 отсто на албанската етничка заедница,а под 1 отсто на турската етничка заедница. Не е подобра состојбата и во Врховниот суд, во кабинетот на претседателот на државата и во самиот Секретаријат на Владата – рече Зибери.

Извештајот покажува дека во 2022 година застапеноста на Македонците во јавниот сектор била со 71,9 отсто, а за 2023 година е 71,6 отсто, што претставува намалување од 0,3 отсто, но бројката е поголема за 13,16 проценти во споредба со резултатите од последниот попис на населението од 2022 година.

Застапеноста на Албанците во 2022 година била 21,4 отсто, а во 2023 година 21,7 отсто, што е пораст од 0,3 отсто, но бројката е помала за 2,6 проценти во споредба со резидентното население согласно пописот.

Мало зголемување има кај турската  и бошњачката заедница, додека ромската, српската и влашката етничка заедница се со ист степен на застапеност во 2022 и 2023 година.

– Како и претходната година, така и за 2024 година, Народниот правобранител упатува јавна критика која се однесува на недоволниот број на застапеност на лица од немнозинските заедници на раководни работни места – албанската (18 отсто), турската (1,6 отсто), а посебно ромската етничка заедница. Од вкупниот број на лица на раководни работни места во јавниот сектор само 0,3 отсто се Роми, назначени на раководна позиција.  Застапеноста на раководни работни позиции кај македонската, влашката и српската заедница процентуално е повисока и во однос на процентот на резидентното население така и во споредба со бројот на вработените од истите заедници во јавниот сектор. Тоа всушност ја потврдува несоодветна примена на начелото на соодветна и правична застапеност кон останатите заедници – потенцираше Народниот правобранител.

По укинувањето на механизмот „балансер“ со кој се спроведуваа вработувањата во јавниот сектор и во очекување на ново законско решение, Зибери упати апел до извршната и законодавната власт за забрзување на постапката и активностите за законско регулирање на оваа прашање. Треба да се обезбеди соодветен инструмент кој ќе го обезбеди и гарантира ова право, притоа запазувајќи ги принципите на стручност и компетентност, нешто што и досегашната регулатива го предвидуваше, но менаџментите на институциите недоволно го применуваа.

– При спроведувањето на вработувањата покрај хоризонталната етничка застапеност, треба да се запази и вертикалната застапеност, односно застапеноста во раководни позиции, како и половата застапеност. Со донесување на соодветни пишани акти ќе се даде друга тежина на начелото на соодветната и правична застапеност, би се намалил просторот за евентуална злоупотреба на оваа мерка, но и ќе биде прилог кон остварување на уставно гарантираното граѓанско право, истото да не остане само декор на нашите уставни определби, туку реална можност за вработување во јавниот сектор на граѓаните од сите заедници на локално и централно ниво. Начелото претставува директен прилог кон создавање поголена кохезија во општеството и најдобра превенција од дискриминација по етничка основа во правото на вработувањето во јавниот сектор – рече Народниот правобранител, Насер Зибери.

The post ВО МАНУ, МЕПСО И ВО ВРХОВНИОТ СУД НЕ СЕ ПОЧИТУВА ПРАВИЧНАТА ЗАСТАПЕНОСТ Народниот правобранител апелира побрзо да се најде замена за балансерот appeared first on plusinfo.mk.

Народниот правобранител Насер Зибери, алармира на лошите услови во кои живеат затворениците во затворот „Идризово“.

– Поради пренатрупаност во затворот Идризово, додека еден спие другиот треба да седи буден и да чека ред бидејќи креветот го делат двајца затвореници – изјави Зибери во Дејли Клик на ТВ21.

Како што вели, состојбата е алармантна, а условите се бедни и нечовечни.

– Има ќелии за затвореници од само 1 метар кубен простор, има ќелии каде еден кревет го делат двајца затвореници, имаме дел од затворениците кои спијат по ходниците, имаме ќелии каде 50 затвореници користат еден тоалет – изјави Зибери.

За хигиена, вели Зибери, не може да стане ни збор „кога еден затвореник спие, а другиот седи буден и откако ќе се разбуди другиот, може да спие тој бидејќи делат ист кревет, или кревет што е ставен во ходникот на бетон, или нема топла вода и греење итн“.

