Здружението на новинарите на Македонија (ЗНМ) упати допис до политичката партија Социјалдемократски сојуз на Македонија (СДСМ) по повод нивната јавна објава на социјалните мрежи со наслов „Фрљо – последната линија на одбрана на ВМРО!“, во која на навредлив, омаловажувачки и деградирачки начин се таргетира новинар.

ЗНМ изрази сериозна загриженост дека ваквиот тип на комуникација од страна на политички партии е неприфатлив во демократско општество, ја поткопува довербата во медиумите и создава атмосфера на стигматизација и притисок врз новинарската професија. Особено е проблематично кога овие објави доаѓаат од партии со значајно влијание во јавниот простор, бидејќи можат да поттикнат онлајн напади, говор на омраза и небезбедна средина за новинарите.

Во дописот, потсетуваме дека евентуални забелешки за работата на новинарите треба да се изразуваат преку постојните механизми за саморегулација, како што се Советот за етика во медиумите и Советот на честа при ЗНМ, а не преку јавни дискредитации. Дополнително, до СДСМ беше посочено и на обврската, согласно сопствениот статут, за целосно почитување на човековото достоинство, права и слободи.

ЗНМ апелира до политичките партии своите битки и политички препукувања да си ги водат меѓусебно, а не на грбот на новинарите. Исто така, бараме да се покаже одговорност во јавната комуникација, да се воздржат од навреди и омаловажување и да го почитуваат интегритетот на новинарите и медиумските работници, како предуслов за слободен, плуралистички и демократски јавен простор.

The post ЗНМ ГИ ПОВИКУВА ПАРТИИТЕ ДА НЕ СЕ ПРЕПУКУВААТ ПРЕКУ ГРБОТ НА НОВИНАРИТЕ Со објавата на СДСМ против Героски на навредлив, омаловажувачки и деградирачки начин се таргетира новинар appeared first on plusinfo.mk.

Сопственикот на отворената депонија во Визбегово, на која на 9 јули гореа авто-делови и го загади воздухот во цело Скопје, му го одзел насилно мобилниот телефон на новинарот известувач на Алсат ТВ и го фрлил во огнот, затоа што претходно на истиот бил снимен физичкиот напад од негова страна над известувачот.

Според информациите објавени од телевизијата Алсат, сопственикот на депонијата Александар Николчев, откако бил снимен како физички го напаѓа новинарот Авни Тахири, насилно му го одзел мобилниот телефон и го фрлил во огнот – во обид да го уништи доказниот материјал. Заедно со него, во нападот учествувала и раководителката на компанијата, Маја Каранакова.

Тахири пред истражителите потврдил дека бил нападнат, навредуван и дека му бил одземен телефонот, а снимателот Шенол Хајредини сведочел дека исто така бил физички нападнат од двете лица. Освен тоа, била оштетена и опремата на телевизијата, за која ќе се води судска постапка за утврдување на надомест на штета.

Јавниот обвинител ги сослушал членовите на новинарската екипа во својство на оштетени. Инцидентот се случил на 9 јули околу 10 часот, кога екипата известувала за пожарот кој предизвика сериозно загадување на воздухот во Скопје.

Од Алсат ТВ побараа институциите итно да постапат и да обезбедат безбедност за новинарите кои известуваат од терен, посебно во услови кога се откриваат сериозни еколошки и безбедносни закани.

The post СНИМАЛЕ ПОЖАР, ПА БИЛЕ НАПАДНАТИ Сопственикот на депонијата мобилниот на новинарот го фрлил во огнот appeared first on plusinfo.mk.