До Агенцијата за заштита на лични податоци, во февруари годинава, од страна на анонимен пациент, е поднесена претставка за сомнителен видео-надзор на ЈЗУ Клиника за хематологија – Скопје. Подносителот навел дека сака да ги заштити своите лични податоци за да избегне ризик од потенцијален реваншизам.

Во Образложението подносителот навел дека додека бил хоспитализиран на Клиниката за хематологија забележал камери за видео-надзор за што не добил соодветно образложение, ниту бил известен дека тоа се врши. Тој навел дека се прекршени неговите уставно загарантирани права за приватност.

Од вработени на Клиниката, пациентот дознал дека мониторингот се вршел со околу 30 камери, во реално време, од канцеларијата на директорката Соња Генадиева-Ставриќ, каде наводно била поставена соодветна техничка опрема, како и дека видео-надзорот е наменет за мониторирање на вработените, за да се утврди дали се почитуваат куќниот ред и дали се исполнуваат професионалните обврски.

Подносителот на претставката тврди дека мониторингот во реално време го врши тим составен од директорката, нејзината ново промовирана техничка секретарка и главната сестра, преку екран со димензии 1×1 метар, поставен во канцеларијата на директорката  и на апликација на мобилниот телефон на директорката.

Пациентот реагирал дека при тоа не се води сметка дека камерите покрај вработените ги регистрираат и пациентите кои добиваат здравствени услуги на дневна основа. Во просториите каде се врши видео-надзор не било истакнато соодветно известување, кое треба да биде јасно, поставено на видливо место и на начин што им овозможува на сите засегнати да се запознати со вршењето на видео-надзорот.

Пациентот навел дека се чувствува загрозено, затоа што не бил официјално известен за тоа колку време, каде се чува, кое овластено лице располага и управува со видео-материјалот, каде го архивира, бидејќи согласно позитивните законски прописи видео-надзор се поставува само во услови на заштита на животот или здравјето на луѓето, заштита на сопственоста, заштита на животот или здравјето на вработените поради природата на дејноста која се врши во објектот, или заради обезбедување соодветна контрола при влегувањето или излегувањето од службени или деловни простории за кои постои потреба да бидат предмет на посебен режим.

Дел од медиумите неодамна обелоденија сериозни сомнежи за злоупотреба на видео-надзор и за нарушување на приватноста се отвораат во Агенцијата за храна и ветеринарство (АХВ), каде вработени протестираат дека директорот Оливер Миланов воспоставил систем за постојано следење на нивното движење, во живо, од својата канцеларија.

Останува шрашањето дали вакви видео-надзори во институции се инсталираат во согласност со некоја препорака од „повисоко место“, или агилните директори подлегнуваат на некоја нова мода, која им овозмиожува „во живо“ да вршат целосна контрола што прават нивните вработени.

ДИРЕКТОРОТ НА АХВ ГИ ДЕМНЕ ВРАБОТЕНИТЕ СО КАМЕРИ Кога ќе му дојдат гости, заедно ги гледаат на неговиот огромен монитор

The post НАСМЕВНИ СЕ, СЕ СНИМА И НА КЛИНИКАТА ЗА ХЕМАТОЛОГИЈА Околу 30 камери ги снимаат вработените, но како да се заштитат пациентите? appeared first on plusinfo.mk.

Данска предложи нова верзија на контроверзниот европски предлог, познат како „контрола на разговорите“ на интернет, со кој скенирањето на приватни пораки би било „доброволно“ за давателите на услуги. Но, експертите предупредуваат дека предлогот сè уште ја заобиколува заштитата на Парламентот со судска наредба, а на децата под 16 години би им забранило да користат апликации за пораки и би можело трајно да ја прекине анонимната комуникација во ЕУ, пишува Euronews.

Според новата верзија, скенирањето на приватни пораки и датотеки повеќе нема да биде задолжително за давателите на услуги, туку „доброволно“, што би значело дека самите платформи ќе одлучуваат дали да ги пребаруваат приватните комуникации на корисниците за „чувствителен материјал“.

Но, поранешниот член на Европскиот парламент и долгогодишен активист за приватност Патрик Брејер предупредува дека ова е козметичка промена што сè уште ги заобиколува клучните механизми за заштита и ја отвора вратата за масовен надзор.

– Наместо општ надзор на приватни пораки, Данска сега предлага пребарувањето да биде доброволно. Но, тоа е само одржување на статус кво, а не вистинска заштита на приватноста – вели Брејер.

Брајер предупредува на три главни забелешки во новиот предлог.

Ова се однесува на заобиколување на судска наредба – ставот на Европскиот парламент дека само судовите можат да одобрат пристап до приватни комуникациски канали сè уште се игнорира, што, според Брејер, е фундаментална гаранција за приватноста на граѓаните што Европската комисија и Советот се обидуваат да ја заобиколат.
Понатаму, постои забрана за апликации за лица под 16 години. Според член 6 од предлогот, на децата под 16 години би им било забрането да инсталираат апликации како WhatsApp, Telegram, Snapchat или X, наводно за заштита од онлајн злоупотреба и регрутирање.

Но, Брејер предупредува дека искуството на Обединетото Кралство покажува дека тинејџерите лесно ги заобиколуваат ваквите ограничувања преку VPN мрежи, доведувајќи ја во прашање ефикасноста на мерката.

И последното е крајот на анонимната комуникација. Член 4(3) од данскиот предлог ефикасно би ги забранил анонимните сметки.

Корисниците би морале да го потврдат својот идентитет со лична карта или биометрија, што, според Брејер, „сериозно ја загрозува приватноста на новинарите, активистите и информаторите кои зависат од анонимни канали на комуникација“.

Покрај тоа, Брејер предупредува на добро познатиот европски механизам на „доброволни кодекси на однесување“, на кои компаниите не се формално обврзани, но трпат притисок од институциите ако не се согласат со нив. Во пракса, ова „доброволно“ лесно се претвора во де факто задолжително скенирање на пораките, без никаква правна транспарентност или судски надзор.

– Доброволно во Европа често значи под притисок. Одбивањето да се учествува во вакви кодекси може да доведе до построги мерки од страна на регулаторите, ефикасно принудувајќи ги компаниите да ги следат корисниците – вели Брејер.“.

Предлогот на Данска, заклучува Брејер, не ги отстранува главните ризици од „контролата на разговорот“, туку ги „маскира“. Доколку се усвои, би можел да доведе до забрани за анонимна кореспонденција, ограничувања на пристапот до дигитални комуникации за младите луѓе и слабеење на механизмите за независна судска ревизија.

-Европскиот парламент јасно стави до знаење: пристапот до приватни комуникации мора да биде одобрен од суд, а не од алгоритам. Ако тој стандард падне, ќе падне и довербата на граѓаните во дигиталната Европа – предупредува Брејер.

Во средината на октомври, Европската Унија го одложи гласањето за предлогот за Регулативата за спречување и борба против сексуалната злоупотреба на деца на Интернет, откако Данска, како претседател на Советот на ЕУ, ја повлече точката од дневниот ред на состанокот на министрите за правда и внатрешни работи.

Предлогот беше поддржан од Хрватска, Унгарија, Бугарија, Романија и Литванија, додека Германија остана цврсто против и со тоа го блокираше мнозинството потребно за негово усвојување.

The post ДАНСКА ПРЕДЛАГА „ДОБРОВОЛНА“ КОНТРОЛА НА ЧЕТОТ ВО ЕУ Експерти тврдат дека тоа ја отвора вратата за масовен надзор appeared first on plusinfo.mk.