Тој го смета и за загрижувачки фактот што околу 80% од 17 затвори колку што ги има во земјава, нема лекар психијатар, општ лекар и нема процес на ресоцијализација.

Зибери вели дека земјава треба да преземе итно мерки за подобрување на условите во правец на проширување на капацитетите, за здравствена грижа но и за проширување на човечките капацитети и за администрацијата.

The post ДВАЈЦА ЗАТВОРЕНИЦИ ДЕЛАТ ИСТ КРЕВЕТ ВО „ИДРИЗОВО“- КОГА ЕДНИОТ СПИЕ, ДРУГИОТ СЕДИ БУДЕН Зибери се шокирал од бедните услови во затворите appeared first on plusinfo.mk.

Народниот правобранител Насер Зибери во интервју за „Радио Слободна Европа“ најавува дека ќе побараат одговор од МВР зошто се доцни со издавањето на документите. Тврди дека има недостиг на обрасци за двојазичните патни исправи, а мисли дека има недостиг и на обрасци за другите документи.

– Овие претставки почнаа да пристигнуваат по нова година и ние ќе се обратиме до МВР зошто се доцни со издавање на веќе изготвените, претпоставувам дека се изготвени тие патни исправи и ќе реагираме. Во одредени неофицијални разговори добив информација дека има недостаток на обрасци. Со сигурност тврдам дека има недостаток на обрасци за двојазични патни исправи, но мислам дека има недостаток и на обрасци за други документи – вели Зибери.

Прашан дали планира да се кандидира повторно за претседател, Зибери вели дека не планира и дека се откажал и од можноста да биде премиер во последните три месеци.

– Не, дефинитивно, не. Јас се откажав и од можноста да бидам премиер во последните три месеци, така што во однос на мојот политички ангажман ставив точка – вели Зибери, додавајќи дека му било понудено да биде технички премиер.

The post ВО МВР НЕДОСТИГААТ ОБРАСЦИ ЗА ПАСОШИ Омбудсманот ќе бара одговори зошто доцни издавањето документи appeared first on plusinfo.mk.

Добар е предлогот на претседателот Стево Пендаровски за пролонгирање на рокот за вадење лични документи, ама сепак ќе мора да ги прашаме Грците затоа што обврската произлегува од потпишаниот меѓународен Преспански договор во 2018 година.

Ваков беше одговорот на премиерот Димитар Ковачевски, кој вети дека за ова прашање дефинитивно ќе се разговара на седница на Влада, а во меѓувреме го упати Пендаровски да ѝ се јави на грчката претседателка Катерина Сакеларопулу и да побара разбирање за пролонгирање на роковите.

– Ќе се консултирам со министрите за предлогот на претседателот Стево Пендаровски да се одложи рокот за менување на личните документи, а и јас лично сметам дека тоа е добар предлог. За продолжување на рокот за менување на личните документи ќе разговараме на седница на Влада. Претседателот најдобро знае и има повеќе детали за тоа како може да се изведе процедурата со оглед на фактот дека вадењето нови лични документи е обврска којашто произлегува од потпишувањето на меѓународен договор. Токму тој меѓународен договор ни овозможи да станеме членка на НАТО и таа обврска е наведена во закон, така што не може да кажете дека Владата нешто направила, бидејќи станува збор за законски решенија за уставни измени коишто се правени во Собранието. Но, тоа што Владата во моментов може да го направи е да го олесни тој процес. Ќе направиме сѐ за да се направат потребните законски измени и да се прифати предлогот на претседателот Пендаровски – рече Ковачевски, потсетувајќи ја јавноста дека вадењето нови лични документи е дел од меѓународен договор со Грција, а тоа значи дека и Грција треба да даде „амин“ за пролонгирање на рокот.

Пендаровски вчера во интервју на ТВ Сител предложи рокот за вадење нови лични документи да се пролонгира до септември-октомври, наместо да заврши во февруари.

– Ова го предложив на најмалку двајца министри во македонската влада – со брза интервенција во два закони – закон за лична карта и закон за патни исправи, и ако е потребно и законот за безбедност во патниот сообраќај, тоа се прави во едно попладне, знаеме дека може да се направи во едно попладне, не мора со европско знаменце да биде. Ќе ги измениме тие два закона, ќе го пролонгираме рокот, наместо февруари да биде септември или октомври, претходно ќе ги известиме и Грците дека немаме намера да бегаме од обврските од Преспанскиот договор – рече Пендаровски.

