Американскиот државен секретар Марко Рубио изјави дека последните израелски напади врз сириската престолнина Дамаск се резултат на „недоразбирање“ меѓу израелската и сириската влада, поттикнато од локалните борби меѓу Друзи и Бедуини во јужниот дел на Сирија.

– На патот сме кон вистинска деескалација, а потоа се надеваме дека ќе се вратиме на патот на помагање на Сирија да ја обнови земјата и кон многу постабилна ситуација на Блискиот Исток – изјави Рубио, додавајќи дека САД очекуваат напредок во следните неколку часа.

Според државниот секретар, Вашингтон будно ја следи ситуацијата и верува дека е можно да се врати мирот меѓу засегнатите страни. Тој ја поздрави улогата на религиозниот водач на Друзите, шеикот Јусеф Џарбу, кој претходно потврди дека е постигнат прекин на огнот меѓу Друзите и сириската влада.

Во исто време, американскиот медиум „Аксиос“, повикувајќи се на извори, објави дека администрацијата на претседателот Доналд Трамп е во завршна фаза од преговори за договор за деескалација меѓу Израел и Сирија.

Претходно денеска, Израел нападна неколку цели во Дамаск, вклучувајќи ја и зградата на Министерството за одбрана. Според податоците од сириското Министерство за здравство, во нападот загинале три лица, а 34 биле повредени.

Ситуацијата дополнително се комплицираше по неуспешните три обиди за примирје меѓу Друзите и Бедуините во градот Свеида. Иако биле постигнати договори за прекин на огнот, насилствата постојано се обновувале, со бројни жртви на обете страни.

The post САД ОЧЕКУВА ДЕЕСКАЛАЦИЈА ВО СИРИЈА Израел нападна по конфликтот меѓу Друзи и Бедуини appeared first on plusinfo.mk.