ПЕНДАРОВСКИ ПРЕДЛАГА ДА СЕ ПРОДОЛЖИ РОКОТ ЗА ЛИЧНИ ДОКУМЕНТИ ДО ЕСЕН Претседателот вели дека тоа се прави за едно попладне, Владата го игнорира

Пролонгирање на рокот денеска предложи и Демократскиот сојуз.

„Замената на лични документи е согласно Договорот потпишан во Преспа, помеѓу Македонија и Грција, но повеќе од јасно е дека нема технички можности, како и доволен кадровски потенцијал, за да се изврши оваа операција до почетокот на февруари“, соопшти Демократски сојуз.

Во соопштението е наведено дека овој состав на Владата или идната техничка влада треба да ги подготви законските измени, по што Парламентот по итна постапка да ги донесе.

„Евентуалните отворени прашања со Грција треба дa се разрешат по дипломатски пат. Пред шалтерите на МВР се создаваат огромни и неподносливи гужви, каде граѓаните чекаат во колони и по два дена за замена на документите“, информираше партијата на Павле Трајанов.

Кај итно, па и скапо

Освен промената на важечките документи, граѓаните сега за нив плаќаат и повисока цена, откако Владата во март минатата година донесе таква одлука.

Пасошите сега чинат 500 денари повеќе за возрасните граѓани над 27 години, кои плаќаат 2.300 денари за патна исправа. Оваа цена е за целата постапка, вклучително со пресметаните трошоци за таксени марки. Поскапо за 1.600 денари чини пасош по итна постапка, односно вкупно 6.100 денари.

Промената на сите документи за едно четиричлено семејство со двајца возрасни и две малолетни деца чини околу 180 евра. Освен пасош, со новите цени, треба да дадат по 310 денари за лична карта, 520 денари за една возачка дозвола, 250 за сообраќајна дозвола и 1.250 денари за промена на таблички за еден автомобил.

Цените на пасошите за деца останаа исти – 1.600 денари, а за деца од 4 до 18 години – 1.700 денари. Возачка дозвола по итна постапка изнесува 1.230 денари, што е зголемување за 390 денари.

Ова го повлекува и прашањето зошто граѓаните треба да го платат овој голем издаток од свој џеб, а и народниот правобранител Насер Зибери неодамна беше категоричен во тоа дека овој трошок не смее да биде покриен со пари од семејните буџети.

– Државата наметнува обврска, а во тој случај логично е граѓаните да не бидат изложени на трошоци, бидејќи таа обврска се наметнува не по нивна вина и не поради истек на исправата – реагираше Зибери.

И тој е скептик дека процедурата со промена на личните документи ќе биде завршена во предвидениот рок.

– Не е возможно во определениот законски рок сите граѓани да ги сменат личните исправи, за што се создадоа големи редици во просториите на МВР и беа отворени дополнителни пункотви. За жал и денес добиваме информации дека тој процес тешко се одвива и дека Министерството тешко ќе стигне навреме да ги задоволи сите барања за смена на овие исправи – рече Зибери.

Сакаме во ЕУ, а не сме ни за во Африка

Поранешниот амбасадор на Македонија во Будимпешта и во Атина, Дарко Ангелов, се огласи со критики до МВР и до министерот за внатрешни работи Оливер Спасовски.

Тој сега е вработен во ОБСЕ, а во Македонија не може да си извади пасош.

Лично бил сведок на огромните гужви на пунктот каде што граѓаните ги подигнуваат новите документи и вели дека ова се случува во главниот град на „земја која претендира дека е Европа, а не е достојна ни за Африка“!

– Празнична голгота, кога дното нема дно! Од медиуми знаев дека е тотален хаос, но човек треба да искуси за да види колкав е колапсот на тоа што претендира сѐ уште да е држава. Јас и најблиските, поради мојата професија живееме во странство, а и често патуваме. Затоа и неизбежно беше престојот дома да го искористиме за замена на пасошите, како што ни наложија властите без наша согласност. И што нѐ пречека: пункт на МВР во МТВ, оддел за подигање на документи: огромна гужва, 2/3 пензионери, стојат со часови, залепени еден до друг, сите молчат бидејќи некој од МВР им се заканил дека ако вреват, сите ќе ги избркал… надвор се стемнува, во просторијата мрак, влага, ѓубре, нема вентилација, нема столчиња, а малкуте искршени. Конечно после 4 часа чекање, вратата се отвора, стампедо од очајни луѓе влетуваат. Внатре нѐ пречекуваат полураспаднати шалтери и еден исклучително нељубезен и агресивен униформиран припадник на МВР кој постојано викаше и се закануваше на мачениците кои чекаат дека ако зборнат и малку ќе ги избркал – раскажува Ангелов.

Се редат луѓе, додава тој, а на половина од нив им кажуваат дека џабе чекале со часови бидејќи документите не им се готови, понекогаш и по недели и месеци откако поднеле апликација за промена.

– Од друга страна на шалтерот, хаос, по земја расфрлени документи, нема ни доволно полици. Вработените нервозни и агресивни. Влетуваат други вработени, на нешто што личи како носилка носат нови пасоши, сѐ се расфрла наоколу, а од страна се носат преку ред „познати фаци“ и функционери кои веднаш завршуваат работа. За нас останатите нема минимум систем, никаков концепт, хаос кој зборови не можат да го доловат. Мојата состојба, ко илустрација за маките на сите останати: мојот пасош бил одобрен, но не е отпечатен, тој на сопругата не знаат каде е, а на синот е отпечатен, но не е донесен. Сите тројца поднесовме апликации во ист ден, ист час. Апсурдистан без срам! Беше жално и траорно да се гледа оваа голгота, луѓе очигледно болни и изнемоштени кои по неколку дена чекаат со часови, само за таму некој службеник да им вика и да ги понижува. Сѐ ова, среде главниот град на земја која претендира дека е Европа, а не е достојна ни за Африка! На овој голем ден, останува да кажам, Господ да ни е напомош, иако и тој мислам веќе не може да ни помогне! Арам да ви е! – раскажа Ангелов.

The post ТИЕ ШТО НЕ БИДНАЛЕ „СЕВЕРНИ“ ДО ФЕВРУАРИ, ЌЕ БИДНАТ ДО ОКТОМВРИ? Само Грците можат да нѐ спасат од самопонижување appeared first on plusinfo.mk.

– Во годината во која одбележуваме 75 години од усвојувањето на Универзалната декларација за човековите права, документ кој беше неминовен после најголемата траума која ја доживеа светот – Втората светска војна, сакам да упатам еден апел, една порака до сите чинители во општеството. Одредбите од оваа Декларација не се само отпечатени зборови. Тоа се правците за движење на општествата. Сторете максимални напори секој напишан збор да биде применет во секојдневниот живот – вели Зибери.

Државата, додава, постои заради граѓаните, а не обратно.

– Затоа во секоја прилика, секој граѓанин без разлика на која националност припаѓа, која му е бојата на кожата, на кој јазик зборува, а кој ќе ви се обрати, ислушајте го, посветете му се и овозможете му да си го оствари со Устав и закон загарантираното право. Станува збор за човечки животи, судбини, а никој нема право со истите да си поигрува. Ние бранителите на човековите слободи и права многу добро го знаеме ова, затоа што секојдневно низ нашата работа го гледаме – посочува Зибери.

Денес, нагласува, со жалење констатирам дека и по 75 години, светот и понатаму се соочува со конфликти поради кои милиони луѓе се принудени да ги напуштат своите домови, да живеат во нехумани услови.

– Посебно страдаат децата кои се на почетокот на својот живот и кои за жал заради нечии интереси не се во можност да го искусат сето она што се нарекува нормално детство – одење на училиште, семејни ручеци, вечери, дружење и слично. Затоа, светот мора да се обедини и под итно мора да ги реши овие конфликти – истакнува Зибери во пораката и посочува дека секој има право да живее нормален живот.

The post СЕКОЈ ИМА ПРАВО ДА ЖИВЕЕ НОРМАЛЕН ЖИВОТ Зибери по повод 10 Декември – Меѓународниот ден на човековите права appeared first on plusinfo.mk.